Leksyon 91

Mga Buhat 13–14

Pasiuna

Si Pablo (kaniadto gitawag og Saulo) misugod sa iyang unang misyonaryong panaw uban ni Bernabe isip iyang kauban. Gisangyaw nila ang ebanghelyo ug gitukod ang mga branch sa Simbahan taliwala sa nagpadayong pagpanggukod. Sa dihang ang mga Judeo midumili sa pagdawat sa pulong sa Dios, si Pablo ug si Bernabe mitutok diha sa pagsangyaw taliwala sa mga Hentil.

Mga Sugyot alang sa Pagtudlo

Mga Buhat 13:1–13

Si Pablo ug si Bernabe misugod og misyonaryong panaw ug gibadlong ang usa ka mini nga propeta

Sa dili pa ang klase pag-andam og usa ka timaan nga nag-ingon “Walay oposisyon” ug lain nga timaan nga nag-ingon “Kanunay nga oposisyon.” Ibutang kini sa magkaatbang nga mga bongbong sa classroom.

Hangyoa ang mga estudyante sa paghunahuna sa kal-ang tali sa mga timaan isip ang sukdanan nga nagrepresentar sa gitas-on sa oposisyon nga atubangon sa usa ka tawo kon maninguha sa pagsunod sa ebanghelyo. Dapita ang mga estudyante sa pagbarug tali sa mga timaan diha sa mga dapit nga ilang gihunahuna nga nagpakita sa gitas-on sa oposisyon nga gisinati ni Moises. Hangyoa ang pipila ka mga estudyante sa pagpasabut sa ilang mga pinili nga dapit. Balika kini nga pagbansay pinaagi sa paghangyo sa mga estudyante sa pagbarug sa bisan asa nga dapit diha sa sukdanan sa oposisyon alang ni Joseph Smith ug dayon alang ni Nephi. Hangyoa ang pipila ka mga estudyante sa pagpasabut sa ilang mga pagpili sa matag usa. Dapita ang mga estudyante sa pagbalik ngadto sa ilang mga lingkuranan.

Ipaila nga ang matag disipulo ni Jesukristo makasugat og oposisyon sa nagkalain-laing mga panahon sa iyang kinabuhi. Hangyoa ang mga estudyante sa paghunahuna mahitungod sa asa nila ibutang ang ilang mga kaugalingon subay sa sukdanan sa oposisyon samtang sila naninguha sa pagsunod sa ebanghelyo. Awhaga ang mga estudyante sa pagpangita og mga baruganan samtang sila nagtuon sa Mga Buhat 13–14 nga makatabang sa paggiya kanila kon sila makasugat og oposisyon diha sa ilang mga paningkamot sa pagpuyo nga matarung.

I-summarize ang Mga Buhat 13:1–6 pinaagi sa pagpasabut nga sa dihang pipila ka mga propeta ug mga magtutudlo nagpundok sa Antioquia sa Siria, sila nakadawat og direksyon gikan sa Espiritu Santo nga si Saulo (sa kadugayan nailhan nga Pablo) ug si Bernabe kinahanglan nga tawgon aron magkuyog og sangyaw sa ebanghelyo. Human sila ma-set apart, si Saulo ug si Bernabe mibiyahe gikan sa Antioquia ngadto sa isla sa Cipro ug misangyaw diha sa usa ka sinagoga sa siyudad sa Salamis. Gikan didto mibiyahe sila ngadto sa pikas nga bahin sa isla padulong sa siyudad sa Pafos. (Mahimong dapiton nimo ang mga estudyante sa pagpangita sa Antioquia ug Cipro diha sa Mga Mapa Ug Indeks Sa Mga Ngalan Sa Dapit, Mapa 6, “Ang Una ug Ikaduha nga mga Panaw ni Apostol Pablo.”)

Dapita ang usa ka estudyante sa pagbasa og kusog sa Mga Buhat 13:6–8. Hangyoa ang klase sa pagsunod, mangita sa unsay nahitabo sa dihang miabut si Saulo ug Bernabe sa Pafos.

• Sumala sa bersikulo 7, kinsa ang gustong maminaw sa ebanghelyo gikan ni Saulo ug Bernabe? (Si Sergio Paulo, kinsa mao ang Romanong deputado sa nasud.)

• Unsa nga oposisyon ang giatubang sa mga misyonaryo sa pagtudlo sa ebanghelyo ngadto ni Sergio Paulo?

Ipasabut nga sugod sa Mga Buhat 13:9, si Saulo gipasabut nga si Pablo. Dapita ang usa ka estudyante sa pagbasa og kusog sa Mga Buhat 13:9–12. Hangyoa ang klase sa pagsunod, mangita kon sa unsa nga paagi giatubang ni Pablo ang oposisyon gikan sa mini nga propeta nga si Elimas.

• Unsay gisulti ni Pablo mahitungod ni Elimas diha sa bersikulo 10? (Ipasabut nga si Pablo migamit og ngil-ad nga mga pulong tungod kay si Elimas misulay sa pagpugong og laing tawo gikan sa pagdawat sa kaluwasan.)

• Sumala sa bersikulo 11, unsay gibuhat ni Pablo ngadto sa mini nga propeta pinaagi sa gahum sa Dios?

• Sumala sa bersikulo 12, sa unsa nga paagi nga ang pagsaksi sa gahum sa Dios miimpluwensya sa deputado?

• Unsay atong makat-unan gikan niini nga istorya mahitungod sa gahum sa Dios kon itandi ngadto sa gahum sa yawa? (Bisan og ang mga estudyante mahimong mogamit og lahi nga mga pulong, siguroa nga ilang mailhan ang mosunod nga kamatuoran: Ang gahum sa Dios mas labaw kaayo kay sa gahum sa yawa. Mahimong mosugyot ka nga ang mga estudyante mosulat niini nga kamatuoran diha sa ilang mga kasulatan tupad sa Mga Buhat 13:9–12.)

Dapita ang mga estudyante sa pagpamalandong kon sa unsa nga paagi nga ang pagsabut nga ang gahum sa Dios sobra kaayo ka labaw sa gahum sa yawa makatabang kanato sa pag-atubang sa oposisyon sa atong mga kinabuhi. Hangyoa ang pipila ka mga estudyante sa pagpakigbahin sa ilang mga hunahuna uban sa klase.

Mga Buhat 13:14–43

Gisaysay og balik ni Pablo ang kasaysayan sa mga Israelite ug nagpamatuod nga si Jesukristo miabut agi og katumanan sa mga saad sa Dios

Dapita ang mga etudyante sa paghunahuna og sayop nga ilang nahimo nga ilang gipangandoy nga ilang mabalik ug mapapas. Ipasabut nga usahay ang oposisyon nga atong atubangon mahitabo tungod sa atong makasasala nga mga pagpili. Awhaga ang mga estudyante sa pagpangita og usa ka baruganan samtang sila nagtuon sa Mga Buhat 13:14–43 nga makatabang kanila sa pagbuntog niini nga oposisyon.

I-summarize ang Mga Buhat 13:14–37 pinaagi sa pagpasabut nga si Pablo ug si Bernabe mibiya sa Cipro ug milayag ngadto sa Panfilia (sa karon nga panahon Turkey), human diin usa sa ilang mga kauban, si Juan Marcos, mihukom sa pagbiya kanila ug mipauli sa panimalay. Si Pablo ug si Bernabe mipadayon ngadto sa Antioquia sa Pisidia (dili ikalibug sa Antioquia sa Siria, gikan diin sila misugod sa ilang misyon). Didto sa Igpapahulay, mibarug si Pablo sa atubangan sa mga lalaki diha sa sinagoga ug gisaysay og balik ang mga panghitabo gikan sa Israelite nga kasaysayan. Dayon mipamatuod si Pablo ni Jesukristo ingon nga ang gisaad nga Manluluwas a Israel.

Dapita ang mga estudyante sa pagbasa og hilum sa Mga Buhat 13:26–34, mangita sa unsay gitudlo ni Pablo mahitungod ni Jesukristo.

• Unsay gusto ni Pablo nga masabtan niadtong anaa sa sinagoga mahitungod ni Jesukristo?

Dapita ang usa ka estudyante sa pagbasa og kusog sa Mga Buhat 1:38–39. Dapita ang klase sa pagsunod, mangita sa unsa nga panalangin ang gitudlo ni Pablo nga atong madawat pinaagi sa Pag-ula ni Jesukristo.

• Unsa nga panalangin ang atong madawat tungod ni Jesukristo ug sa Iyang Pag-ula? (Naggamit sa mga pulong sa mga estudyante, isulat ang mosunod nga kamatuoran diha sa pisara: Mapasaylo kita sa atong mga sala ug kahatagan og kaangayan pinaagi sa Pag-ula ni Jesukristo.)

Ipasabut nga ang pulong nga gihatagan og kaangayan [pahigawas], ingon nga gigamit diha sa bersikulo 39, nagpasabut nga “palingkawason [o pasayloon] gikan sa silot alang sa sala ug gipahayag nga dili sad-an” (Giya ngadto sa mga Kasulatan, “Kaangayan, Paghatag og Kaangayan,” scriptures.lds.org). Kon ang usa ka tawo gihatagan og kaangayan pinaagi sa Pag-ula ni Jesukristo, ang iyang relasyon uban sa Dios mahimong matarung pag-usab.

• Sa unsa nga paagi ang Pag-ula ni Jesukristo nagtugot kanato nga mahatagan og kaangayan gikan sa atong mga sala?

Aron pagtabang sa mga estudyante nga masabtan ang doktrina, dapita ang usa ka estudyante sa pagbasa og kusog sa mosunod nga pamahayag ni Elder D. Todd Christofferson sa Korum sa Napulog Duha ka mga Apostoles:

“Nag-antus si Jesus ug gihatag ang Iyang kinabuhi sa pag-ula alang sa sala. Ang gahum sa Iyang Pag-ula makapapas sa mga epekto sa sala diha kanato. Kon maghinulsol kita, ang Iyang maulaong grasya naghatag og kaangayan ug naglimpyo kanato (tan-awa sa 3 Nephi 27:16–20). Sama ra kini nga wala kita makasala, nga daw wala kita magpabuntog ngadto sa pagtintal” (“Aron nga Sila Mausa ngari Kanato,” Ensign o Liahona, Nob. 2002, 71).

• Unsay kinahanglan natong buhaton aron nga mapasaylo kita sa atong mga sala ug kahatagan og kaangayan pinaagi sa Pag-ula ni Jesukristo?

• Kinsa ang pipila sa mga tawo gikan sa mga kasulatan kinsa napasaylo sa ilang mga sala ug nahatagan og kaangayan pinaagi sa Pag-ula ni Jesukristo? (Ang pipila sa mga ehemplo naglakip ni Pablo, Alma ang Batan-on, ug Enos.)

Dapita ang mga esudyante sa pag-awit sa unang duha ka mga bersikulo sa “I Stand All Amazed” (Hymns, no. 193). Awhaga sila sa pagpangita samtang sila nagkanta kon giunsa sa tigsulat sa himno sa pagpahayag sa iyang pasalamat alang sa Pag-ula sa Manluluwas ug sa pagpasaylo.

Dapita ang mga estudyante sa pagtubag sa mosunod nga pangutana diha sa ilang mga class notebook o sa mga scripture study journal o sa usa ka pirasong papel.

• Unsa nga mga pagbati ang anaa kanimo ngadto ni Jesukristo kon ikaw maghunahuna mahitungod kon sa unsa nga paagi ang Iyang Pag-ula naghimo niining posible alang kanimo nga mapasaylo sa imong mga sala?

Human sa igong panahon, dapita ang pipila ka mga estudyante sa pagpakigbahin sa unsay ilang gisulat. Awhaga ang mga estudyante sa pagsunod sa bisan unsang mga pag-aghat nga ilang nadawat gikan sa Espiritu Santo sa pagtabang kanila sa pagdawat og kapasayloan ug kaangayan pinaagi sa Pag-ula ni Jesukristo.

I-summarize ang Mga Buhat 13:40–43 pinaagi sa pagpasabut nga human sa wali ni Pablo, daghang mga Hentil mihangyo ni Pablo sa pagtudlo og usab sa sunod nga Igpapahulay.

Mga Buhat 13:44–52

Si Pablo ug si Bernabe misangyaw nga maisugon bisan pa sa nagtubo nga pagpanggukod

Ipasabut nga sa sunod adlaw nga Igppahulay, hapit ang tibuok siyudad mianha aron sa pagpaminaw ni Pablo ug ni Bernabe nga nagtudlo sa pulong sa Dios (tan-awa sa Mga Buhat 13:44).

Ipares ang mga estudyante ug dapita sila sa pagbasa og dungan sa Mga Buhat 13:44–52. Tudloi ang usa ka estudyante sa matag paris sa pagpangita sa mga kinaiya ug mga lihok sa mga Judeo ug ang lain nga estudyante sa pagpangita sa mga kinaiya ug mga lihok sa mga Hentil samtang ang mga katawhan mipundok sa pagpaminaw ni Pablo ug Bernabe. Kon ang mga estudyante nahuman na sa pagbasa, hangyoa ang matag paris sa mga estudyante sa pagtandi ug pagpalahi sa mga lihok ug mga kinaiya sa mga Judeo ngadto sa mga lihok ug mga kinaiya sa mga Hentil.

• Unsa nga mga panalangin ang miabut niadtong kinsa andam sa pagpaminaw ngadto ni Pablo ug sa iyang mga kauban?

Mga Buhat 14

Si Pablo ug si Bernabe mihimo og mga milagro samtang sila nagsangyaw sa ebanghelyo taliwala sa nagpadayong pagpanggukod

Isulat ang mosunod nga mga pangutana diha sa pisara: Ngano nga ang Ginoo nagtugot sa maayong mga tawo sa pagsinati og malisud nga mga pagsulay?

Dapita ang mga estudyante sa pagpangita og baruganan samtang sila magtuon sa Mga Buhat 14 nga makatabang kanila sa pagsabut og usa ka paagi sa pagtubag niini nga pangutana.

Ipasabut nga ang Mga Buhat 14:1–21 naghulagway og pipila sa mga kasakit nga gilahutay ni Pablo ug ni Bernabe samtang sila nagpadayon sa pagsangyaw. Dapita ang pipila ka mga estudyante sa pagbasa og kusog sa mosunod nga mga bersikulo, ug hangyoa ang klase sa pagsunod, mangita sa mga kasakit nga giatubang sa mga misyonaryo.

1. Mga Buhat14:1–2 (Ang dili matuohon nga mga Judeo mihulhog mga Hentil batok ni Pablo ug Bernabe.)

2. Mga Buhat 14:8–18 (Human giayo ni Pablo ang bakol nga lalaki, ang mga tawo sa Listra naghunahuna ni Pablo ug ni Bernabe nga Griyego nga mga dios ug misulay sa paghalad og sakripisyo ngadto kanila.)

3. Mga Buhat 14:19–20 (Si Pablo gibato ug mibangon og balik.)

• Unsa nga mga kasakit ang kinahanglang ilahutay ni Pablo ug ni Bernabe?

• Unsa nga mga hunahuna ang tingali maanaa kanimo kon ikaw kauban pa ni Pablo ug ni Bernabe sa panahon niadtong mga kasakit?

Dapita ang usa ka estudyante sa pagbasa og kusog sa Mga Buhat 14:22. Hangyoa ang klase sa pagsunod, mangita sa unsay gitudlo ni Pablo mahitungod sa kasakit.

Tabangi ang mga estudyante sa pag-ila sa mga doktrina ug mga baruganan

Ang usa sa mga katuyoan sa mga kasulatan mao ang pagtudlo sa mga doktrina ug mga baruganan sa ebanghelyo. Ang pag-ila sa mga doktrina ug mga baruganan nga makaplagan diha sa mga kasulatan mao ang usa sa mga Sukaranan sa Pagtudlo ug Pagkat-on sa Ebanghelyo. Ang pagkat-on kon unsaon pag-ila niini nagkinahanglan ug mahunahunaong mga paningkamot ug pagbansay. Samtang ang mga doktrina ug mga baruganan giila, siguroa nga kini tataw ug yano nga pagkapahayag sa pagsiguro nga kining mga kamatuoran tataw diha sa mga salabutan sa mga estudyante.

• Unsa nga baruganan ang gitudlo ni Pablo niini nga bersikulo? (Ang mga estudyante mahimong mogamit og lain-laing mga pulong apan kinahanglan nga makaila og kamatuoran nga susama sa mosunod: Samtang kita matinud-anong moantus og kasakit, mahimo kitang andam sa pagsulod sa celestial nga gingharian.)

• Sa unsa nga mga paagi sa imong hunahuna ang matinud-anong paglahutay og kasakit makaandam kanato alang sa celestial nga gingharian?

Hangyoa ang mga estudyante sa pagpamalandong og mga panalangin nga miabut kanila o ngadto sa mga tawo nga ilang kaila samtang sila nagmatinud-anong miantus sa kasakit. Dapita ang pipila ka mga estudyante sa pagpakigbahin sa ilang mga kasinatian. Pahinumdumi ang mga estudyante nga sila kinahanglan dili mopakigbahin og mga kasinatian nga sagrado o pribado kaayo. Hunahunaa ang pagpakigbahin sa imong kaugalingong personal nga mga kasinatian nga makadugang og paghulagway niini nga baruganan ug sa pagpamatuod kalabut sa pagkatinuod niini.

Awhaga ang mga estudyante sa pagpamalandong sa mga kamatuoran nga ilang giila gikan sa Mga Buhat 13 ug 14 ug pagpili og usa nga motabang kanila og maayo panahon sa mga pagsulay. Paghatag og gamay nga note card o piraso sa papel alang sa matag estudyante, ug dapita ang mga estudyante sa pagsulat sa baruganan nga ilang gipili diha sa kard. Awhaga ang mga estudyante sa pagpataput niini sa usa ka lugar diin sila makakita niini kanunay (salamin, locker sa ekwelahan, ug uban pa) sa paghatag og kalig-on ug pag-awhag kon mag-atubang sila og mga pagsulay.

Komentaryo ug Background nga Impormasyon

Mga Buhat 13:9. Si Saulo nahimong nailhan nga Pablo

“[Ang Apostol Pablo] nailhan sa bata pa nga Saulo; ang iyang Latinong pangalan nga Pablo unang gihisgutan sa sinugdanan sa iyang hentil nga pangalagad (Mga Buhat 13:9)” (Ang Giya ngadto sa mga Kasulatan, “Pablo”).

Mga Buhat 13:51.. “Sila nanaktak sa mga abug gikan sa ilang mga tiil”

Mihatag si Elder James E. Talmage sa Korum sa Napulog Duha ka mga Apostoles niini nga pagpasabut kalabut sa pagpanaktak sa abug gikan sa tiil sa usa ka tawo:

“Ang ingon og seremonyas nga pagpanaktak sa abug gikan sa tiil sa usa ka tawo isip pagpamatuod batok sa lain gisabut sa mga Judeo nga simbolo sa pagputol sa panaghigalaay ug ang pagbiya sa tanang responsibilidad alang sa mga sangputanan nga mahimong mosunod. Nahimo kini nga balaod sa pagpasangil ug pagpamatuod pinaagi sa mga panudlo sa Ginoo ngadto sa Iyang mga apostoles ingon nga gipasabut diha sa [Mateo 10:14]. Sa dispensasyon karon, ang Ginoo susama nga misugo sa Iyang may awtoridad nga mga sulugoon sa pagpamatuod gayud batok niadtong kinsa sa kabubut-on ug madumtanon nga paagi mibatok sa kamatuoran nga gipaila sa awtoridad nga paagi” (Jesus the Christ, 3rd ed. [1916], 345; tan-awa usab sa D&P 24:15; 75:18–22; 84:92–96). Hinoon, tungod sa seryosong kinaiya niini, ang pagbansay sa pagpanaktak sa abug gikan sa till sa usa ka tawo kinahanglan nga dili gayud buhaton gawas kon ubos sa direksyon sa Unang Kapangulohan ug sa Korum sa Napulog Duha ka mga Apostoles.

Mga Buhat 14:22.. “Pinaagi sa daghang kasakit”

Si Elder Robert D. Hales sa Korum sa Napulog Duha ka mga Apostoles mitudlo sa mosunod mahitungod sa kasakit:

“Adunay kahulugan ug katuyoan sa atong yutan-ong mga hagit. … Matag usa kanato kinahanglan gayud nga moagi og piho nga mga kasinatian aron mahimong mas sama sa atong Manluluwas. Sa kinabuhi, ang magtutudlo sa kanunaykasakit ug kalisdanan, apan ang leksyon gituyo aron sa paghashas ug sa pagpanalangin kanato ug sa paglig-on kanato, dili sa paglaglag kanato” (“Hugot nga Pagtuo sa panahon sa Kalisdanan Magdala og Kalinaw ug Hingpit nga Kalipay,” Ensign o Liahona, Mayo 2003, 16, 17).

Mipasabut si Elder Quentin L. Cook sa Korum sa Napulog Duha ka mga Apostoles sa mga katuyoan sa pag-antus dinhi sa mortal nga kinabuhi:

“Daghang mga matang sa mga hagit. Ang uban nakahatag kanato og gikinahanglang mga kasinatian. Ang bati nga mga resulta niining mortal nga kinabuhi dili ebidensya sa kakulang sa pagtuo o sa pagkadili hingpit sa tibuok nga plano sa atong Amahan sa Langit. Ang kalayo sa magtutunaw tinuod, ug ang mga kalidad sa pamatasan ug pagkamatarung nga napalambo pinaagi sa kalisdanan mohingpit ug molimpyo kanato ug moandam kanato sa pag-atubang sa Dios” (“Ang mga Awit nga Dili Nila Makanta,” Ensign o Liahona, Nob. 2011, 106).