Mataupu Faavae ma Feagaiga 51–52

Faatomuaga

A o amata ona taunuu mai i Ohaio ia Me o le 1831, ia nisi o le Au Paia na malaga mai setete i matu, sa faaali mai e le Alii Lona finagalo ia Epikopo Eteuati Paterika e ala i le Perofeta o Iosefa Samita. I lena faaaliga, o loo tusia i le Mataupu Faavae ma Feagaiga 51, o le Au Paia na taunuu mai Colesville, Niu Ioka, sa faasino atu e o i Tomasone, Ohaio, lea o le a latou ola ai i le tulafono o le faapaiaga. O le faapaiaga ma le tausimea o mataupu faavae ma tulafono ia e faavae ai i luga se nuu o Siona. O le Kamupani Tuufaatasi (lea na taua mulimuli ane o le Faatulagaga Tuufaatasi) o le faalapotopotoga lea sa faaaogaina e vaaia lena tulafono i na taimi. I le faaiuga o le konafesi lona fa a le Ekalesia sa faia i le aso 3-6 o Iuni, 1831, i Katelani, Ohaio, na poloaiina ai e le Alii ia Iosefa Samita ma isi alii faifeautalai e malaga taitoalua i Misuri, ma talai atu i le ala. I le faaaliga o loo faamaumauina i le Mataupu Faavae ma Feagaiga 52, na valaauina ai e le Alii ia soa taitasi ma tuuina mai se mamanu e fesoasoani ia i latou e aloese ai mai le faaseseina.

Mataupu Faavae ma Feagaiga 51

Ua faatonu e le Alii ia Epikopo Eteuati Paterika e talanoa e uiga i manaoga faaletino o le Au Paia

O le a le vaega sili ona lotogatasi na avea ai oe ma se vaega? E faapefea ona e iloa po o lotogatasi se vaega o tagata? O a ni ituaiga faiga po o mea e tutupu e fesoasoani i se vaega ina ia lotogatasi?

A o taunuu atu le Au Paia i Ohaio, sa faaali mai e le Alii ia i latou le tulafono o le faapaiaga (tagai i le Mataupu Faavae ma Feagaiga 42:30–42). I lalo o lenei tulafono, e volentia ai alii ma tamaitai e tuuto atu o latou taimi, taleni, ma oa o le lalolagi i le faatuina ma le atiina ae o le malo o le Atua. Faitau le folasaga o le vaega o le Mataupu Faavae ma Feagaiga 51, ma vaavaai mo le mea na nafa Epikopo Eteuati Paterika ma le faiga e faatatau i lenei tulafono.

O le Mataupu Faavae ma Feagaiga 51:1–8 o loo i ai faatonuga mai le Alii ia Epikopo Paterika e uiga i le Au Paia fai mai. Sa fofoga mai e le Alii ia Epikopo Paterika e “tofia i lenei nuu a latou vaega” o fanua ma mea e faaaoga “e tusa ai ma [o latou] tulaga ma [o latou] manaoga ma mea ua tatau ai mo [i latou]” (MF&F 51:3). (Manatua o se tasi o faauigaga o le upu manaoga o le le o maua o se mea. (O le poloaiga a le Alii ia galulue “e tusa ai ma manaoga o tagata” sa o se poloaiga e fesoasoani ai i tagata ia maua mea e manaomia latou te lei mauaina.) Na tatau ia Epikopo Paterika ona tuuina fanua ia anaina atoa e aiga ma ia mautinoa na lava meaai ma lavalava na i ai a tagata uma.

Na faamalamalama mai e le Alii le auala e tatau ona galulue ai le Au Paia a’o ola i le tulafono o le faapaiaga. Faitau le Mataupu Faavae ma Feagaiga 51:9, ma vaavaai mo faatonuga a le Alii i le Au Paia.

Tali fesili nei i lau api talaaga mo le suesueina o tusitusiga paia:
1. O le a le uiga i se vaega o tagata o le “ia tasi”? (Atonu e te manao e faitau le Mose 7:18 mo se fesoasoani i le taliina o lenei fesili.)
2. E tusa ai ma le Mataupu Faavae ma Feagaiga 51:9, o le a le mea na faatonu e le Alii le Au Paia e fai ina ia maua le lotogatasi? O le a sou manatu i le uiga o le “ia tutusa” ma le “maua tutusa”?

A o e faitauina le Mataupu Faavae ma Feagaiga 51:10–20, o le a e iloa ai, na faatonuina e le Alii ia Epikopo Paterika e faatu se faleteuoloa lea e mafai ona teu ai e le Au Paia ni oloa faasili. Na folafola mai le Alii, o le ola ai i le tulafono o le faapaiaga o se faamanuiaga. Sa ia fetalai mai, e ui o le a nonofo le Au Paia i o latou fanua mo na o sina taimi puupuu, ae e tatau ona latou fuafua ia faamaoni, atamamai, ma avea ma ni tausimea amiotonu i mea ua tuuina atu ia i latou.

Mataupu Faavae ma Feagaiga 52:1–13, 22–34

Ua poloaiina e le Alii le Perofeta ma le isi alii faifeautalai e malaga i Misuri, ma ia talai atu le talalelei i le taimi o la latou malaga

I le Mataupu Faavae ma Feagaiga 52:1–13, 22–34 na faatonuina ai e le Alii le Perofeta o Iosefa Samita ma isi alii faifeautalai e malaga ai taitoalua i Misuri, ma ia talai atu i le ala. Sa faaali muamua mai e le Alii e faapea, o le a faatuina e le Au Paia se nuu lotogatasi e ta’ua o Siona (tagai i le MF&F 28:9), ae sa Ia le faaalia mai lona nofoaga. I le faaaliga o loo faamaumauina i le Mataupu Faavae ma Feagaiga 52, sa Ia folafola mai ia te i latou, afai sa faamaoni Iosefa Samita ma Sini Rikitone i Ana faatonuga, o le a Ia faaali mai ia i la’ua le nofoaga “o le laueleele o [le] tofi [o le Au Paia]” (MF&F 52:5).

Mataupu Faavae ma Feagaiga 52:14-21, 35-36

Ua faaali mai e le Alii se mamanu e fesoasoani tatou te aloese ai mai le faaseseina e Satani

I le faaaliga o loo faamaumauina i le Mataupu Faavae ma Feagaiga 50, na lapataia ai e le Alii nisi o toeaina o le Ekalesia, e uiga i agaga sese ma tuuina mai ni faatonuga o le a fesoasoani i le Au Paia e faamalamalama ai e le tasi le isi, a o latou aoao atu ma aoaoina upumoni o le talalelei.

A o e suesue i le Mataupu Faavae ma Feagaiga 52:14–21, vaavaai mo nisi faatonuga mai le Alii e fesoasoani e faamalosia ai tagata o le Ekalesia, ae maise lava o i latou na Ia valaauina e talai atu le talalelei a o latou malaga atu i Misuri. Faitau le Mataupu Faavae ma Feagaiga 52:14, ma faailoa mai fuaitau, na faaaoga e le Alii e faamatala ai le mea o le a ia tuuina atu i nei faifeautalai.

Tali fesili nei i lau api talaaga mo le suesueina o tusitusiga paia:
1. O le a lou manatu i le faamoemoega o se mamanu?
2. O le a le mafuaaga na ta’u mai e le Alii mo le tuuina atu o le mamanu o loo tusia i le Mataupu Faavae ma Feagaiga 52:14–21?

Faitau le Mataupu Faavae ma Feagaiga 52:15–19, ma vaavaai mo amioga ma uiga ia na fetalai mai le Alii o le a fesoasoani i Lona nuu e aloese ai mai le faaseseina e Satani. A o e saili ia malamalama i aoaoga a le Alii i nei fuaiupu, mafaufau i faamalamalamaga nei:

O se tagata “ua agasala mo lona agaga” (MF&F 52:15) ua i ai sona uiga faaalia o le salamo.
O le poloaiga e “usiusitai i au sauniga” (MF&F 52:15) e faatatau i le tatau ona maua o sauniga o le perisitua, e pei o le papatisoga, ma tausi feagaiga e o mai faatasi ai.
O se tagata “o lana gagana e agamalu ma faagaeetia” (MF&F 52:16) o se tasi o lana tautala e lotomaualalo ma faagaeetia pe tuputupu a’e ai isi.
O se tagata e “gatete i lalo o le mana [o le Alii]” (MF&F 52:17) o se tagata e lagona le migao mo le mana o le Atua.
O le “ia aumai fua” (MF&F 52:17) o le ia maua se mea lelei (e pei o le “viiga ma le poto”) e ala i le mulimuli i faaaliga ua tuuina mai e le Atua.

O le mataupu faavae lenei e aotele ai aoaoga ua aoaoina mai i lenei faaaliga: Ina ia le faaseseina e Satani, e tatau i se tagata ona usiusitai i sauniga a le Alii ma ola e tusa ai ma faaaliga ua Ia tuuina mai.

Faitau le Mataupu Faavae ma Feagaiga 52:36, ma vaavaai mo faatonuga faaopoopo na tuuina mai e le Alii. O le a le mea na faatonu e le Alii ia alii faifeautalai o le ekalesia e folafola atu?

I lau api talaaga mo le suesueina o tusitusiga paia, tusi e uiga i se taitai po o se faiaoga e te iloa o loo soifua e tusa ai ma le mamanu na faataatia mai e le Alii i le Mataupu Faavae ma Feagaiga 52:14–19, 36. O a ni auala ua faamanuiaina ai oe mai aoaoga ma faataitaiga a lenei tagata?

Mafaufau e uiga i sui o le Au Peresitene Sili ma le Korama a Aposetolo e Toasefululua, ma mafaufau pe faapefea ona latou faaalia le mamanu a le Alii mo le le faaseseina e Satani.

Mataupu Faavae ma Feagaiga 52:37–44

Ua tuuina mai e le Alii ni fautuaga i taitai o e na nonofo pea i Ohaio

A o valaauina e le Alii le toatele o e o anamua na umia le perisitua, e talai atu a’o latou malaga atu i Misuri po o se isi lava mea, sa Ia poloaiina isi toeaina e nonofo ai pea i Ohaio. Faitau le Mataupu Faavae ma Feagaiga 52:39–40, ma vaavaai mo faatonuga na tuuina mai e le Alii i toeaina o e o le a nonofo ai pea i Ohaio. (A o e faitau, atonu e fesoasoani le iloa o le upu toe e faatatau ia i latou o e na nonofo.) Mafaufau e faailoga mea e te mauaina.

Mafaufau i fesili nei: O le a sou manatu i le uiga o le “ia manatua i mea uma e ua matitiva ma e ua lē tagolima” (MF&F 52:40)? Aisea ua le lava ai le na o le mafaufau i se tasi e lima vaivai, e faataunuu ai lenei poloaiga mai le Alii?

I le Mataupu Faavae ma Feagaiga 52:40, o le a se fetalaiga a le Alii e uiga i tagata o e mumusu e fesoasoani atu ia i latou e manaomia le fesoasoani?

E tusa ai ma lenei fuaiupu, faauma le mataupu faavae lenei: O soo o Iesu Keriso e vaaia ma tausi i .

Mafaufau ia i latou e te iloa o e o le a e mafaufau e avea ma soo o Iesu Keriso. I lau api talaaga mo le suesueina o tusitusiga paia, tusi ai pe na faapefea ona vaai ma tausi e nei tagata i latou e manaomia le fesoasoani.

Mafaufau i ni taimi sa e maua ai ni avanoa e tausia ai e matitiva, lima vaivai, mama’i ma puapuagatia. Mafaufau e faatu se sini patino e taulima ai manaoga o se tasi ma avea ai ma se soo lelei atu o Iesu Keriso.

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 51–52 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: