Iunite 11: Aso 1
Mataupu Faavae ma Feagaiga 45:1–15
Faatomuaga
Na faaauau pea ona ola le Ekalesia i Katelani, Ohaio, ma na faateteleina ai foi le tetee i le, ma lipoti sese e uiga i le Ekalesia. O le faaaliga o loo maua i le Mataupu Faavae ma Feagaiga 45, na maua ia Mati 1831, na aumaia ai le olioli i le Au Paia a o latou taulimaina le faailoga tagata o [tagata] i le lotoifale. O le a e suesueina le Mataupu Faavae ma Feagaiga 45 i ni lesona se lua. I le vaega muamua o lenei faaaliga, na molimau mai ai Iesu Keriso i Lana matafaioi o le Alo o le Atua. Sa Ia fetalai foi e uiga i le nuu o Enoka.
Mataupu Faavae ma Feagaiga 45:1-5
Ua molimau mai Iesu Keriso e uiga i Lana matafaioi o le Alo o le Atua
O ai e te alu i ai mo se fautuaga pe a e feagai ma se luitau o se filifiliga faigata? O a ni uiga e i ai i lena tagata e ala ai ona e maua le lototele e faasoa atu i ai ou lagona ma faalogo atu i lana fautuaga?
Atonu e sili atu ona tatou faalogo i se tasi tatou te lagona e popole alofa mo i tatou lava ma ua faamanuiaina i le mataupu lea e ofo mai ai lana fautuaga. O le faaaliga o loo tusia i le Mataupu Faavae ma Feagaiga 45 na oo mai i se taimi na faalogo ma faitau ai le Au Paia o Aso e Gata Ai ma isi i savali feteenai e uiga i le Ekalesia. Faitau le folasaga o le vaega o Mataupu Faavae ma Feagaiga 45 ma vaaivaai po o a tulaga na feagai ma le Au Paia i le taimi na tuuina mai ai e le Alii lenei faaaliga ia i latou.
Ia matau le upu faalogo i le Mataupu Faavae ma Feagaiga 45:1. Atonu e te manao e faailoga. O le faalogo i se tasi o lona uiga o le faalogo ma le toto’a; e mafai foi ona aofia ai uma le faalogo ma usitai. A tatou faalogo moni i le Alii, o le a tatou mulimuli i Ana fautuaga ma poloaiga. I le amataga o lenei faaaliga, sa faia ai e le Alii ni folafolaga aloaia e uiga i nisi o Ona matafaioi ma e uiga i Ana taumafaiga e fesoasoani ia i tatou. A o tatou faitau i nei folafolaga aloaia, o le a mafai ona tatou maua ai mafuaaga e faalogo ai i Ana fetalaiga. Vaavaai mo upu faalogo mai ia ma le faalogo i fuaiupu e suesueina i le lesona o le aso.
Faitau le Mataupu Faavae ma Feagaiga 45:1, ma vaavaai mo le fetalaiga a Iesu Keriso e uiga ia te Ia lava. Atonu e te manao e faailoga mea e te maua.
E faapefea e le iloaina o Iesu Keriso o le Foafoa o lenei lalolagi lea ua auina mai i ai i tatou, ona fesoasoani tatou te faalogo atu ai i mea ua Ia fetalai mai ai?
Faitau le Mataupu Faavae ma Feagaiga 45:2–3, ma faailoa mai ni mafuaaga faaopoopo e faalogo atu ai i le Faaola. Ia matau le lagona o le naunautai i le fuaiupu e 2. E tatau ona tatou faalogo i le Faaola a’o i ai le taimi e fai ai mea ua Ia fetalai mai ai.
O leMataupu Faavae ma Feagaiga 45:3 ua aoaoina i tatou o Iesu Keriso o lo tatou fautua i lo tatou Tama oi le Lagi. Ia matau le upu o le i le Mataupu Faavae ma Feagaiga 45:3. E te malamalama i le eseesega i le va o le faapea mai “O Iesu Keriso o le a avea ma o tatou fautua” ma le “O Iesu Keriso o lo tatou fautua”? E le gata ina aioi le Faaola mo lo tatou tulaga i le Faamasinoga Mulimuli ae ua avea foi ma o tatou Fautua i aso uma a’o tatou tatalo atu i le Tama Faalelagi, salamo, ma saili ia maua le Agaga e faatasi ma i tatou. Mafaufau loloto po o a ni auala e te manaomia ai Iesu Keriso e avea ma ou Fautua i lou olaga i aso uma.
Ina ia fesoasoani ia e malamalama i le upu fautua ma le faia a se fautua i se tagata ua tuuaia, tusi se laina e faafetaui ai matafaioi a tagata o loo i le agavale ma le faauigaga sa’o o loo i le taumatau.
|
[Tagata] ua Molia |
O lenei tagata ua talitonuina ua faia se solitulafono. |
|
Faamasino |
O lenei tagata e aioi mo le tulaga o se isi tagata. |
|
Fautua |
O le tagata lenei e faafofoga i faamaoniga ma iloilo taunuuga e tusa ai ma le tulafono. |
Mafaufau e faapea ua tausalaina oe i le solia o se tulafono, ma ua aumai e tu i luma o se faamasino. O a ni ou lagona e i ai? Aisea o le a e faafetai ai mo se fautua e aioi mo lou tulaga mo oe?
-
Faitau le Mataupu Faavae ma Feagaiga 45:4–5, ma vaavaai mo auala na faataunuu ai e Iesu Keriso Lana matafaoi o le avea ma o tatou Fautua ma ole mo lo tatou faaolataga. Ona tali lea o fesili nei i lau api talaaga mo le suesueina o tusitusiga paia:
-
Aisea e agavaa ai Iesu Keriso e avea ma o tatou Fautua?
-
O le a le mea o loo talosaga le Faaola i le Tama Faalelagi e silasila i ai?
-
Na molimau mai Elder D. Todd Christofferson o le Korama a Aposetolo e Toasefululua, e uiga i le fia silafia e le Faaola o o tatou tulaga i le taimi nei faapea foi ma lo tatou Faamasinoga Mulimuli: “E faapitoa ona ou faafetai, ma o se mea taua tele ia te a’u, lo’u mafai i soo se taimi, ma i soo se tulaga, ona ou alu atu e ala i le tatalo i le nofoalii o le alofa tunoa, o le a faafofoga lo’u Tama Faalelagi i la’u talosaga, lea o le faapea ona aioi ai lo’u Fautua, o ia o lē sa leai se agasala, o lona toto na faamaligiina, mo lo’u faamoemoega. (Tagai i le MF&F 45:3–5.) Ou te faalagolago tele i lena ala atu i le Atua, lea na te tuuina mai i ana fanau uma, aua o le mea moni, e le faailoga tagata o ia, ma o le ole atu e maua e ia” (“I Know in Whom I Have Trusted,” Ensign, Me 1993, 83).
O le ala e aioi ai Iesu Keriso mo i tatou e ese mai nai lo se fautua i se faamasinoga e tulai mo le tulafono faalemalo, ona ua uma ona Ia totogiina le tau mo le agasala.
-
-
O a ni ou lagona i le avea o Iesu Keriso ma ou Fautua, ma e le gata ina aioi mo lou tulaga ua totogiina foi le tau mo au agasala?
-
O le a lou manatu i le mea e finagalo le Faaola e te faia ina ia lelei atili ai lou sau ia te Ia ma talia o Ia o lou Fautua?
-
Mataupu Faavae ma Feagaiga 45:6-10
Ua valaaulia e le Faaola tagata uma e o mai i Lana feagaiga e faavavau
Suesue le Mataupu Faavae ma Feagaiga 45:6–10, ma vaavaai mo mafuaga na tuuina mai e le Faaola ia tatou faalogo atu ai ia te Ia.
O le feagaiga e faavavau a le Alii o loo ta’ua i fuaiupu e 9-10 o le” atoatoaga o le talalelei a Iesu Keriso. … E faavavau i le uiga e faapea, o le feagaiga a le Atua ma sa olioli ai i tisipenisione uma lava o le talalelei lea na i ai tagata e naunau e talia” (Guide to the Scriptures, “New and Everlasting Covenant,” scriptures.lds.org).
Matau i le Mataupu Faavae ma Feagaiga 45:9 na auina mai e Iesu Keriso Lana feagaiga e faavavau “e avea o se malamalama i le lalolagi, ma avea o se tagavai mo [Lona] nuu, … ma avea o se avefeau i luma o oʼu mata e sauni le ala i [Ona] luma.”
-
-
O le a sou manatu i le uiga o le “o mai.… i” le feagaiga e faavavau (MF&F 45:10)?
-
O a ni auala ua e vaaia ai le talalelei o avea ma se malamalama po o se tagavai i isi?
-
O a ni auala ua fesoasoani ai le feagaiga e faavavau, po o le atoatoaga o le talalelei a Iesu Keriso, e saunia le ala mo le afio mai o le Alii?
-
Mataupu Faavae ma Feagaiga 45:11-15
Ua fetalai mai le Faaola e uiga ia Enoka ma lona nuu
Faitau le Mataupu Faavae ma Feagaiga 45:11, ma vaavaai mo le mea o le a faasoa mai e le Alii ia i latou o e faalogo atu i Lona siufofoga.
Na fetalai mai le Alii, ua ta’u o Ia e nisi o tagata “o le Atua o Enoka” (MF&F 45:11). O Enoka o se perofeta maoae sa soifua a o lei oo i le taimi o Noa ma le Lolo. Sa ufitia le lalolagi i aso o Enoka i le amioleaga, e pei lava ona o le a i ai i le taimi o le Afio Mai Faalua o le Faaola, ae na taitaia e Enoka se nuu o tagata amiotonu sa nonofo i se aai sa taʼua o Siona. O tagata sa nonofo i Siona sa iu lava ina “vavae ese mai le lalolagi”, po o le aveina i le lagi ona o lo latou amiotonu (tagai i le MF&F45:12; Mose 7:69).
Faitau le Mataupu Faavae ma Feagaiga 45:12, ma vaavaai po o le a le mea ua faasao ai le nuu o Siona.
Ua aoao i tatou e leMataupu Faavae ma Feagaiga 45:12–14 e faapea, na talia e le Alii tagata o le nuu o Siona mo Ia lava, ma o le a Ia faasaoina i latou “seia oo mai se aso o le amiotonu.” I lena taimi o le a toe foi mai ai Enoka ma lona nuu i le lalolagi e feiloai ma tagata o le Alii i le aai o Ierusalema Fou, lea foi o le a taʼua o Siona (tagai i le Mose 7:62–64). Ua tulimatai atu perofeta uma i lena aso. Ona o le amioleaga o tagata i le lalolagi, o lea e le’i oo mai ai lena aso, ae o tagata paia o e ua tulimatai atu i ai o le a i ai se aso e vaai ai i ai.
-
O se mataupu faavae e tasi e mafai ona tatou aoao mai nei fuaiupu amata i le Mataupu Faavae ma Feagaiga 45 o le aoao e uiga i le Faaola ma mea ua Ia faia mo i tatou, e mafai ona faateleina ai lo tatou naunau e faalogo i Lona siufofoga. Na faailoa mai e le Faaola o Ia lava ma valaaulia le Au Paia e faalogo i Lona siufofoga ona o le taua o le vaega o loo totoe o le Mataupu Faavae ma Feagaiga 45.
Faitau le Mataupu Faavae ma Feagaiga 45:15–16, ma vaavaai mo le mea na fetalai le Alii o le a Ia fetalaia ma valoia. E mafai faapefea ona e saunia oe lava e faalogo i afioga a le Alii a o e suesue i le vaega o loo totoe o le Mataupu Faavae ma Feagaiga 45 i le lesona e sosoo ai?
-
Ua ou suesueina le Mataupu Faavae ma Feagaiga 45:1–15 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: