Mga Buhat 20–22

Pasiuna

Gisangyaw ni Pablo ang ebanghelyo sa Asia Minor (karong panahona Turkey), ug samtang didto siya sa Mileto, usa ka siyudad duol sa Efeso, iyang gipasidaan ang usa ka umaabut nga apostasiya ug giawhag ang priesthood nga mga lider sa paglig-on sa mga miyembro sa Simbahan. Dayon siya mibiyahe ngadto sa Jerusalem, diin siya gilutos ug gidakop. Samtang nagbarug diha sa mga hagdanan sa kota (usa ka garison diin ang mga kasundalohan sa Romano nagpuyo), gipakigbahin ni Pablo ang istorya sa iyang pagkakabig.

Mga Sugyot alang sa Pagtudlo

Mga Buhat 20:1–21:40

Nangalagad si Pablo sa Asia Minor ug mibiyahe ngadto sa Jerusalem, diin siya gibunalan ug gidakop

Hangyoa ang mga estudyante sa paghunahuna og panahon sa dihang sila kinahanglan nga mobiya sa ilang pamilya, mga higala, o ubang mga tawo nga importante kanila sulod sa daghang mga adlaw, mga semana, o mga bulan.

Unsa nga mga matang sa pagbati nga anaa nimo o kadtong imong mga kauban sa wala pa ikaw mobiya?
Unsay inyong gisulti sa usag usa sa wala pa ang panagbulag?

Ipasabut nga sa panahon sa ikatulong misyonaryo nga panaw ni Pablo, migahin siya og panahon sa Macedonia, Gresya, ug Asia Minor. Atol niini nga panaw, nadani siyang mobalik ngadto sa Jerusalem. Samtang siya mibiyahe, mihunong siya aron sa pagsangyaw ug sa pagpanamilit ngadto sa mga miyembro sa Simbahan nga naagian. Sa pagkagabii sa wala pa siya mobiya gikan sa Troas, sa bag-ong Igpapahulay (Dominggo), si Pablo ug ang mga disipulo nagkatigum aron sa pagpikas-pikas sa tinapay (tan-awa sa Mga Buhat 20:7). Dayon si Pablo nakigpulong uban sa mga Santos hangtud sa tungang gabii.

Dapita ang usa ka estudyante sa pagbasa og kusog sa Mga Buhat 20:9–12. Hangyoa ang klase sa pagsunod, mangita sa unsay nahitabo ngadto sa usa ka batan-ong lalaki nga ginganlan og Eutico human siya nakatulog atol sa wali ni Pablo.

Unsay nahitabo ni Eutico?
Unsay gibuhat ni Pablo aron sa pagpakita og gugma ug kabalaka alang niining batan-ong lalaki?
Sa unsa nga paagi ang mga lihok ni Pablo nagsalamin sa pangalagad sa Manluluwas?

Ipasabut nga isip kabahin sa ikatulong misyonaryong panaw ni Pablo, si Pablo migahin og tulo ka tuig sa Efeso. I-summarize ang Mga Buhat 20:13–17 pinaagi sa pagpasabut nga sa iyang pagpadulong ngadto sa Jeruslem, mihunong si Pablo sa Mileto, diha gawas ra sa Efeso, ug mipadala og pulong alang sa mga lider sa Simbahan sa pagpakigkita kaniya.

Dapita ang usa ka estudyante sa pagbasa og kusog sa Mga Buhat 20:18–23. Hangyoa ang klase sa pagsunod, mangita sa unsay gipasabut ni Pablo mahitungod sa iyang serbisyo.

Giunsa paghulagway ni Pablo ang iyang misyonaryong pagserbisyo?
Unsa kaha ang gipasabut sa pamahayag ni Pablo nga siya “wala maglilong sa bisan unsa” (bersikulo 20) gikan niadtong iyang gitudloan?
Sumala sa bersikulo 23, unsay andam nga atubangon ni Pablo isip sulugoon sa Ginoo?

Ipasabut nga si Pablo kasagaran daling makaagi og kuyaw diha sa Jerusalem, diin ang mga lider nga Judeo nagtan-aw kaniya ingon og usa ka maluibon tungod sa iyang mga paninguha sa pagsangyaw sa ebanghelyo ni Jesukristo.

Sumala sa bersikulo 22, nganong si Pablo andam nga moadto sa Jerusalem?

Dapita ang pipila ka mga estudyante sa pagpuli-pulig basa og kusog gikan sa Mga Buhat 20:24–27. Hangyoa ang klase sa pagsunod, mangita kon unsa ang andam nga buhaton ni Pablo isip usa ka sulugoon sa Ginoo.

Sumala sa bersikulo 24, unsa ang andam nga buhaton ni Pablo isip usa ka sulugoon sa Ginoo?
Unsa nga emosyon ang gisulti ni Pablo nga iyang gibati sa pagbuhat sa unsay gisugo sa Ginoo?
Unsa ang atong makat-unan gikan sa ehemplo ni Pablo sa pagserbisyo? (Ang mga estudyante mahimong mogamit og lain-laing mga pulong, apan siguroa nga ilang mailhan ang mosunod nga kamatuoran: Ang tinuod nga mga sulugoon sa Ginoo matinud-anong nagbuhat sa ilang katungdanan, ug sa pagbuhat sa ingon gibati nila ang hingpit nga kalipay.)
Unsa ang kahulugan niini nganha kanimo ang matinud-anong pagbuhat sa imong katungdanan?
Sa unsa nga paagi atong magamit kini nga kamatuoran sa atong kaugalingong kinabuhi?

Dapita ang mga estudyante sa pagpakigbahin og panahon sa dihang sila o usa ka tawo nga ilang kaila mipili sa pagserbisyo sa Ginoo uban sa tibuok nilang gahum ug kusog ug misinati og dakong hingpit nga kalipay.

Pahinumdumi ang mga estudyante nga mibisita si Pablo sa mga lider sa Simbahan sa Efeso sa katapusang panahon sa wala pa mobiya alang sa Jerusalem.

Kon ikaw anaa pa sa lugar ni Pablo ug nahibalo nga dili na nimo makita ang mga lider sa Simbahan sa Efeso pag-usab, unsa nga tambag ang imong ihatag kanila sa dili pa ikaw mobiya?

Hangyoa ang mga estudyante sa pagbasa sa hilum sa Mga Buhat 20:28–31, mangita sa mga pasidaan ni Pablo ngadto niini nga mga lider sa Simbahan.

Mahitungod sa unsa ang gipasidaan ni Pablo niini nga mga lider?

Ipasabut nga migamit si Pablo sa mga lobo isip usa ka pasumbingay alang sa dili matinud-anong mga tawo kinsa molingla sa matinud-anong mga miyembro sa Simbahan.

Unsa nga pulong ang atong gamiton sa paghulagway sa kondisyon niadtong kinsa mitalikod gikan sa kamatuoran ug naninguha sa paggiya sa uban palayo gikan sa kamatuoran? (Apostasiya. Ipasabut nga si Pablo nagpasidaan sa mga lider sa Simbahan sa umaabut nga apostasiya sulod sa Simbahan.)

Dapita ang usa ka estudyante sa pagbasa og kusog sa Mga Buhat 20:36–38. Hangyoa ang klase sa pagsunod, mangita kon giunsa sa mga lider sa Simbahan pagtubag samtang mibiya na si Pablo. Dapita ang mga estudyante sa pagreport unsa ang ilang nakit-an.

I-summarize ang Mga Buhat 21:1–10 pinaagi sa pagpasabut nga mipadayon si Pablo sa iyang panaw paingon sa Jerusalem ug mihunong sa lain-laing mga rehiyon aron sa paggahin og panahon uban sa mga miyembro sa Simbahan nga naagian. Sa dihang si Pablo mihunong sa usa ka siyudad nga gitawag og Tiro, ang pipila ka mga disipulo—sa tinuod nabalaka alang sa kahilwasan ni Pablo—mitambag ni Pablo sa dili pag-adto sa Jerusalem (tan-awa sa Mga Buhat 21:4).

Sa Cesarea, usa ka propeta nga ginganlan og Agabo nanagna kalabut sa unsay mahitabo ni Pablo sa Jerusalem. Dapita ang usa ka estudyante sa pagbasa og kusog sa Mga Buhat 21:11. Hangyoa ang klase sa pagsunod, mangita kon unsay gipanagna ni Agabo. (Mahimong imong ipasabut nga ang pulong bakus nagpasabut og bakus sa hawak.) Dapita ang mga estudyante sa pagreport unsa ang ilang nakit-an.

Dapita ang usa ka estudyante sa pagbasa og kusog sa Mga Buhat 21:12–14. Hangyoa ang klase sa pagsunod, mangita kon sa unsa nga paagi si Pablo ug ang iyang mga kauban mitubag sa panagna.

Sa unsa nga paagi ang mga kauban ni Pablo mitubag sa panagna?
Sa unsa nga paagi si Pablo mitubag sa panagna? Unsa ang makahuluganon nganha kanimo mahitungod sa tubag ni Pablo?
Unsa nga baruganan ang atong makat-unan gikan sa ehemplo ni Pablo mahitungod sa pagkamatinuorong mga sulugoon sa Ginoo? (Ang mga estudyante mahimong mogamit og lain-laing mga pulong, apan siguroha nga ilang mailhan ang mosunod nga kamatuoran: Ang matinuorong mga sulugoon sa Ginoo andam sa pagbuhat sa kabubut-on sa Dios sa walay pagsapayan sa personal nga pag-antus.)

Dapita ang mga estudyante sa pagpamalandong sa matang sa mga sakripisyo nga tingali kita hangyoon sa paghimo isip mga sulugoon sa Ginoo.

Kanus-a ka andam sa pagbuhat sa kabubut-on sa Dios nga walay pagsapayan sa imong antuson? Nganong andam ka sa pagbuhat niana?

Dapita ang usa ka estudyante sa pagbasa og kusog sa mosunod nga summary sa Mga Buhat 21:17–40.

Miabut si Pablo sa Jerusalem ug mihatag og report sa iyang misyonaryong mga kahago ngadto sa lokal nga mga lider sa Simbahan. Miadto si Pablo sa templo, ug sa dihang usa ka grupo sa mga Judeo kinsa nakaila ni Pablo tungod sa iyang misyonaryo nga mga panaw nakakita kaniya, mipahayag sila nga si Pablo usa ka mini nga magtutudlo kinsa nagtudlo batok sa balaod ni Moises ug supak sa balaod nga midala og mga Hentil ngadto sa templo. Tungod niini nga pasangil, usa ka pundok sa manggugubot midakop ni Pablo diha sa templo ug misugod sa pagbunal kaniya. Ang mga sundalong Romano mipataliwala ug gidala siya palayo aron pagataralon. Samtang diha sa hagdanan sa Kota sa Antonia (tan-awa sa Mga Mapa ug Indeks Sa Mga Ngalan sa Dapit, nu. 5, “Jerusalem sa Panahon ni Jesus”), gipangutana ni Pablo ang mga sundalo kon mahimo bang makigsulti siya sa mga tawo.

Mga Buhat 22:1–30

Nag-istorya si Pablo kalabut sa iyang pagkakabig ug nagpamatuod ni Jesukristo

Isulat ang pulong nga kabig diha sa pisara, ug ipasabut nga ang pagkabig nagpasabut og pag-usab. Pangutan-a ang mga estudyante kon sa unsa nga paagi ang tubig mabalhin o mausab aron kini magamit alang sa lain nga mga katuyoan. (Sama pananglit, ang tubig mahimong mabalhin ngadto sa ice.) Hangyoa ang mga estudyante sa pagpamalandong sa matang sa pagkausab nga gikinahanglan sa pagkakabig ngadto sa ebanghelyo.

Dapita ang usa estudyante sa pagbasa og kusog sa Mga Buhat 22:1–5. Hangyoa ang klase sa pagsunod, mangita kon giunsa ni Pablo paghulagway ang iyang kaugalingon samtang siya misulti ngadto sa mga Judeo diha sa hagdanan sa Kota sa Antonia sa Jerusalem.

Sama sa unsa si Pablo sa wala pa siya makabig ug mahimong usa ka disipulo ni Jesukristo?

Kopyaha ang mosunod nga mga pangutana ug mga kapanguhaan sa kasulatan diha sa pisara o ihatag kini nga handout ngadto sa mga estudyante. Bahina ang mga estudyante ngadto sa lima ka grupo ug i-assign sa matag grupo ang usa sa mga pangutana. Hangyoa ang mga estudyante sa pagbasa og hilum sa mga kasulatan nga motugma sa gi-assign nila nga mga pangutana ug dayon tubagon ang mga pangutana diha sa ilang class notebook o scripture study journals.

Giunsa paghulagway ni Pablo ang iyang unang panan-awon? (Mga Buhat 22:6–9)
Unsay gisugo kang Pablo nga pagabuhaton? (Mga Buhat 22:10–11)
Kinsa ang gikaila ni Pablo sa Damascus, ug unsa ang naangkon pag-usab ni Pablo? (Mga Buhat 22:12–13)
Unsa ang gipanagna ni Ananias mahitungod ni Pablo? (Mga Buhat 22:14–15)
Sa unsa nga paagi nagpakita si Pablo sa iyang hugot nga pagtuo diha kang Jesukristo? (Mga Buhat 9:18; 22:16)

Human sa igong panahon, dapita ang mga estudyante sa pagreport sa ilang mga tubag. Dapita ang pipila ka mga estudyante sa pag-summarize unsa ang ilang nakat-unan mahitungod sa proseso sa pagkakabig ni Pablo. (Mahimo usab nga imong ipasabut nga tali sa panahon sa unang panan-awon ni Pablo ug sa panahon nga siya miserbisyo isip misyonaryo, migahin siya og tulo ka tuig sa Arabia, nga malagmit usa ka panahon sa espirituhanong pagpangandam ug pagtubo [tan-awa sa Mga Taga-Galacia 1:11–18].) Dayon ipangutana ang mosunod nga mga pangutana:

Sa unsa nga mga paagi sa imong hunahuna nausab si Pablo agig resulta sa iyang pagkakabig?
Unsa ang nahitabo nga mitugot niini nga mga kausaban sa pagpahinabo?
Unsay ikatudlo kanato sa pagkakabig ni Pablo mahitungod sa unsa nga paagi kita mahimong makabig? (Ang mga estudyante mahimong mogamit og lain-laing mga pulong, apan siguroha nga ilang mailhan ang mosunod nga kamatuoran: Samtang kita nagsunod sa mga pulong ni Jesukristo, kita mahimong hingpit nga makabig.)
Sa unsa kaha kini nga baruganan makatabang sa usa ka tawo kinsa gustong makabig?

Dapita ang usa ka estudyante sa pagbasa og kusog sa mosunod nga pamahayag ni Sister Bonnie L. Oscarson, kinatibuk-ang presidente sa Young Women, diin iyang gipasabut ang kalainan tali sa pagbaton og pagpamatuod sa ebanghelyo ug sa tinuod nga pagkakabig ngadto niini:

“Ang tinuod nga pagkakabig labaw pa kaysa pagbaton lamang og kahibalo sa mga baruganan sa ebanghelyo ug nagpasabut gani og labaw pa kay sa pagbaton og pagpamatuod niadto nga mga baruganan. Posible nga magbaton og pagpamatuod sa ebanghelyo nga wala magsunod niini. Ang tinuod nga pagkakabig nagpasabut nga kita nagbuhat kon unsay atong gituohan. …

“… Ang pagkakabig mahitabo samtang kita nagsunod sa matarung nga mga baruganan nga atong nakat-unan sa atong panimalay ug sa classroom. Ang pagkakabig mahitabo samtang kita magpuyo og putli ug mahiyason nga mga kinabuhi ug magpahimulos sa panag-uban sa Espiritu Santo” (“Magpakabig Kamo,” Ensign or Liahona, Nob. 2013, 76, 78).

Basaha ang mosunod nga pangutana og kusog o isulat kini sa pisara: Sa unsa nga paagi ako mahimong sa tinuod nakabig ngadto sa ebanghelyo? Dapita ang mga estudyante sa pagrekord sa ilang mga tubag diha sa ilang mga class notebook o sa mga scripture study journal.

I-summarize ang Mga Buhat 22:17–30 pinaagi sa pagpasabut nga si Pablo misulti sa iyang tigpaminaw nga human sa iyang pagkakabig gipapahawa siya sa Ginoo gikan sa Jerusalem aron mahimong misyonaryo taliwala sa mga Hentil. Ang mga tigpaminaw dayon mipahayag nga si Pablo kinahanglan nga pagapatyon. Gidala si Pablo sa atubangan sa pangulong kapitan sa kasundalohang Romano, kinsa mihukom nga si Pablo kinahanglang pagahampakon, o pagalatigohon, usa ka silot nga kasagarang gigamit sa pagpakaulaw ug pagkuha og impormasyon gikan sa mga kriminal. Bisan pa niana, sa dihang ang mga opisyales nga mga Romano nahibalo nga si Pablo usa ka siyudadnong Romano, mihukom sila nga dili siya pagahampakon tungod kay kini supak sa balaod nga Romano ang paggapos o paghampak sa usa ka siyudadnong Romano kinsa “wala kahukmi” (bersikulo 25). Ila hinoon siyang gidala sa atubangan sa tigdumalang konseho nga Judeo, ang Sanhedrin.

Taposa pinaagi sa pagpakigbahin sa imong pagpamatuod sa mga baruganan nga gitudlo diha sa Mga Buhat 20–22.

Komentaryo ug Background nga Impormasyon

Mga Buhat 22:1–24. Si Pablo adunay kaisug sa pagpakigbahin sa ebanghelyo

Ang Apostol Pablo adunay kaisug sa pagpakigbahin sa iyang pagpamatuod ni Jesukristo bisan tuod og dihay grabe nga mga sangputanan (tan-awa sa Mga Buhat 22:1–24). Gitudlo ni Presidente Thomas S. Monson nga ang kaisug sa pagbuhat kon unsa ang matarung, bisan kon wala mabantug, mao gihapon ang gikinahanglan sa mga disipulo ni Jesukristo:

“Ang kaisug makita sa daghang matang. Ang Kristiyanong tagsulat nga si Charles Swindoll misulat: ‘Ang kaisug dili lang sa panggubatan … o sa maisugong pagdakop og kawatan sa inyong balay. Ang tinuod nga pagsulay sa kaisug mas hilom. Mao kini ang pagsulay sa kaugalingon, sama sa magpabiling matinud-anon bisan walay nagtan-aw, … mag-inusarang magbarug kon kamo wala masabti.’ Modugang ko nga kining kaisug sa kaugalingon naglakip sa pagbuhat sa matarung nga butang bisan og kita nahadlok, pagpanalipod sa atong mga gituohan bisan sa risgo nga biay-biayon, ug mopadayon niadto nga mga gituohan bisan hulgaon nga mawad-an og mga higala o kahimtang sa katilingban. Siya kinsa magbarug nga makanunayon alang nianang unsay matarung kinahanglan morisgo nga mahimong sa ubang panahon dili mauyonan ug dili mabantugan” (“Magmakusganon Ka ug Magmaisug,” Ensign o Liahona, Mayo 2014, 67).