Iunite 28: Aso 3
Mataupu Faavae ma Feagaiga 131
Faatomuaga
O leMataupu Faavae ma Feagaiga 131 o loo i ai se tuufaatasiga o mataupu faavae na aoao mai e le Perofeta o Iosefa Samita ao i ai i Ramese, Ilinoi, i le aso 16-17 o Me, 1843. Sa ia aoao mai e uiga i le feagaiga fou ma tumau-faavavau o le faaipoipoga ma le folafolaga o le ola e faavavau mo e faamaoni. Sa ia aoao mai foi o agaga uma o se mea e tino.
Mataupu Faavae ma Feagaiga 131:1–4
Ua aoao mai Iosefa Samita e uiga i le taua o le feagaiga o le faaipoipoga e faavavau
Aisea ua tuuina ai e le Alii ma taitai o le Ekalesia le faamamafaga tele i le faaipoipo i le malumalu? O leMataupu Faavae ma Feagaiga 131 e fesoasoani tatou te taliina ai lena fesili. E faapena foi i le Mataupu Faavae ma Feagaiga 132, lea o le a e suesueina i le lesona e sosoo ai.
I le aso 16 o Me, 1843, sa malaga atu ai le Perofeta o Iosefa Samita i Ramese, Ilinoi. A o nofo ai i le maota o Peniamina ma Melissa Johnson, sa ia faatinoina ai lo laua faamauga o se tane ma se ava mo le faavavau (sa faatagaina lenei sauniga mo se taimi le tumau seia oo ina ua maea le malumalu). Sa ia aoaoina foi i laua i le auala e fesootai ai le faaipoipoga e faavavau i le malo selesitila. O nei upumoni o loo faamaumauina i le Mataupu Faavae ma Feagaiga 131:1–4. (Tagai i le History of the Church, 5:391–92.)
Faitau le Mataupu Faavae ma Feagaiga 131:1, ma vaavaai mo se upumoni na faaali mai e le Perofeta e uiga i le malo selesitila. Ona faauma lea o le fuaiupu lenei: O loo i ai lagi po o tikeri i totonu o le malo selesitila.
E masani ona tatou ta’ua le mauaina o le tikeri o le mamalu aupito maualuga i totonu o le malo selesitila o le faaeaga po o le ola e faavavau. O i latou o e maua lenei tikeri o le mamalu selesitila, o le a ola i le ituaiga ma le tulaga soifuaga o loo soifua ai lo tatou Tama Faalelagi.
Faitau le Mataupu Faavae ma Feagaiga 131:2–4, ma vaavaai mo le mea e ao ona tatou faia ina ia maua ai le tikeri aupito maualuga o le malo selesitila. (O leMataupu Faavae ma Feagaiga 131:1–4 o se mau tauloto. (Atonu e te manao e faailoga nei fuaiupu i se ala e iloagofie ai ina ia faigofie ona e mauaina i se taimi mulimuli ane.)
Mai mea ua e aoaoina i le fuaiupu e 2, faauma le faamatalaga faaleaoaoga faavae lenei: Ina ia mafai ona maua le tikeri aupito maualuga o le malo selesitila, e tatau ona tatou ulu atu i le .
I le Mataupu Faavae ma Feagaiga 131:4, tatou te aoao ai afai e le faamauina i matou i le malumalu i le pule tatau, tatou te “le mafai ona maua se faatelega.” O lefaatelega e faatatau i le avanoa e faaauau ai ona maua fanau i le malo selesitila.
Ia matau le fuaitau “feagaiga fou ma tumau-faavavau o le faaipoipoga” i le fuaiupu e 2. O le upu fou i le tulaga lea o lona uiga, o lenei feagaiga na faatoa uma ona toefuatai mai i lo tatou tisipenisione. O le faaupuga tumau-faavavau o lona uiga, o lenei feagaiga taua o le a tumau i le faavavau atoa. E na o totonu lava o le malumalu tatou te ulu atu ai i lenei feagaiga o le faaipoipoga faaselesitila.
O a ni auala e te manatu e saunia ai e le faaipoipoga faaselesitila i le va o se alii ma se tamaitai i laua mo le faaeaga? Na tuuina mai e Elder David A. Bednar o le Korama a Aposetolo e Toasefululua nisi o manatu taua e uiga i lenei fesili. A o e faitau i le mea na ia aoao mai, faailoga upu po o fuaitau o loo faamalamalama mai ai le auala e fesoasoani ai le faaipoipoga faaselesitila e saunia i tatou mo le ola e faavavau.
“E lua ni mafuaaga faavae malolosi e fesoasoani ai ia tatou malamalama pe aisea ua taua ai le faaipoipoga faavavau i le fuafuaga a le Tama.
“Mafuaaga 1: O natura o le agaga tane ma le fafine e atoa ai ma faaatoatoaina e le tasi le isi, ma o le mea foi lea, ua faamoemoe ai i alii ma tamaitai ina ia agai faatasi atu i luma i le faaeaga. …
“O le mamanu paia, ua fuafuaina alii ma tamaitai ina ia aga’i atu faatasi i luma i le faatoatoaga ma se atoaga o le mamalu. Ona o o la’ua natura ma mana tulaga ese, o lea e tofu aumaia ai e tane ma fafine i se sootaga o le faaipoipoga ia vaaiga ma aafiaga iloga. E eseese sao o le tane ma le fafine, ae e tutusa lava [o laua sao] ina ia tasi ma se faatasiga e leai se isi lava auala e mafai ai. O le tane e faaatoa ma atoatoa ai le fafine, ae o le fafine e faaatoa ma atoatoa ai le alii, a o laua aoao mai, ma faamalosia faatasi, ma faamanuia e le tasi le isi. …
“Mafuaaga 2: O le mamanu paia, e manaomia uma ai se alii ma se tamaitai e aumaia fanau i le lalolagi ma saunia se nofoaga sili mo le tausiaina ma le faafaileleina o le fanau …
“O se aiga e i ai se tane ma se ava e alolofa ma faamaoni, o se nofoaga sili lea e mafai ona tausia ai fanau i le alofa ma le amiotonu, ma e mafai ona taulima ai manaoga faaleagaga ma faaletino o le fanau. E pei lava foi ona tofu sao uiga tulaga ese o alii ma tamaitai i le faaatoatoaina o se mafutaga faalefaaipoipoga, e faapena foi ona taua na lava uiga i le tausiga, faafaileleina, ma le aoaoina o fanau” (“E Taua le Faaipoipoga i Lana Fuafuaga Faavavau,” Ensign June 2006, 83–84; po o le Liahona, Iuni 2006, 51–52).
-
Tali fesili nei i lau api talaaga mo le suesueina o tusitusiga paia:
-
E mafai faapefea e le malamalama i le aoaoga faavae o le, e manaomia le faaipoipoga faaselesitila mo le faaeaga, ona aafia ai mea e te vaavaai i ai mo se toalua i le lumanai?
-
Aisea e taua ai i lou matua ona fai o se mea e faamuamua le saunia ia maua “le feagaiga fou ma tumau-faavavau o le faaipoipoga” (MF&F 131:2) i le malumalu?
-
O faamanuiaga o le faaeaga e avanoa mo i latou e le maua le avanoa mo se faaipoipoga faaselesitila i lenei olaga: “O nisi tagata o le Ekalesia o le a nofo toatasi pea e aunoa ma se mea e sese ai i latou, e ui lava latou te mananao e faaipoipo. Afai o i ai oe i lea tulaga, ia mautinoa e ‘galulue faatasi mea uma e lelei ai i latou o e ua alofa atu i le Atua’ (Roma 8:28). A tumau pea ona e agavaa, o le a i ai se aso, i lenei olaga po o le olaga a sau, o le a tuuina atu ai ia te oe faamanuiaga uma o se sootaga o se aiga e faavavau. Ua tuuina mai e le aunoa e le Alii lenei folafolaga e ala mai i Ana perofeta o aso e gata ai” (Faamaoni i le Faatuatua: O Se Tusitaiala o le Talalelei [2004],40-41).
Mau Tauloto—Mataupu Faavae ma Feagaiga 131:1–4
-
Mataupu Faavae ma Feagaiga 131:5-6
Ua faamalamalama mai e Iosefa Samita le “upu sili atu ona mautinoa o le valoaga”
O se faamaoniga o se folafolaga po o se faamautinoaga o le a faia se mea i le lumanai.
Mafaufau i fesili nei: O a ni mea e lelei ai le i ai o se faamaoniga? Aisea o le a faapitoa ai le taua o se faamaoniga mai le Tama Faalelagi?
I Ramese, Ilinoi, i le taeao o le aso 17 o Me, 1843, na tuuina atu ai e le Perofeta o Iosefa se lauga e uiga i se fuaitau o loo maua i le 2 Peteru 1:19 ua faatusa i se faamaoniga mai le Atua (tagai i le Talafaasolopito o le Ekalesia, 5:392). Su’e i le 2 Peteru 1:19, ma sue le fuaitau “upu o le valoaga e sili lona mausali.” Ona faitau lea o le Mataupu Faavae ma Feagaiga 131:5 ina ia malamalama ai i le uiga o le “upu o le valoaga e sili lona mausali.”
-
O nisi tagata latou te maua lenei faamautinoaga o le ola faavavau a’o i ai pea i le olaga nei. O nisi taimi tatou te vaai ai i fuaitau i tusitusiga paia e faaalia ai le tuuina mai e le Alii o lenei faamaoniga i ni tagata faapitoa. Mo se faataitaiga, na faailoa mai e le Alii lenei faamautinoaga ia Iosefa Samita i le Mataupu Faavae ma Feagaiga 132:49 ma Alema i le Mosaea 26:20. Ae peitai, o se mataupu patino lava lenei i le va o se tagata ma le Alii; e tatau ona tatou taumatemate e uiga i tagata taitoatasi o e ua mauaina le “upu sili atu ona mautinoa o le valoaga.”
Faitau le Mataupu Faavae ma Feagaiga 131:6, ma vaavaai mo se mea o le a faapea ona taofia ai se tasi mai le mauaina o le ola e faavavau.
O le a le saunoaga a le Perofeta o Iosefa Samita i le mea o le a faigata ai i se tagata ona faaolaina, pe maua le ola e faavavau? Faauma le mataupu faavae lenei: E le mafai ona faaolaina i tatou .
Sa tuuina mai e Peresitene Marion G. Romney o le Au Peresitene Sili, se faamalamalamaga o le uiga o lenei mea: “O le malamalama e uiga ‘i le Atua moni e toatasi, ma Iesu Keriso’ (Ioane 17:3) o le malamalama lea ua sili atu ona taua i le atulaulau; o le malamalama lea na saunoa mai le Perofeta o Iosefa Samita, a leai e le mafai ona faaolaina se tagata. O le aunoa ma lea malamalama, o le valea lena ua faatatau i ai upu o le faaaliga o loo tusia ai: ‘E lē mafai lava ona faaolaina se tagata i le lē iloa.’ (MF&F 131:6.)” (“A Le Toe Fanau le Tagata,” Liahona, Ian. 1982, 22).
-
-
O le a le ituaiga malamalama e tatau ona tatou maua ina ia mafai ona maua le ola e faavavau? Aisea e te manatu, e taua ai lenei ituaiga o malamalama mo le faaolataga?
-
O a ni mea e te faia e faateleina ai lou malamalama i le Tama Faalelagi ma Iesu Keriso?
-
Mataupu Faavae ma Feagaiga 131:7-8
Ua aoao mai Iosefa Samita o agaga uma o se mea e tino
Faitau le Mataupu Faavae ma Feagaiga 131:7–8, ma vaavaai po o a mea o loo aofia ai i le agaga.
Ua aoao mai nei fuaiupu, o foafoaga uma o loo aofia ai se mea e tino, ae o mea e tino o le agaga “ua sili atu ona lelei pe mamā” (MF&F 131:7). O mea e tino o mea ia e gaosi ai mea faitino. Na faamalamalama mai e le Perofeta o Iosefa Samita, o o tatou agaga ua faia i mea ua sili atu ona lelei pe mamā, e le mafai ona vaaia i o tatou mata e aunoa ma le fesoasoani a le Alii.
-
Ua ou suesueina le Mataupu Faavae ma Feagaiga 131 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: