Mataupu Faavae ma Feagaiga 5

Faatomuaga

E ui lava ina leiloloa ia Matini Harisi itulau muamua e 116 o tusitusiga o le Tusi a Mamona i le taimi o le taumafanafana o le 1828, ae sa tumau pea lona manao e lagolago atu i le oo mai o le Tusi a Mamona. Ia Mati 1829, sa fuafua ai Matini e malaga mai i lona aiga i Niu Ioka e asi Iosefa ma Ema Samita i Haramoni, Penisilevania. Ae peitai, sa le fiafia le toalua o Matini, o Lusi Harisi, ona o le taimi ma tupe na tuuto atu e lana tane i le lomiaina o le Tusi a Mamona. Sa ita foi o ia ia Iosefa Samita ona o le teena o ana talosaga i taimi na muamua atu e fia vaai i papatusi auro. Sa ia faia se tagi i le tulafono e faasaga ia Iosefa ma faapotopoto se vaega o tagata o e sa malilie e molimau e faapea na pepelo o ia e uiga i le i ai o papatusi. E faaopoopo atu i le taufaamatau o le tagi e faasaga ia Iosefa, sa lapataia e nei tagata ia Matini Harisi, afai e le auai atu o ia ia i latou e molimau i le taufaasese ma le pepelo e le’i faamaoniaina o Iosefa Samita, o le a tausalaina foi Matini ma o le a auai faatasi ma Iosefa i le falepuipui.

I le taimi lea, sa le’i vaai lava foi Matini i papatusi auro, e ui ina sa galue o ia o se tusiupu mo Iosefa. Ina ua taunuu atu i le fale o Iosefa, sa faaalia e Matini lona manao ia maua se molimau atili i le moni o papatusi auro. Ina ua faalogo Iosefa i le talosaga a Matini e fia vaai i papatusi, sa ia fesili atu i le Alii ma maua ai le faaaliga ua i ai i le Mataupu Faavae ma Feagaiga 5. I le faaaliga lenei na tautino mai ai e le Alii, o le a tofia ni molimau e toatolu e molimau i le Tusi a Mamona, ma sa logoina Matini i le mea e ao ona ia faia e agavaa ai e avea ma se tasi o nei molimau.

Mataupu Faavae ma Feagaiga 5:1–22

Ua folafola mai e le Alii o le a Ia aumaia Lana afioga i aso e gata ai ma o le a tautino ai molimau

Pe na i ai se taimi na talosagaina ai oe e avea ma se molimau? O le a se mea e tatau ona faia ina ia avea ai ma se molimau sili ona atamai? Po o i ai se mea na tupu i le talafaasolopito o le lalolagi e te manao e te molimauina e oe lava? Po o i ai soo se mea na tupu i le talafaasolopito o le Ekalesia e te manao e te vaaitino i ai pe molimauina? Aisea?

I le folasaga o le lesona lenei, na e aoao ai na manao Matini Harisi e vaai i papatusi auro. Pe na e lagonaina se manao e vaai i papatusi auro? Aisea?

Faitau le Mataupu Faavae ma Feagaiga 5:1-3, ma vaavaai mo le auala na ta’u mai ai e le Alii ia Iosefa Samita le tali i le talosaga a Matini Harisi. E tusa ai ma nei fuaiupu, aisea na le mafai ai ona faaali atu e Iosefa Samita ia papatusi ia Matini Harisi?

Pe sa e mafaufau ea pe aisea na le faatagaina ai e le Alii ia faaaliali atu ia papatusi auro i le lalolagi? Na faamalamalama mai e Peresitene Iosefa Filitia Samita se mafuaaga se tasi o le a mananao ai tagata e vaai i papatusi: “E masani lava, o [tagata] … pe a faalogo i le tala i le oo mai o le Tusi a Mamona, latou te fesili pe o i ai papatusi i se falemataaga lea e mafai ai ona latou vaai i ai. O nisi o i latou ua i ai ni aoaoga faasaienitisi [ua latou fautua mai] afai e mafai ona vaai ma suesue e le au atamamai ia papatusi ma aoao ina ia latou faitauina, ona mafai lea ona latou molimau atu i le moni o le Tusi a Mamona ma le atamai o Iosefa Samita, ma o le a faaliliuina ai le lalolagi atoa”(Church History and Modern Revelation, 2 vols. [1953], 1:40).

A o e faitauina le Mataupu Faavae ma Feagaiga 5:5–10, vaavaai mo mafuaaga na ta’u atu ai e le Alii ia Iosefa Samita e aua ne’i faaalialiina atu papatusi i le lalolagi.

E tusa ai ma le Mataupu Faavae ma Feagaiga 5:7, o i latou o e sa le talitonu i upu a le Alii na faaali mai e ala ia Iosefa Samita, o le a le talitonu e tusa lava pe latou te vaai i papatusi.

E faavae i mea ua e aoaoina mai le Mataupu Faavae ma Feagaiga 5:5–10, tusi ni nai fuaiupu i lau api talaaga mo le suesueina o tusitusiga paia, e uiga i le mafuaga sa le’i finagalo ai le Alii e faaaliali atu e Iosefa Samita ia papatusi i le lalolagi.

Mai le Mataupu Faavae ma Feagaiga 5:10 tatou te aoao ai na valaauina e le Alii Iosefa Samita e tuuina atu Lana afioga i le lalolagi. O se valaauga lenei na tulaga ese i le Perofeta o Iosefa Samita. Atonu e te manao e faailoga ia upu o loo aoao mai ai lenei upumoni i le Mataupu Faavae ma Feagaiga 5:10.

Tusi i lau api talaaga mo le suesueina o tusitusiga paia pe aisea e te manatu ai e taua le i ai o se molimau e uiga i lenei upumoni.

A o lei mauaina lenei faaaliga, sa valaauina Matini Harisi e tulai i luma o se faamasino i Niu Ioka e moilmau e uiga i moliaga o le taufaasese ma le pepelo na faasaga ia Iosefa Samita. Sa molimau atu ma le lotoa Matini e uiga i le faamaoni ma le amio lelei o Iosefa Samita, ma ta‘u atu i le faamasinoga: “Ae o papatusi ua ia tautino mai ua ia umia, alii e, afai tou te le talitonu i ai, ae faaauau pea ona teena le mea moni, o le a i ai se aso, e avea ai ma auala e olopalaina ai o outou agaga” (i le Lucy Mack Smith, History of Joseph Smith by His Mother, ed. Preston Nibley [1958], 146). Ina ua uma ona faalogo i le molimau a Matini, na solofua ai e le faamasino le mataupu na faasaga ia Iosefa Samita.

Faitau le Mataupu Faavae ma Feagaiga 5:11, ma vaavaai mo le mea na fetalai mai le Alii Na te faia e lagolago ai le molimau a le Perofeta o Iosefa Samita e uiga i le Tusi a Mamona. Ua tatou aoao mai i lenei fuaiupu, na folafola mai e le Alii o le mau a Molimau e Toatolu o le a tutu e avea o se faamaoniga i le moni o le Tusi a Mamona. Faitau le Mataupu Faavae ma Feagaiga 5:11–15, ma vaavaai mo mea o le a faalogoina, vaaia, ma faatonuina Molimau e Toatolu e fai. A o e faitau, atonu e te manao e faailoga mea e te maua.

Tusi ni ou manatu e uiga i fesili nei i lau api talaaga mo le suesueina o tusitusiga paia:
1. E mafai faapefea ona fesoasoani le mau a molimau faaopoopo e toatolu e uiga i papatusi o le Tusi a Mamona, i se tasi e le o se tagata o le Ekalesia?
2. E mafai faapefea ona fesoasoani lenei upumoni i se tasi e auai i le Ekalesia?

E le gata i le faatonutonuina o Iosefa Samita ma Molimau e Toatolu e molimau atu, ae na saunia foi e le Alii se isi auala ina ia mafai ai ona tatou iloa le moni o le Tusi a Mamona. Faitau le Mataupu Faavae ma Feagaiga 5:16, ma vaavaai po o le a le mea na folafola mai e le Alii ia i latou o e talitonu i le Tusi a Mamona.

E tusa ai ma mea na e faitauina, faamaea le upumoni lenei: Afai o le a tatou talitonu i afioga a le Alii, . (Atonu e te manao foi e tusi le mataupu faavae atoa i au tusitusiga paia i talane o le fuaiupu e 16.)

Na saunoa Peresitene Ezra Taft Benson e uiga i lo tatou tiutetauave patino ia maua ma faasoa atu se molimau o le Tusi a Mamona: “E tofu manaomia e i tatou taitoatasi ona maua a tatou lava molimau o le Tusi a Mamona e ala i le Agaga Paia. Ona tatau lea, ona faasoa atu a tatou molimau, faatasi ma le Tusi a Mamona, i isi ina ia mafai ai foi e isi, ona iloa e ala i le Agaga Paia e uiga i lona moni” (O Le Tusi a Mamona ma le Mataupu Faavae ma Feagaiga,” Ensign, Me 1987, 84).

Tusi le tasi po o vaega uma nei e lua i lau api talaaga mo le suesueina o tusitusiga paia:
1. O lau lava molimau e uiga i le Tusi a Mamona
2. O mea e mafai ona e faia ia maua pe faamalosia ai lau molimau e moni le Tusi a Mamona

Faitau le Mataupu Faavae ma Feagaiga 5:21–22, ae sui le igoa o “Iosefa” i lou igoa. Mafaufau loloto pe faapefea ona mafai ona e aloese mai le tuu atu “i faatauanauga a tagata.”

O le a le mea na folafola mai e le Alii o le a maua e Iosefa Samita pe afai e faamaoni, e tusa lava pe “fasiotia” ai o ia?

Mataupu Faavae ma Feagaiga 5:23–35

E mafai ona valaauina Matini Harisi e avea o se tasi o Molimau e Toatolu pe a salamo o ia

O le a le mea e manaomia e ola ai le matauila?

E faaopoopo atu i le eletise, e manaomia ona tatou tuuina le matauila i totonu o se moli, sulu i le moli, ona ki lea o le moli. E pei lava ona i ai ni nai laasaga ina ia ola ai se matauila, na silafia e Matini Harisi o le a i ai ni nai laasaga i le mauaina o le molimau e uiga i papatusi sa ia manaomia mai le Alii.

Faitau le Mataupu Faavae ma Feagaiga 5:23–24, ma faailoa mai le folafolaga e i ai lona tuutuuga na tuuina mai e le Alii ia Matini Harisi. A o e faitauina, vaavaai mo le upu afai ma faailoa mai nai laasaga po o tuutuuga o loo mulimuli mai i lena upu. Faauma le faamatalaga lenei e faavae i luga o le mea na e faitauina: Afai o le a Matini Harisi, ona tuuina mai lea e le Alii ia te ia e vaai i papatusi e pei ona ia manao i ai. E ala i le folafolaga lenei, na ofoina mai ai e le Alii ia Matini Harisi le avanoa e avea ai ma se molimau o le Tusi a Mamona.

O le folafolaga na tuuina mai e le Alii ia Matini Harisi i le Mataupu Faavae ma Feagaiga 5:24 e faatatau foi ia i tatou: Afai tatou te tatalo ma le faamaoni i le lotomaualalo ma faatuatua, ona mafai lea ona tatou maua ni tali e tusa ai ma o tatou manaoga amiotonu.

Faailoaina o Aoaoga ma Mataupu Faavae

O le faailoaina o aoaoga ma mataupu faavae o loo i mau e manaomia ai ni taumafaiga magafagafa ma se faiga masani. O se tasi o auala o le vaavaai mo folafolaga na tuuina mai e le Alii i tagata taitoatasi po o se vaega o tagata i tusitusiga paia, faapea foi ma tuutuuga na manaomia ina ia mafai ona faataunuuina na folafolaga; ona toe tusi lea o na folafolaga ma tuutuuga ina ia faatatau ia te oe. O le isi auala o le vaavaai mo upu ma fasifuaitau e pei o le “ua faapea ona tatou vaai,” “o le mea lea,” “o lea,” “faauta,” po o le “afai … , ona … ,” lea e masani lava ona faalauiloa mai ai mataupu faavae po o faamatalaga o aoaoga faavae. A o e aoao i le auala e faailoa ai aoaoga faavae ma mataupu faavae i mau, o le a mafai ona sili atu le lelei o au suesuega i tusitusiga paia.

Mafaufau loloto i le uiga o le tatalo i le lotomaualalo, faatuatua, ma le faamaoni. Mafaufau i se taimi na e faalogoina ai pe faia ai se tatalo sa e lagonaina sa faia i le auala lenei. O le a se mea na ese ai lenei tatalo mai isi tatalo na e faalogo i ai pe faia foi?

Faitau le Mataupu Faavae ma Feagaiga 5:25–26, ma vaavaai mo le mea na faamoemoe le Alii ia faia e Matini Harisi ina ua uma ona avea o ia ma se molimau o le Tusi a Mamona. Ona faitau lea o le Mataupu Faavae ma Feagaiga 5:27–28, 32, ma vaavaai mo ni fautuaga faaopoopo ma lapataiga na tuuina mai e le Alii ia Matini Harisi.

I lau api talaaga mo le suesueina o tusitusiga paia, tali ai fesili nei:
1. O a mea na fautuaina ma lapataia ai e le Alii ia Matini Harisi e fai?
2. O le a le fetalaiga a le Alii i le mea o le a tupu ia Matini Harisi pe afai e le faamaualalo o ia lava ma “maua se molimau” (MF&F 5:32) mai le Alii?
3. E faapefea ona tatou faatatauina le fautuaga i le Mataupu Faavae ma Feagaiga 5:32 ia i tatou lava?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 5 ma faamaeaina le lesona lenei i le (aso).

O fesili, mafaufauga, ma manatu faaopoopo ou te fia faasoa atu i lou faiaoga