Iunite 31: Aso 4
Mataupu Faavae ma Feagaiga 138
Faatomuaga
I le aso 3 o Oketopa, 1918 na maua ai e Peresitene Iosefa F. Samita le faaaliga ua faamaumauina i le Mataupu Faavae ma Feagaiga 138. I lenei faaaliga na ia vaai ai i le Faaola toetu o auauna atu i agaga amiotonu o loo faatalitali mo le laveaiga mai noataga o le oti.
Mataupu Faavae ma Feagaiga 138:1–11
Ua mafaufau loloto Peresitene Iosefa F. Samita i mau ma le Togiola a Iesu Keriso
Pe ua i ai se tasi e pele ia te oe ua maliu, pe e te iloa se uo e i ai se tasi e pele ia te ia ua maliu? Pe a maliu se tagata, ua tuueseese le agaga ma le tino, ae alu lona agaga i le lalolagi o agaga. O le a sau vaaiga faalemafaufau e faapei le lalolagi o agaga?
Peresitene Iosefa F. Samita
Na maua e Peresitene Iosefa F. Samita, o le peresitene lona ono o le Ekalesia, se faaaliga e uiga i le lalolagi o agaga. Faitau le folasaga o le Mataupu Faavae ma Feagaiga 138, ma vaavaai mo le aafiaga o Peresitene Samita i masina a’o lumanai le konafesi aoao o Oketopa 1918.
I na masina sa mafatia ai Peresitene Iosefa F. Samita i le maliu o lona atalii o Ailama Maki Samita, o lē sa auauna o se tasi o le Korama a Aposetolo e Toasefululua. Na maliu Ailama Maki Samita i le amataga o le tausaga lena ina ua pa lona pitogaau i le 45 o ona tausaga.
Faitau le Mataupu Faavae ma Feagaiga 138:1–4, ma vaavaai mo le aoaoga faavae sa mafaufau loloto i ai Peresitene Iosefa F. Samita i le aso 3, o Oketopa, 1918.
I le fuaiupu e 4, tatou te aoao ai e mafai ona faaolaina tagata uma e ala i le Togiola a Iesu Keriso ma le usiusitai i mataupu faavae o le talalelei.
Faitau le Mataupu Faavae ma Feagaiga 138:5, ma vaavaai mo le mea na oo ia Peresitene Samita a o mafaufau loloto o ia i le Togiola.
Pe na i ai se taimi na oo atu ai i lou mafaufau se mau a’o e mafaufau loloto i se vaega o le talalelei? O le faaauau pea ona suesue i afioga a le Atua ma tauloto fuaitau autu o mau, o le a e iloa ai, e mafai e le Agaga Paia ona faamanatu atu ia te oe na mea pe a e manaomiaina.
Faitau le Mataupu Faavae ma Feagaiga 138:6–10, ma vaavaai mo aoaoga na faagaeetia ai Peresitene Samita.
Na susue e Peresitene Samita ana tusitusiga paia ma faitau mau o loo i le 1 Peteru 3 ma le 4. I nei mau na faamalamalama mai ai e Peteru e faapea, sa asiasi atu Iesu Keriso i le lalolagi o agaga ina ua mavae Lona maliu. Sa aoao atu e le Faaola le talalelei i le lalolagi o agaga ina ia mafai ona tutusa le faamasinoina o tagata.
Faitau le Mataupu Faavae ma Feagaiga 138:11, ma vaavaai mo le mea na vaai i ai Peresitene Samita a o ia mafaufau loloto i mau.
Ae e te lei aoao e uiga i le faaaliga a Peresitene Samita e uiga i le lalolagi o agaga, ia matau le faagasologa o faaaliga na ia faamatalaina: A o mafaufau loloto o ia i mau, sa tomanatu o ia i le aoaoga faavae o le Togiola ma le faamaoniaina o le alofa o le Tama Faalelagi ma Iesu Keriso i le afio mai o le Faaoa i le lalolagi. O nei manatu na oo mai ai i lona mafaufau ia upu a Peteru. Ma, a’o ia toe faitau ma mafaufau loloto i upu a Peteru, “sa tatalaina mata o [lona] malamalama” (MF&F 138:11), sa to’a le Agaga i ona luga, ma sa ia vaai ai i le lalolagi o agaga. O se tasi o mataupu faavae e mafai ona tatou aoao mai i lenei tala o le, a o tatou faitau ma mafaufau loloto i tusitusiga paia, ua tatou saunia i tatou lava ia maua faaaliga.
-
Tali fesili nei i lau api talaaga mo le suesueina o tusitusiga paia:
-
E faapefea ona fesoasoani le faitau ma le mafaufau loloto i tusitusiga paia i le valaaulia o faaaliga?
-
Faamatala se aafiaga i se taimi na e mulimuli ai i lenei mamanu i au suesuega o tusitusiga paia. Na faapefea ona suia e le mulimuli i lenei mamanu lou aafiaga i le suesueina o tusitusiga paia?
-
Na faamatala mai e Elder D. Todd Christofferson o le Korama a Aposetolo e Toasefululua, le auala e tatau ona tatou suesue ai i tusitusiga paia. A o e faitauina lana faamatalaga, ia faailoga soo se manatu e mafai ona e faaaogaina a o e suesue i tusitusiga paia.
“O lo’u fai atu e ‘suesue,’ o lona uiga, e sili atu nai lo le na ona faitau. … Ou te iloa o nisi taimi tou te faitauina ai ni nai fuaiupu, ona mafaufau lea i ai, ma toe faitau ma le faaeteete na lava fuaiupu, ma a o outou mafaufau pe o le a le uiga, tou te tatalo mo se malamalama, tuufesilisili i lou mafaufau, ma faatalitali mo ni lagona faaleagaga, ma tusitusi i lalo lagona ma malamalamaaga e oo mai ina ia mafai ai ona outou manatua ma aoao atili ai” (Pe a Liua Mai Oe,” Ensign po o le Liahona, Me 2004, 11).
Mafaufau e faatu se sini ia faitau ma mafaufau loloto i tusitusiga paia i le ala na faamatala mai e Elder Christofferson i lenei vaiaso.
Mataupu Faavae ma Feagaiga 138:12–24, 38–50
Ua vaai Iosefa F. Samita i e amiotonu ua maliliu o loo faatalitali i lo latou toetutu
O le a se mea e tupu i le lumanai e sili ona e tulimatai atu i ai? Aisea ua e fiafia i ai?
Ina ua vaai Peresitene Iosefa F. Samita i le lalolagi o agaga i se faaaliga vaaia, sa ia vaaia se vaega toatele o agaga o faapotopoto faatasi. Faitau le Mataupu Faavae ma Feagaiga 138:12–13, ma vaavaai po o a ituaiga o agaga sa faapotopoto faatasi. Atonu e te manao e faailoga mea e te maua.
Faitau le Mataupu Faavae ma Feagaiga 138:38–49, ma vaavaai mo igoa o nisi o tagata taitoatasi sa potopoto i lenei faapotopotoga.
Faitau le Mataupu Faavae ma Feagaiga 138:15–16, 50. O le a le ituaiga laveaiga sa faatalitali i ai nei agaga amiotonu? Mafaufau loloto mo sina taimi pe aisea o le a pei ai le toe faatasia o o latou agaga ma tino o se laveaiga mo nei agaga amiotonu.
Faitau le Mataupu Faavae ma Feagaiga 138:17 e iloa ai faamanuiaga e maua e agaga amiotonu pe a uma ona toe faatasi o latou agaga ma tino.
Mai le Mataupu Faavae ma Feagaiga 138:16–17, tatou te aoao ai aoaoga faavae nei: E ala i le alofa tunoa o le Atua le Tama ma Iesu Keriso, o le a laveaiina ai i tatou mai noataga o le oti. E mafai ona tatou maua le atoatoaga o le olioli e ala i le toetu.
A o e faitau le saunoaga lenei a Elder David A. Bednar o le Korama a Aposetolo e Toasefululua, vaavaai mo le mafuaaga e taua ai ona maua e o tatou tino se atoatoaga o le olioli:
“O o tatou tino faaletino ua mafai ai ona tatou maua se poto masani lautele, loloto, ma le maoae lea e le mafai ona maua i lo tatou i ai i le muai olaga. O le mea lea, o a tatou sootaga ma isi tagata, o lo tatou malosi e iloa ai ma faatino e tusa ai ma le upumoni, ma lo tatou tomai e usitai ai i mataupu faavae ma sauniga o le talalelei a Iesu Keriso e faateleina e ala i o tatou tino faaletino. …
“O le fuafuaga a le Tama ua mamanuina ina ia tuuina mai ai le taitaiga mo Ana fanau, e fesoasoani ai ia i latou ia fiafia, ma toe aumaia saogalemu i latou ia te Ia ma ni tino faaeaina” (Matou Te Talitonu i le Nofomama,” Ensign po o le Liahona, Me 2013, 41, 43).
Mafaufau e uiga i le fesili lenei mo sina taimi: Aisea tatou te manaomia ai se tino ina ia maua ai se atoatoaga o le olioli?
O se atoatoaga o le olioli o le ituaiga olioli o loo maua e le Tama Faalelagi. O loo i ai i le Tama Faalelagi se tino faitino o aano ma ivi (tagai i le D&C 130:22). A tuueseese o tatou agaga ma tino, tatou te le pei o Ia ma e le mafai ona maua se atoatoaga o le olioli (tagai i le MF&F 93:33–34). A o tatou avea e faapei o Ia, e mafai ona tatou mauaina na lava foi faamanuiaga, filemu, ma le olioli o loo Ia mauaina.
Faitau le Mataupu Faavae ma Feagaiga 138:51–52, ma vaavaai mo fuaitau faaopoopo o loo faamatala mai ai mea o le a mafai e le toetutu ona faatagaina agaga amiotonu e fai. Mafaufau e faailoga mea e te mauaina.
-
O tagata amiotonu i le lalolagi o agaga sa faatalitali mo le “afio atu”, po o le taunuu atu, o le Alo o le Atua e faasaolotoina i latou ma toefuatai i latou i o latou “autino atoatoa” (MF&F 138:16–17). Vaai faalemafaufau i mea na tutupu i le lalolagi a’o faapotopoto faatasi nei agaga amiotonu. Sa puapuagatia Iesu Keriso i Ketesemane ma luga o le satauro. O nisi o agaga amiotonu i le lalolagi o agaga sa faatalitali mo le faitau afe o tausaga mo lo latou laveaiga mai le oti. O le taulaga a Iesu Keriso na tuuina atu ai mo i latou le faaolataga mai le oti faaletino, ma ua faapena foi mo tagata uma.
Faitau le Mataupu Faavae ma Feagaiga 138:18–24, ma vaai faalemafaufau pe na faapei le mea na tupu o loo faamatalaina i nei fuaiupu.
-
-
Mata o a ni ou manatu po o ni lagona e i ai pe ana e i ai iina e faalogo i le aoao atu a le Faaola i le lalolagi o agaga?
-
Mata e faapei sau tali atu i le Faaola, o le sa le’i leva atu lava ona faataunuuina le Togiola mo oe?
-
Mataupu Faavae ma Feagaiga 138:25-37
Ua aoao Peresitene Iosefa F. Samita i le ala e talai atu ai le talalelei i le lalolagi o agaga
Atonu na e matauina i le Mataupu Faavae ma Feagaiga 138:20–22 sa i ai nisi o agaga sa le mafai ona vaai i le Faaola ina ua Ia asiasi atu i le lalolagi o agaga. A o mafaufau loloto Peresitene Iosefa F. Samita i fuaitau i le 1 Peteru, sa faaali mai e le Alii ia te ia le auala o le a maua ai e agaga i le falepuipui le avanoa e maua ai faamanuiaga o le talalelei. Faitau le Mataupu Faavae ma Feagaiga 138:29–31, ma vaavaai pe o le a faapefea ona maua e agaga i le falepuipui le malamalama o le talalelei. Atonu e te manao e faailoga mea e te maua.
-
I le Mataupu Faavae ma Feagaiga 138:32–37, na tusia ai e Peresitene Iosefa F. Samita sa ia vaaia le talalelei a Iesu Keriso o aoao atu i ni ituaiga agaga se lua i le falepuipui: o i latou o e na maliliu e aunoa ma se malamalama o le talalelei ma i latou o e na teena perofeta i le olaga nei. O nei agaga, o e sa i le falepuipui o agaga, o le a maua uma se avanoa e salamo ai ma talia le talalelei e ala i aoaoga a avefeau filifilia a le Alii.
Mataupu Faavae ma Feagaiga 138:53-60
Ua vaai Peresitene Samita i agaga tamalii ma le tautaua o e o le a talai atu le talalelei i le falepuipui o agaga
Mafaufau i tagata amiotonu o lou aiga po o tuaa o e ua maliliu. Pe na i ai se taimi na e mafaufau ai po o a a latou mea o fai i le lalolagi o agaga?
O se vaega o le faaaliga, sa vaai ai Peresitene Iosefa F. Samita i lona tama, o Ailama Samita; i le uso o lona tama o Iosefa Samita; ma isi agaga filifilia. O nei agaga tamalii uma sa saofaga i le galuega a le Alii i le olaga nei. Sa saunia i latou ma isi e toatele a o lei fananau mai i latou e faataunuu ni mea maoae i le lalolagi.
Faitau le Mataupu Faavae ma Feagaiga 138:57, ma vaavaai mo mea o le a faaauau ona faia e toeaina faamoani pe a latou maliliu. Atonu e te manao e faailoga mea e te maua.
Na faamalamalama mai foi e Peresitene Iosefa F. Samita e faapea, o le galuega i le lalolagi o agaga e le faatapulaaina ia i latou o e umia le Perisitua Mekisateko: “O tuafafine lelei o e ua uma ona vaetofia, faauuina i le galuega, [ma] valaauina i ai, … o le a faatagaina atoatoa ma tuuina i ai le pule e talai atu le talalelei” (Gospel Doctrine, 5th ed. [1939], 461).
O se tasi o upumoni ua tatou aoao mai i le Mataupu Faavae ma Feagaiga 138:57 ma le saunoaga a Peresitene Samita o le, a uma ona tuua lenei olaga faitino, o le a faaauau e le Au Paia faamaoni a latou galuega o le talaiina atu o le talalelei.
Faitau le Mataupu Faavae ma Feagaiga 138:60, ma vaavaai mo le molimau a Peresitene Iosefa F. Samita e uiga i upumoni sa ia faamaumauina.
O se faamanuiaga matagofie le iloa o le a maua e le fanau uma a le Tama Faalelagi se avanoa e talia ma ola ai i le talalelei. O galuega tatou te faia mo e ua maliliu i totonu o le malumalu, e tuu atu ai ia i latou le gafatia e faamamaina ai mai a latou agasala, togiolaina ai mai le falepuipui o agaga, ma auai i le galuega tele o le togiola i le lalolagi o agaga.
-
Ua ou suesueina le Mataupu Faavae ma Feagaiga 138 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: