Leksyon 89

Mga Buhat 10–11

Pasiuna

Nagpadayag ang Dios ngadto ni Pedro diha sa usa ka panan-awon nga ang ebanghelyo kinahanglan nga isangyaw ngadto sa mga Hentil. Gitudlo ni Pedro ang ebanghelyo ngadto ni Cornelio ug sa iyang sakop sa panimalay ug sa wala madugay mihusay og panagbingkil taliwala sa mga Santos nga Judeo mahitungod sa pagsangyaw sa ebanghelyo ngadto sa mga Hentil. Ang buhat sa Ginoo mipadayon sa pag-uswag bisan sa pagpanggukod.

Mga Sugyot alang sa Pagtudlo

Mga Buhat 10

Nagpadayag ang Dios ngadto ni Pedro diha sa usa ka panan-awon nga ang ebanghelyo kinahanglan nga isangyaw ngadto sa mga Hentil

Dapita ang mga estudyante sa paghanduraw nga usa ka higala nangutana: “Nadungog ko nga sa 1978 ang inyong simbahan miusab sa baruganan niini sa pagtugot sa tanang mga lalaki sa pagdawat sa priesthood nga walay pagsapayan sa kaliwatan. Kon ikaw nagtuo nga ang inyong simbahan gidumala sa Dios, ug ang Dios usa ka dili mausab nga binuhat, sa unsa nga paagi kana posible?”

Hangyoa ang mga estudyante sa pagsulat diha sa ilang mga class notebook o mga scripture study journal kon sa unsa nga paagi sila motubag ngadto niini nga higala. (Pahinumdom: Siguroa nga ang mga estudyante motubag sa pangutana kabahin sa kausaban sa pamaagi sa Simbahan kay sa mangagpas og posible nga mga katarungan alang sa pagdili og tugyan sa priesthood. Usab, ayaw og pangagpas kabahin sa nganong ang pagdili og tugyan sa priesthood gihimo, nga kini nga mga katarungan wala gipadayag [tan-awa sa Opisyal nga Pahayag 2].)

Dapita ang mga estudyante samtang sila nagtuon sa Mga Buhat 10–11 sa pagpangita og mga doktrina ug mga baruganan nga makatabang kanila sa pagtubag og mga pangutana mahitungod kon sa unsa nga paagi ang Ginoo nangulo, naggiya, nag-usab, ug nagdumala sa Iyang Simbahan.

Ipasabut nga kutob niini nga bahin sa mga panahon sa Bag-ong Tugon, ang ebanghelyo nasangyaw, nga may pipila ka mga walay labot, ngadto lamang sa mga Judeo ingon nga gitudlo sa Manluluwas (tan-awa sa Mateo 10:5–6). Hinoon, ang Manluluwas misulti usab sa Iyang mga disipulo nga human ang Espiritu Santo mikunsad kanila sila mosangyaw sa ebanghelyo “hangtud sa kinatumyan sa yuta” (Mga Buhat 1:8). Diha sa Mga Buhat 10 atong mabasa ang mahitungod sa usa ka mahinungdanong kausaban diha sa paagi nga ang Simbahan gidumala nga mopahigayon niini.

Dapita ang usa ka estudyante sa pagbasa og kusog sa Mga Buhat 10:1–2. Hangyoa ang klase sa pagsunod, mangita sa mga detalye mahitungod sa usa ka Hentil nga ginganlan og Cornelio. (Mahimo nimong ipasabut nga si Cornelio “mahadlokon sa Dios” (bersikulo 2). Ang mga mahadlokon sa Dios mao ang mga Hentil kinsa misimba sa Ginoo apan dili mga proselyte, o mga kinabig ngadto sa Hudeo nga pagtuo, ug busa wala magsunod sa tibuok balaod ni Moises.)

• Unsa ang pangatungdanan ni Cornelio? (Siya usa ka kapitan sa kasundalohang Romano, responsable sa usa ka gatos ka mga sundalo.)

Pahinumdumi ang mga estudyante nga sa wala pa niini nga panahon, ang usa ka Hentil dili makapasakop sa Simbahan ni Kristo nga dili una magpakabig ngadto sa Judaismo, tungod kay ang ebanghelyo gitudlo lamang ngadto sa mga Judeo.

• Bisan tuod og si Cornelio dili makapasakop sa Simbahan isip usa ka Hentil, sa unsa nga paagi siya mipakita sa iyang hugot nga pagtuo diha sa Dios?

Dapita ang duha ka estudyante sa pagpuli-pulig basa og kusog gikan sa Mga Buhat 10:3–6. Hangyoa ang klase sa pagsunod, mangita kon unsay nahitabo ni Cornelio. (Ipasabut nga ang “ikasiyam nga takna sa adlaw” [bersikulo 3] mga alas 3:00 p.m.)

• Sumala sa bersikulo 4, unsa ang gisulti sa anghel ni Cornelio mahitungod sa iyang mga pag-ampo ug mga paglimos?

• Unsa ang gisugo sa anghel kang Cornelio nga buhaton?

I-summarize ang Mga Buhat 10:7–8 pinaagi sa pagpasabut nga si Cornelio mipadala og tulo ka mga lalaki ngadto sa Jope aron sa pagpangita ni Pedro. (Aron sa pagtabang sa mga estudyante kong hain ang Cesarea kalabut ngadto sa Jope, mahimo nimong itudlo ang mapa ngadto sa mga estudyante “Ang Balaang Yuta sa mga Panahon sa Bag-ong Tugon” [Mga Mapa sa Biblia, nu. 11].)

Ipasabut nga samtang kini nga mga lalaki mibiyahe ngadto sa Jope, si Pedro dihay talagsaon nga panan-awon samtang nagpuyo sa balay sa usa ka tawo nga ginganlan og Simon. Hatagi ang matag estudyante og usa ka pirasong papel. Dapita ang mga estudyante sa pagbasa og hilum sa Mga Buhat 10:9–16 ug sa pagdrow og usa ka hulagway sa panan-awon ni Pedro ingon nga kini gihulagway niini nga mga bersikulo. Human sa igong panahon, hangyoa ang mga estudyante sa paggamit sa ilang mga hulagway sa pagpasabut ngadto sa usa ka kauban sa klase kon unsa ang nahitabo diha sa panan-awon ni Pedro. Mosunod niini nga kalihokan, pangutana:

• Diha sa pana-awon, unsay gisugo nga ipakaon ni Pedro?

• Sumala sa bersikulo 14, unsa ang unang reaksyon ni Pedro ngadto niini nga sugo? (Ipasabut nga ubos sa balaod ni Moises, ang mga Judeo gidid-an sa pagkaon sa mga hayop nga giila nga mahinlo o dili mahinlo [tan-awa sa Levitico 11].)

• Sumala sa bersikulo 15, unsa ang gisulti sa Ginoo mahitungod sa dili mahinlo nga mga hayop nga Siya misugo ni Pedro sa pagpakaon?

Dapita ang usa ka estudyante sa pagbasa og kusog sa Mga Buhat 10:17–20. Hangyoa ang klase sa pagsunod, mangita sa unsa ang nahitabo samtang si Pedro namalandong sa kahulugan sa iyang panan-awon.

• Unsa nga mga pulong diha sa bersikulo 17 ang nagpakita nga si Pedro wala makasabut sa sinugdan sa kahulugan sa iyang panan-awon?

• Kinsa ang miabut samtang namalandong si Pedro sa iyang panan-awon?

• Unsa ang gisulti sa Espiritu nga ipabuhat ni Pedro?

I-summarize ang Mga Buhat 10:21–24 pinaagi sa pagpasabut nga ang tulo ka mga lalaki misulti ni Pedro mahitungod sa panan-awon ni Cornelio. Sa sunod nga adlaw, si Pedro ug ang uban nga mga disipulo miuban kanila sa pagpakigkita ni Cornelio.

Dapita ang pipila ka mga estudyante sa pagpuli-pulig basa og kusog gikan sa Mga Buhat 10:25–28. Hangyoa ang klase sa pagsunod, mangita kon unsa ang gibuhat ni Pedro sa dihang miabut siya sa balay ni Cornelio.

• Sumala sa bersikulo 28, unsa ang gisulti ni Pedro mahitungod sa mga inter-aksyon tali sa mga Judeo ug sa mga Hentil?

• Unsa na ang nasabtan ni Pedro karon?

I-summarize ang Mga Buhat 10:29–33 pinaagi sa pagpasabut nga si Cornelio misulti ni Pedro mahitungod sa iyang panan-awon. Gipundok usab ni Cornelio ang iyang pamilya ug mga higala aron si Pedro makatudlo kanila.

Dapita ang usa ka estudyante sa pagbasa og kusog sa Mga Buhat 10:34–35. Hangyoa ang klase sa pagsunod, mangita kon unsa ang nakat-unan ni Pedro.

• Sa unsa nga paagi imong i-summarize kon unsa ang nakat-unan ni Pedro?

I-summarize ang Mga Buhat 10:36–43 pinaagi sa pagpasabut nga gitudloan ni Pedro si Cornelio ug ang iyang mga sakop sa panimalay mahitungod ni Jesukristo ug sa Iyang maayo nga mga buhat, Paglansang diha sa Krus, ug Pagkabanhaw. Mipamatuod si Pedro nga kadtong kinsa nagtuo ni Jesukristo makadawat og kapasayloan sa ilang mga sala.

Dapita ang usa ka estudyante sa pagbasa og kusog sa Mga Buhat 10:44–48. Hangyoa ang klase sa pagsunod, mangita sa epekto sa pagtudlo ni Pedro diha niining mga Hentil. Ipasabut nga ang mga pulong “may sirkunsisyon nga nanguban” sa (bersikulo 45) nagpasabut ngadto sa mga disipulo nga Judeo kinsa mikuyog ni Pedro gikan sa Jope.

• Sumala sa mga bersikulo 44–46, unsa ang epekto sa mga pagtudlo ni Pedro diha sa sakop sa panimalay ni Cornelio?

• Ngano nga ang mga Judeo kinsa dinha alang niini nga okasyon nahingangha?

• Pinaagi sa mga kasinatian ni Pedro nga narekord diha sa Mga Buhat 10, unsa ang gipadayag sa Ginoo ngadto kaniya mahitungod sa mga Hentil? (Ang ebanghelyo kinahanglan nga isangyaw ngadto sa mga Hentil, ug sila mahimong mabunyagan ngadto sa Simbahan ni Jesukristo.)

Aron matabangan ang mga estudyante sa pag-ila og mga doktrina nga atong makat-unan gikan sa Mga Buhat 10, bahina sila ngadto sa mga grupo nga tinagurha o tinagutlo. Hatagi ang matag grupo og kopya sa mosunod nga handout, o isulat kini nga mga pangutana diha sa pisara. Dapita ang mga estudyante sa pagtrabaho uban sa ilang mga grupo sa pagtubag sa mga pangutana.

Mga Buhat 10

Manwal sa Magtutudlo sa Seminary sa Bag-ong Tugon—Leksyon 89

• Unsa nga kamatuoran ang atong makat-unan gikan sa istorya ni Pedro ug Cornelio mahitungod kon giunsa pagdumala sa Ginoo ang Iyang Simbahan?

• Unsa nga kamatuoran ang atong makat-unan gikan sa katinuod nga ang Ginoo mipadayag og kamatuoran ngadto ni Pedro sa hinay-hinay kay sa tanan dayon?

• Unsa nga kamatuoran ang atong makat-unan gikan niini nga istorya mahitungod sa unsa kaha ang buhaton sa Dios sa mga panudlo nga Iyang nahatag sa nanglabay nga panahon?

© 2015 pinaagi sa Intellectual Reserve, Inc. Tanang mga katungod gigahin.

Human sa igong panahon, dapita ang pipila ka mga estudyante sa pag-adto sa pisara aron isulat ang mga kamatuoran nga nailhan sa ilang mga grupo. Siguroa nga ang mosunod nga mga kamatuoran makita sa unsay ilang gisulat:

Ang Dios nagdumala sa Iyang Simbahan pinaagi sa pagpadayag ngadto sa Iyang propeta, ang nauna nga Apostol.

Kita mahimong makadawat og pagpadayag ug makasabut sa hinay-hinay samtang kita nagsunod sa Ginoo.

Ang Dios mahimong mousab o modugang ngadto sa mga panudlo nga Iyang nahatag sa nanglabay nga panahon sumala sa Iyang kaalam ug sa mga panginahanglan sa Iyang mga anak.

Dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles. Hangyoa ang klase sa pagpaminaw kon sa unsa nga paagi ang ikatulong kamatuoran diha sa gidagko nga lista makita sa pamahayag ni Elder Christofferson.

“Pinaagi niini nga kasinatian ug pagpadayag ngadto ni Pedro, giusab sa Ginoo ang pamaagi sa Simbahan ug mipadayag og mas kompletong panabut sa doktrina ngadto sa Iyang mga disipulo. Ug busa ang pagsangyaw sa ebanghelyo gipakatap ngadto sa tanang katawhan” (“Ang Doktrina ni Kristo,” Ensign o Liahona, Mayo 2012, 88).

Hatagi ang mga estudyante og panahon sa pagribyu unsay ilang gisulat mahitungod sa unsa nga paagi ilang tubagon ang pangutana sa ilang higala. Awhaga sila sa pagsulat og dugang nga mga panlantaw nga ilang naangkon samtang nagtuon sa Mga Buhat 10, ug tuguti sila sa pagpakigbahin niini nga mga panlantaw ngadto sa klase.

Hatagi ang mga estudyante og mga oportunidad sa pagpasabut, pagpakigbahin, ug sa pagpamatuod.

Ang pagtugot sa mga estudyante sa pagtudlo sa usag- usa naghatag kanila og mga oportunidad sa pagpasabut sa mga doktrina ug mga baruganan, pagpakigbahin sa mga panlantaw ug mga kasinatian, ug sa pagpamatuod sa balaang mga kamatuoran. Kini usab makapalawom sa pagsabut sa mga estudyante sa mga doktrina ug mga baruganan ug makadugang sa ilang abilidad sa pagtudlo sa ebanghelyo. Samtang ang mga estudyante nagpasabut, nakigbahin, ug nagpamatuod, ang Espiritu Santo makalig-on sa ilang mga pagpamatuod sa mga kamatuoran nga ilang gipahayag.

Mahimo nimong ipasabut nga bisan tuod ang Dios mahimong mousab og mga pamaagi sa Simbahan ug modugang sa atong doktrinal nga pagsabut pinaagi sa nagpadayon nga pagpadayag (tan-awa sa Mga Artikulo sa Hugot nga Pagtuo 1:9), ang Iyang balaang kinaiyahan, mga hiyas, mga pakigsaad, mga doktrina, ug plano dili gayud mausab. Nahibalo niini makatabang kanato sa pagbaton og hugot nga pagtuo diha sa Dios ug pagsalig nga Siya mogiya sa Iyang Simbahan sumala sa Iyang kabubut-on ug sa mga panginahanglan sa Iyang mga anak.

Mga Buhat 11:1–18

Naghusay si Pedro og panagbingkil taliwala sa mga Santos nga Judeo mahitungod sa pagsangyaw sa ebanghelyo ngadto sa mga Hentil

• Unsa sa imong hunahuna ang gibati sa pipila ka mga miyembro sa Simbahan nga Judeo sa dihang ilang nadungog ang mahitungod sa inter-aksyon ni Pedro uban sa usa ka Hentil? (Ang inter-aksyon ni Pedro uban sa usa ka Hentil usa ka dako kaayo nga kausaban sa nangaging pamaagi, ug pipila sa mga miyembro dihay kalisud sa pagdawat niini nga kausaban.)

Dapita ang usa ka estudyante sa pagbasa og kusog sa Mga Buhat 11:1–3. Hangyoa ang klase sa pagsunod, mangita kon giunsa sa mga disipulo pagtubag ngadto sa unsa ang nabuhat ni Pedro.

• Giunsa sa mga disipulo pagtubag ngadto sa unsa ang nabuhat ni Pedro?

I-summarize ang Mga Buhat 11:4–15 pinaagi sa pagpasabut nga si Pedro mihulagway ngadto sa mga disipulo sa mga panan-awon nga nadawat niya ug ni Cornelio. Gisultihan niya sila nga si Cornelio ug ang iyang panimalay midawat sa mga pagtulun-an ni Jesukristo ug unya nakasinati sa gahum sa Espiritu Santo sa samang paagi nga si Pedro ug ang uban nga mga disipulo nakasinati.

Dapita ang usa ka estudyante sa pagbasa og kusog sa Mga Buhat 11:16–17. Hangyoa ang klase sa pagsunod, mangita sa panapos nga mga sulti ni Pedro ngadto sa mga disipulo.

• Unsa sa imong hunahuna ang gipasabut ni Pedro sa dihang siya miingon,“Si Kinsa man ako nga arang makasalanta sa Dios?” (bersikulo 17)? (Dili mosupak si Pedro sa kabubut-on sa Dios sa paghatag sa mga Hentil sa oportunidad sa pagdawat sa ebanghelyo, paghinulsol, ug sa pagpabunyag.)

Dapita ang mga estudyante sa pagbasa sa hilum sa Mga Buhat 11:18, mangita kon sa unsa nga paagi mitubag ang mga disipulo ngadto sa pagpasabut ni Pedro.

• Sa unsa nga paagi mitubag ang mga disipulo sa dihang ilang nahibaloan nga si Pedro gigiyahan sa Dios?

• Unsa nga baruganan ang gitudlo niini nga istorya mahitungod sa unsa nga paagi kita makasuporta ug makasunod niadtong kinsa nagdumala sa Simbahan? (Ang mga estudyante mahimong moila ug lainlaing mga baruganan, apan siguroa nga ilang masabtan nga kon kita mahibalo nga kadtong kinsa nagdumala sa Simbahan gigiyahan sa Dios, kita masaligong mosuporta ug mosunod kanila. Kini nga baruganan nahimatud-an sa bag-ong kasulatan, nga nagrekord nga ang Dios nagpadayag sa Iyang kabubut-on ngadto niadtong kinsa naghupot sa mga yawe sa tigdumala nga priesthood [tan-awa sa D&P 28:2, 7; 42:11; 107:65–66].)

• Sa unsa nga paagi ikaw nahibalo nga kadtong kinsa nagdumala sa Simbahan gigiyahan sa Dios?

• Unsa nga tambag gikan sa mga propeta ang imong napili sa pagsunod tungod kay ikaw nahibalo nga ang mga propeta gigiyahan sa Dios?

Dapita ang mga estudyante sa paghimo og tumong sa pag-angkon og mas lig-on nga pagpamatuod nga kadtong kinsa nagdumala sa Simbahan gigiyahan sa Dios.

Mga Buhat 11:19–30

Ang buhat sa Ginoo nagpadayon sa pag-uswag bisan sa pagpanggukod

I-summarize ang Mga Buhat 11:19–30 pinaagi sa pagpasabut nga tungod sa pagpanggukod, daghang mga disipulo nagkatibulaag sa tibuok nga rehiyon apan matinud-anon nga nagsangyaw sa ebanghelyo bisan asa sila moadto.

Komentaryo ug Background nga Impormasyon

Mga Buhat 10:21–24. Gikinahanglan nga ipakuha ni Cornelio si Pedro aron sa pagdawat sa mga ordinansa sa ebanghelyo

“Ang pagkakita og anghel o pagdawat og pagbisita gikan sa langit dili magdala og kaluwasan; ang pagsunod sa mga sugo mao. Nangandoy si Cornelio og kaluwasan, ug aron sa pag-angkon niini kinahanglan siya nga mosunod sa mga lagda niini. Ang anghel kinsa mipakita ug mihatag ni Cornelio og unang mga panudlo makasulti unta kaniya kon unsa ang buhaton, apan iyang gipadala siya ngadto ni Pedro, kinsa ang naghupot sa yutan-ong awtoridad. Kini mao ang sumbanan diha sa gingharian sa Dios. Kini mao, usab, ingon nga naobserbahan ni Joseph Smith: … ‘Ang anghel misulti sa buotang tigulang nga si Cornelio nga kinahanglan gayud nga iyang ipakuha si Pedro aron makakat-on kon sa unsa nga paagi maluwas: Si Pedro makabunyag ug ang mga anghel dili, kutob nga adunay legal nga mga opisyales nga buhing naghupot sa mga yawe sa gingharian, o sa awtoridad sa priesthood” [Mga Pagtulun-an sa mga Presidente sa Simbahan: Joseph Smith (2007), 129; mga italic gidugang]” (The Life and Teachings of Jesus and His Apostles [manwal sa Church Educational System, 1979], 252).

Mga Buhat 10:45.. Ang gasa sa Espiritu Santo

Sa Mga Buhat 10:45, ang mga pulong “ang gasa sa Espiritu Santo” nagpasabut ngadto sa gahum sa Espiritu Santo, nga miabut diha niini nga mga Hentil. Kini lahi gikan sa gasa sa Espiritu Santo, nga atong nadawat pinaagi sa ordinansa sa kumpirmasyon human sa bunyag (tan-awa sa Mga Buhat 8:14–17; Mga Pagtulun-an sa mga Presidente sa Simbahan: Joseph Smith [2007], 112).

Mga Buhat 11. Ang Dios naggiya sa Iyang Simbahan pinaagi sa pagpadayag ngadto sa Iyang propeta, ang nauna nga Apostol

Namulong si Elder L. Tom Perry sa Korum sa Napulog Duha ka mga Apostoles kabahin sa han-ay pinaagi diin ang pagpadayag madawat alang sa Simbahan:

“Adunay han-ay sa paagi ang Ginoo sa pagpadayag sa Iyang kabubut-on ngadto sa katawhan. Tanan kita adunay katungod sa paghangyo sa Ginoo ug pagdawat sa inspirasyon pinaagi sa Iyang Espiritu sulod sa utlanan sa atong kaugalingong pagkatinugyanan. Ang mga ginikanan makadawat og pagpadayag alang sa ilang kaugalingong pamilya, ang usa ka bishop alang sa iyang gitakda nga kongregasyon, ug hangtud ngadto sa Unang Kapangulohan alang sa tibuok nga Simbahan. Hinoon, kita dili makadawat og pagpadayag alang sa pagkatinugyanan sa lain nga tawo. Si Propeta Joseph Smith mipahayag:

“‘Supak kini sa mga lagda sa Dios alang ni bisan kinsa nga miyembro sa Simbahan, o ni bisan kinsa, sa pagdawat og mga panudlo alang niadtong may awtoridad, nga mas taas pa kay sa ilang kaugalingon’ [Mga Pagtulun-an sa mga Presidente sa Simbahan: Joseph Smith (2007), 236]” (“We Believe All That God Has Revealed,” Ensign or Liahona, Nob. 2003, 85–86).

Mga Buhat 11. Ang pagpadayag kasagarang magtubo samtang kita naglihok sumala sa unsay atong nahibaloan

Si Elder David A. Bednar sa Napulog Duha ka mga Apostoles gipakigsama ang nagtubo nga pagpadayag ngadto sa nagsubang nga adlaw:

“Ang hinay-hinay nga pagtubo sa kahayag gikan sa nagsubang nga adlaw sama sa pagdawat og mensahe gikan sa Dios ‘pagtulun-an human sa usa ka pagtulun-an, lagda human sa usa ka lagda’ (2 Nephi 28:30). Labing kasagaran, ang pagpadayag motubo og hinay-hinay sa pagdagan sa panahon ug ihatag sumala sa atong tinguha, katakus, ug pagpangandam. Ang ingon nga komunikasyon gikan sa Langitnong Amahan sa hinay-hinay ug sa kalumo ‘motuhop diha sa [atong mga kalag] ingon sa mga yamog nga gikan sa langit’ (D&P 121:45). Kining sumbanan sa pagpadayag may hilig nga mahimong mas sagad kay sa panagsa ra” (“Ang Espiritu sa Pagpadayag,” Ensign o Liahona, Mayo 2011, 88).

Dugang nga mga Ideya sa Pagtudlo

Mga Buhat 10:34–35. “Ang Dios walay pinalabi sa mga tawo”

Samtang ang mga estudyante nag-summarize kon unsa ang nakat-unan ni Pedro ingon nga narekord diha sa Mga Buhat 10:34–35, siguroa nga ilang nailhan ang mosunod nga kamatuoran: Ang Dios walay pinalabi sa mga tawo. Mahimo nimong dapiton sila sa pagmarka niini nga kamatuoran sa bersikulo 34.

• Unsa ang gipasabut sa “Ang Dios walay pinalabi sa mga tawo”? (Tan-awa sa 2 Nephi 26:33.)

• Unsa nga kahupayan ang ikahatag niini nga kamatuoran kanimo?

Mahimo nimong ipasabut nga samtang ang Dios dili mopabor og mga tawo pinasikad sa mga ilhanan sama sa nasyonalidad o sosyal nga kahimtang, Siya mohukom sa tanan nga mga tawo pinaagi sa ilang mga buhat ug nagpanalangin niadtong kinsa nagsunod Kaniya.

(Alang sa dugang nga impormasyon, tan-awa ang opisyal nga pamahayag “Race and the Church: All Are Alike unto God” [mormonnewsroom.org/article/race-church]; tan-awa usab Bruce R. McConkie, “All Are Alike Unto God” [Symposium sa Church Educational System sa Basahon ni Mormon, Agos. 18, 1978], speeches.byu.edu.)