Pag-aaral ng Doktrina
Paghihirap
Buod
Bilang bahagi ng plano ng pagtubos ng Ama sa Langit, nakakaranas ng paghihirap ang lahat ng tao sa panahon ng kanilang buhay dito sa mundo. Ang mga pagsubok, kabiguan, kalungkutan, sakit, at pighati ay mahirap na bahagi ng buhay, ngunit sa tulong ng Panginoon maaaring humantong ang mga ito sa espirituwal na pag-unlad, kadalisayan, at pagsulong.
Ang tagumpay at kaligayahan ng bawat tao, ngayon at sa kawalang-hanggan, ay nakabatay nang lubos sa paraan kung paano niya hinaharap ang mga problema o paghihirap sa buhay.
Iba’t iba ang pinagmumulan ng paghihirap. Ang mga pagsubok ay maaaring dumating dahil sa kapalaluan at pagsuway mismo ng isang tao. Maiiwasan ang mga pagsubok na ito sa pamamagitan ng matwid na pamumuhay. Ang iba pang mga pagsubok ay likas lamang na bahagi ng buhay at maaaring dumating paminsan-minsan kahit matwid na namumuhay ang mga tao. Halimbawa, maaaring makaranas ng mga pagsubok ang mga tao sa oras ng pagkakasakit o kawalang-katiyakan o pagkamatay ng isang mahal sa buhay. Maaaring dumating kung minsan ang paghihirap dahil sa mga maling pasiya at masasakit na salita at ginawa ng ibang tao. Maaari ding dumating ang mga paghihirap sa pamamagitan ng mapagmahal na Ama sa Langit bilang isang karanasan na nagtuturo at kapupulutan ng aral sa buhay.
Kapag nakakaranas ng paghihirap ang ilang tao, nagrereklamo sila at nagagalit. Ganito ang itinatanong nila, “Bakit kailangang mangyari ito sa akin? Bakit kailangang danasin ko ito ngayon? Ano ang nagawa ko para mangyari ito sa akin?” At malaki ang epekto ng mga tanong na ito sa kanilang isipan. Ang gayong mga tanong ay maaaring humadlang sa pagkakaroon nila ng tamang pananaw, umubos ng kanilang lakas sa paghahanap ng mga kasagutan sa mga tanong na iyon, at hindi matanggap ang mga karanasan na nais ng Panginoon na matanggap nila. Sa halip na tumugon sa ganitong paraan, dapat isaisip ng mga tao ang mga tanong na tulad ng, “Ano ang dapat kong gawin? Ano ang matututuhan ko mula sa karanasang ito? Ano ang dapat kong baguhin? Sino ang dapat kong tulungan? Paano ko maaalala ang maraming pagpapala sa akin sa oras ng pagsubok?”
Ang iba’t ibang uri ng paghihirap ay nangangailangan ng magkakaibang tugon. Halimbawa, maaaring ang kinakailangan lang gawin ng mga taong dinapuan ng sakit ay maging mapagtiis at tapat. Ang mga tao naman na nasaktan dahil sa mga sinabi o ginawa ng iba ay dapat gawin ang lahat para mapatawad ang mga taong nakasakit sa kanila. Dapat humingi agad ng tulong ang mga biktima ng pang-aabuso. Kung ang nararanasang paghihirap ng isang tao ay sanhi ng kanyang pagsuway, dapat niyang ituwid ang kanyang pag-uugali at mapagpakumbabang humingi ng tawad.
Bagama’t magkakaiba ang ilan sa mga paraan ng pagharap sa paghihirap o pagsubok, isang bagay ang palagi nating dapat gawin—magtiwala sa Ama sa Langit at kay Jesucristo. Itinuro ng propetang si Alma, “Sino man ang magbibigay ng kanyang tiwala sa Diyos ay tutulungan sa kanilang mga pagsubok, at kanilang mga suliranin, at kanilang mga paghihirap, at dadakilain sa huling araw” (Alma 36:3).
AnItala ang Iyong mga Impresyon
Mga Kaugnay na Paksa
Mga Banal na Kasulatan
Mga Reperensya sa Banal na Kasulatan
Resources sa Pag-aaral ng mga Banal na Kasulatan
Mga Mensahe mula sa mga Lider ng Simbahan
Mga Karagdagang Mensahe
Mga Video
Mga Video ng Tabernacle Choir
“Master, the Tempest Is Raging [Guro, Bagyo’y Nagngangalit]”
Resources sa Pag-aaral
Mga Magasin ng Simbahan
“Lakas na Magpatuloy,” Liahona, Oktubre 2016