Iunite 10: Aso 3
Mataupu Faavae ma Feagaiga 42:30–93
Faatomuaga
A o e faitauina i le faatomuaga o le lesona o le Aso 2, na maua e le Perofeta o Iosefa Samita le faaaliga o loo i le Mataupu Faavae ma Feagaiga 42 “i le faataunuuga o le folafolaga na faia i se taimi muamua ane e le Alii e faapea o le a tuuina mai le ‘tulafono’ i Ohaio” (MF&F 42 folasaga o le vaega). I le lesona lona lua lenei o le Mataupu Faavae ma Feagaiga 42, e aofia ai fuaiupu e 30–93, o le a e aoao ai, na faailoa mai e le Alii ia tulafono faaletino, faaletamaoaiga, ma le faaleagaga ua faatonuina ai tagata o le Ekalesia e fesoasoani atu i e matitiva, faatupeina taumafaiga eseese a le Ekalesia, ma fesoasoani atu i isi tagata o le Au Paia o e na o mai i Ohaio.
Mataupu Faavae ma Feagaiga 42:30-42
Ua faatulaga mai e le Alii le tulafono o le faapaiaga
O le Mataupu Faavae ma Feagaiga 42:30–42 o loo i ai le tulafono a le Alii o le faapaiaga. Ina ia fesoasoani ia e aoao ma malamalama e uiga i lenei tulafono, o lau galuega atofaina o le saunia o se lesona ma aoao atu se tagata o le aiga po o se uo e uiga i le tulafono o le faapaiaga o le tuuina mai i nei fuaiupu. O le a i ai se avanoa e faamaumau ai lou aafiaga i lau api talaaga mo le suesueina o tusitusiga paia, i se taimi e mulimuli mai o le lesona o le aso.
Ina ia saunia e aoao atu le lesona, faitau le Mataupu Faavae ma Feagaiga 42:30–42, ona fai lea o mea nei:
-
Faaaoga se meafaapipii po o se peni e tusi ai se laina i luga o ni ipu malamalama se ono. (Faaaoga ipu inu malamalama kilia pe a mafai.) Faailoga laina i ni uumi eseese i luga o ipu malamalama taitasi. Ona nana lea pe ufiufi ia ipu malamalama ina ia le iloa atu e le tagata o loo e aoaoina.
-
Aumai se sioki ia lava ma totoe ni vai i totonu e ligi i totonu o ipu malamalama e pau mai i faailoga o loo i ai i luga. (Pe afai e maua, e mafai ona e faalanuina le vai.)
Faaali atu le sioki i le tagata o loo e aoaoina, ma fai atu i ai, o le vai ua faatusa i le tamaoaiga uma ma punaoa i se nuu. Faamalamalama atu, ia Fepuari 1831, na manaomia ai e tagata o le Ekalesia i Katelani, Ohaio ona tausia e matitiva, fesoasoani atu i tagata fou na masii atu o e na ositaulaga mea e tele ina ia faapotopoto atu i Ohaio, ma fesoasoani i le faatupeina o le faagaoioiga o le Ekalesia.
Fai atu i lau tagata aoao e faitau leotele le Mataupu Faavae ma Feagaiga 42:30 ma vaai po o le a le mea na faaali mai e le Alii e faatatau i e matitiva. Fai atu ia te ia e faailoga le upu faapaia.
Faitau le faauigaga o le upu faapaia na tuuina mai e Elder D. Todd Christofferson o le Korama a Aposetolo e Toasefululua: “Ina ia faapaiaina o lona uiga o le vaetofia lea po o le tuuina atu o se mea e paia, tuuto atu i faamoemoega paia” (“Toe Manatunatuga i se Olaga Faapaiaina,” Ensign po o le Liahona, Nov. 2010, 16).
Atonu e te manao e valaaulia lau tagata aoga e tusi lenei faauigaga i le laina o ana tusitusiga paia i talane o le fuaiupu e 30.
Faamalamalama atu e faapea, o le Mataupu Faavae ma Feagaiga 42 o loo i ai mataupu faavae o se tulafono e ta‘ua o le tulafono o le faapaiaga. Ina ia fesoasoani i lau tagata aoao ia malamalama i nei mataupu faavae autu, atonu e te manao e faitau leotele le faamalamalamaga lenei a Peresitene J. Reuben Clark Jr. o le Au Peresitene Sili:
“O le mataupu faavae autu o [le tulafono o le faapaiaga] o le, o mea uma ua ia i tatou e a le Alii ia; o le mea lea, e ono valaau mai le Alii ia i tatou mo soo se mea ma meatotino uma o loo ia i tatou, aua o Ia e anaina” (i le conference Report, Oke. 1942, 55).
Fai atu i lau tagata aoga e aotele mai mea o loo aoao mai i le Mataupu Faavae ma Feagaiga 42:30 e uiga i lo tatou tiutetauave agai i e matitiva ma i latou e manaomia le fesoasoani. (Atonu e tali mai lau tagata aoga i se mea e taitutusa ma le mataupu faavae lenei: E tatau ona tatou tausia e matitiva ma i latou e manaomia le fesoasoani. Faamalosiau atu ia te ia e faailoga upu ma fasifuaitau i lena fuaiupu o loo aoao mai i lenei mataupu faavae.)
Faaali atu ipu malamalama gaogao ma faailoga o loo i ai, ona amata ligi loa lea i ai o vai mai le sioki. Faatumu le ipu malamalama e tasi ia gata i le laina na e tusia ai, faatutumu ni ipu malamalama se tolu ia oo i luga a’e o laina na e tusia, ae ligi le isi lua ia i lalo ifo o faailoga na e faia. Faamalamalama atu o laina i luga o ipu malamalama taitasi e faatusa i manaoga ma manaoga amiotonu o ni aiga eseese. Mo se faataitaiga, o manaoga o se aiga e i ai se tamaitiiti se toatasi atonu e ese mai manaoga o se aiga e i ai se fanau e toalima. Faamalamalama atu o le vai ua faatusa i tamaoaiga ma punaoa o aiga taitasi. O ipu malamalama o loo i lalo ifo o le laina ia vai, e faatusa i aiga e le lava se tupe po o ni mea e tali ai o latou manaoga.
Faitau leotele le Mataupu Faavae ma Feagaiga 42:31, ma valaaulia lau tagata aoga e vaai i ana tusitusiga paia. Ona fai atu lea o fesili nei:
-
Mo nei tagata o le Au Paia, o le a le laasaga muamua i le ola ai i le tulafono o le faapaiaga? (Ia tuuina atu a latou mea—a latou tupe, oloa, ma meatotino—i le epikopo.)
-
Pe a tatou foai atu i e matitiva, o ai o loo tatou foai atu foi i ai? (O le Alii.)
Ina ia faatusa i tagata o le Ekalesia e faapaiaina a latou meatotino i le Ekalesia, toe sasaa uma vai o loo i ipu malamalama i le sioki.
Valaaulia lau tagata aoga e faitau leotele le Mataupu Faavae ma Feagaiga 42:32, ma vaavaai mo le laasaga lona lua i le ola ai i le tulafono o le faapaiaga. Ona fesili atu lea:
-
O le a le laasaga lona lua i le ola ai i le tulafono o le faapaiaga? (O aiga uma e maua mai i le epikopo se vaega o punaoa e tusa ai ma mea na manaomia.)
Faamalamalama atu e faapea, a uma ona tuuina atu, pe faapaiaina, a latou meatotino i le Ekalesia, sa toe tuuina mai i aiga meatotino e tusa ai ma mea latou te manaomia. O lenei vaega na avea ma meatotino lava a le aiga ia. O aiga na avea ma tausimea i meatotino, ma sa faatagaina i latou e faaaoga pe a latou iloa e tatau ai, ae sa latou tali atu i le Atua mo le faaaogaina.
Liligi atu le vai mai le sioki, ma faatutumu ai ipu malamalama taitasi e tau i lona laina. Faamalamalama atu, i lalo o le tulafono o le faapaiaga, sa maua e aiga taitasi e tusa ma mea na manaomia ma manaoga amiotonu o le aiga. O nei faaiuga na faia e le epikopo ma le ulu o le aiga e fefautuaai faatasi. Sa iloa e aiga o lo latou anaina o meatotino, sa o se meaalofa mai le Alii, ma i le avea ai ma tausimea, sa latou tali atu i le faaaogaina o mea na tuuina atu ia i latou e atiina ae ai le malo o le Alii.
Faaali atu le vai o loo totoe i le sioki. Valaaulia lau tagata aoga e faitau leotele le Mataupu Faavae ma Feagaiga 42:33–35 ma vaai po o le a le mea na faia i “mea e totoe” po o se toega o meatotino na faapaiaina. Ona fai atu lea o fesili nei:
-
O le a le mea na faatonuina e le Alii le Au Paia e fai i meatotino na totoe, po o “vaega o totoe”? (Latou te faaaogaina e fesoasoani ai i e matitiva, faatupe ai fale o le Ekalesia, ma fesoasoani i tagata o le ekalesia o e sa manaomia le fesoasoani.)
-
Mai mea ua e aoaoina i le fuaiupu e 34, o le a sou manatu i le faatusa o le sioki? (O le faleteuoloa.)
Valaaulia lau tagata aoga e faitau leotele le Mataupu Faavae ma Feagaiga 42:38 ma vaai mo se upumoni o le a fesoasoani i tagata taitoatasi e mananao ai e ola i le tulafono o le faapaiaga, po o le a lava o latou tulaga. Ona fesili atu lea:
-
O le a le mataupu faavae na aoao mai e le Alii e uiga i le faia o mea lelei i isi? (O le tali e tatau ona tai faapei o le mataupu faavae lenei: A o tatou faia mea lelei i isi, ua tatou faia i le Alii. Mafaufau e fai atu i lau tagata aoga e faailoga le upumoni lenei i ana tusitusiga paia.)
-
E ono mafai faapefea e lenei upumoni ona fesoasoani i le Au Paia ia naunau e faapaiaina a latou meatotino? E mafai faapefea i le manatuaina o lenei mataupu faavae ona fesoasoani ia te oe i lou olaga?
-
O le a se taimi na e lagonaina ai sa e auauna atu i le Alii ina ua e faia se mea e fesoasoani ai i isi?
Faamalamalama atu, e ui lava e le o poloaiina i tatou e ola i le tulafono o le faapaiaga i le ala e tasi na faia e le Au Paia anamua, ae o loo faamalosia lava le tulafono i aso nei. Faitau leotele le faamatalaga lenei mai ia Peresitene Spencer W. Kimball, ma fai atu i lau tagata aoga e faalogologo po o le a le uiga mo i tatou i aso nei o le ola i le tulafono o le faapaiaga: “O le faapaiaga o le tuuina atu e se tagata o lona taimi, taleni, ma mea [o i ai] mo i latou e manaomia le fesoasoani—pe faaleagaga pe faaletino—ma i le fausiaina o le malo o le Alii” (“Welfare Services: The Gospel in Action,” Ensign, Nov. 1977, 78).
Atonu e te manao e uunaia lau tagata aoga e tusi lenei faauigaga i le laina o ana tusitusiga paia i autafa o le fuaiupu e 30. A uma ona e faitauina le faamatalaga mai ia Peresitene Kimball, ia fesili atu:
-
O a taimi, taleni, ma mea ua ia te oe e mafai ona e faaaogaina e fesoasoani ai ia i latou e manaomia le fesoasoani?
Faasoa atu se aafiaga e uiga i se taimi na faamanuiaina ai oe e se tasi na ofoina mai le taimi, taleni, po o mea na i ai e fesoasoani ai ia te oe. Faasoa atu lau molimau i le taua o le faia o mea lelei i isi. A uma loa, ia mautinoa e faafetai atu i lau tagata aoga mo le auai i lau lesona.
-
I lau api talaaga mo le suesueina o tusitusiga paia, tusi ai le igoa o le tagata na e aoaoina, faatasi ai ma le aso na e faamaeaina ai lenei galuega atofaina. Tusi se faamatalaga o se mea sa e manatu sa lelei i lau aafiaga faafaiaoga ae o le a foi se mea sa faigata. Ma le isi, faamatala pe na faapefea ona e lagonaina le faamanuiaina i le taimi na e ola ai i le mataupu faavae o le a o tatou faia mea lelei i isi, ua tatou faia i le Alii.
Mataupu Faavae ma Feagaiga 42:43-55
Ua tuuina mai e le Alii le fautuaga e faatatau i le oti ma le faamalologa
I le Mataupu Faavae ma Feagaiga 42:43–55 na aoao mai le Alii e uiga i le oti ma le faamalologa. Sa Ia faamalamalama mai o le oti e suamalie ia te i latou o e oti ia te ia ae oona ia i latou e le [oti ia te Ia]. Sa Ia fetalai mai foi, o i latou o e mamai e tatau ona “tausia ma le faapelepele atoa” (MF&F 42:43) ma maua se faamanuiaga faaleperisitua. O nisi o le a faamaloloina e ala i lo latou faatuatua ia Iesu Keriso (tagai i le MF&F 42:48).
Mataupu Faavae ma Feagaiga 42:56-69
Ua folafola mai e le Alii e faaali mai tusitusiga paia faaopoopo ma faaaliga ia Iosefa Samita
I le Mataupu Faavae ma Feagaiga 42:56–69, na iloa ai e le Perofeta o Iosefa Samita o le a faaauau pea ona tuuina mai e le Alii ia faaaliga a o faaauau pea ona ia saili atu i ai. Faitau le Mataupu Faavae ma Feagaiga 42:61, ma faailoa mai se mataupu faavae e uiga i le mauaina o faaaliga. O o tatou taitai i aso nei e taitai ma taiala le Ekalesia e ala i le mataupu faavae o faaaliga faifaipea.
-
Mataupu Faavae ma Feagaiga 42:70-87
Ua maua e taitai perisitua ni faatonuga i le taulimaina o tagata o le Ekalesia o e solia agasala matuia
O leMataupu Faavae ma Feagaiga 42:70–87 o loo i ai nisi o mataupu faavae autu ma tulafono e pulea ai aoaiga faale-Ekalesia. Faitau le Mataupu Faavae ma Feagaiga 42:78, ma faailoga le poloaiga a le Alii i tagata uma o le Ekalesia.
Mataupu Faavae ma Feagaiga 42:88-93
Ua faatonu e le Alii le Au Paia i le auala e foia ai ni faatausuaiga patino
Mafaufau i se taimi na e vaai ai i se tagata ua faatausuai i upu po o faatinoga a se isi tagata. Faitau le Mataupu Faavae ma Feagaiga 42:88–89, ma vaavaai mo faatonuga a le Alii i le mea e tatau ona tatou faia pe afai ua faatausua’i se tasi ia i tatou.
-
-
O le a le mea muamua e tatau ona tatou faia pe afai ua faatiga se tasi ia i tatou?
-
Aisea e te manatu ai e ono aoga lenei auala?
-
I le Mataupu Faavae ma Feagaiga 42:90–91 ua tatou iloa ai o nisi o agasala po o mea faatausuai ua iloa e le lautele, e manaomia ai se ta’uta’u atu po o se aoaiga talafeagai faalauaitele. I le Mataupu Faavae ma Feagaiga 42:92–93 tatou te aoaoina ai le mataupu faavae lenei: O mea faatiga e faia faalilolilo e tatau ona foiaina faalilolilo.
-
E manaomia le lototele e faafesagai ai ma se tagata na faatausuai ia te oe. Tatalo mo se fesoasoani mai le Tama Faalelagi a o e saili e foia soo se lagona le lelei o loo ono i ai ia te oe e uiga i isi.
-
Ua ou suesueina le Mataupu Faavae ma Feagaiga 42:30–93 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: