Iunite 7: Aso 2

Mataupu Faavae ma Feagaiga 27

Faatomuaga

O Ema Samita ma isi e toa 12, e aofia ai Newel Knight ma lona faletua o Sally, na papatisoina i le aso 28 o Iuni, 1830, i Colesville, Niu Ioka. Ae ui i lea, sa le’i faamauina o latou papatisoga, ona sa faasalavei e se vaega faatupu vevesi o le lotoifale le sauniga ma taofia ai le Perofeta o Iosefa Samita “i moliaga o le avea ma se tagata amio le pulea, i le faaosoina o le atunuu i se faanunununu e ala i le talaiina atu o le Tusi a Mamona, ma isi lava mea.” (tagai i le History of the Church, 1:87–88.) Sa le faamaonia moliaga uma o Iosefa, ae sa taumafai lava tagata faatupu vevesi e taofia mai o ia mai Colesville seia oo ia Aokuso 1830, lea na iu lava ina mafai ai ona ia faamauina le toatele o tagata fou liliu mai. Ona toe foi atu ai lea o Iosefa Samita i lona aiga i Haramoni, Penisilevania.

I le amataga o Aokuso 1830, na malaga atu ai Newel Knight ma lona faletua i Haramoni e asiasi ia Iosefa ma Ema Samita. Ona o le taimi lea e le’i faamauina lava [papatisoga] o Sally Knight ma Ema, o lea na tonu ai o le a faamauina o laua [papatisoga], ma o i latou sa faapotopoto atu o le a aai ma feinu faatasi i le faamanatuga. A’o agai atu o ia e aumai se uaina mo le faamanatuga, sa feiloai ai le Perofeta o Iosefa ma se avefeau faalelagi ma maua ai le faaaliga o loo i le Mataupu Faavae ma Feagaiga 27 (tagai i le History of the Church, 1:106).

Mataupu Faavae ma Feagaiga 27:1–4

Na tuuina mai e le Alii ia faatonuga e faatatau i faatusa o le faamanatuga

O le a sou manatu pe a e vaai o faaaoga pa’u pateta mo le faamanatuga?

Sa asiasi atu Peresitene Ezra Taft Benson i Europa na faatamaia e taua i le faatoa mavae ai o le Taua Lona II a le Lalolagi. I le taimi lena, sa le lava ni meaai, ma o le toatele o tagata sa tauivi tau lava ina ia feola. O le leai o ni meaai sa talafeagai ai i tagata o le Ekalesia ona fetuunai mea na latou faaaogaina o se vaega o le faamanatuga. Na ta’ua e Peresitene Benson: “E le mafai ona galo ia te a’u le Au Paia i Farani o e, na le mafai ona maua se falaoa, ae na faaaogaina pa’u pateta mo faatusa o le faamanatuga” (“Prepare for the Days of Tribulation,” Ensign, Nov. 1980, 33–34)

1. Faitau le Mataupu Faavae ma Feagaiga 27:1–2, ma faailoa mai po o le a le mea na ta’u mai e le agelu ia Iosefa Samita e uiga i faatusa o le faamanatuga. I lau api talaaga mo le suesueina o tusitusiga paia, tali ai fesili nei:

   1. Aisea e te manatu na taliaina ai i le tulaga o le Au Paia i Farani, e faaaoga se mea e ese mai i le areto e fai ma faatusa o le faamanatuga?

   2. E tusa ai ma le Mataupu Faavae ma Feagaiga 27:2, o le a le mea e tatau ona tatou taulai atu i ai a o tatou aai ma feinu i le faamanatuga?

Faauma le mataupu faavae lenei e ala i le faatumuina o avanoa: A o tatou fetagofi atu i le , e tatau ona tatou le taulaga togiola a Iesu Keriso.

2. Tali fesili nei i lau api talaaga mo le suesueina o tusitusiga paia:

   1. O le a sou manatu, o le a le uiga o le aai ma feinu i le faamanatuga “ma le manatu tasi i le mamalu o le [Atua]”?

   2. E mafai faapefea ona e manatuaina atoatoa le Togiola a le Faaola a o e ai ma inu i le faamanatuga?

I le Mataupu Faavae ma Feagaiga 27:3–4 na lapataia ai e le Alii ia Iosefa Samita e aua le faaaogaina le uaina po o meainu malolosi (soo se meainu e ono ona ai) mo le faamanatuga pe afai na faatauina mai i o latou fili. E na o le uaina lava na fai mai e le Au Paia e mafai ona faaaogaina (o lenei faatonuga na sili atu ma le lua tausaga a’o lei faaalia mai le Upu o le Poto [MF&F 89]). O aso nei, ua faaaogaina i le faamanatuga le vai nai lo o le uaina.

Mataupu Faavae ma Feagaiga 27:5–14

O le a toe taumafa le Alii i le faamanatuga i le lalolagi

Mafaufau loloto pe ono faapefea ona ese lou aafiaga o le tago atu i le faamanatuga pe ana faapea sa e faia lena mea a o i ai le Faaola.

Ina ua faalauiloa mai e le Faaola le sauniga o le faamanatuga i Ana Aposetolo i le Talisuaga Mulimuli, sa Ia vavalo e uiga i se taimi o le a Ia toe foi mai ai i le lalolagi ma toe talisua i le faamanatuga faatasi ma Ona soo (tagai i le Mataio 26:26–29).

I le talafaasolopito atoa ua tuuina mai ai e le Alii le pule o le perisitua i alii amiotonu e fesoasoani e faatautaia ai sauniga o Lana talalelei. Ua Ia tuuina mai foi ki o le perisitua i taitai perisitua ina ia mafai ona latou taitaia, faatautaia, ma pulea le faaaogaina o Lana perisitua i le lalolagi.

3. I le Mataupu Faavae ma Feagaiga 27:5–12 tatou te aoao ai e uiga i nisi o i latou o e o le a auai i lenei sauniga faamanatuga faatasi ma Iesu Keriso. Faitau fuaiupu nei, ma i lau api talaaga mo le suesueina o tusitusiga paia, fai se lisi o tagata taitasi o le a auai i lenei sauniga ma, pe afai o ta’ua ai, o a ki po o tiutetauave o ia i latou.

Faitau le Mataupu Faavae ma Feagaiga 27:13, ma faailoa mai po o a ki na tuuina mai e le Alii i le Perofeta o Iosefa Samita. Atonu e te manao e faailoga le fuaitau “tisipenisione o le talalelei mo le taimi mulimuli; ma mo le atoaga o taimi.” Mai lenei fuaiupu ua tatou iloa ai o le tisipenisione o le atoaga o taimi e aumai faatasi uma ai ki o le talalelei, sauniga, ma upumoni o tisipenisione ua mavae.

O se tisipenisione, o se periota o taimi na faaali mai ai e le Alii aoaoga ma mataupu faavae o le talalelei, ma le perisitua. O se periota “sa [filifilia] ai e le Alii e le itiiti ifo i le toatasi se auauna faatagaina i le lalolagi e taulimaina le perisitua paia ma ki, ma ua i ai le tiute paia e faasalalau atu le talalelei i e e nonofo i le lalolagi. Pe a tupu lenei mea, e fou le toe aumaiga o le talalelei, ina ia le faalagolago ai tagata o lena tisipenisione i tisipenisione ua mavae, e uiga i le malamalama i le ata o le faaolataga” (Bible Dictionary, “Dispensations”).

O lo tatou tisipenisione o le tisipenisione mulimuli. E masani lava ona ta‘ua “o le tisipenisione o le atoaga o taimi” aua o ki uma o le perisitua ua faaali mai e le Alii mo le faamanuiaina o Lana fanau ua toefuataiina mai (tagai i le Efeso 1:10). O le Perofeta o Iosefa Samita o le faaao, po o le taitai, o lenei tisipenisione o le talalelei, e pei lava o Atamu, Enoka, Noa, ma Mose o faaao o isi tisipenisione o le talalelei.

Faitau le Mataupu Faavae ma Feagaiga 27:14, ma faailoa mai po o ai isi o le a i ai i le sauniga faamanatuga faatasi ma le Faaola.

O ai e te manatu o loo faatatau i ai le fetalaiga a le Faaola, “o e ua tuuina mai e loʼu Tamā ia te aʼu mai le lalolagi”?

Na ta‘ua e Elder Bruce R. McConkie: “Soo se tagata faamaoni i le talafaasolopito atoa o le lalolagi, o tagata uma o e sa ola ina ia maua le ola faavavau i le malo o le Tama, o le a auai ma o le a aai ma feinu, faatasi ma le Alii, i le faamanatuga” (The Promised Messiah: The First Coming of Christ1978], 595).

4. Tusi lou igoa i lalo o le lisi o i latou ua uma ona e tusia o latou igoa i lau api talaaga mo le suesueina o tusitusiga paia. Ona tali lea o le fesili lenei: O a ni ou lagona, i le iloaina e te ono auai i lenei sauniga faamanatuga faatasi ma le Alii?

Mataupu Faavae ma Feagaiga 27:15–18

Ua poloaiina e le Alii Lona nuu e ofu i le ofutau atoatoa o le Atua

O leMataupu Faavae ma Feagaiga 27:15–18 o loo i ai fautuaga o le a fesoasoani ia tatou agavaa e maua faamanuiaga a le Alii, e aofia ai le faamanuiaga o le auai i le sauniga faamanatuga o loo ta‘ua i fuaiupu e 4–14.

O a ni ofu e te manao e fai pe afai na e iloa o le a e alu i le taua?

5. Faitau le Mataupu Faavae ma Feagaiga 27:15ma tali fesili nei i lau api talaaga mo le suesueina o tusitusiga paia:

   1. O a mea na fautuaina i tatou e le Alii e fai e sauniuni ai mo a tatou taua faaleagaga?

   2. Na folafola mai e le Alii, afai tatou te ave i o tatou luga le ofutau atoatoa o le Atua, o le a mafai ona tatou talitalia le aso leaga. O le a sou manatu i le mea ua faatatau i ai “le aso leaga”? O le a sou manatu i le uiga o le “tutumau” i lena vaitaimi?

Suesue le Mataupu Faavae ma Feagaiga 27: 15–18, ma faaigoa vaega taitasi o le ofutau o loo i le ata i upu ma fasifuaitau mai na fuaiupu.

6. Tali fesili nei i lau api talaaga mo le suesueina o tusitusiga paia:

   1. Aisea e te manatu ai ua valaaulia i tatou e le Alii e fai le ofutau atoatoa o le Atua?

   2. E mafai faapefea e uiga auaumama e fesootai ma vaega taitasi o le ofutau ona puipuia i tatou mai faaosoosoga ma mea leaga?

   3. O a ni auala na e lagonaina ai le puipuiga i lou olaga a o e saili e faamaulu le ofutau o le Atua?

Mafaufau loloto i mea e mafai ona e faia e faamaulu atoa ai le ofutau atoatoa o le Atua, e ala i le mafaufau po o a itu o lou olaga e manaomia ona e faaleleia atili.

7. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

   Ua ou suesueina le Mataupu Faavae ma Feagaiga 27 ma faamaeaina lenei lesona i le (aso).

   O fesili, mafaufauga, ma manatu faaopoopo ou te fia faasoa atu i lo’u faiaoga: