Leksyon 90

Mga Buhat 12

Pasiuna

Gipatay ni Herodes ang Apostol Santiago ug unya gi-aresto ug gibilanggo si Pedro. Nianang gabii sa wala pa patya si Pedro, usa ka anghel mitabang kaniya sa pag-eskapo gikan sa bilanggoan. Gidagmalan si Herodes sa usa ka anghel gikan sa Dios, ug ang ebanghelyo mipadayon sa pag-uswag.

Mga Sugyot alang sa Pagtudlo

Mga Buhat 12:1–17

Gipatay ni Herodes si Santiago ug gi-aresto si Pedro, kinsa milagrosong naka-eskapo gikan sa bilanggoan

Pagpakita og kompas o pagdrow og usa diha sa pisara. Dapita ang usa ka estudyante sa pagpasabut kon unsaon sa kompas paglihok ug alang sa unsa ang gamit niini.

• Tungod kay ang kompas kanunay nga nagtudlo sa amihan, sa unsa nga paagi nga ang paggamit og kompas makatabang kanato sa paghimo og hustong mga desisyon mahitungod kon asa kita kinahanglan nga moadto?

Pagdrow og X diha sa pisara sa usa ka dapit duol sa kompas (apan dili duol sa amihan nga punting sa kompas), ug pangutan-a ang klase sa paghanduraw nga ang X nagrepresentar og gigunitang magnet.

• Sa unsa nga paagi kini nga magnet nag-impluwensya sa lihok sa dagum sa kompas? (Ang dagum motudlo ngadto sa duol nga magnet tungod kay kini nagbabag sa magnetic nga amihan.)

• Sa unsang paagi kini nga magnet nakaapekto sa inyong abilidad sa paghimo og hustong pagpili mahitungod sa unsang direksyon ikaw kinahanglan nga moadto?

Awhaga ang mga estudyante sa pagtan-aw samtang sila nagtuon sa Mga Buhat 12 alang sa usa ka impluwensya nga makababag sa atong abilidad sa paghimo og husto nga mga desisyon.

Aron sa pagtabang sa mga estudyante sa kinatibuk-ang kahulugan sa Mga Buhat 12, ipasabut nga sukad sa pagkamartir ni Esteban, ang mga Kristyanos diha libut sa Jerusalem nakasinati og nagkagrabe nga pagpanggukod.

Dapita ang usa ka estudyante sa pagbasa og kusog sa Mga Buhat 12:1–4. Hangyoa ang klase sa pagsunod, mangita kon sa unsang paagi si Hari Herodes Agripa I mitabang ngadto niini nga pagpanggukod. (Ipasabut nga ang quaternion katumbas sa upat ka mga sundalo).

• Kinsa ang napatay ni Herodes sa espada?

• Sumala sa bersikulo 3, kinsa ang nahimuot sa kamatayon ni Santiago?

Ipasabut nga ang mga pulong “mga Judeo” sa bersikulo 3 nagpasabut ngadto sa may impluwensya nga mga lider nga Judeo sa Jerusalem kinsa miawhag sa pagpanggukod sa Simbahan ni Jesukristo. Si Herodes naningkamut sa pagpahimuot niining mga lider nga Judeo (tan-awa sa Bible Dictionary sa LDS English version sa Biblia, “Herod”). Duol sa X diha sa pisara isulat ang mosunod nga wala mahuman nga pamahayag: Kon kita maningkamut sa pagpahimuot sa uban kay sa Dios, niana …

• Unsa ang gibuhat ni Herodes human makita nga ang pagbuno ni Santiago nakapahimuot sa mga lider nga Judeo? (Giplano niya nga ipapatay si Pedro diha atubangan sa publiko.)

Itudlo ngadto sa litrato sa kompas diha sa pisara, ug pangutana:

• Sa unsa nga paagi nga ang tinguha ni Herodes sa pagpahimuot sa uban kay sa Dios naka-apektar sa direksyon sa kinabuhi ni Herodes?

• Base sa unsay atong nakat-unan gikan sa ehemplo ni Herodes, unsaon nimo pagkompleto ang pamahayag diha sa pisara? (Human sa tubag sa mga estudyante, kompletoha ang pamahayag diha sa pisara aron kini mohatag sa mosunod nga kamatuoran: Kon kita maningkamot sa pagpahimuot sa uban kay sa Dios, niana kita maggiyahan ngadto sa laing sala.)

• Unsa ang pipila ka mga ehemplo nga nagpakita kon sa unsa nga paagi ang pagpaninguha sa pagpahimuot sa uban kay sa Dios makagiya sa usa ka tawo sa pagpakasala?

Dapita ang mga estudyante sa pagpamalandong og mga paagi nga tingali sila nagtugot sa ilang tinguha sa pagpahimuot sa uban sa pagdala kanila palayo gikan sa ilang Amahan sa Langit.

Ipasabut nga ang mga estudyante pagadapiton sa pagdula sa mga panghitabo diha sa Mga Buhat 12:5–17. Dapita ang pipila ka mga estudyante sa pagdula sa mga papel ni Pedro, duha ka mga gwardya, sa anghel, ni Rode, ug sa usa o duha ka mga disipulo nga diha sa panimalay ni Maria, ang inahan ni Marcos. Ikaw o laing estudyante mahimo nga maoy tigsaysay.

Gamita ang lain-laing mga pamaagi sa pagtudlo

Daghang epektibo nga mga magtutudlo ang naglain-lain sa ilang mga paagi sa pagtudlo sa panahon sa leksyon ug kada adlaw. Andam sa pag-eksperimento og mga metodo o mga pamaagi. Usab, pag-andam sa pag-usab og mga pamaagi sa panahon sa leksyon kon ang mga estudyante nawad-an og interes o kon unsay ilang gibuhat ingon og wala makatabang kanila sa pagtuman sa gitinguha nga mga resulta.

• Hangyoa ang tigsaysay sa pagbasa og kusog sa Mga Buhat 12:5–6, ug dapita ang mga estudyante kansang mga papel gihisgutan sa pagdula kon unsay gibasa. Aron matabangan ang mga estudyante sa pagsabut kon unsay sulod, hunong og kadiyot human ang matag grupo sa mga bersikulo nabasa ug nadula, ug dayon ipangutana ang kauban nga mga pangutana.

• Unsay gibuhat sa mga miyembro sa Simbahan niining panahona?

Hangyoa ang tigsaysay sa pagbasa og kusog sa Mga Buhat 12:7–10 samtang ang gitudlo nga mga estudyante modula kon unsay gibasa.

• Unsa nga mga pagpugong o mga babag nga nalusutan ni Pedro sa panahon sa iyang pag-eskapo?

Hangyoa ang tigsaysay sa pagbasa og kusog sa Mga Buhat 12:11–15 samtang ang gitudlo nga mga estudyante modula kon unsay gibasa.

• Kanus-a nakaamgo si Pedro kon unsay nahitabo?

• Unsa ang nahitabo sa dihang mituktok si Pedro sa ganghaan sa balay ni Maria?

Hangyoa ang tigsaysay sa pagbasa og kusog, sa Mga Buhat 12:16–17, ug dapita ang gitudlo nga mga estudyante sa pagdula kon unsay gibasa. Human kini nga mga bersikulo nabasa ug nadula, dapita ang mga estudyante sa paglingkod.

• Sumala sa bersikulo 17, ngadto kang kinsa si Pedro mihatag og dungog sa iyang pag-eskapo gikan sa bilanggoan? (Itudlo nga ang Santiago nga gipasabut diha sa bersikulo 17 usa sa mga igsoon ni Jesus [tan-awa sa Mateo 13:55].)

Dapita ang mga estudyante sa pagribyu sa Mga Buhat 12:5 ug pangitaa kon sa unsa nga paagi kini nga bersikulo may kalabutan ngadto sa unsay nahitabo ni Pedro.

• Unsa sa imong hunahuna ang mga pulong “gihimo ang mainit nga pag-ampo” (bersikulo 5) nagsugyot mahitungod sa sinseridad ug pagkamatinguhaon sa mga pag-ampo sa mga miyembro sa Simbahan?

• Unsa nga baruganan ang atong makat-unan gikan niini nga istorya mahitungod sa mahimong epekto sa atong mga pag-ampo diha sa atong mga kaugalingon ug sa uban? (Ang mga estudyante kinahanglan nga makaila og baruganan nga susama sa mosunod: Ang atong sinsero ug matinguhaong mga pag-ampo nagdapit sa mga milagro ug mga panalangin sa Dios nganhi sa atong mga kinabuhi ug sa mga kinabuhi sa uban. Isulat kini nga baruganan diha sa pisara.)

• Unsay gipasabut nga mag-ampo sa sinsero ug matinguhaon nga paagi?

Ipasabut nga kini nga baruganan wala magpasabut nga kon ang atong mga pag-ampo sinsero ug matinguhaon, kita dayon makadawat sa unsay atong giampo. Uban nga makatabang nga mga hinungdan sa pagdawat sa mga milagro ug mga panalangin sa Dios naglakip sa kabubut-on sa Dios ug panimpo ingon man sa indibidwal nga kabubut-on.

Dapita ang usa ka estudyante sa pagbasa og kusog sa mosunod nga pamahayag. Hangyoa ang mga estudyante sa pagpaminaw kon sa unsa nga paagi ang atong sinsero ug matinguhaon nga mga pag-ampo nag-apekto sa kabubut-on sa Dios.

“Ang pag-ampo mao ang lihok pinaagi diin ang kabubut-on sa Amahan ug ang kabubut-on sa anak gidala ngadto sa pagsinabtanay sa usag usa. Ang tumong sa pag-ampo dili ang pag-usab sa kabubut-on sa Dios, apan ang pagsiguro sa atong mga kaugalingon ug sa uban sa mga panalangin nga ang Dios andam nang mohatag, apan gihimong kondisyonal sa atong pagpangayo niini. Ang mga panalangin nagkinahanglan og pipila ka buhat o paningkamot sa atong bahin sa dili pa kita makabaton niini. Ang pag-ampo usa ka matang sa buhat ug gitudlo nga paagi sa pagbaton sa labing taas sa tanang mga panalangin” (Ang Giya ngadto sa mga Kasulatan, “Pag-ampo”).

• Sumala niini nga pamahayag, unsa ang importanting katuyoan sa pag-ampo?

• Nganong importanting hinumduman nga ang katuyoan sa pag-ampo dili ang pag-usab sa kabubut-on sa Dios?

Dapita ang mga estudyante sa pagtubag sa mosunod nga pangutana diha sa ilang mga notebook sa klase o sa mga scripture study journal.

• Kanus-a ang pag-ampo midapit og mga milagro ug mga panalangin sa Dios diha sa imong kinabuhi o ngadto sa mga kinabuhi sa uban nga imong giampo?

Human sa igong panahon, ikonsiderar ang pagdapit og pipila ka mga estudyante sa pagpakigbahin sa unsay ilang gisulat. Human sa ilang mga komentaryo, dapita ang mga estudyante sa pagkonsiderar unsaon nila paghimo sa pag-ampo sa mas sinsero ug matinguhaon nga paagi aron sa pagdapit sa mga panalangin ug mga milagro nga ang Dios andam sa paghatag diha kanila ug niadtong ilang giampo.

Mga Buhat 12:18–25

Gikastigo si Herodes sa Dios, ug ang ebanghelyo nagpadayon sa pag-uswag

I-summarize ang Mga Buhat 12:18–22 pinaagi sa pagpasabut nga sa sunod adlaw, nahibaloan ni Herodes ang pag-eskapo ni Pedro ug gisilutan og kamatayon ang mga gwardya nga iyang gihunahuna maoy responsable sa pagtugot ni Pedro nga makaeskapo. Sa wala madugay, midiskurso si Herodes ngadto sa katawhan, kinsa midayeg kaniya tungod sa iyang diskurso.

Dapita ang usa ka estudyante sa pagbasa og kusog sa Mga Buhat 12:23–24. Hangyoa ang klase sa pagsunod, mangita kon unsay nahitabo ni Herodes.

• Unsay nahitabo ni Herodes? Ngano?

• Unsa ang nahitabo sa misyonaryong buhat sa Simbahan bisan pa sa pagpanggukod nga giatubang sa mga miyembro sa Simbahan?

Taposa pinaagi sa pagdapit sa mga studyante sa pagribyu sa mga kamatuoran nga ilang nakat-unan ug pamalandonga unsaon nila sa paggamit kadtong mga kamatuoran diha sa ilang mga kinabuhi.

Komentaryo ug Background nga Impormasyon

Mga Buhat 12:1–17. Giuna ni Pedro ug Santiago ang Dios

Ang Mga Buhat 12 nagpakita nga si Pedro ug Santiago giuna ang Dios diha sa ilang mga kinabuhi, sa walay pagsapayan sa silot nga tingali ilang madawat. Nganong importante ang paghigugma sa Dios ug pagbutang Kaniya og una sa atong mga kinabuhi? Si Elder Lynn G. Robbins sa Kapangulohan sa Seventy misaysay sa mosunod nga kasinatian nga mitabang kaniya sa pagsabut sa importansya sa unsay direksyon nga atong giatubang sa atong mga kinabuhi:

“‘Hain ka nag-atubang?’ Si Presidente Boyd K. Packer misorpresa kanako niining makalibug nga pangutana samtang nagkuyog kami sa pagbiyahe sa akong unang buluhaton isip bag-ong Seventy. Walay pagpasabut sa kinatibuk-ang kahulugan sa pangutana nga ibutang diha sa kinatibuk-ang kahulugan, naglibog ako. ‘Ang usa ka Seventy,’ siya mipadayon, ‘wala magrepresentar sa katawhan ngadto sa propeta apan ang propeta ngadto sa katawhan. Ayaw gayud kalimot hain ka nag-atubang!” Usa kadto ka gamhanang leksyon.

“Ang sa pagpahimuot sa uban og una kay sa pagpahimuot sa Dios nagbali sa una ug ikaduhang dako nga mga sugo (tan-awa sa Mateo 22:37–39). Kini nakapalimot nato kon asa kita nag-atubang. Ug gani, kitang tanan nakabuhat niana nga sayop tungod sa kahadlok sa tawo. Sa Isaias ang Ginoo nagpasidaan kanato, ‘Ayaw ninyo kahadloki ang pagtamay sa mga tawo’ (Isaias 51:7; tan-awa usab sa 2 Nephi 8:7). Sa damgo ni Lehi, kini nga kahadlok nasugdan sa tulisok sa pagbugal-bugal gikan sa dako ug lapad nga gambalay, nakapahimo sa daghan nga makalimot hain sila mag-atubang ug mibiya sa kahoy nga ‘naulaw’ (tan-awa sa 1 Nephi 8:25–28)” (“Hain Ka Nag-atubang?” Ensign o Liahona, Nob. 2014, 9).

Mga Buhat 12:5. “Gihimo ang mainit nga pag-ampo ngadto sa Dios”

Gipahayag ni Presidente Thomas S. Monson ang iyang pasalamat alang niadtong kinsa nag-ampo alang kaniya ug sa mga lider sa Simbahan:

“Akong ipahayag ang akong pasalamat sa inyong kamabination ngari kanako bisan asa ko moadto. Salamat sa inyong pag-ampo alang kanako. Gibati ko kini nga pag-ampo ug mapasalamaton kaayo niini” (“Samtang Kita Nagkatigum Pag-usab,”Ensign o Liahona, Mayo 2012, 5).

“Mahal ko kamo, ako nag-ampo alang kaninyo. Mohangyo ko kaninyo sa makausa pa nga ako ug ang tanang mga General Authority inyong hinumduman sa inyong mga pag-ampo. Kami inyong kauban sa pag-uswag niining kahibulongan nga buhat. Akong ipamatuod kaninyo nga kitang tanan apil niini ug ang tanang lalaki, babaye, ug bata adunay bahin nga pagabuhaton. Hinaut nga ang Dios mohatag kanato og kalig-on ug abilidad ug determinasyon sa mas maayo nga pagbuhat sa atong bahin” (“Hangtud sa Sunod Natong Panagkita,” Ensign o Liahona, Nob. 2011, 109).

Mihatag si Presidente Harold B. Lee sa mosunod nga panglantaw kalabut sa paghalad og gamhanang pag-ampo:

“Kinahanglan nga tinguhaon nimo kini uban sa tibuok nimong kalag! Kinahanglan nga aduna kay tibuok kusog diin ikaw makahimo ug usa ka tinguha nga kini mao ang labing gimahal nga butang sa tibuok kalibutan nga imong gitinguha!” (Teachings of Harold B. Lee, ed. Clyde J. Williams [1996], 125).

Mga Buhat 12:21–23. Ang kamatayon ni Herodes Agripa I

Si Herodes Agripa I mao ang pag-umangkon ni Herodes Antipus, kinsa mipatay ni Juan Bautista, ug usab “ang apo nga lalaki ni Gamhanang Herodes. Sa kinatibuk-an bantugan siya sa mga Pariseo tungod kay siya nagmatngon sa pagsunod sa mga kostumbre sa Judeo. Kini mahimong mao ang rason—nga mabantugan taliwala sa mga Judeo—nga siya misugo sa pagpatay ni Santiago (tan-awa sa Mga Buhat 12:1–2). Namatay si Agripa sa edad nga 54, sa A.D. 44, sa samang tuig nga si Santiago gimartir. Nakita ni Lucas ang kalit nga kamatayon ni Agripa isip balaan nga gaba, gipahamtang pinaagi sa anghel sa Ginoo” (New Testament Student Manual [manwal sa Church Educational System, 2014], 302; tan-awa usab sa Ang Giya Ngadto Ngadto Sa Mga Kasulatan, “Herodes”).