Leksyon 44

Lucas 2

Pasiuna

Si Jose ug Maria mibiyahe ngadto sa Betlehem, diin si Jesus natawo. Ang mga magbalantay sa karnero misunod sa sugo sa usa ka anghel sa pagpangita sa bag-ong natawo nga si Jesus, ug dayon ilang gisangyaw ang pagkatawo ni Jesus ngadto sa uban. Si Simeon mipanalangin ni Jesus sa templo, ug si Ana mipakigbahin sa iyang pagsaksi nga ang Manunubos natawo. Si Jesus mitubo “sa kaalam ug sa gidak-on ug sa kahimuot kaniya sa Dios ug sa tawo” (Lucas 2:52).

Mga Sugyot alang sa Pagtudlo

Lucas 2:1–20

Si Jesus natawo didto sa Betlehem

Ikonsiderar ang pagpakanta sa klase sa “Joy to the World” (Hymns, nu. 201) o lain nga himno sa Pasko isip kabahin sa debosyonal.

Ipakita ang litrato nga Si Jose ug Maria Mibiyahe ngadto sa Betlehem (Libro sa mga Hulagway sa Ebanghelyo [2009], nu. 29; tan-awa usab sa LDS.org). Hangyoa ang mga estudyante sa pagkonsiderar kon unsa ka daghan ang ilang nasayran sa mga panghitabo nga naglibut sa pagkatawo sa Manluluwas.

Aron sa pag-andam sa mga estudyante sa pagtuon sa Lucas 2:1–20, dapita sila sa pagkuha sa mosunod nga tinuod-o-sayop nga eksamin. (Sa dili pa magklase, pag-andam og kopya sa eksamin alang sa matag estudyante.)

Tinuod–Sayop nga Eksamin (Lucas 2:1–20)

Manwal sa Seminary Teacher sa Bag-ong Tugon—Leksyon 44

• ____ 1. Si Maria ug Jose miadto sa Betlehem aron sa pagbayad og buhis.

• ____ 2. Si Maria ug Jose kinahanglang mobiyahe og 27 ka milya (44 ka kilometro) gikan sa Nazaret ngadto sa Betlehem.

• ____ 3. Si Maria mipahimutang sa batang Jesus sa pasungan tungod kay puno na ang balay abutanan.

• ____ 4. Ang mga magbalantay sa karnero misunod sa bitoon ngadto sa pasungan diin naghigda si Jesus.

• ____ 5. Gawas kang Maria ug Jose, ang unang mga tawo nga nasulat nga nakakita ni Jesus mao ang mga magbalantay sa karnero.

• ____ 6. Ang anghel misulti sa mga magbalantay sa karnero nga dili ipanugid ni bisan kinsa ang unsay ilang nakita.

© 2015 pinaagi sa Intellectual Reserve, Inc. Tanang mga katungod gigahin.

Dapita ang mga estudyante sa pagpangita sa mga tubag sa eksamin samtang sila magtuon sa Lucas 2.

Dapita ang usa ka estudyante sa pagbasa og kusog sa Lucas 2:1–5. Hangyoa ang klase sa pagsunod, nga mangita kon nganong mibiyahe si Jose ug Maria ngadto sa Betlehem.

• Nganong mibiyahe man si Jose ug Maria ngadto sa Betlehem? (Ipasabut nga ang Lucas 2:1, footnote b sa LDS English version sa Biblia nagklaro nga si Cesar gusto nga marehistro, o maihap, ang katawhan. Gibuhat kini alang sa pagpangolekta og buhis.)

Dapita ang mga estudyante sa pagpakli ngadto sa mga Mapa sa Biblia, nu. 11, “Ang Balaan nga Yuta sa mga Panahon sa Bag-ong Tugon,” nga anaa sa Giya ngadto sa mga Kasulatan. Hangyoa ang mga estudyante sa pagpangita sa Nazaret ug Betlehem diha sa mapa ug, gamit ang yawe, sa pagbana-bana kon unsa ka layo ang gibiyahe ni Joseph ug Maria. Human makatubag ang mga estudyante, ipasabut nga ang distansya nga 85–90 ka milya (137–145 kilometro) gikan sa Nazaret ngadto sa Betlehem moabot og dili mominos upat ngadto sa lima ka adlaw nga paglakaw, ug tingali sobra pa alang nila ni Jose ug Maria tungod sa kondisyon ni Maria.

Gamita ang mga scripture study aid

Ang Simbahan nag-andam og pipila ka mga tabang sa pagtuon sa kasulatan ug gilakip kini sa sumbanan nga mga basahon alang sa uban nga mga pinulongan. Kini naglakip sa mga materyal nga pakisayran sama sa mga footnote, mga index, mga litrato, ug mga mapa. Kini mao ang pipila sa labing bililhong kapanguhaan nga magamit sa mga magtutudlo ug mga estudyante samtang sila magtuon sa mga kasulatan. Awhaga ang mga estudyante sa paggamit sa anaa nga mga tabang sa pagtuon sa ilang personal nga pagtuon sa kasulatan.

Hangyoa ang mga estudyante sa pagpamalandong kon unsay ilang hunahuna nga tukma nga kahimtang alang sa pagkatawo sa Tiglalang ug Manluluwas sa kalibutan.

Dapita ang usa ka estudyante sa pagbasa og kusog sa Lucas 2:6–7. Hangyoa ang klase sa pagsunod, nga mangita sa mga sirkumstanya sa pagkatawo ni Jesus.

• Bisan pa man sa talagsaon nga importanteng kahimtang ni Jesus isip Bugtong Anak sa Dios diha sa unod, unsa man ang kahimtang sa Iyang pagkatawo?

Dapita ang pipila ka estudyante nga magpuli-puli sa pagbasa og kusog gikan sa Lucas 2:8–14. Hangyoa ang klase sa pagsunod, nga mangita kon giunsa pagpahibalo ang pagkatawo sa Manluluwas. Dapita ang mga estudyante nga moreport sa unsay ilang nakat-unan. Ipakita ang litrato nga Ang Anghel Mipakita sa mga Magbalantay sa Karnero (Libro sa mga Hulagway sa Ebanghelyo nu. 31; tan-awa usab sa LDS.org).

• Sumala sa bersikulo 10, unsay atong masinati tungod sa pagkatawo sa Manluluwas? (Human makatubag ang mga estudyante, isulat sa pisara ang mosunod nga kamatuoran: Tungod kay ang Manluluwas natawo dinhi sa yuta, kita makasinati og hingpit nga kalipay.)

Samtang ang mga estudyante magpadayon sa pagtuon sa Lucas 2, dapita sila sa pagpangita og mga ehemplo kon sa unsang paagi ang kahibalo sa pagkatawo sa Manluluwas mihatag og dakong kalipay ngadto sa uban.

Dapita ang usa ka estudyante sa pagbasa og kusog sa Lucas 2:15–20. Hangyoa ang klase sa pagsunod, nga mangita kon unsa ang reaksyon sa mga magbalantay sa karnero sa mensahe sa anghel.

• Unsa nga mga pulong ang nagpakita kon unsa ang reaksyon sa mga magbalantay sa karnero sa mensahe sa anghel? (Mahimo nimong isugyot nga markahan sa mga estudyante ang mga pulong “tana! mangadto na kita” sa bersikulo 15 ug “sila miadto nga nanagdali” sa bersikulo 16.)

• Unsa nga saksi, o pagpamatuod, ang nadawat sa mga magbalantay sa karnero tungod kay sila mipatalinghug niini nga mensahe?

• Unsa ang gibuhat sa mga magbalantay sa karnero human nila madawat ang ilang saksi ni Jesukristo?

• Ngano kaha nga ang mga magbalantay sa karnero mipakigbahin ngadto sa uban sa ilang nasinati?

• Unsa nga baruganan ang atong makat-unan gikan niini nga istorya mahitungod sa unsay mahitabo kon kita makadawat og atong kaugalingong pagpamatuod kang Jesukristo? (Gamit ang kaugalingon nilang mga pulong, ang mga estudyante kinahanglang mahibalo og baruganan sama sa mosunod: Kon kita makadawat og atong kaugalingong pagpamatuod kang Jesukristo, kita magtinguha sa pagpakigbahin sa atong pagpamatuod ngadto sa uban.)

Dapita ang mga estudyante sa paghunahuna og higayon sa dihang sila mibati og tinguha sa pagpakigbahin sa ilang mga pagpamatuod ni Jesukristo ug sa Iyang ebanghelyo ngadto sa uban. Awhaga sila sa pagpamalandong kon unsay nagdasig niana nga tinguha. Pagdapit og pipila ka mga estudyante sa pagpakigbahin sa ilang mga kasinatian diha sa klase.

Lucas 2:21–39

Si Simeon ug Ana nagdeklarar ni Jesus nga mao ang Manluluwas sa kalibutan

I-summarize ang Lucas 2:21–24 pinaagi sa pagpasabut nga human sa pagkatawo ni Jesus, si Maria ug Jose mipresentar Kaniya didto sa templo sumala sa balaod sa Judeo (tan-awa sa Exodo 13:2). Duha ka tawo nga anaa sa templo nianang adlawa nakaila sa batang Jesus isip ang Mesiyas. Dapita ang batan-ong mga lalaki sa klase nga hilum nga mobasa sa istorya ni Simeon diha sa Lucas 2:25–32. (Tingali kinahanglan nimong ipasabut nga ang mga pulong nga “nagpaabot sa paglipay sa Israel” sa bersikulo 25 nagpasabut nga naghulat sa Mesiyas nga moabut.) Dapita ang batan-ong mga babaye nga hilum nga mobasa sa istorya ni Ana diha sa Lucas 2:36–38 (ug kon gikinahanglan, ipasabut nga ang “kawaloan” diha sa bersikulo 37 nagpasabut og 80). Samtang ang mga estudyante nagbasa sa gi-assign kanila nga mga bersikulo, dapita sila sa pagpangita sa mga tubag sa mosunod nga mga pangutana:

• Sa unsang paagi ang kahibalo sa pagkatawo sa Manluluwas midala og hingpit nga kalipay niini nga tawo?

• Sa unsang paagi nga siya nagpamatuod ni Jesukristo?

Human sa igong panahon, pagdapit og usa ka batan-ong lalaki sa pagbarug, sa pag-summarize sa istorya nga iyang gibasa, ug sa pagreport sa iyang mga tubag sa mosunod nga mga pangutana. Ipakita ang litrato nga Si Simeon Mihatag og Balaang Pagtahud sa Batang Jesus (Libro sa mga Hulagway sa Ebanghelyo, nu. 32; tan-awa usab sa LDS.org).

I-summarize ang Lucas 2:33–35 pinaagi sa pagpasabut nga si Simeon mipanalangin usab kang Maria ug Jose.

Dapita ang usa ka batan-ong babaye sa pagbarug, pag-summarize sa istorya nga iyang gibasa, ug sa pagreport sa iyang mga tubag sa nag-una nga mga pangutana.

Dapita ang mga estudyante sa pagpasabut kon sa unsang paagi ang pagkasayud nga natawo ang Manluluwas makahatag kanato og hingpit nga kalipay. Dapita kadtong kinsa komportable sa pagbuhat sa ingon nga mopaambit sa ilang mga pagpamatuod ni Jesukristo diha sa klase.

I-summarize ang Lucas 2:39 pinaagi sa pagpasabut nga pagkahuman niini nga mga hitabo, si Maria, Jose, ug Jesus mipauli sa Nazaret.

Lucas 2:40–52

Ang batan-ong Jesus nagtudlo sa Templo

Dapita ang mga estudyante sa pagsulat diha sa ilang mga notebook sa klase o scripture study journal og usa ka aspeto nga gusto nilang molambo. Pagdapit og pipila ka mga estudyante kinsa komportable nga mobuhat nga ipakigbahin sa klase kon unsay ilang gisulat. (Pahinumdumi ang mga estudyante nga dili mopakigbahin og bisan unsa nga personal o pribado ra kaayo.)

• Sa unsang paagi ang pagkahibalo kon sama sa unsa si Jesus sa Iyang kabatan-on makatabang kaninyo isip usa ka batan-on?

Ipasabut nga kita adunay pipila lang ka mga detalye sa pagkabatan-on ni Jesus, apan kadtong narekord mahimong usa ka dakong panalangin ug giya kanato samtang kita naningkamot sa pagpalambo sa atong kaugalingon. Samtang ang mga estudyante nagtuon sa nahibilin sa Lucas 2, dapita sila sa pagpangita sa mga kamatuoran nga makatabang nato nga masayud kon unsa nga mga aspeto ang kinahanglan natong tutukan samtang naningkamot kita sa pagpalambo sa atong kaugalingon.

Ipakita ang litrato nga Si Jesus Nag-ampo uban sa Iyang Inahan (Libro sa mga Hulagway sa Ebanghelyo, nu. 33; tan-awa usab sa LDS.org). Dapita ang usa ka estudyante sa pagbasa og kusog sa Lucas 2:40. Hangyoa ang klase sa pagsunod, nga mangita kon giunsa paghulagway ni Lucas ang pagkabata ni Jesus. Ipasabut nga ang nahimong nagpasabut nga mitubo o milambo. Dapita ang mga estudyante nga moreport sa unsay ilang nakat-unan.

Dapita ang pipila ka estudyante nga magpuli-puli sa pagbasa og kusog gikan sa Lucas 2:41–47. Hangyoa ang klase sa pagsunod, nga mangita kon unsay gibuhat ni Jesus sa dihang nag-edad Siya og 12 anyos.

• Ngano nga nagpabilin man si Jesus didto sa templo? (Dapita ang mga estudyante sa pagbasa sa kinutlo gikan sa Hubad ni Joseph Smith, Lucas 2:46 nga makita sa Giya ngadto sa mga Kasulatan, nga mangita kon sa unsang paagi ang Hubad ni Joseph Smith nagklaro unsa ang gibuhat ni Jesus sa templo ug sa unsang paagi kini nga pagklaro mas mohaum sa paghulagway sa panghitabo sa Lucas 2:47.)

Dapita ang usa ka estudyante sa pagbasa og kusog sa Lucas 2:48–50. Hangyoa ang mga estudyante sa pagsunod ug mangita kon unsay gisulti ni Jesus kang Maria ug Jose sa diha nga Siya ilang nakit-an.

• Unsa ang gisulti ni Jesus kang Maria ug Jose sa diha nga Siya ilang nakit-an?

• Unsa ang gipadayag niini nga istorya mahitungod sa kahibalo ni Jesus kabahin sa Iyang tinuod nga pagkatawo ug kabahin sa Iyang kinaiya sa Iyang kabatan-onan?

Dapita ang usa ka estudyante sa pagbasa og kusog sa Lucas 2:51–52. Hangyoa ang klase sa pagsunod, nga mangita sa mga paagi nga milambo si Jesus.

• Unsay buot ipasabut sa “[nagtubo] sa kaalam”? (Naglambo sa kaalam.) Sa pagtubo sa “gidak-on”? (Naglambo sa pisikal nga paagi.) Sa pagtubo sa “kahimuot kaniya sa Dios”? (Naglambo sa espirituhanong paagi.) Sa pagtubo sa “kahimuot kaniya sa … tawo”? (Naglambo sa sosyal nga paagi.)

• Basi sa bersikulo 52, unsaon ninyo pagpahayag og usa ka baruganan nga makagiya kanato sa pagsunod sa ehemplo ni Jesus? (Ang mga estudyante kinahanglang moila og baruganan sama sa mosunod: Makasunod kita sa ehemplo ni Jesus pinaagi sa pag-angkon og kaalam ug sa paglambo sa pisikal, espiritwal ug sosyal nga paagi.)

• Ngano nga importante alang kanato nga molambo sa matag usa niining upat ka mga aspeto? (Aron mamahimo kita nga maayong pagkabalanse nga mga katawhan.)

• Sa unsang paagi kamo napanalanginan samtang kamo naningkamot sa pagsunod sa ehemplo ni Jesus pinaagi sa pagpalambo sa inyong kaugalingon niini nga mga aspeto?

Isulat sa pisara ang mosunod nga mga ulohan diha sa pisara ug dapita ang mga estudyante sa pagkopya niini diha sa ilang mga notebook sa klase o scripture study journal: Intelektwal nga paagi, Pisikal nga paagi, Espiritwal nga paagi, ug Sosyal nga paagi. Hangyoa ang mga estudyante sa pagsulat og usa ka tumong ubos sa matag usa niini nga mga kategoriya alang sa ilang personal nga kalamboan. Awhaga ang mga estudyante sa pagbuhat niini nga mga tumong. Tapusa pinaagi sa pagpaambit sa imong pagpamatuod sa mga baruganan nga nahisgutan sa leksyon karon.

(Ang mga tubag sa eksamin mao ang mosunod: 1. Husto; 2. Sayop; 3. Husto; 4. Sayop; 5. Husto; 6. Sayop.)

Scripture Mastery Review

Ang pagbalik-balik makatabang sa mga estudyante sa paghinumdom sa nahimutangan sa mga scripture mastery passage. Gamita ang mga kard sa scripture mastery, o pahimoa ang mga estudyante sa kaugalingon nilang mga kard pinaagi sa pagsulat sa importanting mga pulong o mga kahulugan sa usa ka bahin sa blanko nga mga notecard o mga piraso nga papel ug ang mga pakisayran sa pikas nga bahin. Ipares-pares ang mga estudyante. Hangyoa sila sa pag-eksamin sa usag usa gamit ang mga kard. Dapita ang mga estudyante sa kanunay nga paggamit niini nga mga kard sa pag-eksamin sa ilang mga kaugalingon ug sa usag usa. Mahimo nimong magamit ang mga timailhan sa mga kard sa pagbuhat sa scripture chase nga kalihokan sa klase (tan-awa ang “scripture chase” sa appendix niini nga manwal).

Komentaryo ug Background nga Impormasyon

Lucas 2:7. “Iyang gianak ang iyang panganay nga usa ka lalaki”

Si Elder D. Todd Christofferson sa Korum sa Napulog Duha ka mga Apostoles mitudlo sa mosunod mahitungod sa kahimtang sa pagkatawo sa Manluluwas:

“Makatingala nga ang Anak gayud sa Dios, ang gamhanang Jehova sa kakaraanan, matawo sa kalibutan sa pinakaubos sa tanang kahimtang. Ang balay nga abutanan ubos na man gani, apan dili pa gyud kadto balay. Hinoon usa kadto ka pasungan, ug ang bata gipahigda sa mga dagami sa pasungan nga lawganan sa mga hayop. Gani, ang mas dako nga pagpakig-angay mao nga si Jesus mitugyan sa pagka-mortal, gani angay nga Siya unta matawo sa pinakanindot ug labing elegante nga mga kahimtang. Uban ni Pablo, matingala kita nga ang ‘Dios [n]agpadala sa iyang kaugalingong Anak nga diha sa dagway sa usa ka masal-anon nga unod’ [Mga Taga-Roma 8:3]—nga mahimo Siyang usa ka masuso; nga angay Siyang mahimong bata ug dayon tawo, nga nag-antus sa mga ‘tintasyon, ug sakit sa lawas, kagutom, kauhaw, ug kakapoy’ [Mosiah 3:7] ug gani sa kamatayon.

“Ngano nga Siya nga nagdumala sa taas nga kalangitan, ang Tiglalang sa yuta motugot nga matawo ‘sumala sa kahimtang sa unod’ (1 Nephi 11:18) ug magalakaw sa Iyang tumbanan (tan-awa sa 1 Nephi 17:39) sa kakabus, gipasipad-an ug gidaugdaog, ug sa katapusan gilansang sa krus?” (“Ang Pagpakig-angay sa Dios ug sa Tawo” [Debosyonal sa Pasko sa Unang Kapangulohan, Dis. 7, 2014], lds.org/broadcasts).

Lucas 2:19. “Kining tanang mga butanga gitipigan ni Maria nga namalandong niini diha sa iyang kasingkasing”

Samtang importante nga kita mopakigbahin sa atong pagpamatuod sa uban, si Presidente Boyd K. Packer sa Korum sa Napulog Duha ka mga Apostoles mitudlo nga kita kinahanglang mopakigbahin lamang sa atong sagrado nga mga kasinatian kon kita giaghat sa pagbuhat sa ingon:

“Dili maalamon ang pagpadayon og pagpanabi sa dili kasagaran nga mga espirituhanong kasinatian. Kinahanglan nga ampingan kini ug ipakigbahin lamang kon ang Espiritu mismo ang modasig kaninyo sa paggamit niini sa pagpanalangin sa uban. …

“Nakadungog ko ni Presidente Marion G. Romney kausa nga mitambag sa mga mission president ug ilang mga asawa …, ‘Akong nasayran nga kon sayon-sayunon ra nako paghisgot ang sagrado nga mga butang, human niana ang Ginoo dili na mosalig kanako.’

Kita kinahanglan, ako nagtuo, nga motipig niini nga mga butang ug mamalandong niini sa atong mga kasingkasing, sama sa gisulti ni Lucas nga maoy gibuhat ni Maria sa balaanong mga hitabo nga naglibut sa pagkatawo ni Jesus” (“The Candle of the Lord,” Ensign, Ene. 1983, 53).

Lucas 2:47. “Ang tanang nakadungog kaniya nahitingala sa iyang pagpanabut ug sa iyang mga pagpanubag”

Ang Propeta Joseph Smith mitudlo sa mosunod mahitungod sa kabatan-onan ni Jesukristo:

“Sa dihang gamay pa nga batang lalaki anaa na Kaniya ang kaalam nga gikinahanglan aron Siya makamando ug makadumala sa mga Judeo, ug makaharong sa mga pinakamaalam ug sa pinakamaayong mga doktor sa balaod ug kabalaan, ug makahimo sa ilang mga teyoriya ug mga gipangbuhat nga daw hinanggaw ra ikumparar sa kaalam nga Iyang nabatunan; apan usa pa lamang siya ka gamay nga batang lalaki, ug kulang pa sa pisikal nga kalig-on bisan sa pagpanalipod sa Iyang kaugalingon; ug mahimo siyang magkasakit, gutumon ug mamatay” (History of the Church, 6:608).