Mataupu Faavae ma Feagaiga 76:50–80

Faatomuaga

Ina ua uma ona vaai i le faaaliga i le mamalu o le Alo, o le pau o Lusifelo, ma le tulaga o atalii o le malaia, sa faapea ona faaalia mai i le Perofeta o Iosefa Samita ma Sini Rikitone i latou o e o le a i ai i le toetutu o e amiotonu: o e nonofo i le malo selesitila ma le terasitila.

Mataupu Faavae ma Feagaiga 76:50-70

Ua faaali mai e le Alii mea e manaomia mo, ma faamanuiaga o le mauaina o le mamalu selesitila

Maota o Ioane Ioanesone — O le potu lea na maua ai le faaaliga o loo tusia i le Mataupu Faavae ma Feagaiga 76.

Ao galue ai i le faaliliuga o le Tusi Paia i le aso 16 o Fepuari, 1832, na faia ai e le Perofeta o Iosefa Samita ni suiga musuia i le faaupuga o le Ioane 5:29 faatatau i le toetutu o e amiotonu ma e e amioletonu (tagai i le MF&F 76:15–17). Sa mafaufau loloto i laua ma Sini Rikitone i le faamatalaga a Ioane e uiga i le toetutu o e amiotonu ma le toetutu o e e amioletonu, ae o laua mauaina loa le faaaliga o loo aofia i le Mataupu Faavae ma Feagaiga 76. Faitau le Mataupu Faavae ma Feagaiga 76:50, ma vaavaai po o ai na faaalia ifo ia Iosefa Samita ma Sini Rikitone ina ua mavae le faaaliga e uiga i atalii o le malaia. (A o e faitauina, atonu e aoga le iloa, i lenei fuaiupu o le upu amiotonu o lona uiga o le amiosa’o. Atonu e te manao e tusi lenei faauigaga i le laina o au tusitusiga paia i talane o le Mataupu Faavae ma Feagaiga 76:50.)

Faitau le Mataupu Faavae ma Feagaiga 76:70, ma faailoga po o ai sa i ai i le vaega muamua na vaai i ai Iosefa ma Sini, o e o le a toetutu i le toetutu o e amiotonu. O se vaega o lenei faaaliga, na faaalia mai ai e le Alii uiga auaumama o i latou o e o le a mautofi i le malo selesitila.

Tusi le ulutala Avea ma se Tagata Selesitila i lau api talaaga mo le suesueina o tusitusiga paia. Faitau le Mataupu Faavae ma Feagaiga 76:51–53, ma i lalo o ulutala i lau api talaaga mo le suesueina o tusitusiga paia, lisi ia uiga auaumama o loo faamatalaina i nei fuaiupu mo i latou o e o le a mautofi i le malo selesitila. Taumafai ia maua ni uiga auaumama e le itiiti ifo ma le fa.

Ina ia fesoasoani ia e malamalama atili i nisi o fasifuaitau e te faailoaina mai, atonu e aoga le iloa o le “[maua] o le molimau ia Iesu” (MF&F 76:51) o le maua lea o se molimau e ala i faaaliga faaletagata lava ia, o Iesu Keriso o le Faaola ma ia galue loa e tusa ai ma lena molimau i lou olaga. O le “manumalo e ala i le faatuatua” (MF&F 76:53) o le faatoilaloina o faaosoosoga ma agasala e ala i le faaaogaina o le faatuatua ia Iesu Keriso. O se tagata e “faamauina e le Agaga Paia o le folafolaga” (MF&F 76:53; tagai foi i le MF&F 132:7) pe a faamautu mai e le Agaga Paia o sauniga o le perisitua na mauaina ma feagaiga na osia e taliaina e le Atua. O lenei faamaoniga e faalagolago lea i luga o le faamaoni o se tagata.

Ina ia fesoasoani ina ia e malamalama atili i uiga auaumama o se tagata selesitila, tali se fesili se tasi pe sili atu o fesili o loo i lalo i lau api talaaga mo le suesueina o tusitusiga paia:
1. O le a se mea ua e faia e maua ai le molimau ia Iesu Keriso ma ia tausisia ai le malosi o lena molimau?
2. O le a se mea e mafai ona e faia ia maua lelei ai le molimau ia Iesu Keriso?
3. E mafai faapefea i le mauaina o le molimau ia Iesu Keriso ma le tausia o Ana poloaiga ona fesoasoani i se tasi ia agavaa atili ai mo le malo selesitila?

E le gata i le faaalia mai o nisi o uiga auaumama o i latou o e o le a mautofi i le malo selesitila, sa faapea foi ona faamamatala mai e le Alii nisi o faamanuiaga o le a maua e i latou e mautofi i le malo selesitila. Faitau le Mataupu Faavae ma Feagaiga 76:54–68, ma faailoa mai nei faamanuiaga. Mafaufau e faailoga faamanuiaga e sili ona anoa ia te oe.

Faitau le Mataupu Faavae ma Feagaiga 76:69–70, ma vaai mo mea o le a tutupu ia i latou o e agavaa mo le malo selesitila. A o e faitauina, atonu e aoga le iloa o le upu atoatoa i le fuaiupu e 69 e le faapea o le leai o se mea e masepu; o lona uiga ua ma’ea. (O loo faamalamalama mai i le Mataio 5:48 vaefaamatalaga e o isi faaliliuga mai le upu Eleni o le “ma’ea, uma, atoatoa le tuputupu a’e.”)

E ui o a tatou taumafaiga sili ona lelei e tausia poloaiga uma e le mafai ona tatou atoatoa ai, ae o a tatou taumafaiga e mafai ai ona tatou maua le alofa tunoa o le Faaola ma ia faamamaina ai e ala i Lana “togiola ua atoatoa e ala i le faamaligiina o lona lava toto” (MF&F 76:69). O i tatou taitoatasi e mafai ona faaatoatoaina e ala ia Iesu Keriso ma faaeaina ma o tatou aiga i le tikeri aupito maualuga o le malo selesitila (tagai i le Moronae 10:32–33). E mafai ona uunaia e lenei upu moni i tatou e tausi i poloaiga ma maua sauniga o le faaolataga ina ia mafai ona tatou maua nei faamanuiaga silisili. O lea la, e mafai ona faaatoatoaina i tatou e ala i le Togiola a Iesu Keriso. Atonu e te manao e tusi lenei mataupu faavae i lalo o le ulutala “Avea ma se Tagata Selesitila” i lau api talaaga mo le suesueina o tusitusiga paia.

Tali fesili nei i lau api talaaga mo le suesueina o tusitusiga paia:
1. E faapefea e mataupu faavae na aoaoina i le Mataupu Faavae ma Feagaiga 76:69–70 ona faamalosia lou faatuatua ma le musuia o oe e saili le faaeaga i le malo selesitila?
2. Atonu e faapefea e mataupu faavae ua aoaoina i nei fuaiupu ona fesoasoani ia i tatou e faatoilalo le lotovaivai a o tatou taumafai atu mo le mamalu selesitila?

Mataupu Faavae ma Feagaiga 76:71-80

Ua faaali mai i le faaaliga ia Iosefa Samita ma Sini Rikitone le malo terasitila

Afai e te fesili atu i au uo pe latou te talitonu e mafai ona latou mauaina le malo selesitila—o le toe foi atu e ola e faavavau faatasi ma le Tama Faalelagi ma o latou aiga—mata e toafia e te manatu o le a fai mai latou te talitonu latou te mafaia? E te talitonu e mafai ona e mautofi i le malo selesitila?

Na molimau mai Epikopo Joseph L. Wirthlin o le au Epikopo Pulefaamalumalu, “O i tatou uma o tagata ua faamoemoeina mo le malo selesitila” (i le Conference Report, Ape. 1952, 118). Atonu e te manao e tusi le faamatalaga lenei i lau api talaaga mo le suesueina o tusitusiga paia, po o le laina i autafa o au tusitusiga paia.

E ui lava o tagata uma ua faamoemoeina mo le malo selesitila, ae e filifili lava nisi e le ola e tusa ai ma o latou gafatia. Faitau le Mataupu Faavae ma Feagaiga 76:71, ma faailoga po o le a le isi mea na vaai i ai le Perofeta o Iosefa Samita ma Sini Rikitone i le faaaliga vaaia.

Ia matau le auala o loo faaaoga ai e mau le eseesega i le va o le malamalama e atagia mai i le masina ma le malamalama e susulu sa‘o mai i le la, e faatusa i ai le eseesega i le va o mamalu o le malo selesitila ma le terasitila. E ui o tagata e nonofo i le selesitila ma le malo terasitila o loo aofia uma i le toetutu o e amiotonu, ae o i latou e maua tino selesitila o le a toetutu ma le mamalu ma faamanuiaga sili atu nai lo o i latou e maua tino terasitila.

Faitau le Mataupu Faavae ma Feagaiga 76:72–80, ma vaavaai po o a eseesega o tagata e nonofo i le malo terasitila mai tagata e nofoia le malo selesitila.

Toe iloilo le Mataupu Faavae ma Feagaiga 76:71–79, ma faailoga mea e te maua po o ai o le a mautofi i le malo terasitila. “Ia manatua e na o le Atua, o le silafia loto o tagata taitoatasi, e mafai ona faia faamasinoga mulimuli o tagata taitoatasi (tagai i le Faaaliga 20:12; 3 Nifae 27:14; MF&F 137:9)” (Faamaoni i le Faatuatua: O Se Tusitaiala o le Talalelei [2004], 90). E na o le Alii lava e silafia o tatou loto; e tatau ona tatou faaeteete e aua le faia ni faamasinoga po o le fea o malo o le a mautofi ai isi tagata.

Tali le fesili lenei i lau api talaaga mo le suesueina o tusitusiga paia: O a ni auala ua faatauasoina ai nisi o tagata i aso nei i le poto o tagata?

O se tasi o eseesega tele i le va o tagata o e mautofi i le malo selesitila ma le terasitila, o mea latou te faia i a latou molimau ia Iesu Keriso. O i latou o e mautofi i le malo terasitila “sa lei totoa i le molimau ia Iesu” (MF&F 76:79). Na faamalamalama mai e Elder Bruce R. McConkie o le Korama a Aposetolo e Toasefululua:

“O le a le uiga o le toa i le molimau ia Iesu?

“O le lototele ma le le fefe; o le faaaogaina o lo tatou malosi atoa, le malosiaga, ma le atamai i le tauina o le taua ma le lalolagi; ina ia tatou tau ai le taua lelei o le faatuatua. … O le maatulimanu tele o le lototele i le galuega o le amiotonu o le usiusitai lea i le tulafono atoa o le talalelei. …

“Ia ina ia lototoa i le molimau ia Iesu o le talitonu lea ia Keriso ma lana talalelei i se talitonuga e le maluelueina. O le iloa lea o le moni [faamaoni] ma le paia o le galuega a le Alii i le lalolagi.

“Ae e le na o le pau lena. E sili atu nai lo na o le talitonu ma le iloa. E tatau ona fai i tatou ma e anaana i le upu ae le na o le faalogo i ai. E sili atu nai lo na o se auaunaga e na o upu; e le na o le ta’uta’u atu e le gutu le tulaga paia o le Alo o le Faaola. O le usiusitai ma le usitaia ma le amiotonu patino. …

“O le totoa i le molimau ia Iesu o le … ‘tumau e oo i le iuga.’ (2 Nifae 31:20.) O le ola ai i la tatou tapuaiga, ia faatino mea tatou te talai atu, ia tausi poloaiga” (“Be Valiant in the Fight of Faith,” Ensign, Nov. 1974, 35).

Ua ia i tatou taitoatasi le gafatia e maua ai le malo selesitila e ala i filifiliga tatou te faia. E pei ona aoao mai i tusitusiga paia ua e suesueina i lenei lesona, afai tatou te totoa i le molimau ia Iesu, e mafai ona tatou maua le malo selesitila o le Atua. Faaopoopo le mataupu faavae lenei i lalo o le ulutala “Avea ma se Tagata Selesitila” i lau api talaaga mo le suesueina o tusitusiga paia.

Tali fesili nei i lau api talaaga mo le suesueina o tusitusiga paia:
1. Mafaufau i se tasi e te iloa e te manatu e lototoa i le molimau ia Iesu Keriso. O a ni uiga ma ni amioga e faaalia ai lona lototoa?
2. O le a se mea na fesoasoani ia te oe ia e lototoa ai i lau molimau ia Iesu Keriso?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Mataupu Faavae ma Feagaiga 76:50–80 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: