Leksyon 126

Mga Taga-Colosas

Pasiuna

Gitudlo ni Pablo ang pagkalabaw ni Jesukristo (kahalangdon, katalagsaon, o labihan ka maayo) ug mipahimangno batok sa sayop nga doktrina. Giawhag niya ang mga Santos sa Colosas nga ipahimutang ang ilang mga pagbati sa langitnong mga butang ug magpalambo og kinaiya ni Kristo. Gitudloan sab sila ni Pablo nga magmatinagdanon ug magmanggialamon sa ilang pakig-inter-aksyon sa uban.

Mga Sugyot alang sa Pagtudlo

Mga Taga-Colosas 1–2

Gitudlo ni Pablo ang pagkalabaw ni Jesukristo ug mipahimangno batok sa sayop nga doktrina

Ang paggamit sa pisara

Ang epektibong paggamit sa pisara atol sa usa ka leksyon maghimo sa estudyante nga maandam sa pagkat-on ug makadapit og makahuluganong partisipasyon, ilabi na niadtong nagkat-on pinaagi sa pagtan-aw. Sa pisara, ang usa ka titser maka-outline og daghang mga punto o baruganan sa leksyon, mohimo og diagram sa usa ka doktrina, makadrowing og mga mapa, makahimo og mga flow chart, maka-display o makadrowing og mga litrato sa mga butang nga naa sa mga kasulatan, ug makahimo og daghan pang uban nga mga kalihokan nga makapalambo sa pagkat-on.

I-drowing sa pisara ang mosunod nga litrato.

• Kon ang grabe nga unos moabut, asa niining mga kahoya ang kalagmitang matumba? Ngano man?

Dapita ang usa ka estudyante sa pagbasa og kusog sa mosunod nga pamahayag ni Elder Neil L. Andersen sa Korum sa Napulog Duha ka mga Apostoles. Ipapaminaw sa klase ang mga alimpulos nga kinahanglan natong bantayan.

“Dugang pa sa mga gipanagna nga mga linog ug mga gubat [sa katapusang mga adlaw] mao ang espirituhanong mga alimpulos nga makaibut kaninyo gikan sa inyong espirituhanon nga pundasyon ug mopadpad sa inyong espiritu ngadto sa mga dapit nga wala ninyo dahuma, usahay dili kaayo ninyo mamatngunan nga naalsa na kamo” (“Espirituhanong mga Alimpulos,” Ensign o Liahona, Mayo 2014, 18).

• Unsa ang pipila ka mga example sa espirituhanong mga alimpulos nga makaibut o makabulag kanato gikan sa atong pagtuo kang Jesukristo? (Mahimo nimong dapiton ang mga estudyante sa paglista sa ilang mga tubag diha sa pisara duol sa drowing nga alimpulos.)

• Ngano nga makahasol man kaayo kining espirituhanong alimpulos kay sa pisikal nga mga hagit, sama sa linog o mga gubat?

Dapita ang mga estudyante sa pagpamalandong kon unsa nga espirituhanong mga alimpulos ang makaapekto kanila.

Ipasabut nga gihimo ni Pablo ang sulat ngadto sa mga miyembro nga Taga-Colosas (gi-refer nga Mga Taga-Colosas) human mahibaloi ang mahitungod sa mga impluwensya ug sayop nga pagtulun-an didto nga naghulga sa pagguba sa ilang pagtuo kang Jesukristo. (Mahimo nimong dapiton ang mga estudyante nga pangitaon ang Laodicea, nga duol ra sa kasadpan sa Colosas, sa Mapa sa Biblia, nu. 13, “Ang Misyonaryo nga mga Panaw ni Apostol Pablo.”) Dapita ang mga estudyante sa pagpangita samtang tun-an nila ang Mga Taga-Colosas kon sa unsang paagi gitinguha ni Pablo nga ang mga miyembro sa Simbahan malig-on sa ilang pagtuo kang Jesukristo ug mapanalanginan gumikan sa maayong pagkagamut nilang pagtuo kang Jesukristo.

I-summarize ang Mga Taga-Colosas 1:1–11 pinaagi sa pagpasabut nga human mahimamat ang mga Santos sa Colosas, gipasidunggan ni Pablo ang ilang kamatinud-anon ug gipasabut nga ang ebanghelyo nagdala og bunga, o mga panalangin, sa kinabuhi niadtong modawat ug magasunod niini. Dayon gitudloan sila ni Pablo mahitungod ni Jesukristo.

Dapita ang pipila ka estudyante nga magpuli-puli sa pagbasa og kusog sa Mga Taga-Colosas 1:12–19. Hangyoa ang klase sa pagsunod, nga mangita sa kamatuoran nga gitudlo ni Pablo mahitungod ni Jesukristo. (Mahimo nimong ipasabut nga ang pulong nga “dili makita” sa bersikulo 15 gihubad sa pulong nga Gresyanhon aoratos, nga nagpasabut usab nga “dili makita.” Timan-i nga diha sa Mga Hebreohanon 11:27 nag-ingon nga si Moises nakakita “kaniya nga dili makita,” nagpasabut sa dili sagad nga makita [tan-awa usab sa D&C 67:11].)

• Unsa man ang gitudlo ni Pablo mahitungod ni Jesukristo? (Gamit ang mga pulong sa mga estudyante, isulat sa pisara ang mosunod nga kamatuoran diha sa ubos sa kahoy nga nakagamut og lawom: Si Jesukristo mao ang Manunubos, ang panganay sa espiritung mga anak sa Langitnong Amahan, ang Tiglalang sa tanang butang, ang pangulo sa Simbahan, ug ang una nga nabanhaw.)

• Ngano kaha importante man nga kita mahibalo ug motuo niini nga mga kamaturoan mahitungod ni Jesukristo? Sa unsang paagi ang pagkahibalo ug ang pagtuo niini nga mga kamatuoran makalig-on sa atong pagtuo Kaniya?

I-refer ngadto sa pulong nga Manunubos diha sa pamahayag nga naa sa pisara, ug ipasabut nga gipahinumduman ni Pablo ang mga Santos sa Colosas nganong nagkinahanglan sila og usa ka Manunubos.

Dapita ang usa ka estudyante sa pagbasa og kusog sa Mga Taga-Colosas 1:20–22. Hangyoa ang klase sa pagsunod, nga mangita kon unsay gitudlo ni Pablo sa mga Santos sa Colosas mahitungod sa ilang panginahanglan sa usa ka Manunubos.

• Sumala sa bersikulo 21, sa unsang paagi ang usa ka tawo mapahilayo o mabulag sa Dios?

• Unsa ang kahulugan sa pulong nga pagpasig-uli [reconcile] diha sa bersikulo 20? (Aron magkasabut o aron magkahiusa.)

• Sumala sa bersikulo 20 ug 22, sa unsang paagi ma-reconcile o mahiuli kita ni Jesus ngadto sa Dios? (Ipasabut nga ang mga pulong nga “naghimo sa kadaitan [kalinaw] pinaagi sa iyang dugo diha sa krus” nag-refer sa Pag-ula ni Jesukristo.)

Ipasabut nga ang panalangin nga ma-reconcile ngadto sa Dios adunay kondisyon. Isulat sa pisara ang mosunod nga mga pulong: Ma-reconcile kita sa Dios pinaagi sa Pag-ula ni Jesukristo kon …

Dapita ang usa ka estudyante sa pagbasa og kusog sa Mga Taga-Colosas 1:23. Hangyoa ang klase sa pagsunod, nga mangita kon unsay gikinahanglan aron ma-reconcile ngadto sa Dios.

• Unsa man ang gikinahanglan sa atong bahin aron ma-reconcile ngadto sa Dios?

• Unsay ipasabut ngari nato sa “magapadayon gayud sa pagtuo ug dili matarug”? (Magpabiling makanunayon sa atong hugot nga pagtuo kang Jesukristo.)

• Base sa unsay atong nakat-unan gikan sa bersikulo 23, unsaon ninyo sa pagkompleto ang pamahayag diha sa pisara? (Gamit ang pulong sa mga estudyante, kompletuha ang baruganan diha sa pisara nga sama sa mosunod: Ma-reconcile kita sa Dios pinaagi sa Pag-ula ni Jesukristo kon kita magapadayon gayud sa pagtuo, dili matarug sa atong pagtuo.)

Idirekta ang atensyon sa mga estudyante ngadto sa drowing nga naa sa pisara, ug ipangutana:

• Kinsa ang inyong nahibaloan nga sama sa kahoy nga nagakagamut og lawom—magapadayon sa pagtuo, dili matarug sa iyang pagtuo kang Kristo?

• Sa unsang paagi nga ang iyang ehemplo mahimong usa ka panalangin nganha kaninyo?

Dapita ang mga estudyante sa pagbasa og hilum sa Mga Taga-Colosas 2:4, 8 nga mangita sa espirituhanong mga alimpulos nga mihulga nga magun-ob ang mga Santos sa Colosas.

• Unsa ang espirituhanong mga alimpulos nga mihulga aron maibut [magun-ob] ang mga Santos sa Colosas? (Ipasabut nga dunay daghang pilosopiya ug mga tradisyon nga gitudlo sa ubang tawo kinsa naningkamot nga mous-us ang ilang pagtan-aw sa kaimportante ni Jesukristo.)

• Ngano nga ang pagtuo sa sayop nga mga pagtulun-an, lakip ang mga pagtulun-an aron mous-os ang ilang pagtan-aw sa kaimportante ni Jesukristo, naghimo sa usa ka tawo nga dali rang maibut [magun-ob] sa pagka-espirituhanon?

Dapita ang usa ka estudyante sa pagbasa og kusog sa Mga Taga-Galacia 2:5–7. Hangyoa ang klase sa pagsunod, nga mangita kon unsa pay gitinguha ni Pablo aron malikayan ang pagkahisalaag gumikan sa kalibutanong mga pilosopiya ug mga tradisyon.

• Unsa ang gitudlo diri nato sa Mga Taga-Colosas 2:5–7 nga makatabang nato nga malikay sa pagkahisalaag gumikan sa sayop nga mga pilosopiya sa kalibutan, relihiyusong mga pagtulun-an, o mga tradisyon? (Ang mga estudyante mahimong mogamit og ilang kaugalingong mga pulong aron sa pag-ila sa baruganan nga susama sa mosunod: Kon kita makagamut ug malig-on pinaagi ni Kristo, malikay kita sa pagkahisalaag pinaagi sa kalibutanong mga pilosopiya ug mga tradisyon.)

Isulat sa pisara ang mosunod nga mga pangutana:

Unsa sa inyong pagtuo ang usa sa pinaka importanting mga butang nga atong mahimo aron makagamut ug malig-on diha ni Jesukristo? Nganong mituo man kamo nga ang usa ka butang importante kaayo?

Bahina ang klase ngadto sa grupo nga tinagutlo o tinagup-at. Dapita ang matag estudyante sa pagpasabut sa iyang mga tubag sa mga pangutana nga naa sa pisara ngadto sa mga sakop sa grupo. Human sa igo nga panahon, hangyoa ang mga estudyante nga moreport sa unsay ilang nakat-unan gikan sa mga sakop sa grupo.

Dapita ang mga estudyante sa pagribyu sa gipamalandong nila nga espirituhanong mga alimpulos atol sa pagsugod sa klase. Dapita sila sa pagsulat diha sa ilang mga class notebook o mga scripture study journal kon unsay ilang buhaton aron magpabiling nakagamut ug malig-on diha ni Jesukristo ug malikayan ang pagkaibut gumikan sa espirituhanong mga alimpulos.

Mga Taga-Colosas 3–4

Giawhag ni Pablo ang mga Taga-Colosas nga ipahiluna ang ilang mga pagbati ngadto sa langitnong mga butang ug magmaalamon

I-summarize ang Mga Taga-Colosas 3–4 pinaagi sa pagpasabut nga giawhag ni Pablo ang mga Santos sa Colosas nga ihunong ang pagkadili matarung ug magpalambo og mga kinaiya ni Jesukristo. Giawhag sab niya sila nga magmainampuon ug magmanggialamon, ilabi na sa ilang pakig-inter-aksyon sa dili mga Kristiyano. Iya dayong gipadangat ang mga pagtimbaya ngadto sa pipila sa iyang kaubanang mga sulugoon, lakip kang Lucas.

Ipaambit ang imong pagpamatuod bahin sa mga kamatuoran nga gihisgutan niini nga leksyon.

Komentaryo ug Background nga Impormasyon

Mga Taga-Colosas 1:15, 18. Si Jesukristo mao ang Panganay

Ang mga pulong nga “ang panganay sa tibuok nga kabuhatan” (Mga Taga-Colosas 1:15) nagpamatuod nga si Jesukristo mao ang panganay sa tanang espiritu nga anak sa Langitnong Amahan. Gipamatud-an sa Unang Kapangulohan nga:

“Tali sa mga espiritu nga mga anak ni Elohim [Dios nga Amahan] ang unang natawo mao si Jehovah o si Jesukristo diin kang kinsa ang uban mga manghud” (“Ang Amahan ug ang Anak: A Doctrinal Exposition by the First Presidency and the Quorum of the Twelve Apostles,” Ensign, Abr. 2002, 18).

Ang mga pulong nga “ang panganay nga gikan sa mga nangamatay” diha sa bersikulo 18 nagpasabut nga si Jesukristo mao ang unang tawo sa kalibutan nga nabanhaw. Gitawag usab Siya nga “ang nahaunang gibanhaw sa mga nangamatay” (1 Mga Taga-Corinto 15:20).

Mga Taga-Colosas 1:16–17. Pinaagi kang Jesukristo “ang tanang mga butang gibuhat”

Si Elder Dallin H. Oaks sa Korum sa Napulog Duha ka mga Apostoles mipasabut nga si Jesukristo, mao ang Tiglalang ug adunay gahum sa pagdumala sa tanan nga Iyang gilalang:

“Ubos sa direksyon ug sumala sa plano sa Dios nga Amahan, si Jesukristo mao ang Tiglalang, ang tinubdan sa kahayag ug sa kinabuhi sa tanang mga butang. Pinaagi sa modernong pagpadayag nakaangkon kita og pagpamatuod kang Juan, kinsa mipamatuod nga si Jesukristo ‘ang kahayag ug ang Manunubos sa kalibutan, ang Espiritu sa kamatuoran, kinsa mianhi dinhi sa kalibutan,tungod kay ang kalibutan iyang binuhat, ug diha kaniya ang kinabuhi sa mga tawo ug ang kahayag sa mga tawo.

“‘Ang mga kalibutan iyang mga binuhat; ang mga tawo iyang mga binuhat; ang tanan nga mga butang iyang mga binuhat, ug pinaagi ngadto kaniya, ug tungod kaniya’ (D&P 93:9–10)” (“The Light and Life of the World,” Ensign, Nob. 1987, 63; tan-awa usab sa Juan 1:1–3; Mga Hebreohanon 1:2; D&P 76:24; Moises 1:33).

Mga Taga-Colosas 2:9. “Kay diha kaniya nagapuyo sa pagkalawas ang bug-os kinatibuk-an sa pagka-Dios [Dios nga Kapangulohan]”

Sa pagpamulong bahin ni Jesukristo, mipamatuod si Pablo, “ Kay diha kaniya nagapuyo sa pagkalawas ang bug-os kinatibuk-an sa pagka-Dios.” Kini nga mga pulong nagpasabut nga si Jesukristo hingpit ang pagkabalaan ug nagabaton sa kinatibuk-ang gahum sa pagkadios (tan-awa usab sa Mateo 28:18).

Dugang nga mga Ideya sa Pagtudlo

Mga Taga-Colosas 3. Giawhag ni Pablo ang mga Taga-Colosas nga ipahiluna ang ilang mga pagbati ngadto sa langitnong mga butang

Idrowing sa pisara ang dibuho o hulagway nga may igong kadak-on aron ang mga estudyante mahimong mosulat sulod sa matag drowing. Isulat ang Hukason ibabaw sa drowing, ug isulat ang Isul-ob sa ibabaw sa laing drowing.

Ipasabut nga sigun sa narekord diha sa Mga Taga-Colosas 3:1–4, giawhag ni Pablo ang mga Santos nga itumong ang ilang atensyon ngadto sa langitnong mga butang kay sa kalibutanong mga butang ug mitudlo nga si Jesukristo mopakita uban sa himaya sa Iyang Ikaduhang Pag-anhi.

• Kon naa kamo inig pakita sa Manluluwas uban sa himaya, unsa nga saput ang gusto ninyong isul-ob?

• Unsa sa inyong hunahuna ang mas importante kay sa saput nga inyong isul-ob?

Ipasabut nga sa Mga Taga-Colosas 3:5–15, gitudloan ni Pablo ang mga Santos sa Colosas kon unsay angay nilang “hukason” (bersikulo 8) ug unsay angay nilang“isul-ob” (bersikulo 10) isip mga disipulo ni Jesukristo. Bahina ang klase og katunga, ug dapita ang katunga sa klase sa pagbasa sa Mga Taga-Colosas 3:5–9, nga mangita sa unsay gitudlo ni Pablo nga angay natong hukason. Dapita ang laing katunga sa klase sa pagbasa sa Mga Taga-Colosas 3:10–15, nga mangita sa unsay gitudlo ni Pablo nga angay natong isul-ob. (Mahimo nimong ipasabut ang mosunod: pakighilawas [sekswal nga imoralidad], walay kontrol nga pagbati [pangibug], ug dautang mga tinguha].)

Human sa igo nga panahon, dapita ang pipila ka estudyante nga isulat sa pisara sulod sa tukma nga mga drowing ang gisulti ni Pablo nga kinahanglang hukason o isul-ob.

Idirekta ang atensyon sa mga estudyante ngadto sa drowing nga may label nga “Hukason,” ug ipangutana:

• Sa inyong hunahuna unsay buot ipasabut nga hukason kining mga butanga?

• Sa unsang paagi kaha nga ang tawo nga nakahimo niini nga mga sala ug wala maghinulsol niini mobati sa presensya sa Manluluwas? (Tan-awa usab sa Mormon 9:3–4.)

Idirekta ang atensyon sa mga estudyante ngadto sa drowing nga may label nga “Isul-ob,” ug ipangutana:

• Sa unsang paagi kaha nga ang tawo nga misul-ob niining mga kinaiyaha mobati sa presensya sa Manluluwas?

• Kon ang usa ka tawo mosul-ob niining mga kinaiyaha, kang kinsa sila nagkahimong susama? (Jesukristo [tan-awa sa Mga Taga-Colosas 3:10]. Isulat sa pisara ang mosunod nga baruganan: Kon atong hukason ang pagkadili matarung ug paningkamutan nga masul-ob ang mga kinaiya ni Jesukristo, mamahimo kitang bag-o nga mga indibidwal nga sama Kaniya.)

• Sa unsang paagi kita makapalambo niining mga kinaiyaha ni Jesukristo?

Hangyoa ang mga estudyante sa paghunahuna og usa ka tawo nga ilang nahibaloan nga nagsul-ob sa mga kinaiya ni Jesukristo. Ikonsiderar ang paghangyo og pipila ka estudyante nga ipakigbahin sa unsang paagi kining tawhana nakapalambo niana nga mga kinaiya.

Dapita ang mga estudyante sa pagpamalandong unsa nga mga sala ang angay nilang hukason ug unsang mga kinaiya ni Jesukristo ang angay nilang isul-ob. Hangyoa ang mga estudyante sa paghimo og tumong nga hukason ang piho nga mga sala ug isul-ob ang piho nga mga kinaiya ni Kristo. Dapita ang mga estudyante nga isulat sa ilang mga scripture study journal o sa usa ka papel ang illang mga tumong.

Ipasabut nga sigun sa narekord sa Mga Taga-Colosas 3:16–25, gihatagan ni Pablo ang mga Santos sa Colosas og instruksyon nga makatabang nila sa pagkahimong mas sama ni Kristo ug makaangkon og mas dakong kalinaw sa ilang kinabuhi.

Mga Taga-Colosas 4:16. Gitudloan ni Pablo ang mga Santos sa Colosas nga basahon ang sulat gikan sa Laodicea

Ipasabut nga sa kapanahunan ni Pablo, ang mga branch sa Simbahan mobasa og kusog sa mga sulat ni Pablo nganha sa ilang mga kongregasyon. Ang mga sulat sa usa ka branch usahay ipasa ngadto sa laing branch aron mas daghang miyembro ang makadungog sa mga pagtulun-an ug mga tambag ni Pablo. Dapita ang usa ka estudyante sa pagbasa og kusog sa Mga Taga-Colosas 4:16. Hangyoa ang klase sa pagsunod, nga mangita sa duha ka managlahing sulat nga gihimo ni Pablo. Hangyoa ang mga estudyante sa pagreport sa ilang nakit-an.

Ipasabut nga ang Biblia naglangkob og mga sulat nga gihimo ni Pablo ngadto sa mga Taga-Colosas, apan ang sulat gikan sa Laodicea nga gihisgutan ni Pablo nawala na karon ug wala na sa Biblia, ingon man ang laing mga sulat ni Pablo (tan-awa sa 1 Mga Taga-Corinto 5:9; Mga Taga-Efeso 3:3). Nagpasabut kini nga ang Biblia wala maglangkob sa tanang kasulatan nga gisulat sa mga propeta ug mga apostoles sa Ginoo.