Iunite 20: Aso 4
Mataupu Faavae ma Feagaiga 97
Faatomuaga
Na maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 97 i le aso 2 o Aokuso, 1833. I le faaaliga lenei, na tuuina mai ai e le Alii ni faatonuga ma faamalosiauga mo Pale P. Palate, o le sa pulefaamalumalu i se aoga mo le usoga perisitua i Misuri, ma mo le usoga sa auai i lena aoga. Na faamamafa mai foi e le Alii Lona finagalo ina ia fausia e le Au Paia i Misuri se malumalu. Sa Ia folafola mai afai latou te faia o lea, ma afai sa mama o latou loto, o le a faapea ona mafuta ai iina o Ia ma Lona mamalu.
O se aoga mo toeaina
Mataupu Faavae ma Feagaiga 97:1–9
Ua aoao mai e le Alii ia tagata o le aoga a toeaina i Misuri, i mea e ao ona latou faia ina ia taliaina ia e Ia
Afai e te aoao atu i se uo le auala e avea ai ma se tagata aoga lelei, o a ni uiga ma ni amioga o le a e uunaia lau uo e atiina ae?
I le taumalulu o le 1832–33, sa faatonuina ai e le Alii ia taitai o le Ekalesia e faavae le Aoga a Perofeta i Katelani, Ohaio. I lalo o le taitaiga a le Perofeta o Iosefa Samita, sa taitaia ai e Pale P. Palate se aoga tai faapena i Initipene, Misuri. Sa ta’ua lenei aoga o le aoga mo toeaina. Na tusi atu e tagata o le aoga mo toeaina ni tusi ia Iosefa Samita, o le sa i Ohaio. I le tali atu, na ia auina atu i ai se tusi na i ai le faaaliga lea ua tusia nei i le Mataupu Faavae ma Feagaiga 97. Faitau le Mataupu Faavae ma Feagaiga 97:1, ma faailoa mai pe na faapefea ona faamatalaina e le Alii le toatele o le usoga i Misuri.
Faitau le Mataupu Faavae ma Feagaiga 97:2, ma faailoa mai le mea na folafola mai e le Alii i nei alii pe afai latou te faaauau pea ona faamaoni.
Mai le Mataupu Faavae ma Feagaiga 97:1–2, tatou te aoao e faapea, afai tatou te faamaualaloina i tatou lava ma saili ma le filiga ia iloa, o le a tatou maua le poto ma le upumoni. Atonu e te manao e tusi le mataupu faavae lenei i au tusitusiga paia.
-
Tali fesili nei i lau api talaaga mo le suesueina o tusitusiga paia:
-
Aisea e taua ai ia te oe le maua o le poto ma le upumoni?
-
O le a sou manatu, o a ni auala o le a mafai ai e le lotomaualalo ma le filiga ona fesoasoani ia te oe ia maua le poto ma le upumoni?
-
Faitau le Mataupu Faavae ma Feagaiga 97:3–5 e iloa ai pe na faapei lagona o le Alii i le auaunaga a Pale P. Palate, ma o le a le mea sa folafola atu e le Alii ia Uso Palate.
E pei o Pale P. Palate, e mafai ona e iloa e fiafia le Alii ia te oe a o faaauau ona e mulimuli ia te Ia.
-
O ituaiga laau e lua e faatusa i tagata o le Ekalesia, ae o fua e faatusa i galuega po o faatinoga a tagata o le Ekalesia. Ia manatua o le toatele o le Au Paia i Misuri sa lotomaulalalo ma faamaoni. Ae peitai, o isi sa faamaualuluga ma le usiusitai. Faitau le Mataupu Faavae ma Feagaiga 97:6–7, ma mafaufau loloto i savali e te maua i nei fuaiupu.
Faitau le Mataupu Faavae ma Feagaiga 97:8-9, ma mafaufau loloto i savali e te maua i nei fuaiupu.
-
E tusa ai ma le Mataupu Faavae ma Feagaiga 97:8, o a nisi o uiga o se tagata ua taliaina e le Alii? Ina ia tali lenei fesili, tusi ni upu e faauma ai lenei mataupu faavae: Ina ia talia e le Alii e tatau ona tatou .
-
Mafaufau loloto i lou tulaga i luma o le Alii. Mafaufau e uiga i le auala e mafai ona e faaaogaina ai le mataupu faavae o loo i le Mataupu Faavae ma Feagaiga 97:8.
Mataupu Faavae ma Feagaiga 97:10-21
Ua faamamafa mai e le Alii Lona finagalo ina ia fausia e le Au Paia i Siona se malumalu
Faitau le Mataupu Faavae ma Feagaiga 97:10–12, ma vaavaai mo le taulaga na manaomia e le Alii mai i le Au Paia i Siona (Misuri). I nei fuaiupu o le upu sefuluai e faatatau i taulaga faalauaitele, ae e le o le 10 pasene o le tupe maua a se tagata, e pei ona malamalama ai i le tulafono o le sefuluai, lea na faaalia mulimuli mai (tagai i le MF&F 119). E sili atu ma le tasi-vae-sefulu o punaoa a le Au Paia na semanu e manaomia e fausia ai le malumalu, e aofia ai le taulagaina o o latou taimi ma galuega.
Ia manatua na filifilia e le Alii le fanua mo le malumalu i Siona i le lua tausaga a’o le’i ona tuuina mai le faaaliga lenei (tagai i le MF&F 57:1–3). Ia Iuni 1833, na tusi atu ai le Perofeta o Iosefa Samita i taitai o le Ekalesia i Misuri ma faatonu i latou e amata loa lava ona fausia le malumalu (tagai i le History of the Church, 1:363). Ae peitai, ina ua tuuina mai le faaaliga o loo i le Mataupu Faavae ma Feagaiga 97, i le aso 2 o Aokuso, 1833, sa le’i amataina lava e le Au Paia i Misuri le fausiaina [o le Malumalu].
Su’e i le Mataupu Faavae ma Feagaiga 97:12–14, ma faailoa mai mafuaaga na finagalo ai le Alii i le Au Paia i Misuri e fausia se malumalu.
O faapefea ona avea le malumalu ma “se nofoaga o le faafetai” (MF&F 97:13) mo oe? O faapefea ona avea ma “se nofoaga o le aoaoga” (MF&F 97:13)?
A o e suesue i le Mataupu Faavae ma Feagaiga 97:15–20, tagai mo ni folafolaga na tuuina mai e le Alii i le Au Paia pe afai o le a latou fausia se malumalu.
Sa faamalamalama mai e Elder David B. Haight o le Korama a Aposetolo e Toasefululua, e faapea, o le folafolaga o le vaaia o le Atua i le malumalu (tagai i le fuaiupu e 15-16) atonu e aofia ai le sili atu nai lo le vaaia o Ia i o tatou mata faaletino: “E moni lava, o nisi ua vaai tino i le Faaola, peitai a tagai i le lomifefiloi, o le a silafia ai e tele uiga o le upu vaai, e pei o le iloa o Ia, malamalama ia te Ia, iloa o Ia ma lana galuega, silafia o Lona taua, po o le malamalama ia te Ia” (“Malumalu ma Galuega e Fai Ai,” Ensign, Nov. 1990, 61).
E tusa ai ma le Mataupu Faavae ma Feagaiga 97:15–17, e mafai faapefea ona e agavaa e iloa le mamalu ma le i ai o le Alii i totonu o le malumalu? Faailoga upu po o fasifuaitau i nei fuaiupu o loo aoao mai ai le mataupu faavae e faapea, i le malumalu, o le a faaali mai le Atua ia i latou o e e loto mama.
-
-
O le a lou manatu i le uiga o le loto mama?
-
O a ni mea e mafai ona tatou faia e faamama ai o tatou loto, ina ia mafai ona tatou maua faamanuiaga o le malumalu?
-
Na faapefea ona e lagona le faamanuiaina a’o e saunia oe lava e te alu atu i le malumalu?
-
Faitau le Mataupu Faavae ma Feagaiga 97:21, ma faailoa mai pe faapefea ona faauigaina e le Alii le upu Siona. Atonu e te manao e tusi pe faailoga le fasifuaitau o loo aoao mai ai le upumoni lenei i au tusitusiga paia: O Siona o e loto mama.
Mataupu Faavae ma Feagaiga 97:22-28
Ua faamalamalama mai e le Alii mea e tatau ona tatou faia e faasaoina ai mai Lona toasa, ma maua Ana faamanuiaga
Ina ia malamalama i le savali a le Alii i le Mataupu Faavae ma Feagaiga 97:22–24, mafaufau i le faamatalaga lenei: Ua tulai mai matagi vivili i le lalolagi atoa. O matagi vivili malolosi e mafai ona suia i asiosio saua lea e faaleagaina ai mea uma i lo latou ala. Pe ua e vaaitino pe vaaia foi ni ata i vitio o se matagi vivili po o se asiasio?
Faitau le Mataupu Faavae ma Feagaiga 97:22–24, ma faailoa mai le mea na faatusa e le Alii i se asiosio.
I le fuaiupu e 22, o le upu tauimasui e faatatau i taunuuga o le le usitai i le Alii. I le avanoa ua saunia, ia tusi ai pe mafai faapefea ona pei le tauimasui o le Alii o se asiosio:
Suesue i le Mataupu Faavae ma Feagaiga 97:25–28 e iloa ai le mea e tatau ona tatou faia e sosola ai mai le tauimasui o le Alii ma maua Ana faamanuiaga. Atonu e te manao e faailoga le upu afai po o fea lava e ta’ua ai i nei fuaiupu.
Mafaufau pe faapefea ona fesootai le savali a le Alii o loo i fuaiupu 25–28 i ata o ituaiga laau e lua sa e suesueina i le amataga. O le a le mea o loo aoao mai e fuaiupu 27–28 e uiga i le salamo ma le faamagaloga?
Mai i nei fuaiupu ua tatou aoao ai i le mataupu faavae e faapea afai tatou te usiusitai, o le a tatou sao mai le tauimasui o le Alii ma maua ai se faatelega o Ana faamanuiaga.
Mafaufau i mea na e lagonaina na uunaia oe e fai a’o suesueina le Mataupu Faavae ma Feagaiga 97. Ia galue loa i na uunaiga ina ia e maua faamanuiaga a le Alii.
-
Ua ou suesueina le Mataupu Faavae ma Feagaiga 97 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: