Leksyon 81
Mga Buhat 1:1–8
Pasiuna
Human sa Iyang Pagkabanhaw, si Jesukristo nangalagad ngadto sa Iyang mga Apostoles sulod sa 40 ka mga adlaw. Giandam Niya sila nga mahimo Niyang mga saksi sa tibuok kalibutan.
Mga Sugyot alang sa Pagtudlo
Mga Buhat 1:1–8
Nangalagad si Jesus ngadto sa Iyang mga disipulo sulod sa 40 ka mga adlaw
Dapita ang mga estudyante sa paghanduraw nga usa ka higala sa laing tinuohan miduol kanila uban sa tinguha nga mahibalo pa mahitungod sa atong Simbahan ug nangutana, “Kinsa ang nangulo sa inyong simbahan?”
Ipasulat sa mga estudyante kon sa unsa nga paagi ilang tubagon kini nga pangutana diha sa ilang mga class notebook o mga scripture study journal.
Dapita ang mga estudyante sa pagpangita og usa ka kamatuoran samtang ilang tun-an ang Mga Buhat 1:1–8 nga makatabang sa pagtubag sa pangutana kon kinsa ang nangulo sa Simbahan.
Dapita ang mga estudyante sa pag-abli sa basahon sa Mga Buhat ug ipaila ang hingpit nga ulohan niini nga basahon. Hangyoa ang mga estudyante sa pagreport unsay ilang nakit-an.
-
Base sa hingpit nga ulohan, unsa sa inyong hunahuna ang atong makat-unan mahitungod niini nga basahon?
Ipasabut nga ang basahon sa Mga Buhat nagtimaan og usa ka makahuluganong pagkabalhin diha sa Bag-ong Tugon. Ang mga basahon ni Mateo, Marcos, Lucas, ug Juan naghatag og mga istorya sa mortal nga pangalagad sa Manluluwas, lakip ang Iyang Pag-ula ug Pagkabanhaw. Ang basahon sa Mga Buhat nagsaysay sa pangalagad sa mga Apostoles human sa Pagsaka sa Manluluwas ngadto sa langit.
Dapita ang usa ka estudyante sa pagbasa og kusog sa Mga Buhat 1:1–2. Hangyoa ang klase sa pagsunod, nga mangita kon alang kang kinsa kini nga basahon gisulat.
-
Ngadto kang kinsa ang basahon sa Mga Buhat gisulat?
Ipasabut nga si Lucas mao ang tagsulat sa basahon nga Mga Buhat ug nga ang “nag-unang basahon” nga gipasabut diha sa bersikulo 1 mao ang basahon ni Lucas, nga gisulat usab ngadto ni Teofilo. Ang katuyoan ni Lucas sa pagsulat mao ang pagtabang ni Teofilo sa pag-angkon og iyang kaugalingong pagpamatuod kabahin ni Jesukristo (tan-awa sa Lucas1:1–4).
Dapita ang usa ka estudyante sa pagbasa og kusog sa Mga Buhat 1:2–4. Hangyoa ang klase sa pagsunod, nga mangita kon unsa ka gidugayon si Jesukristo personal nga nangalagad ngadto sa Iyang mga Apostoles human sa Iyang Pagkabanhaw. (Mahimong imong ipasabut nga diha sa bersikulo 3, ang “pag-antus” nagpasabut ngadto sa maulaong sakripisyo sa Manluluwas, ug ang “mga pagpamatuod” nagpasabut ngadto sa dili ikalimud nga ebidensya nga gihatag ni Jesus nga Siya nabanhaw.)
-
Unsa ka gidugayon mipabilin si Jesukristo uban sa Iyang mga Apostoles human Siya nabanhaw?
-
Unsay gitudlo ni Jesus kanila sulod niining 40 ka mga adlaw? (Mga butang kalabut sa gingharian sa Dios.)
Pagsugod og himo og usa ka yanong drowing sa usa ka balay diha sa pisara. (O makahimo kamo og usa ka gamay nga modelo sa balay gamitan og mga bloke o yuta nga kulunon.)
Kon katunga na ang imong nahuman, pagdapit og estudyante sa pag-adto sa pisara ug ipahuman ang drowing alang kanimo. Hatagi ang estudyante og piho nga mga panudlo kon sa unsa nga paagi humanon ang balay. Mahimo nga imong sultihan siya sa pagdugang og atop, pipila ka mga bintana, ug mga tanom, bulak ug mga kahoy palibut sa balay. Human sa pipila ka minuto sa pagtinabangay og trabaho, balhin ngadto sa pikas nga bahin sa classroom ug ipadayon ang paghatag sa estudyante og mga panudlo. Kon mahuman na ang balay, pasalamati ang estudyante, ug palingkura siya.
Hangyoa ang mga estudyante sa paghanduraw nga ang drowing sa balay nagrepresentar sa gingharian sa Dios dinhi sa kalibutan, nga mao ang Simbahan ni Jesukristo.
-
Sa unsa kaha nga paagi nga ang atong pamaagi sa pagdrowing niini nga balay nagpakita kon sa unsa nga paagi gitukod ni Jesukristo ang Iyang Simbahan sa panahon sa Iyang mortal nga pangalagad ug human sa Iyang Pagkabanhaw? (Sa panahon sa Iyang mortal nga pangalagad, gisugdan sa Manluluwas ang pagtukod sa Iyang Simbahan. Gitawag Niya ang uban sa pagtabang Kaniya og tukod niini, ug human sa Iyang Pagkabanhaw, gigiyahan Niya ang ilang mga lihok bisan tuod og Siya wala na nila ikauban.)
-
Sumala sa bersikulo 2, sa unsa nga paagi gidumala ni Jesukristo ang Iyang Simbahan? (Gamit ang mga pulong sa mga estudyante, isulat ang mosunod nga kamatuoran diha sa pisara: Si Jesukristo nagdumala sa Iyang Simbahan pinaagi sa pagpadayag sa Iyang kabubut-on ngadto sa Iyang mga Apostoles pinaagi sa Espiritu Santo.)
Hangyoa ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles:
“Sugod sa unang bersikulo [sa basahon sa Mga Buhat], ang pamahayag mao nga ang Simbahan mopadayon sa balaanong paggiya, dili sa mortal nga paggiya. … Sa pagkatinuod, ang mas kompleto nga ulohan sa Mga Buhat ingon og angay sama sa ‘Ang mga Buhat sa Nabanhaw nga Kristo nga Naglihok pinaagi sa Balaang Espiritu diha sa mga Kinabuhi ug mga Pangalagad sa Iyang Gi-orden nga mga Apostoles.’ …
“Ang pagdumala sa Simbahan sama ra. Ang Manluluwas wala na dinhi, apan ang pagdumala ug ang kapangulohan sa Simbahan sama ra gayud gihapon” (“Therefore, What?” [Komperensya sa Church Educational System kabahin sa Bag-ong Tugon, Ago. 8, 2000], 6, si.lds.org).
-
Nganong importante nga mahibalo nga si Jesukristo nagpadayon sa pagdumala sa Iyang Simbahan karon pinaagi sa pagpadayag?
Dapita ang mga mga estudyante sa pagpamalandong og mga kasinatian nga nakapalig-on sa ilang pagpamatuod nga si Jesukristo nagdumala sa Iyang Simbahan karon pinaagi sa pagpadayag. Dapita ang pipila ka mga estudyante sa pagpakigbahin sa ilang mga kasinatian. Mahimong ikaw usab gustong makigbahin og usa ka kasinatian.
Hangyoa ang pipila ka mga estudyante sa pagpuli-pulig basa og kusog gikan sa Mga Buhat 1:4–8. Hangyoa ang klase sa pagsunod, mangita kon unsay gisugo ni Jesus nga buhaton sa mga Apostoles.
-
Sumala sa bersikulo 4, unsay gisugo ni Jesus nga buhaton sa mga Apostoles?
-
Sumala sa bersikulo 5, unsa ang gisaad sa Manluluwas sa mga Apostoles nga ilang madawat kon sila magpabilin sa Jerusalem?
-
Sumala sa bersikulo 8, unsa ang ihatag sa Espiritu Santo sa mga Apostoles nga gahum sa pagbuhat?
-
Unsa ang atong makat-unan mahitungod sa mga Apostoles gikan sa unsay gitudlo sa Manluluwas diha sa bersikulo 8? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga kamatuoran: Ang mga Apostoles mga saksi ni Jesukristo ug nagpamatuod Kaniya sa tibuok yuta.)
Aron sa pagtabang sa mga estudyante nga makasabut niini nga kamatuoran, hangyoa ang usa ka estudyante sa pagbasa og kusog sa mosunod nga pamahayag ni Presidente Gordon B. Hinckley:
“Sa atong panahon ang Ginoo nagtawag og 15 ka linain nga mga saksi aron sa pagpamatuod sa Iyang pagkabalaan sa atubangan sa kalibutan. Ang ila maoy usa ka talagsaon nga calling; mga Apostoles sila ni Ginoong Jesukristo, pinili ug sinugo Niya. Gimandoan sila sa pagsaksi sa Iyang pagkatinuod nga buhi pinaagi sa gahum ug awtoridad sa balaang pagkadisipulo nga ilang gihuptan” (“Special Witnesses of Christ,” Ensign, Abr. 2001, 4).
Isulat ang mosunod nga dili kompleto nga pamahayag diha sa pisara: Ang mga Apostoles sa atong panahon nagpamatuod nga si Jesukristo …
Kon posible, paghatag og usa ka kopya sa “Ang Buhing Kristo: The Testimony of the Apostles” (Ensign, Abr. 2000, 2) alang sa matag estudyante diha sa imong klase. Mahimo usab nimong ikonsiderar ang pagkuha og usa ka kopya, paggunting niini ngadto sa mas gagmay nga mga seksyon, ug pagbahin-bahin sa mga seksyon ngadto sa mga estudyante. Hangyoa ang mga estudyante sa pagbasa sa dokumento o seksyon sa hilum, mangita kon unsaon nila pagkompleto ang pamahayag diha sa pisara. Kon mahuman na ang mga estudyante sa pagbasa, hangyoa ang usa ka estudyante sa pag-adto sa pisara ug isulat ang mga tubag diha sa pisara. Dapita ang mga estudyante sa pagreport unsay ilang nakit-an, ug hangyoa ang estudyante nga anaa sa pisara sa paglista sa ilang mga tubag diha sa pisara.
-
Hain niini nga mga pamahayag ang labing importante kaninyo?
-
Sa unsa nga paagi ang pagsaksi sa mga Apostoles karong panahona nag-impluwensya sa inyong personal nga pagsaksi o pagpamatuod ni Jesukristo?
Ipasabut nga bisan tuod ang Mga Buhat 1:8 piho nga nagpasabut sa tahas sa mga Apostoles isip linain nga mga saksi sa Manluluwas, kini usab nagtudlo kanato mahitungod sa unsay makatabang kanato nga mahimong mga saksi ni Jesukristo ngadto sa tibuok kalibutan.
-
Basi sa saad sa Ginoo ngadto sa mga Apostoles diha sa Mga Buhat 1:8, unsay naghimo niini nga posible alang kanato nga mahimong mga saksi ni Jesukristo? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga kamatuoran: Pinaagi sa gahum sa Espiritu Santo, mahimo kita nga mga saksi ni Jesukristo.)
-
Sa unsa nga mga paagi ang Espiritu Santo nagtabang kanato nga mahimong mga saksi sa Manluluwas?
Dapita ang mga estudyante sa pagpamalandong sa mga panahon nga gibati nila ang Espiritu Santo samtang gipakigbahin sa uban ang ilang pagpamatuod ni Jesukristo. Human sa pipila ka mga minuto, dapita ang mga estudyante sa pagpakigbahin sa ilang mga kasinatian. Pahinumdumi ang mga estudyante nga sila kinahanglan dili mopakigbahin og mga kasinatian nga sagrado o pribado kaayo.
-
Kanus-a ninyo gibati nga ang Espiritu Santo nagtabang kaninyo sa pagpamatuod ni Jesukristo ngadto sa uban?
Awhaga ang mga estudyante sa pagpangita og mga oportunidad sa pagpakigbahin sa ilang mga pagpamatuod ngadto sa uban ug sa pagsalig nga ang Espiritu Santo mopanghimatuod sa kamatuoran sa unsay ilang gisaksi.
Mga Buhat–Pinadayag
Kinatibuk-ang pagpasabut sa ikaduhang katunga sa Bag-ong Tugon
Ipasabut nga ang Mga Buhat 1:8 wala lamang magtudlo og mga kamatuoran apan naghatag usab og kinatibuk-ang pagsabut sa ikaduhang katunga sa Bag-ong Tugon.
-
Sumala sa Mga Buhat 1:8, diin nanagna ang Manluluwas nga ang Iyang mga Apostoles mosaksi Kaniya?
Isulat ang mosunod diha sa pisara: Mga Buhat 1–5 = Jerusalem; Mga Buhat 6–9 = Judea ug Samaria; Mga Buhat 10–28 = Kinatumyan nga bahin sa yuta (tan-awa sa Ang Giyangadto sa mga Kasulatan, “Mga Buhat sa mga Apostoles”).
Ipasabut nga ang mga disipulo misugod sa pagsaksi ni Jesukristo ingon nga gisugo. Una, misangyaw ang mga Apostoles didto sa Jerusalem, dayon sa Judea ug sa Samaria, ug dayon sa kinatumyan nga mga bahin sa yuta.
Hangyoa ang mga estudyante sa pagtan-aw sa talaan sa mga sulod sa Biblia. Dapita ang mga estudyante sa pagtan-aw sa mga basahon sa Bag-ong Tugon nga nagsunod sa basahon sa Mga Buhat. Ipasabut nga ang mga basahon sa Mga Taga-Roma ngadto sa mga Hebreohanon mga epistola (mga sulat) nga sinulat ni Apostol Pablo. Makat-unan sa mga estudyante ang mahitungod sa pagkakabig ug pangalagad ni Pablo samtang ilang tun-an ang Mga Buhat 9, 13–28.
Hangyoa ang mga estudyante sa pagpangita sa 1 Mga Taga-Tesalonica. Ipasabut nga ang mga Taga-Tesalonica mao ang mga tawo kinsa mipuyo sa siyudad sa Tesalonica. Dapita ang mga estudyante sa pagtan-aw sa mga Mapa sa Biblia, nu. 13, “Ang Misyonaryong mga Panaw ni Apostol Pablo,” ug pangitaa ang Tesalonica diha sa mapa. Ipasabut nga kadaghanan sa mga sulat diha sa Bag-ong Tugon gisulat ngadto sa mga kongregasyon sa Simbahan sa nagkalain-laing mga siyudad aron sa pagtubag sa ilang piho nga mga panginahanglan. Mahimo usab nga imong ipasabut nga kini nga mga sulat wala han-aya sumala sa panahon sa pagsulat diha sa Bag-ong Tugon. Ang basahon sa 1 Mga Taga-Tesalonica gituohan nga mao ang unang sulat nga gisulat ni Pablo.
Hangyoa ang mga estudyante sa pagtan-aw sa mga sulod ug ipaila ang pipila sa ubang mga basahon nga gisulat isip mga sulat ngadto sa mga kongregasyon sa mga Santos.
Ipasabut nga agi og dugang sa pagsulat ngadto sa mga kongregasyon sa mga Santos, si Pablo misulat ngadto sa mga indibidwal sama ni Timoteo, Tito, ug Filemon.
Hangyoa ang mga estudyante sa pagpangita unsa nga mga basahon ang nagsunod sa Mga Hebreohanon diha sa mga sulod.
Ipasabut nga agi og dugang ngadto ni Pablo, ang ubang mga Apostoles ug mga lider sa Simbahan misulat ngadto sa mga miyembro sa Simbahan. Aduna pa gihapon kita og pipila niini nga mga sulat, nga mao ang mga basahon ni Santiago ngadto ni Judas. Ang basahon nga Pinadayag nagrekord og usa ka panan-awon nga nakita ni Apostol Juan.
Dapita ang mga estudyante sa pagpadayon og basa sa ikaduhang katunga sa Bag-ong Tugon sa ilang kaugalingon. Awhaga sila sa pag-ampo samtang sila nagtuon aron ang Espiritu Santo makalamdag kanila ug makatabang kanila sa pag-angkon og mas dako nga pagsabut samtang sila magtuon sa mga panudlo sa mga Apostoles sa Bag-ong Tugon .
Komentaryo ug Background nga Impormasyon
Mga Buhat sa Mga Apostoles. Usa ka kinatibuk-ang pagpasabut
Si Elder Bruce R. McConkie sa Korum sa Napulog Duha ka mga Apostoles miingon sa mosunod mahitungod sa basahon sa Mga Buhat:
“Ang Mga Buhat nagtudlo sa pagdumala sa Balaang Espiritu diha sa tinuod nga Simbahan.
“Sa mga Biblikanhong mga basahon kini naglangkob sa labing daghang impormasyon mahitungod sa unsa nga paagi ang Simbahan ug gingharian sa Dios dinhi sa yuta gidumala sa panahon nga si Jesus ang Hari wala sa personal nga paagi nagpuyo sa planetang yuta. …
“Ang Mga Buhat nag-istorya kon sa unsa nga paagi ang mga espirituhanong mga gasa midaghan hangtud kini mapahimuslan sa mga apostoles ug sa tibuok nga mga kongregasyon sa matinud-anon. …
“… Ang Mga Buhat nagsaysay og balik sa mga kamatuoran kalabut sa organisasyon sa simbahan, misyonaryong mga panaw, ug ang kinatibuk-ang pagsangyaw sa kamatuoran diha sa walay pagtuo nga mga katawhan. Kini nag-istorya sa mga panggukod, mga pangbato, mga pagsulay, ug mga silot nga gisinati diha niadtong kinsa nagtuo ug nagsunod ni Kristo ug nanlimbasog sa pagbuntog sa kalibutan. …
“Apan ang Mga Buhat labaw pa kay sa usa ka basahon sa maayo kaayo nga espirituhanong mga ideya; kini usa usab ka istorya kalabut sa matarung nga mga tawo ug sa ilang mga kahuyang ug mga panagbingkil-bingkil, sa ilang mga pagkamasinahon ug mga kasaypanan, sa ilang mga kapakyasan ug mga kalampusan.
“Ang mga santos sa kapanahunan human mamatay si Kristo dili mga perpekto. Nakiglantugi si Pablo ni Silas, nagkorihir ni Pedro, ug nagdumili ni Marcos isip misyonaryo nga kauban. …
“Busa ang Mga Buhat usa ka basahon alang sa mahuyang nga mga mortal. Kini nagpakita sa importanting espirituhanong mga butang nga ilang mabuhat – dili perpekto, masinahon, ug gahi og ulo bisan tingali og sila ingon niini. …
“Ang Mga Buhat sa tinuod nagrekord kon sa unsa nga paagi ang Balaang Espiritu nagdumala sa tinuod nga Simbahan; kini sa tinuod ang basahon nga nag-istorya kon giunsa sa Dios pagdumala ang Iyang yutan-ong gingharian” (Doctrinal New Testament Commentary, 3 vols. [1965–73], 2:19–20).
Mga Buhat 1:2. Nagdumala si Jesukristo sa Iyang Simbahan
Mipamatuod si Presidente Gordon B. Hinckley nga ang Ginoo nagdumala sa Iyang Simbahan—Ang Simbahan ni Jesukristo sa mga Santos sa Ulahing mga Adlaw:
“Angay nga masabtan sa tanan nga si Jesukristo mao ang pangulo niining simbahan nga nagdala sa Iyang sagrado nga pangalan. Nagbantay Siya niini. Naggiya Siya niini. Nagbarug diha sa tuong kamot sa Iyang Amahan, Siya nagdumala niini nga buhat” (“God Is at the Helm,” Ensign, Mayo 1994, 59).
Mga Buhat 1:4–8. Naghulat sa saad sa Espiritu Santo
Ang saad sa Espiritu Santo nga gihatag ngadto sa mga Apostoles ingon nga narekord diha sa Mga Buhat 1:4–8 maingon og makalibug kon atong hunahunaon ang Juan 20:22, nga nag-ingon nga si Jesus “gihuypan niya ang [mga Apostoles], ug miingon kanila, Dawata ninyo ang Espiritu Santo.” Si Elder Bruce R. McConkie sa Korum sa Napulog Duha ka mga Apostoles mipasabut nga si “Jesus ‘mihuyop diha kanila,’ nga tingali nagpasabut nga gipandong niya ang iyang mga kamot diha kanila samtang gisulti niya ang mando: ‘Dawata … ang Espiritu Santo’” (Doctrinal New Testament Commentary, 3 vols. (1965–73), 1:857).
Migamit si Elder McConkie sa ang kasinatian sa mga Apostoles aron sa pagpakita nga adunay kalainan tali sa pagtugyan sa gasa sa Espiritu Santo ug sa tinuod nga pagpahimulos niana nga gasa:
“Sila sa ingon nakadawat, apan wala niana nga higayon sa tinuod nagpahimulos, sa gasa sa Espiritu Santo. … Ang gasa sa Espiritu Santo mao ang katungod, pinasikad sa pagkamatinud-anon, sa pagdawat sa kanunay nga pakig-uban niini nga miyembro sa Diosnong Kapangulohan; ug kini nga gasa itugyan pinaagi sa pagpandong sa mga kamot diha sa ulo human sa bunyag. Kini nga gasa nagtanyag og pila ka mga panalangin kon adunay hingpit nga pagsunod sa balaod nga nalakip niini; ang tanan ngadto kang kinsa ang gasa gitugyan dili sa pagkatinuod makapahimulos o makaangkon sa gitanyag nga gasa. Sa sitwasyon sa mga apostoles ang tinuod nga pagpahimulos sa gasa gilangan hangtud sa adlaw sa Pentecostes. (Acts 2.)” Doctrinal New Testament Commentary, 1:857).
Si Elder Dallin H. Oaks sa Korum sa Napulog Duha ka mga Apostoles mipasabut kon ngano nga ang mga Apostoles gisultihan sa paghulat alang sa pakig-uban sa Espiritu Santo sa dili pa nila tumanon ang ilang sugo sa pagpamatuod ni Jesukristo ngadto sa tibuok yuta:
“Ang usa ka personal nga pagsaksi dili igo. Bisan ang pagsaksi ug pagpamatuod sa orihinal nga mga Apostoles gikinahanglan nga nadawat pinaagi sa pagpamatuod sa Espiritu Santo. Si [Presidente Joseph Fielding Smith] nagsulti kanato nga ang pagsaksi sa Espiritu Santo naghimo og panumduman diha sa atong kalag nga mas importante kay sa ‘usa ka pagduaw sa angel.’ Joseph Fielding Smith, Doctrines of Salvation, comp. Bruce R. McConkie, Siyudad sa Salt Lake: Bookcraft, 1954, 1:44.) Ug ang Biblia nagtudlo nga kon kita mopamatuod pinasikad niini nga saksi, ang Espiritu Santo nagpamatuod ngadto niadtong kinsa nakadungog sa atong mga pulong” (“Witnesses of Christ,” Ensign, Nob. 1990, 30).