Leksyon 103

1 Mga Taga-Corinto 1–2

Pasiuna

Human sa pagkat-on mahitungod sa mga problema nga nasinati sa mga miyembro sa Simbahan didto sa Corinto, si Pablo misulat niining mga miyembro ug nag-awhag kanila nga wagtangon ang panagbingkil ug magkahiusa. Siya usab mipasabut nga ang Dios mitawag sa mga huyang ug mapaubsanon aron sa pagsangyaw sa Iyang ebanghelyo ug sa mga butang sa Dios nga mahimo lamang masayran ug masabtan pinaagi sa Espiritu.

Mga Sugyot alang sa Pagtudlo

1 Mga Taga-Corinto 1:1–16

Si Pablo misulat ngadto sa mga Santos sa Corinto ug miawhag kanila nga wad-on ang panagbingkil ug magkahiusa

Ipakita sa klase ang hulagway sa usa ka pamilya, usa ka team sa sport, ug usa ka grupo sa mga higala (o isulat ang pamilya, team sa sport, grupo sa mga higala diha sa pisara).

• Unsay hinungdan sa mga pagkabahin-bahin ug panagbingkil diha sa matag usa niini nga mga grupo?

• Sa unsa nga paagi nga ang ingon nga pagkabahin-bahin ug mga panagbingkil makaapekto sa usa ka pamilya, sa team o sa grupo sa mga higala?

• Sa unsang paagi nga ang maong pagkabahin-bahin ug mga panagbingkil tali sa mga miyembro sa Simbahan makaapekto sa Simbahan?

Dapita ang mga estudyante sa pagtan-aw samtang magtuon sila sa 1 Mga Taga-Corinto 1 alang sa kamatuoran mahitungod sa mga panagbingkil nga gitudlo ni Pablo sa mga Santos didto sa Corinto.

Dapita ang mga estudyante sa pagpakli sa mga Mapa sa Biblia, nu. 13, “Ang Misyonaryo nga mga Biyahe ni Apostol Pablo,” nahimutang sa Giya ngadto sa mga Kasulatan, ug pangitaa ang Corinto diha sa mapa.

Dapita ang usa ka estudyante sa pagbasa og kusog sa mosunod nga paragraph:

Atol sa iyang ika-duhang misyonaryo nga biyahe, si Pablo mibiyahe sa usa ka dakbayan nga gitawag og Corinto, diin siya misangyaw sa ebanghelyo. Daghang tawo ang nabunyagan nianang panahona (tan-awa sa mga Buhat 18:1–18). Sa kaulahian, samtang si Pablo nagsangyaw didto sa Efeso, iyang nahibaloan nga mitumaw ang mga problema diha sa mga miyembro sa Simbahan sa Corinto tungod kay ang pipila sa mga kinabig namalik sa kanhi nilang gituohan ug nagpraktis sa pagsimba sa mga dios-dios. Misulat si Pablo ngadto sa mga miyembro sa Simbahan sa Corinto aron sa paglig-on kanila ug mopahinumdom kanila sa ilang pasalig sa pagserbisyo sa Ginoo.

Dapita ang usa ka estudyante sa pagbasa og kusog sa 1 Mga Taga-Corinto 1:1-2. Hangyoa ang klase sa pagsunod, nga mangita kon sa unsang paagi nga namulong si Pablo sa mga miyembro sa Simbahan didto sa Corinto.

• Sa unsang paagi nga namulong si Pablo sa mga miyembro sa Simbahan didto sa Corinto?

• Sumala sa bersikulo 1, unsay posisyon nga gihuptan ni Pablo sa Simbahan?

I-summarize 1 Mga Taga-Corinto 1:3–9 pinaagi sa pagpasabut nga si Pablo misulti sa mga Santos didto sa Corinto nga nagpasalamat siya sa Dios alang kanila tungod sa grasya nga ilang nadawat pinaagi ni Jesukristo, nga mipanalangin kanila sa tanang paagi. Ipasabut nga samtang namulong si Pablo sa mga Santos migamit siya sa pinulongan nga nagpakita nga ang Langitnong Amahan ug si Jesukristo managlahi nga mga binuhat (tan-awa sa bersikulo 3).

Dapita ang usa ka estudyante sa pagbasa og kusog sa 1 Mga Taga-Corinto 1:10-11. Hangyoa ang klase sa pagsunod, nga mangita sa unsay gipabuhat ni Pablo nga buhaton sa mga Santos sa Corinto.

• Sumala sa 1 Mga Taga-Corinto 1:10, unsa ang gilauman sa Ginoo nga atong buhaton isip mga miyembro sa Simbahan? (Gamit ang kaugalingon nilang mga pulong, kinahanglang mahibalo ang mga estudyante og usa ka baruganan sama sa mosunod: Ang Ginoo naglaum nga kita isip mga Santos nga magkahiusa ug wad-on ang pagkabahin-bahin ug panagbingkil.)

• Unsa ang atong mahimo isip mga miyembro sa Simbahan sa pagwagtang sa pagkabahin-bahin ug mga panagbingkil diha sa atong mga pamilya? Sa atong mga ward? (Isulat ang tubag sa mga estudyante sa pisara.)

• Unsa nga mga panalangin ang atong madawat gikan sa panaghiusa ug pagwagtang sa panagbingkil?

• Kanus-a kamo napanalanginan agig resulta sa panaghiusa diha sa klase, korum, o sa ward o branch?

I-refer ang mga estudyante ngadto sa mga tubag nga nasulat sa pisara, ug awhaga sila sa pagpili og usa ka paagi nga sila makapawagtang sa mga pagkabahin-bahin ug panagbingkil ug sa paghimo og tumong sa pag-implementar niini.

I-summarize 1 Mga Taga-Corinto 1:12–16 pinaagi sa pagpasabut nga ang mga Santos didto sa Corinto nagkabahin-bahin ngadto sa mga grupo base sa kon kinsa ang nagbautismo nila. Midako ang panagbingkil tungod kay nagtuo sila nga ang ilang kahimtang sa simbahan natino pinaagi sa kaimportante sa tawo kinsa nagbautismo nila.

1 Mga Taga-Corinto 1:17–31

Si Pablo nagtudlo nga ang Dios mitawag sa mga huyang sa pagsangyaw sa Iyang ebanghelyo

Ipasabut nga sa panahon ni Pablo, daghan nga mga Gresyanhon nagpuyo didto sa Corinto. Kining mga Gresyanhon naghatag og dakong bili sa pilosopikanhong mga ideya ug kalibutanong kaalam.

• Ngano kaha nga kon ang tawo kinsa naghatag og bili sa kalibutanong mga pilosopiya maglisud sa pagdawat sa ebanghelyo? (Mahimo nimong basahon ang 2 Nephi 9:28.)

Dapita ang mga estudyante sa pagpangita sa kamatuoran samtang ilang tun-an ang 1 Mga Taga Corinto 1:17–31 aron matabangan sila nga masabtan ang kahuyang sa kaalam sa kalibutan.

Bahina ang klase ngadto sa upat ka grupo. I-assign ang usa sa mosunod nga scripture reference ngadto sa matag usa ka grupo: 1 Mga Taga-Corinto 1:17–18; 1 Mga Taga-Corinto 1:19–20; 1 Mga Taga-Corinto 1:21–22; ug ang 1 Mga Taga-Corinto 1:23–24. Dapita ang mga estudyante sa pagbasa niining mga bersikulo diha sa ilang mga grupo, mangita alang sa unsay gisulti ni Pablo kabahin sa kaalam sa kalibutan batok sa kaalam sa Dios. Ipasabut nga ang mga pulong “kay si Kristo wala magpadala kanako aron sa pagpamautismo” diha sa bersikulo 17 nagsugyot nga si Pablo wala gipadala aron pagtukod og reputasyon base sa gidaghanon sa mga kinabig nga makuha niya. Mahimo usab nimong ipasabut nga ang mga pulong “ang kaalam sa mga manggialamon” diha sa bersikulo 19 ug “kaalam nga iya sa kalibutan” sa bersikulo 20 nagpasabut ngadto sa hiwi nga pilosopikanhong tradisyon nianang panahona.

Human sa igong panahon, dapita ang usa ka estudyante gikan sa matag grupo sa pag-summarize sa klase kon unsa ang gitudlo ni Pablo sa mga Santos sa Corinto kabahin sa kaalam. Human makareport ang tanan sa grupo, pangutana:

• Sa inyong hunahuna ngano kaha nga ang mga dili tumutuo mikonsiderar man nga usa ka binuang ang mensahe bahin sa Pag-ula ni Jesukristo?

Dapita ang usa ka estudyante sa pagbasa og kusog sa 1 Mga Taga-Corinto 1:25. Hangyoa ang klase sa pagsunod, nga mangita kon unsay gitudlo ni Pablo mahitungod sa tawhanong kaalam itandi ngadto sa kaalam sa Dios. Ipasabut nga si Pablo migamit sa mga pulong “Kay ang binoang sa Dios labi pang maalam kay sa mga tawo” ug “ang kahuyang sa Dios labi pang kusgan kay sa mga tawo” aron sa paghatud sa talagsaong kaalam ug gahum sa Dios. Ang Dios dili boang, wala usab Siyay mga kahuyang.

• Unsa nga kamatuoran ang gitudlo ni Pablo mahitungod sa tawhanong kaalam kon itandi sa kaalam sa Dios? (Human ang mga estudyante makatubag, isulat ang mosunod nga kamatuoran sa pisara: Ang kaalam sa Dios mas labaw pa kaysa tawhanong kaalam.)

• Sa unsa kaha nga mga paagi nga ang pagsabut niining kamatuoran makaapekto sa usa ka tawo nga nangita og solusyon sa iyang mga problema?

Dapita ang usa ka estudyante sa pagbasa og kusog sa 1 Mga Taga-Corinto 1:26–27. Hangyoa ang klase sa pagsunod, nga mangita kon si kinsa ang gipili sa Dios nga magsangyaw sa Iyang ebanghelyo.

• Kinsa ang gipili sa Dios sa pagsangyaw sa Iyang ebanghelyo?

• Sa inyong hunahuna ngano kaha nga ang Dios mipili niadtong gikonsiderar sa kalibutan nga boang ug huyang aron sa pagsangyaw sa Iyang ebanghelyo?

1 Mga Taga-Corinto 2

Si Pablo mipasabut kon sa unsang paagi kita makakat-on sa mga butang sa Dios

Dapita ang usa ka estudyante sa pagbasa og kusog sa mosunod nga istorya ni Presidente Boyd K. Packer sa Korum sa Napulog Duha ka mga Apostoles:

“Naglingkod ako sakay sa usa ka eroplano tupad sa usa ka tawo nga dali nga miangkon nga usa siya ka atiyesta kinsa nangusog gayud sa iyang dili pagtuo sa Dios mao nga ako mipadayag sa akong pagpamatuod ngadto kaniya. ‘Sayop ka,’ matud pa nako, ‘adunay Dios. Ako nasayud nga Siya buhi!’

“Miprotesta siya, ‘Wala ka masayud. Walay usa nga nasayud niana! Dili kana nimo masayran!’ Sa dihang dili gayud ako moundang, ang atiyesta, kinsa usa ka abogado, nangutana sa tingali pinakalisud nga pangutana kabahin sa pagpamatuod. ‘Sige kuno,’ siya miingon sa bugal-bugalon, matamayon nga paagi, ‘ingon nimo nasayud ka. Sultihi kuno ko giunsa nimo pagkasayud.’

“Sa dihang misulay ako sa pagtubag, bisan tuod kon gradwado ako sa mas taas nga pagtuon nga mga kurso, naglisud ako sa pagtubag. …

“Sa dihang akong gigamit ang mga pulong nga Espiritu ug saksi, ang atiyesta mitubag, ‘Dili ko kasabut nianang imong gipangsulti’ Ang mga pulong pag-ampo, pag-ila [discernment], ug hugot nga pagtuo, puro walay kahulugan kaniya. ‘Tan-awa,’ siya miingon, ‘wala gayud ikaw masayud. Kay kon nasayud ka pa, makasulti ikaw kanako kon giunsa nimo pagkahibalo.’

“Ako … nahutdan sa unsay buhaton” (“The Candle of the Lord,” Ensign, Ene. 1983, 51).

• Unsa kaha inyong ikasulti ngadto sa atiyesta?

Dapita ang mga estudyante sa pagpangita sa mga kamatuoran samtang magtuon sila sa 1 Mga Taga-Corinto 2 nga makatabang nila nga masayud nganong kining tawhana dili makasabut ni Presidente Packer ug nganong nahimo silang masaligon sa ilang mga kahibalo sa mga espirituhanon nga mga butang.

I-summarize ang 1 Mga Taga-Corinto 2:1–8 pinaagi sa pagpasabut nga si Pablo misulti sa mga Santos sa Corinto nga wala siya naggamit sa kalibutanong kaalam sa pagkombinser nila sa ebanghelyo. Nagtudlo siya kanila pinaagi sa Espiritu aron sila makabaton og hugot nga pagtuo sa Dios. Misulti usab si Pablo ngadto nila nga ang mga dili tumutuo dili makasabut sa mga misteryo sa Dios.

Dapita ang pipila ka estudyante nga magpuli-puli sa pagbasa og kusog gikan sa 1°Mga Taga-Corinto 2:29–16. Hangyoa ang klase sa pagsunod, nga mangita nganong miingon si Pablo nga ang pipila ka mga tawo mahimong masayud ug makasabut sa “kinahiladman sa Dios” (bersikulo 10), samtang ang uban dili.

• Sumala sa mga bersikulo 9–10, nganong masabtan man ni Pablo ug sa ubang matinud-anong mga tawo ang mga butang sa Dios?

• Sumala sa bersikulo 14, ngano nga ang ubang tawo dili man makasabut sa mga butang sa Dios?

• Unsa nga kamatuoran ang atong makat-unan gikan niining mga bersikulo mahitungod kon unsaon nato sa pagkahibalo og pagkasabut sa mga butang sa Dios? (Ang mga estudyante mahimong mogamit og lain-laing mga pulong, apan siguraduha nga ilang mailhan ang mosunod nga kamatuoran: Mahibaloan lamang nato ug masabtan ang mga butang sa Dios pinaagi sa Iyang Espiritu.)

I-refer ngadto sa asoy ni Presidente Packer, ug ipasabut nga si Presidente Packer nadasig sa pagpangutana sa tawo nga iyang katupad og lingkod diha sa eroplano kon unsay lami sa asin. Dapita ang usa ka estudyante sa pagbasa og kusog sa nahabilin nga istorya ni President Boyd K. Packer:

“Human sa pipila ka mga pagsulay, siyempre, dili siya makahimo niini. Dili siya makahulagway, pinaagi sa mga pulong lamang, ordinaryo ra kaayo nga kasinatian ang pagtilaw sa asin. Mipamatuod ko ngadto kaniya sa makausa pa ug miingon, ‘nasayud ko nga adunay Dios. Imong gibugal-bugalan kana nga pagpamatuod ug miingon nga kon nakahibalo ko, makasulti ko nimo sa eksakto nga paagi kon giunsa nako sa pagkahibalo. Higala, sa espirituhanong pagkasulti, nakatilaw na ako og asin. Dili na pud ko makahulagway kanimo pinaagi sa mga pulong kon sa unsang paagi kini nga kahibalo miabot sama nga ikaw makasulti kanako kon unsa ang lami sa asin. Apan sultihan ko ikaw pag-usab, adunay Dios! Buhi gayud Siya! Ug tungod lamang kay wala ka masayud, ayaw kog sultihi nga ako wala masayud, kay ako nasayud gayud!’

“Sa among pagbulag, nadungog nako siya nga nagyawyaw, ‘Wala ko magkinahanglan nga suportahan sa imong relihiyon! Wala ko magkinahanglan niana.’

“Sukad niana nga kasinatian, wala na gayud ako naulawi o naulaw nga dili nako mapasabut pinaagi sa pulong lamang ang tanan nakong nasayran sa espirituhanong paagi” (“The Candle of the Lord,” 52).

Isulat ang mga pulong sa Mga Butang sa Dios diha sa pisara ug pangutana sa mga estudyante kon unsay ilang gikonsiderar nga mga butang sa Dios nga mahimo lamang nga masayran ug masabtan pinaagi sa Iyang Espiritu. Isulat ang ilang mga tubag sa pisara.

• Nganong importante man para nato nga motuo nga mahibaloan lamang nato ug masabtan ang mga butang sa Dios pinaagi sa Iyang Espiritu?

I-refer ang mga estudyante sa lista diha sa pisara, ug dapita sila sa pagpakigbahin og kasinatian diin ang mga butang sa Dios ilang nahibaloan ug nasabtan pinaagi sa Espiritu. Ikonsiderar ang pagpakigbahin og kasinatian gikan sa imong kaugalingon.

Dapita ang mga estudyante sa pagpakigbahin

Ang pagpakigbahin og mga ideya ug tukma nga mga kasinatian makatabang sa pagpatin-aw sa pagsabut sa mga estudyante sa mga doktrina ug mga baruganan sa ebanghelyo. Samtang ang mga estudyante mopakigbahin sa ilang mga kasinatian, ang Espiritu Santo sa kasagaran modala kanila ngadto sa mas lawom nga pagsabut ug pagpamatuod sa mismong mga hunahuna nga ilang gipamahayag. Pinaagi sa gahum sa Espiritu Santo, ang ilang mga pulong ug mga kasinatian adunay dakong epekto usab sa mga kasingkasing ug hunahuna sa ilang mga kaedad.

Awhaga ang mga estudyante sa paghunahuna unsay ilang mahimo sa pagpangita og tabang sa Espiritu samtang sila maningkamot nga makahibalo ug makasabut sa mga butang sa Dios.

Tapusa pinaagi sa pagpamatuod sa mga kamatuoran nga gitudlo niining leksyon.

Komentaryo ug Background nga Impormasyon

1 Mga Taga-Corinto 1:17–2:13. Ang kaalam nga iya sa kalibutan

“Dihang si Pablo namulong batok sa ‘kaalam nga iya sa kalibutan’ (1 Mga Taga-Corinto 1:20), siya mipasabut sa mga sayop nga pilosopikanhong tradisyon sa iyang panahon ug dili sa bililhong pagtinguha sa pagkat-on ug edukasyon nga gi-awhag sa Ginoo (tan-awa sa Mateo 22:37; 2 Nephi 9:29; D&P 88:78–80). Si Pablo migamit sa mga pulong maalamon ug kaalam nga gibalik-balik sa 1 Mga Taga-Corinto 1:17–2:13 nga nagpasabut sa kalibutanong mga pilosopiya ug kadto kinsa misuporta niini. Ang pilosopikanhong mga ideya mao kanunay ang hilisgutan sa pampublikong mgaebate. Si Pablo mitandi sa limitado nga mga kaalam sa tawo uban sa gamhanan nga mensahe sa Anak sa Dios nga gilansang sa krus (tan-awa sa 1 Mga Taga-Corinto 1:17–25). Bisan pa niadtong kinsa nagbugalbugal sa ebanghelyo, ang hugot nga pagtuo sa mga Santos kinahanglang dili mag-agad sa ‘kaalam sa mga tawo, apan … sa gahum sa Dios’ (1 Mga Taga-Corinto 2:5).

“Ang mensahe sa usa ka Mesiyas nga gilansang sa krus hilabihan ka lisud dawaton alang sa mga Judeo ug Hentil. Sa mga Romano, ang paglansang sa krus mao ang silot nga giandam alang sa mga kriminal o mga ulipon ug nagsimbolo og kaulaw ug kapildihan. Ang ideya nga ang usa ka tawo mopuli sa pag-antus ug mamatay alang sa uban, dayon sa wala madugay mabuhi pag-usab, mao ang ‘binuang’ ngadto sa mga pilosopikanhong panghunahuna nga Gresyanhon (1 Mga Taga-Corinto 1:23). Alang sa mga Judeo, kansang mga konsepto sa Mesiyas nagdala sa paglaum sa mga harianon, gahum, ug kadaugan, ang mensahe nga ang Mesiyas namatay sa krus mao ang usa ka ‘kapangdolan’ ug ideya nga dili madawat (1 Mga Taga-Corinto 1:23)” (New Testament Student Manual [manwal sa Church Educational System, 2014], 364).

1 Mga Taga-Corinto 1:18–29. “Ang Dios mipili sa mga huyang nga mga butang sa kalibutan aron sa pagpakaulaw sa mga manggialamon.”

“Samtang daghan sa mga Judeo ug Hentil misalikway sa mensahe sa ebanghelyo isip ‘binuang’ (1 Mga Taga-Corinto 1:18), si Pablo mitudlo nga ‘ang binoang sa Dios labi pang maalam kay sa mga tawo; ug ang kahuyang sa Dios labi pang kusgan kay sa mga tawo’ (1 Mga Taga-Corinto 1:19–25). Ang Dios kasagaran nagpahigayon sa Iyang buhat pinaagi sa indibidwal kang kinsa ang kalibutan mahimong makonsiderar nga ‘binuang’ o ‘mahuyang’ (tan-awa sa D&P 35: 13–14; 124:1). Sa 1 Mga Taga-Corinto 1:28, ang ‘timawa ug tinamay sa kalibutan’—kadtong kinsa mapaubsanon ug mapainubsanon—mao kadtong gipili sa Dios nga motuman sa Iyang buhat” (New Testament Student Manual [manwal sa Church Educational System, 2014], 364).

1 Mga Taga-Corinto 2:6–16. Ang “mga butang sa Dios” mao ang “pagatugkaron sa espirituhanong paagi”

Tungod kay “ang igatudlo sa Espiritu sa Dios” mao lamang ang “pagatugkaron sa espirituhanong paagi” (1 Mga Taga-Corinto 2:14), kadtong mga kalibutanong mga hunahuna dili makasabut sa espirituhanong kamatuoran. Ang Dios naghatag og paagi alang kanato aron makabaton og espirituhanong kahibalo. Si Elder Paul V. Johnson sa Seventy mitudlo:

“Sa siyensya sa kalibutan ang siyentipekanhong pamaagi gamiton sa pagkat-on sa kamatuoran ug sa pagbaton og bag-ong kahibalo. Kini nahimong nakatabang kaayo sa mga katuigan, ug adunay misangput og hilabihan kadaghan nga siyentipekanhong kahibalo ug nagpadayon sa pagkunhod sa kaignorante mahitungod sa atong pisikal nga kalibutan. Ang pagkat-on og espirituhanong mga butang, hinoon, nagkinahanglan og lahi nga pamaagi kay sa pagkat-on sa siyentipiko nga mga butang. Ang siyentipekanhong paagi ug salabutan makatabang kaayo, apan kon kini lang dili gayud makadala og espiritwal nga kahibalo.

“Pagkat-on sa espirituhanon nga mga butang naglakip sa salabutan, apan dili kana paigo. Makat-unan lamang nato ang espirituhanon nga mga butang pinaagi sa Espiritu. …

“… Ang mga tubag sa espiritwal nga mga pangutana gihatag ngadto sa mga indibidwal kinsa wala magpatig-a sa ilang mga kasingkasing; kinsa nangutana nga may hugot nga pagtuo, motuo nga sila makadawat; ug kinsa matinud-anong mosunod sa mga sugo. Bisan kon kita mosunod niining sumbanan, dili kita makakontrolar sa husto nga panahon sa pag-angkon sa mga tubag. Usahay ang atong mga tubag moabut sa labing madali, ug usahay kita kinahanglang ibutang ang pangutana diha sa estante sa makadiyot ug mosalig sa atong hugot nga pagtuo nga napalambo gikan sa mga tubag nga kita nasayud” (“Usa Ka Sumbanan alang sa Pagkat-on sa Espirituhanon nga mga Butang” [Seminaries ug Institutes of Religion satellite broadcast, Ago. 7, 2012], si.lds.org).

Si Elder Dallin H. Oaks sa Korum sa Napulog Duha ka mga Apostoles mitudlo:

“Ang gisugyot nga pamaagi sa Ginoo sa pag-angkon og sagradong kahibalo lahi kaayo sa mga pamaagi nga gigamit niadtong nagbaton sa mga pagtulun-an lamang pinaagi sa pagtuon. Sama pananglit, usa ka kanunayng pamaagi sa pagka-eskolar mao ang pakig-debate o argumento nga diskusyon, usa ka pamaagi nga aduna koy dakong personal nga kasinatian. Apan ang Ginoo nagtudlo kanato sa karaan ug modernong mga kasulatan nga kita kinahanglan nga dili makigbingkil ibabaw sa mga punto sa iyang doktrina. Tan-awa sa 3 Ne. 11:28–30; D&P 10:63.) … Ang mga kamatuoran sa ebanghelyo ug pagpamatuod gidawat gikan sa Espiritu Santo pinaagi sa balaan nga pagtahud sa personal nga pagtuon ug pagpamalandong” (“Alternate Voices,” Ensign, Mayo 1989, 29).