Mataupu Faavae ma Feagaiga 33–34

Faatomuaga

I le faaaliga ua faamaumauina i le Mataupu Faavae ma Feagaiga 33, na valaauina e le Alii ia Ezra Thayre ma Northrop Sweet e folafola atu le talalelei a Iesu Keriso. Na tuuina mai e le Alii i nei alii ni faatonuga mo le aoaoina atu o le talalelei. E pei ona tusia i le Mataupu Faavae ma Feagaiga 34, na faafetaia e le Alii ia Orson Pratt mo lona faatuatua ma faapea foi ona poloaiina o ia e talai atu le talalelei.

Mataupu Faavae ma Feagaiga 33:1–6

Ua valaauina e le Alii ia Ezra Thayre ma Northrop Sweet e folafola atu Lana talalelei

E fesootai mai le Atua i Ana fanau i le tele o auala eseese. O le a se faataitaiga o se auala ua Ia fesootai mai ai ia te oe po o se tasi e te iloa?

O se tasi o auala e mafai ona fesootai mai ai le Alii ia i tatou, e ala lea i miti ma faaaliga. Faitau le faamatalaga lenei i se faaaliga na oo ia Ezra Thayre. Mafaufau pe faapefea ona fesootai lana faaaliga vaaia i se taaiga pepa, se taliga, ma se pu. Ma le isi, ia mafaufau pe mata o le a le uiga o lenei faaaliga.

“Sa sau se tamaloa ma aumai ia te a’u se taaiga pepa ma tuu mai ia te au, faapea foi ma se pu, ma fai mai ou te feulaina. Sa ou fai atu ia te ia, ou te lei feulaina lava se pu i lo’u olaga. Sa ia fai mai, e mafai ona e feula, tago e faataitai. Sa ou tuuina i lo’u gutu ma feula loa, ma sa sau ai se leo sili ona matagofie ua ou faalogo i ai” (“Testimony of Brother E. Thayre,” The True Latter Day Saints’ Herald, Oct. 1862, 82).

Sa nofo Ezra Thayre i Palamaira, Niu Ioka, ma sa ia iloaina tagata o le aiga o Samita e ala i galuega sa latou faia mo ia i ni taimi eseese. Ia Oketopa 1830, na papatisoina ai Ezra Thayre ma se isi foi tagata na nofo i Palamaira, o Northrop Sweet, i totonu o le Ekalesia. E lei leva ona uma ona papatisoina ia Ezra ma Northrop, ae maua e le Perofeta o Iosefa Samita se faaaliga sa mo nei tamalii e toalua, lea ua avea nei ma Mataupu Faavae ma Feagaiga 33. Sa faamalamalama mai e Ezra i le mavae ai o ni tausaga se tele, “O le taaiga pepa o le faaaliga lea mo i ma’ua ma Northrop Sweet” (“Testimony of Brother E. Thayre,” 82).

Faitau le Mataupu Faavae ma Feagaiga 33:1-2, ma vaavaai mo upu ma fasifuaitau e faatatau i se taaiga pepa, se taliga, ma se pu.

Mafaufau i le uiga o le “tatala … oulua taliga ma faalogo mai i le leo o le Alii lo oulua Atua” (MF&F 33:1). Mafaufau loloto pe faapefea ona e faaali atu i le Alii o loo tatala ou taliga e faalogo i Lona siufofoga.

I lau api talaaga mo le suesueina o tusitusiga paia, tali ai fesili nei:
1. O le a sou manatu i le uiga o le folafola atu le talalelei “e pei o le leo o se pu” (MF&F 33)?
2. I le faaaliga a Esera Thayre, ina ua ia iliina le pu, na sau ai se leo na sili ona matagofie ua ia faalogo i ai. Mai mea ua e aoaoina i le Mataupu Faavae ma Feagaiga 33:2, aisea e te manatu sa sili ona matagofie ai le leo?

I le Mataupu Faavae ma Feagaiga 33:3, na faaaoga ai e le Alii ni faatusa faaopoopo e aoao ai Esera ma Northrop e uiga i o laua valaauga o ni faifeautalai. Faitau le fuaiupu lenei, ma mafaufau po o a ni mea o loo i ai i faatusa. I le gaoioiga lenei, tusi se laina e faafetaui i faatusa taitasi ma lona uiga.

Faatusa	Faauigaga
O le fanua po o le tovine	O tagata o le Ekalesia a Iesu Keriso o loo galulue e fausia le malo o le Atua i le lalolagi
O e e galulue	O le lalolagi
O le itula lona sefulutasi	O le tisipenisione mulimuli o le talalelei ma le taimi mulimuli o le a faatuina ai e le Alii ia Lona malo i le lalolagi, a’o lei oo i Lona Afio Mai Faalua (tagai i le Bible Dictionary, “Dispensations”)

Faitau le Mataupu Faavae ma Feagaiga 33:4, ma vaavaai pe na faapefea ona faamatalaina e le Alii le tulaga o le lalolagi i le 1830. O a ni luitau o loo e vaaia i le tovine a le Alii i aso nei?

Mafaufau loloto i mea ua faia pe o loo faia e le Alii e fesoasoani i lou nofo ai i lenei lalolagi leaga. Faitau le Mataupu Faavae ma Feagaiga 33:5–6. O le a le mea na fetalai mai le Alii ua Ia faia e fesoasoani ai ia i tatou?

I lau api talaaga mo le suesueina o tusitusiga paia, tusi se ata e faaalia ai se auala se tasi ua fesoasoani ai le Atua i tagata e aloese mai le faaleagaina o le lalolagi.

Atonu e te manao e faailoga upu ma fasifuaitau mai le Mataupu Faavae ma Feagaiga 33:5–6 o loo aoao mai ai le upumoni lenei: Ua faatuina e le Alii ia Lana Ekalesia ma ua faapotopotoina Lana ʼau filifilia i aso e gata ai.

Ina ia fesoasoani ia e malamalama atili i lenei upumoni ma lona taua, tali fesili nei i lau api talaaga mo le suesueina o tusitusiga paia:
1. E tusa ai ma le Mataupu Faavae ma Feagaiga 33:6, o ai le au filifilia?
2. Mafaufau i le leaga o le lalolagi, aisea o le a taua ai mo le au filifilia a le Alii ona faapotopoto faatasi?
3. Ua faapefea ona fesoasoani le Ekalesia ia te oe e aloese mai le leaga o le lalolagi?

Mataupu Faavae ma Feagaiga 33:7-18

Ua tuuina mai e le Alii ia Esera Thayre ma Northrop Sweet faatonuga mo le aoaoina atu o le talalelei

Faitau le Mataupu Faavae ma Feagaiga 33:7-10 e iloa ai le mea na aoao mai e le Alii ia Esera Thayre ma Northrop Sweet na tatau ona la faia i o laua gutu. I talane o le ata lenei, tusi ai se mataupu faavae e faatatau i mea ua e aoaoina mai nei fuaiupu. E mafai ona amata le mataupu faavae [i le]: Afai e tatala o tatou gutu e folafola atu le talalelei, o le Alii o le a …

Mafaufau i se taimi na e lagonaina ai, e pei sa tatau ona e tautala atu e uiga i le talalelei peitai e te le’i [tautala]. I lau api talaaga mo le suesueina o tusitusiga paia, tali ia fesili nei:
1. O a ni nisi o tulaga atonu e te musu ai e tatala lou gutu e uiga i le talalelei?
2. O anafea na e faasoaina atu ai le talalelei ma lagona ai le musuia ia iloa le upu e fai atu? Po o anafea na e vaaia ai isi o faasoa atu le talalelei ma lagona ai sa musuia i latou i upu na latou fai atu?

O leMataupu Faavae ma Feagaiga 33:10–15 o loo i ai faatonuga a le Alii ia Esera ma Northrop e talai atu uluai mataupu faavae ma sauniga o le talalelei (faatuatua ia Iesu Keriso, salamo, papatisoga, ma le meaalofa o le Agaga Paia). Suesue le Mataupu Faavae ma Feagaiga 33:16–18 e iloa ai po o le a le fautuaga faaopoopo na tuuina mai e le Alii ia Esera ma Northrop, o le a fesoasoani la te iloa ai mea e tautatala atu ai o ni faifeautalai. Atonu e te manao e faailoga mea e te maua. O le fautuaga i le fuaiupu e 17 ina ia “teuteu ma faamumu a oulua lamepa, ma ia i ai le suauu ia te oulua” o lona uiga ia saunia faaleagaga ma sauni i taimi uma mo le Afio Mai Faalua o Iesu Keriso.

I lau api talaaga mo le suesueina o tusitusiga paia, tusi ai se fautuaga se tasi o loo tuuina mai i le Mataupu Faavae ma Feagaiga 33:16–18, ma faamatala pe mafai faapefea ona fesoasoani ia te oe ia e saunia e tatala lou gutu ma faasoa atu le talalelei i isi i soo se taimi.

Mataupu Faavae ma Feagaiga 34

Ua faafetaia e le Alii ia Orson Pratt mo lona faatuatua ma valaauina o ia e talai atu le talalelei

O leMataupu Faavae ma Feagaiga 34 o loo aumai ai se faataitaiga o se tasi sa faamanuiaina ina ua tatala e se isi tagata lona gutu e faasoa atu le talalelei. Faitau le folasaga o le vaega i le faaaliga lenei i au tusitusiga paia, e iloa ai po o ai na tatala lona gutu e faasoa atu le talalelei ia Orson Pratt.

O Orson Pratt sa 19 ona tausaga i le taimi na papatisoina ai o ia e lona uso matua o Parley. Faitau le Mataupu Faavae ma Feagaiga 34:1, ma matau pe na faapefea ona talanoa mai le Alii ia Orson.

Ia suesue loa le Mataupu Faavae ma Feagaiga 34:2–3, ma vaavaai mo le mafuaaga na ta’u ai e le Alii ia Orson o Lona atalii.

Atonu ua e matauina i le fuaiupu e 3 o i latou uma o e talitonu ia Iesu Keriso e avea ma Ona atalii. O le faatusa lenei o le ola fou tatou te maua a o tatou taliaina le talalelei a le Faaola. Ua tatou aoao mai i le Mataupu Faavae ma Feagaiga 25:1 o lenei folafolaga ua faatatau foi i tamaitai, o e e avea ma afafine o Iesu Keriso a o latou taliaina Lana talalelei.

A o e faitauina le faamatalaga lenei na tusia e Orson Pratt e uiga i lona olaga talavou, ia faailoga le mea na ia faia e faaalia ai lona talitonu i le Alii:

“Mai le sefulu e oo i le sefuluiva o o’u tausaga, ua ou vaai i le tele o le lalolagi, ma sa masani ona ou feosofai solo e aunoa ma se nofoaga tumau; ae ona o le alofa tunoa o le Atua, sa mafai ona taofia mai ai a’u mai le tele o mea leaga ia e fetaiai ma tagata talavou; o manatu amata e uiga i amioga lelei ma tapuaiga, sa totoina i lo’u mafaufau e o’u matua, sa tumau pea ia te a’u; ma sa masani ona ou lagonaina se naunautaiga tele ia saunia mo se tulaga o le lumanai; ae ou te le’i amataina lava, ma le loto faamaoni i ai, e saili i le Alii, seia oo i le tautoulu o le 1829. Ona amata lea ona ou tatalo ma le faatauanau, ma salamo i agasala uma. I itula paganoa o le po, a’o momoegase isi i luga o o latou aluga, sa masani ona ou alu atu i ni nofoaga lilo i laufanua e le’i aina po o le vaomatua tuufua, ma ifo atu i luma o le Alii, ma tatalo ai mo le tele o itula ma se loto momomo ma le agaga salamo; o lo’u faamafanafanaga lena ma fiafiaga. O le faanaunauga sili o lo’u loto, ia faaali mai e le Alii Lona finagalo e uiga ia te a’u. Sa faaauau pea ona ou tatalo i lenei tulaga faamaoni seia oo ia Setema, 1830, o le taimi lea na oo mai ai ni alii Faifeautalai se toalua o le Ekalesia a Iesu Keriso o le au Paia o Aso e Gata Ai, i lo [matou] pitonuu, o se tasi o i la’ua o lo’u uso o Parley. Sa la faia ni sauniga lea sa ou auai ai.

“O le talitonu i le moni aiai o le aoaoga faavae sa la aoaoina, sa ou papatiso ai i le aso 19 o Setema, 1830. O lo’u aso fanau lena, o le sefuluiva o o’u tausaga. Sa na o a’u lava le tagata i le [eria] na taliaina ma usitai i le savali” (i le The Orson Pratt Journals, comp. Elden J. Watson [1975], 8–9).

Faitau le Mataupu Faavae ma Feagaiga 34:4–6 e vaai ai po o le a le mea na valaauina e le Alii ia Orson Pratt e fai ina ia faamanuiaina atili ai. Mafaufau pe aisea tatou te maua ai faamanuiaga sili atu pe a tatou aoao atu le talalelei i isi.

Na fetalai le Alii ia Orson e uiga i nisi o faailoga o le a tutupu a’o lumanai Lona Afio Mai Faalua (tagai i le MF&F 34:7–9). Ona Ia faaiuina lea o lenei faaaliga i le faamalosiauina o Orson i lona valaauga e talai atu le talalelei. Faitau le Mataupu Faavae ma Feagaiga 34:10–12, ma vaavaai mo upumoni nei: O i latou o e aoao atu ma le filiga le talalelei, o le a latou faia e ala i le mana o le Agaga Paia. Afai tatou te faamaoni, o le a faatasi le Alii ma i tatou.

Mata e mafai faapefea e folafolaga a le Alii o loo i le Mataupu Faavae ma Feagaiga 34:11 ona faamafanafana ma faamalosia ai se tasi i se taimi o le lotovaivai?

I lau api talaaga mo le suesueina o tusitusiga paia, faamatala ai pe aisea e te manatu, e taua ai le i ai o le mana o le Agaga Paia e fesoasoani ia te oe a o e aoaoina atu le talalelei i isi.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 33–34 ma faamaeaina lenei lesona i le (aso).

O fesili, mafaufauga, ma manatu faaopoopo ou te fia faasoa atu i lo’u faiaoga: