Leksyon 150
Judas
Pasiuna
Giawhag ni Judas ang mga miyembro sa Simbahan nga makigbisog sa pagpanalipud sa ilang tinuohan batok sa mini nga mga magtutudlo. Gihulagway niya ang mini nga mga magtutudlo ug gitambagan ang mga Santos nga itukod ang ilang kinabuhi diha sa ebanghelyo ni Jesukristo. Si Judas sa tradisyunal nga paagi gisabut nga igsoon ni Jesukristo sa inahan (tan-awa sa Mateo 13:55). Si Judas tataw nga usa ka aktibong miyembro sa Simbahan nga maayo og dungog sa Jerusalem.
Mga Sugyot alang sa Pagtudlo
Judas 1:1–19
Giawhag ni Judas ang mga miyembro sa Simbahan nga makigbisog sa pagpanalipud sa pagtuo batok sa mini nga mga magtutudlo
Basaha og kusog ang mosunod nga mga sitwasyon, ug dapita ang mga estudyante sa paghunahuna unsaon nila sa pagtubag:
-
Sa usa ka site sa social media, nag-post ang usa ka higala og usa ka pamahayag nga misaway sa baruganan sa Simbahan mahitungod sa pagminyo sa managsama og sekso.
-
Usa ka silingan nakahibalo nga ikaw miyembro sa Simbahan. Miingon siya nimo nga nabasa niya ang Basahon ni Mormon ug mibati nga makabayaw kini nga literatura apan dili pulong sa Dios.
-
Atol sa diskusyon sa klase sa eskwelahan, usa ka higala nakiglantugi nga ang pagtan-aw og pornograpiya dili makadaot ug dili kini angayang pugngan.
-
Unsa ang lain-laing paagi ang usa ka tawo mahimong motubag niini nga mga sitwasyon?
Dapita ang usa ka estudyante sa pagbasa og kusog sa Judas 1:3–4. Hangyoa ang klase sa pagsunod, nga mangita kon unsay gipasidaan ni Judas ngadto sa mga miyembro sa Simbahan.
-
Sumala sa bersikulo 4, unsa ang gipasidaan ni Judas ngadto sa mga miyembro sa Simbahan?
Tabangi ang mga estudyante sa pagsabut nga ang “mga tawong dili diosnon” nga dunay dautang mga intensyon ang hinay-hinay nga nagpamiyembro sa Simbahan. Kining mga miyembroha mipasiugda og dautan, imoral nga mga buhat pinaagi sa pagtudlo nga ang doktrina sa grasya hingpit nga nagtugot sa pagpakasala tungod kay ang Dios puno sa kalooy nga mopasaylo. Gisalikway sab nila ang pihong mga kamatuoran mahitungod sa Langitnong Amahan ug ni Jesukristo. Ang mga pulong nga “mga tawo nga dugay nang gikatagana alang niining maong pagkahinukman sa silot” (bersikulo 4) nagpasabut nga ang pagkahinukman o panghimaraut nianang mga tawhana nasulat na kaniadto pa.
-
Kabahin niining sayop nga mga pagtulun-an ug dautang mga binuhatan nga gisabwag niining mga tawhana, unsa ang giawhag ni Judas nga buhaton sa matinud-anong mga miyembro sa Simbahan? (“Maningkamot sa pagpanalipud sa pagtuo” [verse 3].)
Ipasabut nga ang “tinuohan nga sa makausa ra ug sa dayon gitugyan ngadto sa mga balaan” (bersikulo 3) nagpasabut sa ebanghelyo ni Jesukristo—mga kamatuoran, mga balaod, ug mga ordinansa nga gitudlo sa Manluluwas ug sa Iyang mga Apostoles.
-
Unsa nga kamatuoran ang atong makat-unan mahitungod sa responsibilidad sa mga disipulo ni Jesukristo sa pag-atubang sa sayop nga mga pagtulun-an ug dautang mga binuhatan? (Ang mga estudyante mahimong mogamit og kaugalingon nilang mga pulong aron mahibaloan ang mosunod nga kamatuoran: Ang mga disipulo ni Jesukristo kinahanglang makigbisog sa pagpanalipud sa ebanghelyo ni Jesukristo batok sa sayop nga mga pagtulun-an ug dautang mga binuhatan.)
-
Unsa sa imong hunahuna ang ipasabut sa makigbisog sa pagpanalipud para sa ebanghelyo? (Kinahanglan nga wala kitay kahadlok nga motudlo ug mopamatuod sa ebanghelyo. Apan, dili angay nga wala kitay pagbati, dili kita magpalabi-labi, o makigbingkil samtang gibuhat nato kini [tan-awa sa Alma 38:12; 3 Nephi 11:29].)
-
Unsaon man nato sa pagpanalipud sa ebanghelyo nga dili makigbingkil?
Pahinumdumi ang mga estudyante sa mga sitwasyon nga gipresentar sa pagsugod sa leksyon.
-
Niining susama nga mga sitwasyon, unsa ang pipila ka mga paagi nga atong mapanalipdan ang ebanghelyo batok sa sayop nga mga pagtulun-an ug dautang mga binuhatan?
Dapita ang usa ka estudyante nga basahon ang mosunod nga istorya nga gihatag ni Elder Neil L. Andersen sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi gipanalipdan sa batan-ong babaye ang ebanghelyo.
“Bag-ohay lang, nakig-istorya ko sa usa ka Laurel gikan sa Estados Unidos. Mokutlo ko gikan sa iyang email:
“‘Niining milabayng tuig pipila sa akong mga higala sa Facebook misugod na og pang-post sa ilang opinyon bahin sa kaminyoon. Daghan ang mipabor sa kaminyoon sa managsama og sekso, ug pipila sa LDS nga mga kabatan-onan ‘mi-like’ sa mga gi-post. Wala ko mokomentaryo.
“‘Nakahukom ko nga akong ipahayag ang akong pagtuo bahin sa tradisyonal nga kaminyoon sa mahunahunaong paagi.
“‘Gamit ang akong profile picture, gidugang nako ang caption nga “Mituo ako sa kaminyoon nga tali sa usa ka lalaki ug usa ka babaye.” Ingon og diha-diha dayon nakadawat ko og mga mensahe. “Hakog ka.” “Mahukmanon ka.” Ang usa mitandi kanako sa usa ka tigpanag-iya og ulipon. Ug nadawat nako kini nga post gikan sa suod nga higala nga lig-ong miyembro sa Simbahan: “Kinahanglan mouyon-uyon ka sa dagan sa panahon. Ang mga butang nag-usab-usab ug busa kinahanglang usbon nimo ang kinaraang hunahuna.”
“‘Wala ko makiglalis,” siya miingon, “apan wala nako tangtanga ang akong pamahayag.’
“Siya mitapos: ‘Usahay, sama sa giingon ni Presidente Monson, “Kamo kinahanglan nga mobarug nga mag-inusara.” Unta isip mga kabatan-onan, kita maghiusang mobarug nga matinuoron sa Dios ug sa mga pagtulun-an sa Iyang buhi nga mga propeta’” (“Espirituhanong mga Alimpulos,” Ensign o Liahona, Mayo 2014, 19–20).
-
Sa unsang paagi kining babayhana nanalipud sa ebanghelyo?
-
Kanus-a kamo, o usa ka tawo nga inyong nailhan nanalipud sa ebanghelyo ni Jesukristo? Unsa man ang inyong nakat-unan gikan niana nga kasinatian?
Hangyoa ang mga estudyante nga pamalandungan kon unsay ilang mahimo aron makigbisog sa pagpanalipud sa ebanghelyo ni Jesukristo. Awhaga sila sa pagsunod sa bisan unsang mga pag-aghat nga ilang nadawat.
I-summarize ang Judas 1:5–7 pinaagi sa pagpasabut nga gikumpara ni Judas kining supakan nga mga miyembro sa Simbahan adtong mga tawo sa Daang Tugon kinsa misupak sa Dios ug nakatagamtan sa Iyang paghukom. Kining mga tawhana naglakip sa daghang mga anak sa Israel kinsa nalaglag didto sa kamingawan ug sa mga tawo sa Sodoma ug Gomorra, kinsa gilaglag pinaagi sa pagkasunog. Gikumpara usab ni Judas ang supakan nga mga miyembro sa Simbahan adtong mga tawo nga misupak batok sa Dios sa “wala managpabilin diha sa ilang nahimutangan,” o kinabuhi sa wala pa sa yuta, ug gipalayas gikan sa Iyang presensya (Judas 1:6; tan-awa usab sa Abraham 3:22–26).
Isulat ang mosunod nga ulohan diha sa pisara: Mga Kinaiya sa Mini nga mga Magtutudlo.
Ipasabut nga sa Judas 1:8–16, atong mabasa ang paghulagway ni Judas mahitungod sa daghang kinaiya nga makatabang sa mga miyembro sa Simbahan sa pag-ila niadtong nagsabwag og dautang mga pilosopiya ug mga binuhatan sa Simbahan. Aron mahulagway kini nga ideya, ipasabut ang mga pulong nga “sila mga panganud nga walay dalang ulan, nga ginataral sa hangin” ug “larag nga mga kahoy nga walay mga bunga” sa Judas 1:12.
-
Sa unsang paagi ang mini nga mga magtutudlo sama sa panganud nga walay dalang ulan ug mga kahoy nga walay bunga?
Bahina ang klase ngadto sa mga grupo nga tinagutlo o tinagup-at. Ipabasa sa mga estudyante ang Judas 1:8, 10, 14–19 kauban sa ilang mga kagrupo, nga mangita og dugang nga mga kinaiya sa mini nga mga magtutudlo. Dapita ang mga estudyante sa pagmarka unsay ilang nakit-an. Mahimo nimong ipasabut nga ang “ulahiayng panahon” (bersikulo 18) nagpasabut sa panahon diin si Judas nagpakabuhi ug sa katapusang mga adlaw diin kita nagpuyo.
Human sa igo nga panahon, dapita ang mga estudyante sa pagduol sa pisara ug isulat ang nakit-an nilang mga kinaiya sa mini nga mga magtutudlo. Ang mga kinaiya nga tingali isulat sa mga estudyante maglakip sa mosunod (mahimo nimong gamiton kini nga mga pamahayag aron matabangan ang mga estudyante sa pagsabut sa ilang gibasa):
Mga Kinaiya sa Mini nga mga Magtutudlo
Nanaghugawhugaw sa ilang lawas pinaagi sa imoralidad (bersikulo 8)
Nanagsalikway sa kagamhanan, ug nagapasipala sa mga halangdon (bersikulo 8)
Nagapasipala sa bisan unsang butang nga dili nila masabut (bersikulo 10)
Nagdaut sa ilang mga kaugalingon pinaagi sa pagpakabuhi sa kalibutanong kahibalo nga ilang gibatunan (bersikulo 10)
Nagbuhat og dili diosnong pamaagi, (bersikulo 15)
Namulong og mapait nga mga butang batok sa Dios (bersikulo 15)
Bagulbolan ug tigmulo (bersikulo 16)
Nanaggawi pahiuyon sa ilang kaugalingong mga pangibog (bersikulo 16)
Nagasultig mga pasiatab [hinambog] (bersikulo 16)
Nagaulog-ulog sa mga tawo alang sa personal nilang bintaha (bersikulo 16)
Mamugal-bugal sa Simbahan sa Ginoo ug sa mga sumbanan niini (bersikulo 18)
Molahi sa ilang kaugalingon gikan sa mga tumutuo (bersikulo 19)
Maghunahuna ug molihok sa kalibutanong mga paagi (bersikulo 19)
Wala magbaton sa Espiritu (bersikulo 19)
-
Sa unsang paagi ang dili pagbaton sa Espiritu mosangput sa pagpalambo og mga kinaiya nga gilista sa pisara?
-
Nganong importante ang pag-ila sa mga kinaiya sa mini nga mga magtutudlo?
Tabangi ang mga estudyante sa pagsabut nga dili tanan nga adunay usa o daghan pa niining kinaiyaha o nakatudlo og sayop matawag nga mini nga magtutudlo sigun sa gihulagway ni Judas. Ang maong tawo posibling inosente sa iyang sayop o sa iyang pagsabut sa hilisgutan. Hinoon, kining mga kinaiyaha makatabang nato sa pag-ila sa mini nga mga magtutudlo kansang tuyo mao ang pagpahuyang sa hugot nga pagtuo ug kamasulundon sa uban pinaagi sa paglingla nila ug pagtudlo og dautan.
Dapita ang mga estudyante sa pagribyu og hilum sa Judas 1:17–18.
-
Kinsa ang unang mipasidaan sa mga miyembro sa Simbahan mahitungod sa mini nga mga magtutudlo?
-
Unsa nga kamatuoran ang atong makat-unan gikan niini nga mga bersikulo kon sa unsang paagi ang mga apostoles ug mga propeta makatabang sa atong mga paningkamot nga makapanalipud batok sa mini nga mga magtutudlo? (Ang mga estudyante mahimong mogamit sa ilang kaugalingong mga pulong apan kinahanglang mahibaloan nila ang kamatuoran sama sa mosunod: Ang mga apostoles ug mga propeta nagpasidaan kanato ug nagtabang nga atong mailhan kinsa kadtong nagtinguha sa pagpahuyang sa atong hugot nga pagtuo ug kamasulundon. Isulat sa pisara kini nga kamatuoran.)
Dapita ang usa ka estudyante sa pagbasa og kusog sa mosunod nga pamahayag ni Elder M. Russell Ballard sa Korum sa Napulog Duha ka mga Apostoles. Hangyoa ang klase sa pagpaminaw kon sa unsang paagi kini nga pamahayag nagpakita niini nga kamatuoran.
“Karon pahimangnoan namo kamo nga dunay mini nga mga propeta ug mini nga mga magtutudlo nga motumaw; ug kon dili kita magmatngon, bisan kadtong mga matinud-anong mga miyembro sa Simbahan ni Jesukristo sa mga Santos sa Ulahing mga Adlaw mabiktima sa ilang pagpanglingla” (“Beware of False Prophets and False Teachers,” Ensign, Nob. 1999, 62).
-
Sa pagkonsiderar niini nga kamatuoran, nganong importante man ang pagtuon sa pulong sa mga apostoles ug mga propeta?
-
Unsa ang pipila ka mga sayop nga pagtulun-an ang gipasidaan sa mga propeta ug mga apostoles?
Judas 1:20–25
Gitambagan ni Judas ang mga Santos nga itukod ang ilang kinabuhi diha sa ebanghelyo ni Jesukristo ug motabang sa pagluwas sa uban
Isulat sa pisara ang mosunod nga dili kompleto nga pamahayag: Mahimo kitang magpabiling matinud-anon sa tinuohan pinaagi sa …
Dapita ang usa ka estudyante sa pagbasa og kusog sa Judas 1:20–21. Hangyoa ang klase sa pagsunod, nga mangita kon unsay gitambag ni Judas nga buhaton sa mga Santos aron magpabiling matinud-anon sa tinuohan. Mahimo nimong ipasabut nga “ang pag-ampo diha sa Espiritu Santo” nagpasabut nga pag-ampo uban sa tabang sa inspirasyon sa Espiritu Santo.
-
Sumala sa mga bersikulo 20–21, unsaon ninyo sa pagkompleto ang pamahayag nga naa sa pisara? (Usa ka paagi nga makompleto sa mga estudyante ang pamahayag mao kining mosunod: Mahimo kitang magmatinud-anon sa tinuohan pinaagi sa pagtukod sa atong kinabuhi diha sa ebanghelyo ni Jesukristo.)
-
Sa unsang paagi ang pagsunod sa dugang nga instruksyon ni Judas diha sa mga bersikulo 20–21 makatabang nga atong matukod ang atong kinabuhi diha sa ebanghelyo?
-
Ngano kaha nga ang pagkamatinud-anon sa tinuohan takus man sa gihimong paningkamot?
-
Sa unsang paagi ang pagsunod sa tambag ni Judas nakatabang ninyo o sa uban nga magpabiling matinud-anon sa tinuohan?
Dapita ang mga estudyante nga isulat sa ilang mga scripture study journal o mga class notebook ang usa ka paagi nga ilang mapalambo ang mosunod nga tambag ni Judas. Awhaga ang mga estudyante nga i-apply unsay ilang gisulat.
I-summarize ang Judas 1:22–25 pinaagi sa pagpasabut nga gitambagan ni Judas ang matinud-anong mga miyembro sa Simbahan sa pagtabang sa uban nga nanglimbasug sa espirituhanong paagi, tingali tungod sa impluwensya sa mini nga mga magtutudlo, ug mihalad siya og pagdayeg sa Dios.
Tapusa pinaagi sa pagpakigbahin sa imong pagpamatuod sa mga kamatuoran nga gihisgutan dinhi sa leksyon.
Ribyu sa Scripture Mastery
I-assign ang matag estudyante og usa ka lahi nga scripture mastery passage. Pasulata ang mga estudyante og usa ka tinuod nga sitwasyon sa kinabuhi sa usa ka pirasong papel diin ang mga doktrina ug mga baruganan nga gilangkuban sa gi-assign nganha nila nga scripture mastery passage mahimo nilang magamit. Kon mahuman na og sulat ang mga estudyante, kolektaha ang gihimo nilang mga sitwasyon. Basaha ang pipila ka mga sitwasyon, ug dapita ang mga estudyante sa pagpakigbahin sa unsang paagi ang mga doktrina ug mga baruganan sa scripture mastery passage magamit sa matag sitwasyon. Mahimo kang mopresentar og pipila ka mga sitwasyon sa sinugdanan o sa katapusan sa mga leksyon sa nagsunod nga semana.
Komentaryo ug Background nga Impormasyon
Judas 1:3. “Makigbisug sa pagpanalipud sa tinuohan”
Si Elder M. Russell Ballard sa Korum sa Napulog Duha ka mga Apostoles mitudlo mahitungod sa pagpaningkamot nga mapanalipdan ang ebanghelyo ni Jesukristo batok sa sayop nga mga pagtulun-an ug dautang mga binuhatan:
“Kon ang dautan gustong moataki ug mosamok sa buhat sa Dios, moataki kini sa pamilya. Mobuhat kini sa ingon pinaagi sa pagbaliwala sa balaod sa kaputli, sa paglibug kon babaye ba o lalaki, dili na panumbalingon ang kabayolente, sa paghimo sa law-ay ug mapanamastamason nga pinulongan nga maoy uso, ug sa paghimo sa imoral ug dili maayo nga kinaiya ingon nga mao ang lagda imbis mao ang kalainan.
“Kinahanglang hinumduman nato ang pamahayag ni Edmund Burke: ‘Ang bugtong ra nga butang nga gikinahanglan aron magmadaugon ang dautan mao nga ang buotang mga tawo walay buhaton’ [gipasidunggan sa John Bartlett, comp., Familiar Quotations, 15th ed. (1980), ix]. Gikinahanglan nga atong ipadungog ang atong mga tingog uban sa nagpakabana nga mga lumulupyo sa kalibutan sa pagsupak sa bag-ong mga hilig” (“Ipadungog Nato ang Atong mga Tingog,” Ensign o Liahona, Nob. 2003, 18).
Ang modernong mga Apostoles mitudlo sa mga miyembro sa Simbahan kon sa unsang paagi mapanalipdan ang ebanghelyo nga dili makigbingkil. Alang sa pananglitan, tan-awa sa Elder Robert D. Hales, “Kristohanong Kaisug: Ang Bugti sa Pagkadisipulo,” Ensign o Liahona, Nob. 2008, 72–75; Elder Jeffrey R. Holland, “Ang Bili—ug mga Panalangin—sa Pagkadisipulo,” Ensign o Liahona, Mayo 2014, 6–9; and Elder Dallin H. Oaks, “Pagpakabuhi nga may mga Panaglahi,” Ensign or Liahona, Nob. 2014, 25–28.
Judas 1:9, 14–15. Biblikanhong mga basahon
Mahimong nag-refer si Judas sa mga basahon sa apokripa nga Assumption of Moses (tan-awa sa bersikulo 9) ug sa Basahon ni Enoch (tan-awa sa verses 14–15). Ang Ginoo mipadayag nga daghang butang nga gisudlan sa apokripa mga eksakto, ug kadtong nahayagan sa Espiritu makabenipisyo sa pagbasa niini. Hinoon, ang pipila sa mga basahon dunay mga gipangdugang nga midaot sa orihinal nga teksto (tan-awa sa D&P 91). Alang sa dugang nga impormasyon mahitungod sa Apokripa, tan-awa sa Ang Giya ngadto sa mga Kasulatan, “Apokripa.”