Leksyon 139

Mga Hebreohanon 12–13

Pasiuna

Mitambag si Pablo sa Judeo nga mga miyembro sa Simbahan sa pagdagan sa lumba sa pagkadisipulo pinaagi sa pagsunod sa ehemplo ni Jesukristo. Mipasabut usab Siya sa mga panalangin sa pagdawat sa pagpanton sa Ginoo. Miawhag si Pablo sa mga Santos sa pagbuhat sa kabubut-on sa Dios aron mahimo silang hingpit pinaagi sa Pag-ula ni Jesukristo.

Timan-i: Ang leksyon 140 naghatag og oportunidad alang sa duha ka estudyante nga motudlo. Pagpili daan og duha ka estudyante ug hatagi sila og mga kopya sa napili nga mga bahin sa leksyon 140 aron makapangandam sila. Awhaga sila nga tun-an ang materyal sa leksyon sa mainampuong paagi ug tinguhaon ang paggiya sa Espiritu Santo sa ilang pagpangandam ug sa pagtudlo.

Mga Sugyot alang sa Pagtudlo

Mga Hebreohanon 12

Nagtambag si Pablo sa mga Santos nga modagan sa lumba sa kinabuhi uban ang hugot nga pagtuo ug pailub

Diha sa pisara, paghimo og usa ka yano nga drowing sa usa ka magdadagan [runner]. Hangyoa ang klase sa paghulagway kon unsa nga mga kalisud ang mahimong masugatan sa usa ka magdadagan samtang nagdagan siya sa taas og distansya nga lumba. (Mahimo usab kang mangutana kon aduna bay estudyante sa klase nga nakadagan na og taas og distansya nga mga lumba ug dayon pangutan-a ang usa ka estudyante nga nakadagan na kon unsay mga kalisud nga iyang nasinati kon modagan og layong distansya nga lumba.)

• Unsay makadasig sa usa ka magdadagan nga magpadayon sa pagdagan bisan og makasinati siya og kakapoy o uban pang mga kalisud?

• Sa unsang mga pamaagi ang pagpakabuhi isip usa ka disipulo ni Jesukristo sama sa lumba sa paglahutay?

• Unsa nga mga kalisud ang tingali atong atubangon isip mga disipulo ni Jesukristo?

Hangyoa ang mga estudyante sa paghunahuna mahitungod sa mga kalisud nga ilang giatubang (o nga sila miatubang) isip mga sumusunod ni Jesukristo. Dapita ang mga estudyante sa pagpangita sa mga kamatuoran samtang nagtuon sila sa Mga Hebreohanon 12 nga makatabang nila nga magpadayon sa pagsunod ni Jesukristo bisan og mahimo na kining lisud.

Dapita ang usa ka estudyante sa pagbasa og kusog sa Mga Hebreohanon 12:1. Hangyoa ang klase sa pagsunod, nga mangita kon unsay gisulti ni Pablo sa mga Santos nga gikinahanglan nilang buhaton aron malampuson nga modagan sa lumba sa pagkadisipulo.

• Unsay gisulti ni Pablo sa mga Santos nga gikinahanglan nilang buhaton aron magmalampuson sa pagdagan sa lumba sa pagkadisipulo?

Dapita ang usa ka estudyante sa pagduol sa atubangan sa klase, ug hatagi siya og usa ka backpack aron sul-ubon. Pun-a og mga bato ang backpack, dayon pangutan-a ang mga estudyante sa pagpasabut sa unsang paagi ang pagsuot og backpack nga puno og mga bato makaapekto sa usa ka magdadagan.

• Sa unsang paagi ang atong mga sala sama sa usa ka backpack nga puno og mga bato?

Hangyoa ang estudyante sa paghubo sa backpack, ug dapita siya sa paglingkod.

• Unsay gipasabut sa pagdagan sa lumba sa pagkadisipulo uban ang pagpailub?

Dapita ang usa ka estudyante sa pagbasa og kusog sa Mga Hebreohanon 12:2–4. Hangyoa ang klase sa pagsunod, nga mangita kon unsay gisulti ni Pablo sa mga Santos nga buhaton nga makatabang nila sa pagbiya sa ilang mga sala ug mapailubong mosagubang sa oposisyon. Ipasabut nga ang pulong pagsupak diha sa bersikulo 3 nagpasabut nga oposisyon.

• Base sa unsay gitudlo ni Pablo sa mga Santos, unsay makatabang nato sa pagbiya sa atong mga sala ug mapailubong mosagubang sa oposisyon? (Ang mga estudyante mahimong mogamit og lain-laing mga pulong, apan siguroa nga mahibalo sila sa usa ka baruganan susama sa mosunod: Samtang nagtan-aw kita sa ehemplo ni Jesukristo, makakaplag kita og kalig-on sa pagbiya sa atong mga sala ug mapailubong mosagubang sa oposisyon.)

• Sumala sa bersikulo 2, unsay gibuhat ni Jesukristo nga gisulti ni Pablo sa mga Santos nga tan-awon isip usa ka ehemplo?

Ipakita ang litrato nga Ang Paglansang (Libro sa mga Hulagway sa Ebanghelyo [2009], nu. 57; tan-awa usab sa LDS.org), ug ipasabut nga si Pablo miingon sa mga Santos nga si Jesukristo andam nga moantus sa kamatayon sa krus ug mosagubang sa kaulaw sa kalibutan tungod kay nasayud Siya sa kalipay nga Iyang madawat kon magpabalin Siya nga matinud-anon ngadto sa Langitnong Amahan.

• Sa unsang paagi ang paglantaw sa ehemplo ni Jesukristo makatabang nato kon gihagit kita pinaagi sa pag-antus ug mga babag?

Hangyoa ang mga estudyante sa paghunahuna mahitungod sa ilang mga hagit karon ug sa unsang paagi ang pagtan-aw sa ehemplo ni Jesukristo makatabang kanila uban niadto nga mga hagit.

Dapita ang usa ka estudyante sa pagbasa og kusog sa mosunod nga pamahayag ni Elder Jeffrey R. Holland sa Korum sa Napulog Duha ka mga Apostoles. Hangyoa ang klase nga maminaw alang sa unsang paagi ang ehemplo ni Jesukristo makatabang nato sa pagbiya sa atong mga sala ug mopadayon uban sa pailub.

“Aron mahimo ang Iyang Pag-ula nga walay katapusan ug mahangturon, kinahanglan Siyang motagamtam kon unsay bation sa pagkamatay dili lamang sa pisikal apan usab sa espirituhanong paagi, aron mabatyagan unsay bation kon ang balaang Espiritu mobiya, unsay bation kon siya gitalikdan sa hingpit, kapait ug kawalay paglaum nga pag-inusara.

“Apan si Jesus nagpadayon. Mipadayon siya. Ang kamaayo nga anaa Kaniya mitugot sa pagtuo nga magmadaugon bisan sa kahimtang ubos sa hingpit nga kapait. Ang pagsalig nga Iyang gipuy-an misulti Kaniya bisan pa sa Iyang mga gibati nga Siya dili gayud motalikod ingon man dili mopakyas kanato” (“Walay Bisan Usa nga Nakig-uban Kaniya,” Ensign o Liahona, Mayo 2009, 88).

Awhaga ang mga estudyante sa paggahin og panahon matag adlaw, tingali isip bahin sa ilang scripture study, nga motan-aw sa ehemplo ni Jesukristo aron makakaplag sila og kalig-on sa pagbiya sa ilang mga sala ug mapailubong mosagubang sa oposisyon.

Aron makapangandam ang mga estudyante nga mahibalo sa laing baruganan nga gitudlo ni Pablo diha sa Mga Hebreohanon 12, dapita sila sa paghunahuna og usa ka higayon diin ang usa ka tawo mikorihir nila. Hangyoa sila sa paghinumdom kon giunsa nila pagtubag niana nga pagkorihir.

• Nganong mahimo mang lisud nga modawat og pagkorihir gikan sa usa ka tawo?

• Unsa kaha ang pipila ka mga katarungan nga ang mga tawo nagtinguha sa pagkorihir nato, ilabi na kon kadtong mga tawhana nasayud nga mahimong dili ta ganahan sa ilang pagkorihir?

Ipasabut nga samtang kita nagdagan sa lumba sa pagkadisipulo, makadahum kita nga mapanton, o makorihian. Dapita ang usa ka estudyante sa pagbasa og kusog sa Mga Hebreohanon 12:6–9. Hangyoa ang klase sa pagsunod, nga mangita kon kinsa ang mokorihir kanato ug ngano. Sa kinatibuk-ang kahulugan niini, ang pulong pinaangkan diha sa bersikulo 8 nagkahulugan niadtong gipanganak sa wala nakasal nga mga gikinanan, kinsa wala gikonsiderar nga legal nga mga manununod.

Ang Mga Hebreohanon 12:9 usa ka scripture mastery passage. Ang pagtuon sa mga scripture mastery passage makatabang sa mga estudyante nga mapalambo ang ilang panabut sa sukaranang mga doktrina ug maandam sa pagtudlo niini ngadto sa uban. Mahimo nimong isugyot nga markahan sa mga estudyante ang mga scripture mastery passage sa lahi nga paagi aron dali ra nila kining mapangita. Tan-awa ang ideya sa pagtudlo nga naa sa katapusan sa leksyon aron matabangan ang mga estudyante sa ilang pag-sag-ulo niini nga tudling.

• Kinsa ang mokorihir nato samtang nagdagan kita sa lumba sa pagkadisipulo?

• Sumala ni Pablo, nganong mopanton, o mokorihir man kanato ang Langitnong Amahan?

• Sa unsang mga paagi ang pagpanton sa Langitnong Amahan kanato usa ka timaan sa Iyang gugma alang sa Iyang mga anak?

Dapita ang mga estudyante nga sulod sa 30 ka segundo mosulat sila sa ilang mga class notebook o mga scripture study journal sa pipila ka mga paagi ang Langitnong Amahan tingali mokorihir kanato. Hangyoa ang pipila ka mga estudyante nga moreport ngadto sa klase sa unsay ilang gisulat. Siguroha nga ang mga estudyante makasabut nga bisan og ang pagpanton mahimong moabut sa daghan nga paagi, dili matag pagsulay o pag-antus nga atong gisinati naggikan sa Dios.

• Diha sa bersikulo 9, unsay giingon ni Pablo nga angay natong buhaton sa dihang mokorihir ug mopanton ang Langitnong Amahan kanato?

• Unsay gipasabut sa “magapailalum,” o motugyan, ngadto sa Langitnong Amahan? (Mapainubsanon, matudloan, ug andam mohimo og mga kausaban sa atong mga kinabuhi aron sa pagsunod sa Iyang kabubut-on.)

Isulat sa pisara ang mosunod nga dili kompleto nga mga pulong: Kon motugyan kita sa pamanton gikan sa Langitnong Amahan, kita …

Ipasabut nga diha sa bersikulo 10, miangkon si Pablo nga ang atong kalibutanon nga mga ginikanan usahay mopanton nato sa dili hingpit nga paagi, apan ang pagpanton sa Langitnong Amahan hingpit ug gi-desenyo alang sa atong kaayohan. Dapita ang usa ka estudyante sa pagbasa og kusog sa Mga Hebreohanon 12:10–11. Hangyoa ang klase sa pagsunod, nga mangita kon unsay gitudlo ni Pablo nga mahitabo kon motugyan kita sa pagpanton gikan sa Langitnong Amahan. Ipasabut nga ang mga pulong “makaambit sa iyang pagkabalaan” diha sa bersikulo 10 nagkahulugan nga mas mahisama sa Dios.

• Sa unsang paagi ang mga pulong ni Pablo sa bersikulo 11 naghulagway sa unsang paagi kita tingali mobati sa sinugdan kon mapanton kita?

• Sumala sa bersikulo 10–11, unsay mahitabo kon motugyan kita sa pamanton gikan sa Langitnong Amahan? (Human makatubag ang mga estudyante, kompletuha ang pamahayag diha sa pisara sama sa mosunod: Kon motugyan kita sa pamanton gikan sa Langitnong Amahan, mas mahisama kita Kaniya ug makabaton og kalinaw nga moabut gikan sa pagkamatarung.)

Hunahunaa ang pagpakigbahin og usa ka kasinatian nga ikaw mitugyan sa pamanton gikan sa Langitnong Amahan ug mibati nga napanalanginan sa pagbuhat sa ingon. (Siguroha nga dili mopakigbahin sa bisan unsa nga hilabihan ka sagrado o personal.) Dapita ang mga estudyante sa paghunahuna og usa ka higayon nga mibati sila nga gipanton sa Langitnong Amahan. Hangyoa sila sa paghunahuna kon giunsa nila pagtubag niana nga pagkorihir. Awhaga ang mga estudyante sa paghukom karon sa pagtugyan sa pamanton sa Langitnong Amahan nga mahimong ilang madawat sa umaabut.

I-summarize ang Mga Hebreohanon 12:12–29 pinaagi sa pagpasabut nga miawhag si Pablo sa mga Santos sa paglig-on sa pagtuo sa ubang mga miyembro sa Simbahan. Miawhag siya nila nga mohunong sa pagpakasala aron dili nila mapakyas ang mga panalangin sa Dios sama sa gibuhat ni Esau ug sama sa gibuhat sa mga anak sa Israel didto sa bukid sa Sinai. Mipasabut si Pablo nga ang mga Santos kinsa magpabiling matinud-anon ug moserbisyo sa Dios makadawat ug wala’y sama nga himaya ug usa ka dapit sa Iyang gingharian.

Mga Hebreohanon 13

Naghatag si Pablo og lainlaing mga tambag ngadto sa mga Santos

Ipasabut nga si Pablo mitapos sa iyang sulat ngadto sa Mga Hebreohanon nga mga Santos pinaagi sa paghatag nila og tambag sa lainlaing mga hilisgutan. Bahina ang mga estudyante sa ginagmayng grupo nga magtinagurha o tinagutlo. Dapita sila nga basahon og dungan ang Mga Hebreohanon 13:1–9, 17, nga mangita sa tambag nga gihatag ni Pablo sa mga Santos. Sugoa ang mga estudyante nga maghisgut sa mosunod nga mga pangutana diha sa ilang mga grupo inig kahuman nila og basa. Mahimo nimong isulat kining mga pangutana diha sa pisara.

• Hain kaha nga tambag ang gikinahanglan kaayo sa kalibutan karon? Ngano man?

Human sa igong panahon, dapita ang pipila ka mga estudyante sa pagreport kon giunsa nila pagtubag ang mga pangutana. Dapita ang mga estudyante sa paghunahuna hain nga mga bahin sa tambag ni Pablo ang mas maayo nilang mapatuman sa ilang kaugalingong mga kinabuhi.

I-summarize ang Mga Hebreohanon 13:10–12 pinaagi sa pagpasabut nga mitudlo si Pablo nga sa panahon sa Daang Tugon, ang mga mananap nga gisakripisyo isip mga halad sa sala gisunog sa gawas sa kampo sa Israel. Sa samang paagi, si Jesukristo gisakripisyo sa gawas sa siyudad sa Jerusalem. Ipasabut nga human nakompleto ni Jesukristo ang Pag-ula, wala na gikinahanglan ang mga sakripisyo sa mga hayop (tan-awa sa 3 Nephi 9:18–20).

Dapita ang usa ka estudyante sa pagbasa og kusog sa Mga Hebreohanon 1:13–16. Hangyoa ang klase sa pagsunod, nga mangita kon unsa nga sakripisyo ang giingon ni Pablo nga kinahanglang ihalad sa mga Santos imbis mga hayop. Ikonsiderar ang pagdapit sa mga estudyante sa pagmarka sa unsay ilang nakit-an.

• Unsa nga mga sakripisyo ang giingon ni Pablo nga kinahanglan natong himuon?

• Ngano kaha nga ang ingon nga mga sakripisyo makapahimuot sa Dios?

I-summarize ang Mga Hebreohanon 13:17–25 pinaagi sa pagpasabut nga mitambag si Pablo sa mga Santos nga mosunod sa ilang espirituhanon nga mga lider ug mag-ampo alang kanila. Nag-ampo si Pablo nga unta ang Dios mohatag sa mga Santos sa tanang gikinahanglan aron mahimo nila ang Iyang kabubut-on.

Mahimo nimong tapuson pinaagi sa pagpamatuod sa mga kamatuoran nga nahibaloan sa mga estudyante sa Mga Hebreohanon 12–13.

Scripture Mastery—Mga Hebreohanon 12:9

Tabangi ang mga estudyante nga sag-ulohon ang Mga Hebreohanon 12:9 pinaagi sa pagdapit nila nga isulat ang unang letra sa matag pulong sa bersikulo diha sa usa ka piraso nga papel. Ribyuha ang tudling sa makadaghan uban ang imong mga estudyante hangtud nga makasaysay na sila sa bersikulo gamit ang unang letra sa matag pulong.

• Unsa nga doktrina ang atong makat-unan gikan niini nga bersikulo mahitungod sa atong relasyon sa atong Langitnong Amahan? (Ang mga estudyante kinahanglang mahibalo sa mosunod nga doktrina: Ang Langitnong Amahan mao ang amahan sa atong mga espiritu.)

• Nganong importante man nga motuo nga kita mga anak sa Dios?

Ipamatuod nga kita tinuod nga mga anak sa Dios.

Komentaryo ug Background nga Impormasyon

Mga Hebreohanon 12:6–11. Ang pamanton sa Ginoo

Si Elder D. Todd Christofferson sa Korum sa Napulog Duha ka mga Apostoles mipasabut sa mosunod mahitungod sa pamanton sa Ginoo:

“Ang pagkorihir mahinungdanon kaayo kon gusto kita nga mapahiangay ang atong mga kinabuhi ‘makakab-ot sa kahamtong sa pagkatawo, [nagpasabut nga,] sa sukod sa gidak-on sa kahupnganan ni Kristo’ (Mga Taga-Efeso 4:13). Si Pablo naghisgut kabahin sa balaanong pagkorihir o pagpanton, “Kay ang Ginoo nagapanton kaniya nga iyang ginahigugma” (Mga Hebreohanon 12:6). Bisan tuod nga sa kanunay lisud kining antuson, sa pagkatinuod angay kita nga malipay nga ang Dios mikonsiderar kanato nga angayan sa Iyang panahon ug kahasol aron sa pagkorihir kanato” (“Ako Nagabadlong ug Nagapanton sa Akong Gihigugma,” Ensign o Liahona, Mayo 2011, 97–98).

Mga Hebreohanon 12:9. “Ang Amahan sa mga espiritu”

Si Presidente Boyd K. Packer sa Korum sa Napulog Duha ka mga Apostoles mitudlo nga ang espiritu sa matag tawo usa ka anak sa Langitnong Amahan:

“Ikaw usa ka anak sa Dios. Siya mao ang amahan sa imong espiritu. Sa espirituhanon nga paagi ikaw gipakatawo nga madungganon, anak sa Hari sa langit. Ibutang kana nga kamatuoran sa imong hunahuna ug hupot niini. Bisan unsa ka daghan ang mga henerasyon sa imong mortal nga mga kagikanan, walay igsapayan kon unsa nga kaliwat o mga katawhan ang imong gi-representar, ang talaan sa kaliwatan sa imong espiritu mahimong isulat sa usa lamang ka linya. Ikaw usa ka anak sa Dios!” (“To Young Women and Men,” Ensign, Mayo 1989, 54).

Si Elder Dallin H. Oaks sa Korum sa Napulog Duha ka mga Apostoles mihatag og gibug-aton sa importansya sa pagsabut nga kita mga anak sa Dios:

“Hunahunaa ang gahum sa ideya nga gitudlo sa atong minahal nga kanta ‘I Am a Child of God’ (Hymns, 1985, nu. 301). … Ania ang tubag sa usa sa dagkong mga pangutana sa kinabuhi, ‘Kinsa ako?’ Ako anak sa Dios nga may espiritwal nga kagikan sa langitnong mga ginikanan. Kana nga pagkaginikanan nagpasabut sa atong mahangturong potensyal. Kana nga gamhanang ideya usa ka epektibong pagpawala sa tumang kasubo. Kini makapalig-on kanato sa paghimo og matarung nga mga pagpili ug sa pagtinguha sa labing maayo nga anaa kanato. Ipahimutang sa hunahuna sa usa ka batan-on ang gamhanan nga ideya nga siya usa ka anak sa Dios ug kamo adunay hinatag nga pagtahod sa kaugalingon ug kadasig nga molihok batok sa mga problema sa kinabuhi” (“Powerful Ideas,” Ensign, Nob. 1995, 25).

Mga Hebreohanon 12:23. “Katilingban sa mga panganay”

“Ang panudlo ni Pablo nga ang natubos nga mga Santos moapil sa ‘katilingban sa mga panganay’ (Mga Hebreohanon 12:23) mao ang bugtong biblikanhong higayon nga nasangpit kini nga mga pulong. Sa mga pagpadayag sa ulahing mga adlaw, si Propeta Joseph Smith nakat-on nga ang Katilingban sa mga Panganay nagpasabut sa langitnong Simbahan ni Jesukristo, nga gilangkuban sa matinud-anon, nahimaya nga mga Santos didto sa celestial nga gingharian (tan-awa sa D&P 76:54; 88:4–5). ‘Si Jesus mao ang unang natawo sa anak nga mga espiritu sa atong Langitnong Amahan, ang Bugtong Anak sa Amahan diha sa unod, ug ang unang mibangon gikan sa patay diha sa pagkabanhaw (Col. 1:13–18). Ang matinud-anon nga mga Santos mahimo nga mga sakop sa Simbahan sa Unang Natawo sa kahangturan (D&P 93:21–22)’ (Giya Ngadto sa mga Kasulatan, “Unang Natawo,” scriptures.lds.org)” (New Testament Student Manual [manwal sa Church Educational System, 2014], 489). Kini nga mga Santos mao ang “isigkamanununod uban kang Cristo” (Mga Taga-Roma 8:17) ug sa katapusan makapanunod sa “tanan nga iya sa Amahan” (D&P 84:38).