Iunite 19: Aso 3

Mataupu Faavae ma Feagaiga 88:70–141

Faatomuaga

O le vaega o le faaaliga i le Mataupu Faavae ma Feagaiga 88 o loo taulai atu i ai le lesona lenei, e aofia ai faatonuga a le Alii mo se vaega o taitai perisitua, ina ia aoao faatasi e ala i le suesue ma le faatuatua ma ia faaali atu le alofa ma le faauo agai i le tasi i le isi. Na valoia foi e le Alii ia faailoga o Lona Afio Mai Faalua, o le faatulagaga o le Toetu, ma mea e tutupu e siomia ai le taua tele mulimuli ma Satani.

Mataupu Faavae ma Feagaiga 88:70-117

Ua poloaiina e le Alii ia toeaina o le Ekalesia e saunia mo la latou auaunaga ma faaali mai mea e tutupu e siomia ai Lona Afio Mai Faalua

O le Aoga a Perofeta sa faia i le potu pito i luga o le faleoloa o Newel K. Whitney seia oo ina fausia le Malumalu o Katelani.

I Katelani, Ohaio, i le taumalulu o le 1832–33, na poloaiina ai e le Alii se vaega o taitai perisitua e faapotopoto faatasi i le mea sa ta‘ua o le Aoga a Perofeta e saunia ai i latou lava e talai atu le talalelei i atunuu o le lalolagi. Na poloaiina e le Alii lenei vaega e nonofo i Katelani ma aoao mai le tasi i le isi. Faitau le Mataupu Faavae ma Feagaiga 88:77–80, ma vaavaai mo le mea na poloaiina e le Alii i latou nei na umia le perisitua e faia a’o latou potopoto faatasi. Atonu e te manao e faailoga mea e te maua.

I le Mataupu Faavae ma Feagaiga 88:81–115, na faaali mai e le Alii le tele o mea e tutupu o le a muamua ma mulimuli mai i Lona Afio Mai Faalua. Na Ia faaalia mai foi mea e tutupu o le a tulai mai i le faaiuga o le Meleniuma.

Na faaalia mai e le Alii o e ua maliliu o le a toetutu i le faasologa o lo latou amiotonu. O i latou o e e toetutu muamua o i latou ia o e mautofi i le malo selesitila (tagai i le MF&F 88:97–98, 107). O i latou o e e toetutu lona lua o i latou o e mautofi i le malo terasitila (tagai i le MF&F 88:99). O i latou o e mautofi i le malo telesitila o le a toetutu pe a mavae le Meleniuma (tagai i le MF&F 88:100–101). Ma le mulimuli, o i latou o e “tumau pea i le eleelea”—o i latou e fananau mai i lenei lalolagi o e e avea ma atalii o le malaia—o le a toetutu ma lafo i le pogisa i fafo (tagai i le MF&F 88:102, 114).

Mataupu Faavae ma Feagaiga 88:118-26

Ua faamatala mai e le Alii se mamanu o le aoaoina

1. I lau api talaaga mo le suesueina o tusitusiga paia, lisi ai nisi o mea na e aoaoina lata mai nei i le aoga ma i le lotu. Ona tali lea o le fesili lenei: E faapefea ona ese le aoaoina o mataupu o le aoga e pei o le matematika ma le saienisi, mai le aoaoina o mataupu o le talalelei? E faapefea ona tutusa? (Tagai i le MF&F 88:78–79.)

Faitau le Mataupu Faavae ma Feagaiga 88:118, ma vaavaai pe na tatau faapefea e i latou o e sa auai i le Aoga a Perofeta ona saili le aoaoina. Atonu e te manao e faailoga mea e te maua. O le a sou manatu i le uiga o le aoao “e ala i le faatuatua”?

A o e faitau i le faamatalaga lenei mai ia Elder David A. Bednar o le Korama a Aposetolo e Toasefululua, ia faailoga upu po o fasifuaitau e fesoasoani e te malamalama atili ai i le uiga o le aoao e ala i le faatuatua:

“I le avea ai o i tatou ma ni tagata e aoao, e tatau ia te oe ma a’u ona galulue e faatino ma avea ma e anaana i le upu ae le na ona faalogologo ae tau galueaiina e isi. Pe o oe ma a’u ea o ni sui o loo galulue e faatino ma saili e aoao e ala i le faatuatua, pe o ta faatalitali ea i isi e aoao ma galueaiina i taua? …

“… O le aoao e ala i le faatuatua e manaomia ona tuu i ai le faaleagaga, o le mafaufau, ma le faaletino ae le tau lava ina talia. O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo, o Iesu Keriso, lo tatou naunautai e aoao ma talia faatonuga po o aoaoga mai le Agaga Paia. …

“… O le aoao e ala i le faatuatua e manaomia ai ‘le loto ma le mafaufau matala’ (MF&F 64:34). O le aoao i le faatuatua o le taunuuga lena o le tauaveina e le Agaga Paia o le mana o le upu a le Atua e le gata i le loto ae faapea foi i totonu o le loto. O le aoao e ala i le faatuatua e le mafai ona sii mai i se faiaoga i se tamaitiiti aoga … ; nai lo lena e tatau i se tamaitiiti aoga ona faaaoga le faatuatua ma galue ai ina ia maua le malamalama mo ia lava“ (”Saili e Aoao e ala i le Faatuatua,“ Ensign, Sete. 2007, 64).

E mafai ona tatou aoao e ala i le faatuatua pe a tatou auai ma le punouai ma le agaga tatalo i le aoaoina o le talalelei ona galulue loa lea i mea ua tatou aoaoina.

Ia matau i le amataga o le Mataupu Faavae ma Feagaiga 88:118 na faailoa mai e le Alii o nisi sa le’i i ai le faatuatua. Mai mea ua e aoaoina mai lenei fuaiupu, e faapefea ona e faaumaina le mataupu faavae lenei i le auala e faateleina ai o tatou faatuatua? Afai tatou te , o le a faapea ona faateleina lo tatou faatuatua ia Iesu Keriso.

2. Ina ia fesoasoani ia e malamalama pe faapefea ona faaaoga lenei mataupu faavae i lou olaga, faitau ia tulaga taitasi nei. Ona, tusi lea i lau api talaaga mo le suesueina o tusitusiga paia, pe faapefea ona sui le tagata o loo i tulaga taitasi ina ia mafai ona aoao e ala i le suesue ma i le faatuatua. Ia tusi foi pe faapefea ona fesoasoani faatinoga a le tagata e faateleina ai lona faatuatua.

   1. O se tamaitai talavou e masani lava ona faitau i tusitusiga paia, ae e seasea ona taofi ma mafaufau e uiga i mea o loo ia faitauina. Na te le lagonaina o le faitauina o tusitusiga paia e aoga tele ia te ia.

   2. O se alii talavou e auai i ana sauniga a le Ekalesia ma e fiafia e auai i talanoaga i le vasega. O nisi taimi na te lagona ai le uunaia e fai ni suiga i lona olaga e faavae i mea na te aoaoina, ae e masani ona ia le faia na uunaiga.

3. Tali fesili nei i lau api talaaga mo le suesueina o tusitusiga paia:

   1. O anafea na e lagonaina ai le faateleina o lou faatuatua o se taunuuga o le saili malosi ia aoaoina e ala i le suesue ma le faatuatua?

   2. Na faapefea ona fesoasoani au faatinoga i le faateleina o lou faatuatua?

   3. O le a se mea e te lagona e tatau ona e faia i le lumanai e saili ai le aoaoina e ala i le suesue ma le faatuatua?

Tusi e uiga i Musumusuga E te Maua

Na uunaia i tatou e Elder Richard G. Scott o le Korama a Aposetolo e Toasefululua, e tusi i lalo musumusuga tatou te maua: “Tusi i se mea malupuipuia ia mea taua ua e aoaoina mai le Agaga. O le a e iloa ai a’o e tusia musumusuga taua, e masani ona tele isi musumusuga e oo mai. Ma le isi foi, o le malamalama na e mauaina o le a tumau pea i lou olaga atoa. Ia e saili atu i taimi uma le taitaiga a le Agaga, i le ao po o le po, po o fea lava e te i ai, po o le a foi sau mea o fai” (“Ina Ia Maua Le Malamalama ma le Malosi ia Faaaogaina ai ma le Poto,” Ensign, Iuni 2002, 32).

Ina ia aoao atili e uiga i le Aoga a Perofeta, faitau le Mataupu Faavae ma Feagaiga 88:119–20, ma vaavaai pe na faapefea ona faamatala e le Alii le nofoaga sa fai ai le Aoga a Perofeta. Atonu e te manao e faailoga mea e te maua.

I le tali atu i le poloaiga a le Alii e fausia le fale na faamatalaina i le fuaiupu e 119, na iu lava ina fausia e le Au Paia le Malumalu o Katelani. A o fausia le malumalu, sa fai le Aoga a Perofeta i le potu i luga o le faleoloa o Newel K. Whitney i Katelani.

Suesue i le Mataupu Faavae ma Feagaiga 88:121–26, ma faailoa mai pe faapei amioga na faamoemoe le Alii e amio a’i le usoga i le Aoga a Perofeta. Mafaufau pe mafai faapefea e nei amioga ona fesoasoani ia te oe a’o e suesue i le talalelei na o oe lava ma faatasi ai ma isi. Atonu e te manao e mafaufau loloto pe faapefea ona faaaoga ia amioga ua e faailoaina mai i lou lava olaga.

4. Tali le fesili lenei i lau api talaaga mo le suesueina o tusitusiga paia: O le a sou manatu i le uiga o le “ia taofi mai ia outou upu faatauvaa uma, mai toega uma, … ma manatu-māmā uma” (MF&F 88:121)?

O faatonuga e faatatau i toega ma le manatu-māmā i upu na tuuina mai ia i latou na auai i le Aoga a Perofeta, o lona uiga o i latou e auai i le Aoga a Perofeta sa manaomia ona ava ma migao i nofoaga paia. O nei fonotaga o le a iu ina faia i totonu o le malumalu.

Aisea atonu e fesoasoani ai le usitai i lenei fautuaga i au taumafaiga e aoao i mea e paia?

Ae peitai, o lenei fautuaga, e le faapea ai o toega uma o le agasala. E faatatau i toega, sa tau mai e Peresitene Gordon B. Hinckley i le autalavou a le Ekalesia:

“E mafai ona e maua se taimi fiafia. E moni e mafai ona e maua! Matou te mananao ia e maua le fiafia. Matou te mananao ia e olioli i le olaga. … Matou te mananao ia e tiotio ma fiafia, pese ma e siva, ‘ata ma fiafia.

“Ae o le faia o lena mea, ia outou lotomaulalo ma agaga tatalo, ona i ai lea o faamanuiaga o le lagi i o outou luga” (O Le Fautuaga ma le Tatalo a se Perofeta mo le Autalavou,” Liahona, Ape. 2001, 40).

Ia matau le ta’u soo o le upu uma i le Mataupu Faavae ma Feagaiga 88:122. Mafaufau i le auala e mafai ona aafia ai se vasega pe afai e auai tagata uma o le vasega i le lesona ma taumafai e aoao mai i le tasi ma le isi.

O leMataupu Faavae ma Feagaiga 88:124 o loo i ai faatonuga mai le Alii e faatatau i le moe. Mafaufau po o a auala e aafia ai e le moe umi atu nai lo le mea e tatau ai, ia lou gafatia e aoao pe lagona le Agaga. (O leMF&F 88:124 o se mau tauloto. Atonu e te manao e faailoga i se auala e iloagofie ai e fesoasoani i lou sueina i le lumanai.)

O a ni auala e te manatu e mafai ai e le mauaina o le lava o le moe ma le alapo ona fesoasoani tatou te aoao lelei ai? O le mataupu faavae e tasi e mafai ona faailoa mai i faatonuga a le Alii i le Mataupu Faavae ma Feagaiga 88:118–26 o le faia o gaoioiga amiotonu ae tuu gaoioiga e le amiotonu o le a fesoasoani tatou te aoao ma ia aoaoina. Mafaufau e tusi le mataupu faavae lenei i avanoa o i autafa o au tusitusiga paia.

5. Toe iloilo le Mataupu Faavae ma Feagaiga 88:121–26, ma vaai po o le fea o fautuaga e manaomia ona e faaaogaina atoatoa i lou olaga. I lau api talaaga mo le suesueina o tusitusiga paia, tusi ai pe aisea e te manatu ai o le mulimuli i fautuaga a le Alii ma le faia o nei mea e taua ina ia fesoasoani e te aoao ai i le talalelei ma ia aoaoina.

Mau Tauloto—Mataupu Faavae ma Feagaiga 88:124

6. Ina ia fesoasoani ia e taulotoina le Mataupu Faavae ma Feagaiga 88:124, lisi i lau api talaaga mo le suesueina o tusitusiga paia, ia amioga e ono ua fetalai mai le Alii e tuu pe ia mulimuli ai. Toe fai le lisi o faatinoga, seia oo ina mafai ona e taulotoina atoa mai i lou manatua. Ina ia fesoasoani e te manatua ma faaaoga le fautuaga i lenei mau tauloto, ia mafaufau e tauloto i lou mafaufau i taimi uma lava e te auai atu ai i se vasega seminare po o le Lotu po o se afiafi faaleaiga mo le masina e sosoo ai.

Mataupu Faavae ma Feagaiga 88:127-41

Ua faatulaga mai e le Alii le faatulagaga o le Aoga a Perofeta

Mafaufau loloto i nisi o nofoaga tou te suesueina ai le talalelei ma isi. Mafaufau pe i ai ni tagata i nei nofoaga e te le iloa lelei tele i latou pe faigata ona outou faifaimea faatasi. Mafaufau i se tasi o nei tagata, a o e suesueina le Mataupu Faavae ma Feagaiga 88:127–41. Mafaufau loloto i le fesili lenei: E faapefea ona aafia lou gafatia e aoao ma ia aoaoina e ala i le Agaga, i la outou mafutaga ma i latou o loo outou aoao faatasi i le talalelei?

Sa faamoemoe le Alii i tagata o le Aoga a Perofeta e faia ni mafutaga lelei ma le tasi ma le isi a’o aoaoina faatasi i latou. Faitau le Mataupu Faavae ma Feagaiga 88:128–34, ma vaavaai mo le tiute o le faiaoga i le faia o se siosiomaga faaleagaga e aoao ai i le Aoga a Perofeta. Atonu e te manao e faailoga mea e te maua.

O le uiga o le faalo o le faiaoga i tagata o le vasega o le, na te faafeiloaia i latou a’o latou ulufale atu. O se faafeiloaiga faapitoa lenei i le Aoga a Perofeta. O le a se mea e te matauina e uiga i le faalo po o le faafeiloaiga i le fuaiupu e 133?

Faitau le Mataupu Faavae ma Feagaiga 88:135–37, ma vaavaai mo le tiute o tagata aoga i le faia o se siosiomaga lelei e aoao ai.

O le a le ituaiga sootaga na finagalo le Alii i tagata o le Aoga a Perofeta ia i ai i le tasi ma le isi? E tusa ai ma le fuaiupu e 137, o le a le mea na folafola mai e le Alii pe afai o le a mulimuli tagata o le Aoga a Perofeta i Ana faatonuga?

O le mataupu faavae lenei o se tasi lea o mataupu faavae e mafai ona tatou aoao mai i nei fuaiupu: Afai tatou te faaali atu le agaga faauo ma le alofa i le tasi ma le isi, ona mafai lea ona tatou valaaulia le Agaga a’o tatou suesue faatasi i le talalelei.

7. Toe iloilo le faafeiloaiga i le Mataupu Faavae ma Feagaiga 88:133. Ona tali lea o fesili nei i lau api talaaga mo le suesueina o tusitusiga paia:

   1. E te manatu e mafai faapefea ona tatou faaalia “se tautinoga e tumau, e lē maluelueina, ma lē masuia, e avea ma [se] uo” i tagata o le vasega po o le aiga o e atonu tatou te le masani lelei i ai pe faigata ona alofa i ai?

   2. O anafea na e aafia ai i le aoaoina o le talalelei i se siosiomaga lea sa naunau ai tagata uma ia avea ma ni uo? Na faapei, po o le, o le a sou manatu i le tulaga o le a i ai?

   Mafaufau e uiga i le auala e mafai ona e atiina ae ai se naunautaiga ia e alofa ia i latou o loo outou aoao faatasi i le talalelei. Atonu e te manao e faamaumau soo se uunaiga e te lagonaina e faaali atu le agalelei sili atu ma le alofa i tagata o le vasega ma tagata o le aiga.

8. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia.

   Ua ou suesueina le Mataupu Faavae ma Feagaiga 88:70–141 ma faamaeaina lenei lesona i le (aso).

   O fesili, mafaufauga ma manatu faaopoopo ou te fia faasoa atu i lo’u faiaoga.