Iunite 7: Aso 4
Mataupu Faavae ma Feagaiga 29:1–30
Faatomuaga
E le’i leva ma a’o lumanai se konafesi a le Ekalesia i le aso 26 o Setema, 1830, na tuuina mai ai e le Alii le faaaliga o loo maua i le Mataupu Faavae ma Feagaiga 29 “i luma o toeaina e toaono” (MF&F 29, ulutala o le vaega). O faatonuga o loo i lenei faaaliga e faatatau ia i latou uma ua valaauina e folafola atu le talalelei.
Mataupu Faavae ma Feagaiga 29:1-5
Ua molimau mai le Alii e uiga i Lana Togiola ma Lona finagalo e faapotopoto mai Lona nuu
Pe na i ai se taimi sa e mafaufau ai pe o le a alofa, puipui, ma faamagalo oe e le Atua? Faitau le Mataupu Faavae ma Feagaiga 29:1-5, ma vaavaai mo auala e alofa, puipui ma faamagalo mai ai le Faaola.
E tusa ai ma le Mataupu Faavae ma Feagaiga 29:2, o le a le mea na faatusa i ai e le Faaola o Ia lava?
Pe a lagona e se matuamoa se tulaga lamatia, e valaau atu o ia i lana toloai. O le a latou o mai ia te ia, ma na te ofaofata’i i latou i lalo o ona apaau faaloloa e puipuia ai i latou. O le a ia ositaulagaina o ia lava e laveai ai i lana toloai.
Mafaufau i mea e ao ona faia e le toloai ina ia mafai ona faapotopotoina ma le saogalemu i lalo o le puipuiga o le matuamoa. O le a se mea e ono tupu i le toloai pe ana fai latou te le’i faia le mea na tatau ona latou faia? E faapefea ona pei Iesu Keriso o se matuamoa e faapotopotoina ma puipuia lana toloai?
Toe iloilo le Mataupu Faavae ma Feagaiga 29:2, ma mafaufau i le mea e tatau ona tatou faia ina ia faapotopotoina mai ai ia Iesu Keriso mo le saogalemu. Faailoga upu po o fasifuaiupu o loo i fuaiupu e 1-2 o loo aoao mai ai lenei upumoni: O le a faapotopoto mai e Iesu Keriso i tatou i Ona aao o le alofa mutimutivale pe a tatou faalogo i Lona siufofoga, o lotomaulalo, ma valaau atu i Lona suafa i le tatalo. (Ia manatua o le upu faalogo o lona uiga o le faalogo ma le totoa ma usiusitai.)
-
I lau api talaaga mo le suesueina o tusitusiga paia, tali ai fesili nei:
-
O le a se mea o e faia e faalogo atu ai i le siufofoga o le Alii i lou olaga i le taimi nei? O a nisi mea e mafai ona e faia?
-
O le a se taimi na e lagona ai le latalata atu i le Faaola e ala i le faalogo i Lona siufofoga pe e ala i le tatalo?
-
O leMataupu Faavae ma Feagaiga 29:5 e amata i le fuaitau “ia sii i luga o outou loto ma fiafia.” (Atonu e te manao e faailoga lenei fasifuaitau i au tusitusiga paia.) Aisea na fetalai mai ai le Alii e tatau ona latou fiafia? O le a se mea e mafai ona tatou aoao mai i le Mataupu Faavae ma Feagaiga 29:1-5 e uiga i le mafuaaga e mafai ona tatou sii ai i luga o tatou loto ma fiafia?
O se mataupu faavae e tasi e mafai ona tatou aoaoina o le ona sa togiola Iesu Keriso mo a tatou agasala ma o lo tatou Fautua i le Tama, e mafai ona tatou sii i luga o tatou loto ma fiafia. Atonu e te manao e tusi lenei upumoni i le laina o au tusitusiga paia i autafa o le fuaiupu e 5.
-
Mataupu Faavae ma Feagaiga 29:6-13
O le a faapotopoto mai e Iesu Keriso Lana ʼau filifilia e sauniuni ai mo Lona Afio Mai Faalua
A uma ona tatou maua se molimau i le Togiola a Iesu Keriso, ua ia i tatou se tiutetauave e faasoa atu le tala fou i isi. Faitau le Mataupu Faavae ma Feagaiga 29:7–8, ma vaavaai po o ai na finagalo le Alii i nei alii faifeautalai e faapotopoto mai e ala i la latou talaiga o le talalelei. O le a le fetalaiga a le Alii e uiga i Lana ʼau filifilia i le fuaiupu e 7?
-
I le Mataupu Faavae ma Feagaiga 29:10–13 na aoao mai ai le Faaola o le a Ia “faaali atu [Ia] lava mai le lagi i le mana ma le mamalu tele” (fuaiupu e 11), po o se isi faaupuga, O le a toe afio mai o Ia mai le lagi i le lalolagi, ma o le a nofotupu o Ia i le amiotonu mo le 1,000 tausaga. Pe a toe afio mai o Ia, faatasi ai ma Ana Aposetolo i Lona “lima taumatau” (fuaiupu e 12), o le a Ia faamasino i tagata o le lalolagi, ma o e amiotonu na maliliu o le a toetutu.
Mataupu Faavae ma Feagaiga 29:14-21
Ua faamatala mai e le Alii faailoga o le a muamua mai i le Afio Mai Faalua
E ui lava e leai se tagata i le lalolagi e iloa tonu le taimi o le Afio Mai Faalua, ae ua ta’u mai e le Alii ia i tatou ia faailoga o le a tutupu a’o lei oo i le Afio Mai Faalua ina ia mafai ona saunia ai e amiotonu. Faitau le Mataupu Faavae ma Feagaiga 29:14–21, ma faailoga nisi o mea e tutupu o le a tutupu a o lei oo i le Afio Mai Faalua.
-
O le manatuaina o le tala faatusa i le matuamoa e valaau atu i lana toloai, o le a fesoasoani e te malamalama ai i le savali a le Faaola i nei fuaiupu. Toe faitau le Mataupu Faavae ma Feagaiga 29:17, ma faailoa mai le mea o le a tupu ia i latou o e e le tali atu pe a valaau mai le Faaola.
I le Mataupu Faavae ma Feagaiga 29:17 tatou te aoaoina ai le mataupu faavae, afai tatou te le salamo, o le a le faamamaina i tatou i le toto togiola o le Faaola.
Mafaufau loloto pe i ai se mea i lou olaga e tatau ona e salamo ai ma le mea e ao ona e faia ina ia faamamaina.
Mataupu Faavae ma Feagaiga 29:22-30
O Le Meleniuma ma le Faamasinoga Mulimuli
Ina ua uma ona aoao mai e uiga i le Afio Mai Faalua, ona aoao mai lea e le Alii le Au Paia i le mea o le a tupu pe a mavae le Meleniuma. O le Meleniuma, o le vaitau o le 1,000 tausaga o le filemu lea o le a amata pe a toe foi mai Keriso e nofotupu o ia lava i le lalolagi. Faitau le Mataupu Faavae ma Feagaiga 29:22–30, ma faailoa mai le mea o le a tupu pe a mavae le Meleniuma. (Atonu e fesoasoani ia te oe le iloa o Mekaeli, le agelu sili o loo ta‘ua i le fuaiupu e 26, o Atamu lea [tagai i le MF&F 107:54].)
Mafaufau pe na faapefea ona fesoasoani le iloaina o nei upumoni i uluai faifeautalai, e faataunuu lelei ai o latou valaauga e talai atu le talalelei ma faapotopoto mai le au filifilia.
Toe faitau le Mataupu Faavae ma Feagaiga 29:27, ma vaavaai mo le faamanuiaga na tuuina mai ia i latou o e e faapotopotoina mai i le Faaola. Atonu e te manao e faailoga upu ma fasifuaitau o loo aoao mai ai lenei mataupu faavae: O i latou o e sa ola amiotonu ma o mai ia Iesu Keriso o le a maua le ola faavavau.
-
-
Ua ou suesueina le Mataupu Faavae ma Feagaiga 29:1–30 ma faamaeaina lenei lesona i le (aso).
O fesili, mafaufauga, ma manatu faaopoopo ou te fia faasoa atu i lo’u faiaoga: