Librarya
Leksyon 7: Mateo 3

Leksyon 7

Mateo 3

Pasiuna

Si Juan Bautista nagsangyaw ug namunyag didto sa Judea. Si Jesukristo mibiyahe gikan sa Galilea ngadto sa Suba sa Jordan, diin Siya gibunyagan ni Juan. Ang Dios nga Amahan mipamatuod nga si Jesus mao ang Iyang Pinalanggang Anak.

Mga Sugyot alang sa Pagtudlo

Mateo 3:1–12

Si Juan Bautista nagsangyaw didto sa Judea

Hangyoa ang klase sa paghunahuna unsay ilang bation kon usa sa mga estudyante diha sa klase mobarug ug magsugod pagkuha og personal nga mga item nga gipanag-iya sa ubang mga estudyante. Dayon hangyoa sila sa paghunahuna nga human makuha ang kada item, ang nakasala nga estudyante nangayo og pasaylo apan nagpadayon sa pagkuha og mga item gikan sa ubang mga estudyante. Ipangutana:

  • Unsa may inyong mahunahuna kalabut sa pagpangayo og pasaylo niini nga estudyante?

  • Unsa kaha ang pagkapareho sa mga aksyon niini nga estudyante ngadto sa paghinulsol nga dili kinasingkasing?

Dapita ang mga estudyante nga samtang nagtuon sila sa Mateo 3 sa pagpangita alang sa mga kamatuoran nga makatabang nato nga makasabut kon unsay kinahanglan natong buhaton aron tinud-anay nga maghinulsol.

Dapita ang usa ka estudyante sa pagbasa og kusog sa Mateo 3:1–4. Hangyoa ang klase sa pagpangita kon unsay nahitabo nga makatabang sa mga tawo nga maandam alang sa pagpangalagad sa Manluluwas.

  • Kinsa man si Juan Bautista? (Siya mao ang anak ni Zacarias ug Elisabet, nga kaliwat ni Maria. Gihuptan niya ang mga yawe sa Aaronic Priesthood [tan-awa sa D&P 13; 84:27–28].)

  • Unsa man ang gibuhat ni Juan?

  • Unsa man ang gi-awhag ni Juan nga buhaton sa iyang mga tigpaminaw?

Ipasabut nga ang misyon ni Juan gipanagna na ni Isaias (Esaias) ug sa ubang mga propeta (tan-awa sa Isaias 40:3; Malaquias 3:1; 1 Nephi 10:7–10). Si Juan mao ang moandam sa agianan alang sa Mesiyas (Jesukristo) pinaagi sa pagpahayag og paghinulsol ug pagbunyag pinaagi sa tubig.

  • Unsa kaha sa inyong hunahuna nga ang pagpahayag og paghinulsol ug pagbunyag pinaagi sa tubig nakatabang sa pag-andam sa agianan sa Ginoo?

Dapita ang usa ka estudyante sa pagbasa og kusog sa Mateo 3:5–6. Hangyoa ang klase sa pagsunod, mangita sa unsay reaksyon sa mga tawo sa mensahe ni Juan.

  • Unsa ang reaksyon sa mga tawo sa mensahe ni Juan? (Gikumpisal nila ang ilang mga sala ug nabunyagan. Ipasabut nga ang kaandam sa usa ka tawo nga mokumpisal sa sala ngadto sa Langitnong Amahan ug, kon gikinahanglan, ngadto sa gisangunan nga mga lider sa priesthood mahinungdanon sa paghinulsol [tan-awa sa Matinud-anon sa Tinuhoan: Usa ka Pakisayran sa Ebanghelyo (2004), 131–132].)

Dapita ang usa ka estudyante sa pagbasa og kusog sa Mateo 3:7. Hangyoa ang klase sa pagsunod, mangita kon kinsa ang giistoryahan ni Juan.

  • Sumala niini nga bersikulo, kinsa man ang giistoryahan ni Juan?

Ipasabut nga ang mga Pariseo usa ka relihiyuso nga grupo sa mga Judeo kansang ngalan nagsugyot nga ibulag o ilain. Nagpasigarbo sila nga hugot nga nagsunod sa balaod ni Moises ug mituo nga ang hinimo sa mga tawo nga gipangdugang niini, nga nailhan isip balaod nga gipaagi sa ba-ba [oral law], sama ra kaimportante sa balaod ni Moises mismo (tan-awa sa Ang Giya ngadto sa mga Kasulatan, “Pariseo, mga”). Ang mga Saduceo usa ka gamay apan gamhanan nga pundok politikanhon sa mga Judeo kinsa higpit nga nagtuo sa pagsunod sa balaod ni Moises. Wala sila motuo sa doktrina sa pagkabanhaw o kinabuhing dayon (tan-awa sa Ang Giya ngadto sa mga Kasulatan, “Saducio [Saduceo], mga”).

  • Unsa man ang gitawag ni Juan sa mga Pariseo ug sa mga Saduceo?

Palestinian viper

Bitin sa Palestina

© taviphoto/Shutterstock.com

Kon mahimo, ipakita ang hulagway sa usa ka bitin sa Palestina ug ipasabut nga kini ang pinakakomon nga malala nga bitin sa Israel. Ang mga bitin aktibo sa gabii ug kasagaran mangita pinaagi sa pagtago ug dayon motukob sa biktimahon niini. Kon bation niini nga namiligro, ang mga bitin molikus sa lawas niini, mohishis, ug moataki sa mga kaaway niini.

  • Ngano sa inyong hunahuna nga si Juan mipasabut man sa mga Pariseo ug sa mga Saduceo isip mga bitin? (Mahimo nimong ipasabut nga ang mga Pariseo ug mga Saduceo nahulga ni Juan, kay nakadani siya og daghang mga tawo gikan sa dautan nilang impluwensya ug sayop nga mga pagtulun-an.)

Ipasabut nga ang Joseph Smith Translation naglangkob og dugang nga mga pulong nga gisulti ni Juan ngadto sa mga Pariseo ug sa mga Saduceo. Dapita ang mga estudyante nga moabli sa Joseph Smith Translation, Mateo 3:34–36. (Mahimo nimong ipasabut nga kining mga bersikulo usa ka hubad sa Mateo 3:8–9.) Hangyoa ang usa ka estudyante sa pagbasa og kusog niining mga bersikulo.

  • Sumala ni Juan, kon ang mga Pariseo ug mga Saduceo mosalikway sa iyang gisangyaw, kinsa man usab ang ilang gisalikway?

  • Unsaon nimo pag-summarize ang mensahe ni Juan ngadto kanila?

Isulat sa pisara ang mga pulong Pamunga kamog mga bunga nga mahiangay sa paghinulsol.

Aron matabangan ang mga estudyante nga makasabut niini nga mga pulong, ipasabut nga diha sa mga kasulatan ang mga tawo usahay ihulagway og mga kahoy nga mamunga og maayo o dili maayo nga bunga. Pagpakita o pagdrowing og usa ka piraso sa prutas ug ipasabut nga kini nagrepresentar sa atong mga tinguha ug mga lihok. Mahimo nimong ipasabut nga ang mga pulong “mahiangay” nagpasabut og “takus”

Pahinumdumi ang klase sa sitwasyon nga imong gihangyo nga ilang hunahunaon sa pagsugod sa leksyon (usa ka estudyante ang nanguha og personal nga mga butang gikan sa laing mga estudyante ug dayon nagpadayon sa pagbuhat niini, bisan human nga nangayo og pasaylo).

  • Tukma bang gipakita sa estudyante ang baruganan sa paghinulsol pinaagi sa iyang mga tinguha ug mga lihok? Nganong dili man? (Ang estudyante mipadayon sa pagkuha og mga butang gikan sa laing mga estudyante bisan human nga nangayo og pasaylo.)

  • Unsaon man nimo pag-summarize kon unsay gipasabut sa “pamunga kamog … mga bunga nga mahiangay sa paghinulsol”? (Mateo 3:8). (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga kamatuoran: Atong gipakita ang tinuod nga paghinulsol ngadto sa Ginoo samtang giusab nato ang atong mga tinguha ug mga lihok sa pagsunod sa Iyang mga pagtulun-an.)

  • Unsa nga mga tinguha ug mga lihok ang nagpakita nga tinuod kita nga naghinulsol sa atong mga sala?

Aron matabangan ang mga estudyante nga makasabut niini nga kamatuoran, ilista sa pisara ang mosunod nga mga example: manikas sa eskwelahan, manghilabot ngadto sa mga igsoon, pagkadili mabination o pagbinagis sa ubang mga estudyante, paggamit og dili maayo nga mga pulong, ug pagtan-aw og pornograpiya. Hangyoa ang mga estudyante sa pagpasabut kon sa unsang paagi nga maghunahuna ug molihok ang usa ka tawo nga naghinulsol niini nga mga sala.

Basaha og kusog ang Mateo 3:10. Dapita ang mga estudyante sa pagsunod, nga mangita sa sangputanan sa dili tinuod nga paghinulsol. Hangyoa ang mga estudyante sa pagreport kon unsay ilang nakit-an. Ipasabut nga ang “pagaputlon, ug isalibay ngadto sa kalayo” nagpasabut nga ang dili mahinulsulon nga mga indibidwal mawad-an sa impluwensya sa Espiritu sa Dios ug sa katapusan dili makadawat sa mga panalangin sa celestial nga gingharian.

Dapita ang mga estudyante sa pagpamalandong sa bisan unsang mga tinguha o mga lihok nga kinahanglan nilang usbon aron tinuod nga maghinulsol. Awhaga sila sa pagpakita og tinuod nga paghinulsol pinaagi sa pag-usab sa bisan unsang mga tinguha ug mga lihok nga wala mahisubay sa mga pagtulun-an sa Dios.

Ipabasa og hilum sa mga estudyante ang Mateo 3:11, nga mangita sa gisulti ni Juan nga buhaton sa Manluluwas.

  • Sumala sa bersikulo 11, unsa ang buhaton ni Jesus nga dili mabuhat ni Juan? (Ang ibunyag ni Jesus “mao ang Espiritu Santo ug kalayo.” Ipasabut nga si Juan nagpasabut sa pagdawat sa gasa sa Espiritu Santo, ang ikaduhang bahin sa pakigsaad ug ordinansa sa bunyag. Ang Espiritu Santo mobalaan ug mopalunsay sa atong mga kalag nga ingon og pinaagi sa kalayo [tan-awa sa 2 Nephi 31:13–14, 17].)

I-summarize ang bersikulo 12 pinaagi sa pagpasabut nga simbolikanhon kining naghulagway sa unsay mahitabo sa mga matarung nga midawat kang Jesukristo (ang trigo) ug sa mga dautan nga misalikway Kaniya (ang uhot).

Mateo 3:13–17

Si Jesukristo nabunyagan, ug ang Amahan mipasidungog Kaniya isip Iyang Hinigugmang Anak

Hangyoa ang mga estudyante nga nabunyagan na sa paghunahuna kalabut sa ilang kaugalingong bunyag. Hangyoa ang pipila kanila sa pagpakigbahin sa unsay ilang nahinumduman.

Ipasabut nga ang Mateo 3:13–17 nag-istorya sa bunyag sa Manluluwas. Dapita ang mga estudyante sa pagpangita og mga pagkasusama tali sa ilang bunyag ug sa bunyag sa Manluluwas samtang nagtuon sila niini nga mga bersikulo.

Isulat sa pisara ang mosunod nga mga pangutana:

Pinaagi ni kinsa?

Giunsa man?

Ngano man?

Ipares-pares ang mga estudyante. Papuli-puliha sa pagbasa og kusog ang matag pares gikan sa Mateo 3:13–17, nga mangita sa mga tubag niini nga mga pangutana. Human sa igong panahon, ipangutana:

  • Kinsa ang nagbunyag ni Jesus? (Isulat sa pisara ang Juan Bautista sunod sa Pinaagi ni kinsa?)

  • Ngano nga si Jesus mibiyahe man gikan sa Galilea ngadto sa Suba sa Jordan aron magpabunyag ni Juan Bautista? (Pahinumdumi ang mga estudyante nga si Juan naghupot sa mga yawe sa Aaronic Priesthood ug mao lamang ang bugtong tawo nianang higayuna nga dunay awtoridad sa pagpahigayon sa ordinansa sa bunyag. Isulat sa pisara ang Tukma nga awtoridad sunod sa Juan Bautista.)

  • Unsa nga mga pulong diha sa bersikulo 16 ang nagpakita kon giunsa pagbunyag si Jesus? (Siguroa nga ang mga estudyante nakasabut nga ang paghaw-as dayon ni Jesus “gikan sa tubig” nagpasabut nga Siya gibunyagan pinaagi sa pagpaunlod—nangahulugan nga Siya hingpit nga nahumol sa tubig. Isulat sa pisara ang Pinaagi sa pagpaunlod sunod sa Giunsa man?)

Dapita ang mga estudyante sa paghunahuna nga didto sila sa Suba sa Jordan sa dihang miabut si Jesus aron magpabunyag.

  • Nganong nagduha-duha man primero si Juan nga mobunyag sa Manluluwas? (Nasayud siya nga ang katungdanan ug awtoridad ni Jesus mas dako kay sa iyang kaugalingon.)

  • Sumala sa bersikulo 15, nganong miingon man si Jesus nga kinahanglan Siya nga magpabunyag? (“Sa pagtuman sa tibuok pagkamatarung.” Isulat sa pisara kini nga mga pulong sunod sa Ngano man?)

  • Sa inyong hunahuna unsa ang gipasabut niini nga mga pulong?

Ipasabut nga ang “pagtuman sa tibuok pagkamatarung” nagpasabut nga pagbuhat sa tanang gimando sa Langitnong Amahan kanato aron kita makapuyo pag-usab uban Kaniya. Naglakip kini sa pagdawat og mga ordinansa sa kaluwasan, nga gimando sa Dios sa tanan Niyang mga anak, lakip na ni Jesus. Pinaagi sa pagpabunyag, gipakita ni Jesus ang hingpit nga ehemplo nga angayan natong sundon, mipakita og pagkamapainubsanon, mituman sa mga sugo sa Iyang Amahan, ug midawat sa ordinansa nga gikinahanglan aron makaangkon og kinabuhing dayon (tan-awa sa 2 Nephi 31:4–11).

Hangyoa ang mga estudyante sa paggamit sa mga tubag sa tulo ka mga pangutana diha sa pisara sa pag-ila og doktrina nga atong makat-unan gikan sa Mateo 3:13–17. Ang mga estudyante mahimong mogamit og lain-laing mga pulong apan kinahanglang mahibalo sa mosunod nga doktrina: Ang bunyag pinaagi sa pagpaunlod pinaagi sa usa ka tawo nga naghupot og awtoridad mahinungdanon alang sa kaluwasan.

  • Sa unsang paagi nga ang inyong bunyag matandi sa ehemplo sa Manluluwas nga gitakda alang kanato?

Ipasabut nga ang Mateo 3:16–17 makatabang usab kanato nga makakat-on og doktrina kalabut sa Dios nga Kapangulohan. Ipabasa og usab sa hilum sa mga estudyante kini nga mga bersikulo, nga mangita kon unsay gitudlo niini mahitungod sa Amahan, sa Anak, ug sa Espiritu Santo.

  • Asa man ang matag sakop sa Dios nga Kapangulohan atol sa bunyag sa Manluluwas? (Si Jesukristo didto sa Suba sa Jordan, ang Espiritu Santo mikunsad diha Kaniya sama sa usa ka salampati, ug ang Langitnong Amahan namulong gikan sa langit. Mahimo nimong ipasabut nga ang Espiritu Santo sa tinuod lang wala mahimong usa ka salampati. Hinoon, ang salampati usa ka timailhan o simbolo nga ang Espiritu Santo mikunsad ngadto kang Jesus.)

  • Unsa nga doktrina ang gitudlo niini nga mga bersikulo kanato mahitungod sa Dios nga Kapangulohan? (Ang mga estudyante mahimong mogamit og lain-laing mga pulong apan kinahanglang mahibalo sa mosunod nga doktrina: Ang Amahan, ang Anak, ug ang Espiritu Santo tulo ka managlahi ug bulag nga mga binuhat.)

Ipasabut nga daghang mga tawo walay husto o kompleto nga kahibalo bahin sa Dios nga Kapangulohan. Kon mas makasabut kita sa tinuod nga kinaiyahan sa Dios nga Kapangulohan, mas dako nga gugma ang atong mabati alang Kanila ug mas maandam kita sa pagtudlo ug sa pagpamatuod bahin Kanila ngadto sa uban.

Aron matabangan ang mga estudyante nga makaangkon og mas maayo nga panabut bahin sa matag usa ka sakop sa Dios nga Kapangulohan, grupoha sila og tagtulo ug hangyoa sila sa pagtan-aw sa “Dios” diha sa Ang Giya ngadto sa mga Kasulatan. Alang sa matag grupo, i-assign ang matag usa sa tulo ka mga estudyante og usa ka sakop sa Dios nga Kapangulohan. Dapita ang mga estudyante sa pagbasa sa nakasulat, nga mangita sa impormasyon kalabut sa sakop nga gi-assign ngadto kanila. Human sa igong panahon, hangyoa ang mga estudyante sa pagtudlo sa unsay ilang nakat-unan ngadto sa ilang grupo ug sa pagpasabut kon ngano nga kadtong mga kamatuoran importante nga atong mahibaloan.

Sa pagtapos sa leksyon, hunahunaa ang pagdapit sa mga estudyante sa pagpakigbahin sa klase sa ilang mga pagpamatuod bahin sa Amahan, sa Anak, ug sa Espiritu Santo.

Komentaryo ug Background nga Impormasyon

Mateo 3:11. “Ang iyang igabunyag kaninyo mao ang Espiritu Santo, ug kalayo”

Si Elder David A. Bednar sa Korum sa Napulog Duha ka mga Apostoles mihisgot kon unsay buot ipasabut sa mabunyagan sa kalayo:

“Kita gimandoan ug gitudloan nga magpakabuhi nga ang atong nalaglag nga kinaiya mausab pinaagi sa balaanong gahum sa Espiritu Santo. Si Presidente Marion G. Romney nagtudlo nga ang bunyag sa kalayo pinaagi sa Espiritu Santo ‘nag-usab [kanato] gikan sa pagkatawhanon ngadto sa pagkaespirituhanon. Kini naglimpyo, nag-ayo, ug nagputli sa kalag. … Ang hugot nga pagtuo kang Ginoong Jesukristo, paghinulsol, ug bunyag sa tubig mga pasiuna ug gikinahanglan ngadto niini, apan [kini nga pagbunyag sa kalayo] ang katumanan. Ang pagdawat [sa pagbunyag sa kalayo] mao ang paghugas sa saput sa tawo pinaagi sa pag-ula sa dugo ni Jesukristo’ (Learning for the Eternities, comp. George J. Romney [1977], 133; tan-awa usab sa 3 Nephi 27:19–20).

“Busa, kita natawo pag-usab ug maningkamot nga kanunay makabaton sa Iyang Espiritu nga mag-uban kanato, ang Espiritu Santo maglimpyo ug maglunsay sa atong mga kalag sama sa kalayo (tan-awa sa 2 Nephi 31:13–14, 17). Sa katapusan, kita mobarug nga walay lama sa atubangan sa Dios” (“Limpyo nga mga Kamot ug Putli nga Kasingkasing,” Ensign o Liahona, Nob. 2007, 81).

Mateo 3:12. “Ang Iyang paliran anaa sa Iyang kamot”

“Ang ‘paliran’ nga gipasabut diha sa Mateo 3:12 usa ka taphanan nga gigamit sa pagtapha sa trigo. Molain kini sa trigo gikan sa uhot. Ang mga lugas sa trigo mahulog sa yuta samtang ang hangin motayhup sa mas gaan nga uhot. Ang trigo pundukon dayon ngadto sa usa ka pundukanan, o balay-tipiganan, ug ang uhot sunugon sa kalayo. Si Juan Bautista nagtudlo nga ang Manluluwas, nga moabut sunod kaniya, molain sa mga tumutuo gikan sa mga dili tumutuo sa samang paagi sa paglain sa trigo gikan sa uhot (New Testament Student Manual [manwal sa Church Educational System, 2014], 17).

Mateo 3:16. Ang timailhan sa salampati

Si Propeta Joseph Smith mipasabut nga ang Espiritu Santo wala mopakita isip usa ka salampati human sa bunyag ni Jesukristo. Hinoon, ang mikunsad nga salampati nagpakita nga ang Espiritu Santo anaa nianang higayuna. Si Joseph Smith nagtudlo:

“Ang timailhan sa salampati gipasiugdahan sa wala pa malalang ang kalibutan, usa ka saksi sa Espiritu Santo, ug ang yawa dili moabut pinaagi sa timailhan sa salampati. Ang Espiritu Santo usa ka personahe, ug anaa sa porma sa usa ka personahe. Dili kini limitado sa porma sa salampati, pero sa timailhan sa salampati. Ang Espiritu Santo dili mausab ngadto sa usa ka salampati; pero ang timailhan sa usa ka salampati gihatag ngadto ni Juan aron sa pagmatuod sa kamaturoan sa gibuhat, ingon nga ang salampati usa ka timailhan o timaan sa kamatuoran ug pagkainosente” (Mga Pagtulun-an sa mga Presidente sa Simbahan: Joseph Smith [2007], 95–96).

Mateo 3:13–17. Ang Amahan, ang Anak, ug ang Espiritu Santo tulo ka managlahi ug bulag nga mga binuhat

Si Elder Jeffrey R. Holland sa Korum sa Napulog Duha ka mga Apostoles mipasabut kon sa unsang paagi nga ang mga sakop sa Dios nga Kapangulohan usa ra apan bulag usab nga mga binuhat:

“Kita nagtuo nga kining tulo ka balaanong mga tawo nga naglangkob sa usa ka Dios nga Kapangulohan nagkahiusa sa katuyoan, sa pamaagi, sa pagpamatuod, sa misyon. … Sa akong hunahuna tukma kini sa pag-ingon nga kita nagtuo nga Sila usa sa mahinungdanon ug mahangturong kinaiya nga mahunahuna gawas nga kita wala magtuo Kanila nga tulo ka mga tawo nga giusa ra diha sa usa ka lawas, usa ka Trinitarian nga ideya nga dili gayud pinasikad diha sa mga kasulatan tungod kay dili kini tinuod” (“Sa Bugtong Tinuod nga Dios ug kang Jesukristo Nga Iyang Pinadala,” Ensign o Liahona, Nob. 2007, 40).

Si Elder Holland mipasabut og dugang nga usa sa mga rason sa kalibug kalabut sa kinaiyahan sa Dios nga Kapangulohan mao nga atol sa Grabeng Apostasiya, ang “mga tawo sa simbahan, mga pilosoper, ug prominenteng mga opisyales sa simbahan” nagdebate sa kinaiyahan sa Dios nga Kapangulohan ug sa katapusan nakahukom nga ang Dios dili mahibaloan ug dili masabtan (tan-awa sa “Sa Bugtong Tinuod nga Dios ug kang Jesukristo Nga Iyang Pinadala,” 40–41).