Iunite 13: Aso 3
Mataupu Faavae ma Feagaiga 58
Faatomuaga
I le aso 1 o Aokuso, 1831, ae le’i atoa le lua vaiaso talu ona atofaina mai e le Alii ia Initipene, Misuri, e avea ma nofoaga tutotonu o Siona, na maua ai e le Perofeta o Iosefa Samita le faaaliga o loo i le Mataupu Faavae ma Feagaiga 58. O lenei faaaliga na tuuina mai o le tali ia i latou o e sa naunau e fia iloa le finagalo o le Alii e uiga ia i latou i lenei laueleele fou. I le faaaliga lenei, na fautuaina ai e le Alii le Au Paia ina ia faamaoni i o latou puapuaga, ma faamalamalama mai le mafuaaga na Ia auina mai ai i latou i Siona. Na uunaia foi e le Alii le Au Paia e faaaoga o latou faitalia e aumai ai le amiotonu.
Mataupu Faavae ma Feagaiga 58:1–13
Ua fautuaina e le Alii le Au Paia ina ia faamaoni i o latou puapuaga
O a nisi o luitau o loo feagai ma oe i le taimi lenei o lou olaga?
Ao e faitau i le palakalafa lenei, vaavaai mo luitau na feagai ma le Au Paia i Misuri i le 1831:
Ia Ianuari 1831, na maua ai e faifeautalai se vaega o tagata Initia Delaware o ola i le Teritori o Initia i tala atu o le tuaoi i sisifo o Misuri. Sa fiafia tagata Initia Delaware i le aoaoina o le talalelei o loo i ai i le Tusi a Mamona. Ae peitai, ona sa le’i maua e faifeautalai pemita na manaomia e ulufale ai i le Teritori o Initia ma talai atu le talelelei, ma talu ai ona o le tetee mai sui ma faifeau o Initia i le lotoifale, o lea sa faamalosia ai faifeautalai mai le Ekalesia e o ese mai le teritori. Ona taumafai lea o faifeautalai e aoao tagata papae sa aumau i Initipene, Misuri, ma eria lata ane, ae e oo ane ia Iulai 1831, e itiiti ifo ma le 10 tagata liliu mai sa auai i le Ekalesia. Ina ua amata ona taunuu i Misuri ia Iulai 1831 ia toeaina o le Ekalesia mai Ohaio, sa faapea ona le fiafia nisi i mea na latou maua atu i ai. O nisi o i latou sa faamoemoe e vaaia se nuu na vave ona ola i tagata talitonu, ma se nofoaga sa saunia e taulimaina ai tagata o le Ekalesia e malaga atu i ai. O nisi na faaalia le popole ona o le laueleele i Initipene sa le’i galueaiina ma o le a manaomia ai se taumafaiga tele e atiina ae ai. O nisi o le usoga sa uunaia e nonofo i Misuri ma faatau mai ni fanua e saunia ai Siona mo le Au Paia o e o le a malaga mai i se taimi mulimuli ane.
Faitau le Mataupu Faavae ma Feagaiga 58:1–2, ma vaavaai mo le mea na ta’u mai e le Alii i toeaina, lea atonu na fesoasoani ia i latou e maua ai ni lagona lelei e uiga i luitau na feagai ma i latou.
Mai mea ua e aoaoina i le fuaiupu e 2, faauma mataupu faavae nei:
O le a faamanuiaina i tatou pe afai tatou te .
O le a sili atu lo tatou taui e faavavau pe afai tatou te .
Faitau le Mataupu Faavae ma Feagaiga 58:3–5, ma vaavaai mo le mea e masani ona tatou le iloaina pe malamalama i ai pe a tatou feagai ma ni tofotofoga.
Na fautuaina e le Alii ia toeaina ina ia faatuatua ia te Ia ma ia vaai i tua atu o tofotofoga na latou onosaia, ma ia taulai atu i le lumanai matagofie o le a latou oo i ai pe afai latou te faamaoni. O le savali a le Alii i le Au Paia i Misuri, e mafai ona fesoasoani ia i tatou e onosaia ai luitau, e ala i le taulai atu pea i faamanuiaga ua folafolaina mai ia i latou o e onosaia puapuaga ma le faamaoni.
-
Tali se fesili e tasi po o fesili uma i lau api talaaga mo le suesueina o tusitusiga paia:
-
E mafai faapefea e le talitonuina o le a faamanuia oe e le Alii, ona fesoasoani e te onosaia ai ma le faamaoni ia puapuga?
-
O le a se taimi na e lagonaina ai sa faamanuiaina oe ona o lou faamaoni i taimi o puapuaga?
-
I le Mataupu Faavae ma Feagaiga 58:6–13, na faaali mai ai e le Alii nisi o auala o le a faamanuiaina ai le Au Paia mo lo latou usiusitai i le fesoasoani e faatuina Siona. Ia faia se tautinoga e te tumau faamaoni i le taimi o ou luitau, ina ia mafai ona e maua taui ua saunia e le Alii mo oe i le taimi nei ma i le lumanai.
Mataupu Faavae ma Feagaiga 58:14-23
Ua faamatalaina e le Alii ia tiutetauave o se epikopo, ma poloaiina le Au Paia e tausi tulafono o le laueleele
Sa faatonuina e le Alii ia Epikopo Eteuati Paterika ma Sidney Gilbert e nonofo i Misuri e taulima meatotino a le Ekalesia, ma faatau mai fanua i totonu ma lata ane i Initipene, Misuri (tagai i le MF&F 57:7–8). Sa finau Epikopo Paterika ma le Perofeta o Iosefa Samita e uiga i le tulaga lelei o le fanua sa filifilia. Sa manatu o ia, sa tatau ona faatau mai ni fasi fanua eseese. O lenei feeseeseaiga sa faatupuina ai ni lagona le lelei.
Toe faamanatu le Mataupu Faavae ma Feagaiga 58:3, ona faitau lea o le Mataupu Faavae ma Feagaiga 58:14–15, ma vaavaai mo le mea na ta’u mai e le Alii ia Epikopo Paterika.
-
-
Na ono mafai faapefea e mataupu faavae o loo aoaoina i le Mataupu Faavae ma Feagaiga 58:3 ona fesoasoani ia Epikopo Paterika e filifili ai e salamo, ona o le finau ma le Perofeta e uiga i le po o fea o fasi fanua e tatau ona faatauina mai?
-
Mafaufau i faafitauli po o tulaga o loo i ai nei, lea e ono tali ai nisi i o latou taitai faale-Ekalesia i le “lē talitonu lea ma le tauaso o le loto” (MF&F 58:15). O le a se mea e mafai ona e faia e aloese ai mai le faia o lena mea sese?
-
Na talia e Epikopo Paterika le aoaiga a le Alii ma le lotomaualalo, ma sa faamagaloina o ia i ana agasala.
Faitau le Mataupu Faavae ma Feagaiga 58:16–23, ma vaavaai mo le mea na faatonuina e le Alii ia Epikopo Paterika e fai e faataunuu ai lona valaauga. E tusa ai ma fuaiupu e 21–23, o le a le mea na faatonuina e le Alii le Au Paia e fai? O le a le mea o loo aoao mai e nei fuaiupu e uiga ia i latou o e taumafai e faaaoga tulafono a le Atua, e ta’uamiotonu ai lo latou le usitaia o tulafono o le laueleele?
Mataupu Faavae ma Feagaiga 58:24-33
Ua fautuaina e le Alii le Au Paia e faaaoga o latou faitalia e fai ai mea lelei
Vaai faalemafaufau e faapea, a’o e savali i le auala, sa e vaaia ai se tagata matua o pa‘ū. I le siata lenei, li‘o ai le mea e tatau ona e faia.
|
Faatali mo le Agaga e uunaia oe e fesoasoani i ai. |
Faatali sei vaai pe e i ai se isi tagata o le a fesoasoani i ai. |
|
Faatali mo se tasi e ta‘u atu le mea e te faia. |
Alu e fesoasoani i le tagata na pa‘ū. |
Aisea na e filifilia ai lena tali?
Faitau le Mataupu Faavae ma Feagaiga 58:24–28, ma vaavaai mo mataupu faavae na aoao mai e le Alii i le Au Paia a o latou feagai ma le luitau o le fausiaina o le aai o Siona. Atonu e te manao e faailoga mea ua e maua. O se tasi o mataupu faavae o loo aoao mai i nei fuaiupu o le, e tatau ona tatou auai ma le naunautai i le filifilia e faia mea lelei, ma i le faataunuuina o le amiotonu. (O le fuaitau “o ia o lē e tau faamalosia i mea uma” [MF&F 58:26] e faatatau i se tasi e le galue seiiloga e manaomia ona ia faia o se mea. O leMataupu Faavae ma Feagaiga 58:27 o se mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)
-
-
O le a le “taui” o loo faatatau i ai nei fuaiupu? E mafai faapefea e le faia o mea lelei e tele i lo tatou lava lotomalie, ona aafia ai pe tatou te mauaina le ola e faavavau?
-
O a nisi o auala e mafai ona e galue punouai ai i le faia o mea lelei i le fale? I le aoga? I lau uarota po o le paranesi?
-
Faitau le Mataupu Faavae ma Feagaiga 58:29–33, ma vaavaai mo le mea e tupu ia i latou o e e le faaaogaina o latou faitalia e fai ai mea lelei po o e e masalosalo i poloaiga a le Alii. Mafaufau e faailoga mea ua e mauaina.
Mau Tauloto—Mataupu Faavae ma Feagaiga 58:27
-
Mataupu Faavae ma Feagaiga 58:34-65
Ua tuuina mai e le Alii faatonuga e uiga ia Siona ma aoao mai mataupu faavae o le salamo
E mafai faapefea ona e iloa ua faamagaloina e le Alii oe i au agasala? Faitau le Mataupu Faavae ma Feagaiga 58:42–43, ma faailoga mea na aoao mai e le Alii e uiga i le faamagaloga. (O leMataupu Faavae ma Feagaiga 58:42–43 o se mau tauloto. Atonu e te manao e faailoga i se auala e iloagofie ai ina ia mafai ona e mauaina i le lumanai.)
Faauma le mataupu faavae lenei mai le Mataupu Faavae ma Feagaiga 58:42: Afai tatou te , o le a faamagalo i tatou e le Alii ma le toe manatua a tatou agasala.
O le fuaitau “lē toe manatuaina lava i latou” e le faapea e galo i le Atua a tatou agasala. O le Atua e silisili ese, e silafia mea uma—e leai se mea e galo ia te Ia. Ae ui i lea, o agasala e salamoina e faamagaloina ma le toe manatuaina e ala i le le toe ta’uaina lava.
-
Ua aoao mai leMataupu Faavae ma Feagaiga 58:43 i le auala tatou te iloa ai pe ua tatou salamo i a tatou agasala. Faitau le fuaiupu lenei, ona faauma lea o le mataupu faavae lenei: Ina ia salamo, e tatau ona tatou ma a tatou agasala.
O le lafoai o se agasala, o lona uiga o le liliuese atoatoa mai ai ma le toe faia lava. A o e faitau i le saunoaga lenei a Peresitene Dieter F. Uchtdorf o le Au Peresitene Sili, mafaufau i taimi na e salamo ai ma lagona le faamagaloga a le Alii: “O le taimi lava tatou te salamo moni ai, o le a aveese e Keriso le avega o le tausalaga ona o a tatou agasala. E mafai ona tatou iloa mo i tatou lava ua faamagaloina i tatou ma ua faamamaina. O le a faamaonia mai ia i tatou e le Agaga Paia lena mea; O Ia o le Faapaiaina. E leai se isi molimau o le faamagaloga e mafai ona sili atu” (“Vaega Tonu o le Toe Foi Saogalemu,” Ensign po o le Liahona, Me 2007, 101).
Mau Tauloto—Mataupu Faavae ma Feagaiga 58:42–43
-
-
Ua ou suesueina le Mataupu Faavae ma Feagaiga 58 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: