Mataupu Faavae ma Feagaiga 99–100

Faatomuaga

Na maua e le Perofeta o Iosefa Samita le faaaliga ua faamaumauina i le Mataupu Faavae ma Feagaiga 99 i le aso 29 o Aokuso, 1832. I le faaaliga lenei na valaauina ai e le Alii ia John Murdock e faaauau ana galuega faafaifeautalai, ma alu i le itu i sasae o le Iunaite Setete. Na maua e Iosefa Samita le faaaliga ua faamaumauina i le Mataupu Faavae ma Feagaiga 100 i le aso 12 o Oketopa, 1833, a’o i ai i laua ma Sini Rikitone i Niu Ioka o galulue ai o ni faifeautalai. I lenei faaaliga na faamautinoa mai ai e le Alii ia Iosefa ma Sini o loo manuia o laua aiga i Ohaio. Na faamafanafanaina foi e le Alii ia Iosefa e uiga i le Au Paia i Misuri o e na mafatia i sauaga.

Mataupu Faavae ma Feagaiga 99

Ua valaauina e le Alii ia John Murdock e folafola atu le talalelei

Vaai faalemafaufau e faapea ua fesili atu sau uo e le o se tagata o le Ekalesia pe aisea e mananao ai le toatele o alii ma tamaitai talavou e tuu atu tausaga e 2 po o le 18 masina o o latou olaga e auauna ai faamisiona. E faapefea ona e faamalamalama atu le pogai o le a manao ai se tasi e faia sea osigataulaga e auauna atu i se misiona?

O John Murdock sa o se tasi o uluai tagata o le Ekalesia. A o e faitau i le faamatalaga lenei, ia matau osigataulaga sa ia faia e auauna ai i le Alii:

Sa sailiili John Murdock i le tele o lotu ma sa faaiuina ai o lotu uma ua leiloloa o latou ala. Ae peitai, i le faaiuiuga o le 1830, sa ia faitauina ai le Tusi a Mamona ma lagonaina le molimau atu o le Agaga Paia e uiga i lona moni. Sa faatalitonuina o ia ua ia maua le Ekalesia moni a Keriso. E lei leva ona uma ona papatiso i le aso 5 o Novema, 1830, ae auauna atu John Murdock i se misiona, ma papatiso ai le tusa ma le 70 tagata i le fa masina i Orange ma Warrensville, Ohaio.

I le aso 30 o Aperila, 1831, a’o lei leva ona foi mai John mai lana misiona, ae maliu lona faletua o Iulia, ina ua mavae lona fanauina o se masaga. Ia Iuni 1831, na valaauina ai o Ia e le Alii e alu i Misuri ma talai atu le talalelei i le ala (tagai i le MF&F 52:8–9). A o lei mafai ona alu Ioane, sa manaomia ona ia mautinoa na i ai le tausiga mo lana fanau e toalima, o i latou uma sa i lalo o le fitu tausaga le matutua. Sa ia faia fuafuaga mo nisi o tagata taitoatasi e vaaia lana fanau matutua, ae vaetamaina e Iosefa ma Ema le masaga laiti. Mo le vaega na totoe o le 1831, ma le afa muamua o le 1832, na talai ai John Murdock i le Teritori o Michigan, Initiana, Misuri, ma Ohaio. Ina ua ia toe foi atu i Hairama, Ohaio, ia Iuni o le 1832, sa puapuagatia o ia mai aafiaga o se gasegase faaumiumi. Sa ia iloaina ai foi o se tasi o lana masaga na maliu ia Mati na mavae atu, ma o i latou o e na tausia lana fanau matutua e toatolu na poloaiina ia totogi atu i latou mo la latou fesoasoani.

Na maua e le Perofeta o Iosefa Samita le faaaliga i le Mataupu Faavae ma Feagaiga 99 pe tusa ma le lua masina talu ona taunuu atu John Murdock i le fale mai lana misiona lona lua. Faitau le Mataupu Faavae ma Feagaiga 99:1, ma vaavaai mo le mea na valaauina e le Alii ia John Murdock e fai.

E le gata i lenei valaauga e talai atu le talalelei, ae o lenei foi faaaliga o loo i ai ni folafolaga e tele e faatatau i le auaunaga a John. Faitau le Mataupu Faavae ma Feagaiga 99:2–3, ma vaavaai po o a auala o le a faamanuiaina ai John Murdock ma i latou na ia aoaoina e ala i lana auaunaga.

Mai fuaiupu e 2-3 tatou te aoao ai upumoni nei: E fai i tatou ma sui o le Alii pe a tatou auauna atu i ni misiona, ma o i latou o e talia le talalelei e pei o tamaiti laiti e maua le alofa mutimutivale.

A o lei alu John Murdock i lana misiona i setete i sasae, sa i ai sana aafiaga i le Aoga a Perofeta lea sa i ai se taunuuga loloto ia te ia. “I se tasi o [a matou sauniga tatalo] na saunoa mai ai le Perofeta ia i matou afai e mafai ona faamaualalalo i tatou lava i luma o le Atua, ma faaaoga le faatuatua malosi, e tatau ona tatou vaai i fofoga o le Alii. Ma pe a o le ogatotonu o le aso na tatalaina ai faaaaliga vaaia o lo’u mafaufau, ma sa faamalamalamaina mata o lo’u mafaufau, ma sa ou vaai ai i le fuaitino o se tagata, na sili ona matagofie, ma o le ataata o ona foliga sa lelei ma paepae e pei o le la. … O Ona foliga sa sili ona ati [Lana silasila], ae sa sili ona matagofie. Ma a’o ou taumafai e malamalama i le peresona atoa mai le ulu e tau i vae, sa faapea ona see ese atu mai ia te au ma tapunia ai le faaaliga vaaia. Ae sa tuua i lo’u mafaufau le lagona o le alofa, mo le tele o masina, lea ou te lei lagonaina muamua i lena tulaga” (John Murdock, autobiography and diary, 13, L. Tom Perry Special Collections, Harold B. Lee Library, Brigham Young University, Provo, Utah).

Faailoa mai ia le itiiti ifo ma le toatolu ni tagata i tusitusiga paia po o lou olaga o e na faia ni osigataulaga e auauna atu i le Alii. Tusi o latou igoa i lau api talaaga mo le suesueina o tusitusiga paia. Ona tusi lea po o a faamanuiaga na maua e nei tagata ona o a latou osigataulaga ma auaunaga.

Faitau le Mataupu Faavae ma Feagaiga 99:4–5, ma vaavaai mo le mea na fetalai mai le Alii o le a tupu ia i latou o e teena le savali a John Murdock.

Faitau le Mataupu Faavae ma Feagaiga 99:6–8, ma vaavaai mo faamaoniga na silafia lelei e le Alii ia manaoga o John Murdock ma osigataulaga sa ia faia.

Sa mulimuli John Murdock i fautuaga a le Alii ma faia fuafuaga e auina atu ai lana fanau matutua e toatolu ia Epikopo Paterika i Misuri, lea sa latou nonofo ai i ni aiga eseese. Sa alu John i lana misiona ia Setema 1832, pe a ma le tasi le masina talu ona ia mauaina lona valaauga. Sa ia auauna atu i nisi misiona, ona ia faatasi atu lea i lana fanau matutua i Misuri. Mo aso na totoe o lona soifua, sa auauna atu ai ma le faamaoni John Murdock i le Alii i ona valaauga o se faifeautalai, o se epikopo, ma se peteriaka.

Mataupu Faavae ma Feagaiga 100:1–12

Ua tuu mai e le Alii ia Iosefa Samita ma Sini Rikitone ni upu faamafanafana ma ni aoaoga

O a nisi o popolega e ono i ai i faifeautalai a’o amata a latou misiona? Mafaufau i nei popolega a’o suesueina le Mataupu Faavae ma Feagaiga 100.

Ia Aperila 1833 na auai ai se tagata na igoa ia Freeman Nickerson i le Ekalesia i Niu Ioka ma malaga atu ai i Katelani, Ohaio. Ina ua feiloai Freeman ia Iosefa Samita, sa ia talosaga atu i le Perofeta e asiasi atu i le aiga o Nickerson i Niu Ioka ma Kanata. Sa malilie Iosefa Samita ma Sini Rikitone i lana talosaga, ma latou tuua ai Katelani faatasi ma ia i le aso 5 o Oketopa, 1833. Sa talai atu e le vaega le talalelei a’o latou malaga. I le aso 12 o Oketopa, 1833, sa latou taunuu ai i le maota o Nickerson i Perrysburg, Niu Ioka, ma na maua ai e Iosefa le faaaliga ua faamaumauina i le Mataupu Faavae ma Feagaiga 100.

Faitau le folasaga o le vaega mo le Mataupu Faavae ma Feagaiga 100, ma vaavaai mo le mea na popole i ai Iosefa Samita ma Sini Rikitone, ina ua latou taunuu i Niu Ioka.

I le faaaliga lenei na tali mai ai le Alii i popolega o Iosefa Samita ma Sini Rikitone mo o laua aiga. Faitau le Mataupu Faavae ma Feagaiga 100:1–2, ma vaavaai mo le ala na tali mai ai le Faaola i o laua popolega. Atonu e te manao e faailoga ia fuaitau atonu na faamafanafanaina ai Iosefa ma Sini.

I lau api talaaga mo le suesueina o tusitusiga paia, faamatala ai pe ono mafai faapefea e afioga a le Alii o loo i le Mataupu Faavae ma Feagaiga 100:1–2 ona fesoasoani i faifeautalai i aso nei i o latou popolega e uiga i o latou aiga.

E le gata i le faamalosiau ia i laua e uiga i o laua aiga, ae sa tautino mai foi e le Alii ia Iosefa ma Sini, o le a faamanuiaina i laua i a laua galuega faafaifeautalai. Faitau le Mataupu Faavae ma Feagaiga 100:3-4, ma faailoa mai nisi o nei faamalosiauga.

Faitau le Mataupu Faavae ma Feagaiga 100:5-8, ma vaavaai mo folafolaga faaopoopo mai le Alii.

alii talavou e toalua — Afai o le a tatou siia‘e o tatou leo e faasoa atu le talalelei, o le a faapea ona fesoasoani le Alii ia i tatou ia tatou iloa upu e fai atu.

Ofuaiupu e 5-6 o loo i ai le folafolaga e faapea afai o le a tatou siia‘e o tatou leo e faasoa atu le talalelei, o le a faapea ona fesoasoani mai le Alii ia i tatou ia tatou iloa upu e fai atu. (Manatua ina ia maua lenei fesoasoani na folafolaina mai, e tatau ona tatou ola amiotonu ma saunia i tatou lava e auauna atu.)

I le Mataupu Faavae ma Feagaiga 100:7, tatou te aoao ai, e tatau i faifeautalai ona folafola atu le talalelei “i le mamalu o le loto, i le agaga o le agamalu.” O loo faapea mai lenei fautuaga, e tatau ona tatou faasoa atu le talalelei i le faamaoni atoatoa ma le lotomaualalo.

Faitau le Mataupu Faavae ma Feagaiga 100:8, ma vaavaai mo le mea na folafola mai e le Alii pe afai tatou te talai atu le talalelei i lenei faiga. Ona faauma lea o le mataupu faavae lenei: Afai tatou te faasoa atu le talalelei i isi i le mamalu o le loto ma le agaga o le agamalu, o le Agaga Paia o le a .

Mafaufau loloto i se taimi na e lagonaina ai le Agaga o faamautu atu se mea na e aoaoina atu pe fai atu foi sa sa’o. E ono aofia ai le talanoa e uiga i le talalelei ma au uo po o le aiga, tuu atu lau molimau po o le tuuina atu o se lauga i se sauniga a le Ekalesia, po o le faia o se faamatalaga i se vasega. I lau api talaaga mo le suesueina o tusitusiga paia, faamatala ai lau aafiaga. E mafai foi ona faamatalaina se aafiaga i se taimi na e lagona ai le Agaga Paia o molimau mai e faapea, o se mea na saunoa mai ai se isi tagata ua moni.

Faitau le Mataupu Faavae ma Feagaiga 100:9–12, ma vaavaai mo faatonuga ma folafolaga na tuuina mai e le Alii i le Perofeta o Iosefa Samita ma Sini Rikitone.

Tali le fesili lenei i lau api talaaga mo le suesueina o tusitusiga paia: Mata o le a le uiga o le folafolaga o loo i le Mataupu Faavae ma Feagaiga 100:12 ia te oe pe afai o loo e auauna atu i se misiona?

O taumafaiga faafaifeautalai a le Perofeta o Iosefa Samita ma Sini Rikitone sa i ai se faatosinaga tumau i le Ekalesia. Sa talai atu Sini Rikitone i se vaega toatele na faapotopoto i le fale o Nickerson i Niu Ioka, ona faaauau ai lea o le usoga e toatolu i matu i Ontario, Kanata, lea na latou talai atu ai i ni vaega faaopoopo. Sa papatisoina e faifeautalai le toeitiiti 20 o tagata taitoatasi iina ma faatuina ai se paranesi o le Ekalesia. I se taimi mulimuli ane, na asiasi atu ai Pale P. Palate i lenei paranesi a o ia auauna atu i se misiona i Kanata. O Moses Nickerson, o se tagata liliu mai mai le misiona i le 1833, na faailoaina atu Elder Palate ia Ioane Teila, o le sa avea ma se faifeautalai faamanuiaina ma mulimuli ane avea ma Peresitene o le Ekalesia. O nei mea na tutupu sa o se faataunuuga o se vaega o le folafolaga a le Alii e faapea, “[o le a] tatalaina se faitotoa aoga i itulagi faataamilo i le laueleele lenei i sasaʼe” (MF&F 100: 3).

Mataupu Faavae ma Feagaiga 100:13-17

Ua faamafanafana e le Alii ia Iosefa ma Sini e faatatau i tofotofoga o le Au Paia i Misuri

Ia Aokuso 1833, a o lei umi ona malaga ese atu lea o le Perofeta o Iosefa Samita i lenei misiona, sa momoli mai e Oliva Kaotui le tala mai Misuri e faapea, na oo ina faatupuina e fili o le Ekalesia ni vevesi e faasaga i le Au Paia o Aso e Gata Ai iina. Na auina atu e Iosefa ia Orson Hyde ma Ioane Koula e tuuina atu fautuaga i le Au Paia i Misuri mai ia te ia. O lenei malaga o le a lamatia ona o le a latou ui atu i eria e latalata i vaega faatupu faalavelave e le fiafia i Mamona. Ao i ai i lana misiona faatasi ma Sini Rikitone ma Freeman Nickerson, sa popole le Perofeta e uiga ia Orson ma Ioane ma tagata uma o le Au Paia o e sa sauaina i Misuri.

Faitau le Mataupu Faavae ma Feagaiga 100:13–17, ma vaavaai mo le mea na ta’u mai e le Alii i le Perofeta o Iosefa Samita. I lau api talaaga o le suesueina o tusitusiga paia, faauma ai galuega faatino nei:
1. E faavae i luga o mea ua e aoaoina i le fuaiupu e 15, ia faauma le mataupu faavae lenei: O le a galulue faatasi mea uma mo lo tatou lelei pe afai tatou te …
2. Ina ia “savavali sao” i luma o le Alii e faatatau i le amiotonu ma le tausia o poloaiga. Mafaufau i ni mea patino e mafai ona e faia i lou olaga ina ia lelei atili ai ona e “savali sao” i luma o le Alii. Faatu ma tusi se sini ina ia e galue i se tasi o nei mea ma ia atili valaaulia atoatoa ai lenei faamanuiaga i lou olaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 99–100 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: