Isrel

Lod i givim nem ia, Isrel, long Jekob, boe blong Aesak mo apu blong Ebraham long OlTesteman (Jen 32:28; 35:10). Nem ia, Isrel i save tokbaot Jekob nomo, ol pikinini we oli kamaot long laen blong hem, o long kingdom we ol pikinini ia oli bin gat long taem blong OlTesteman (2 Saml 1:24; 23:3). Afta we Moses i bin lidim ol pikinini blong Isrel aot long fasin blong stap slef long Ijip (Eks 3–14), ol jaj oli bin lidim olgeta blong ova tri handred yia. Stat wetem King Sol, ol king oli bin rul ova long Isrel we i bin wan kasem ded blong Solomon, taem ol tenfala traeb oli go agensem Jeroboam blong mekem se i gat wan narafala nesen. Afta we kingdom blong Isrel i seraot, ol traeb long Not, we i bigfala pat, oli holemtaet nem ia, Isrel, be kingdom long Saot, oli singaotem Juda. Graon blong Kenan, oli singaotem tu Isrel tedei. Long wan nara wei, Isrel i minim wan we i biliv tru long Kraes (Rom 10:1; 11:7; Gal 6:16; Efes 2:12).

Olgeta twelef traeb blong Isrel

Apuboe blong Jekob, we nem blong hem i jenis i go long Isrel, i bin gat twelef boe. Ol pikinini we oli kamaot long laen blong olgeta, oli save olgeta olsem olgeta twelef traeb blong Isrel, o ol pikinini blong Isrel. Ol twelef traeb ia, i gat: Ruben, Simeon, Livae, Juda, Isakara, mo Sebulun (ol boe blong Jekob wetem Lea); Dan mo Naftali (ol boe blong Jekob wetem Bila); Gad mo Asere (ol boe blong Jekob wetem Silfa); Josef mo Benjamin (ol boe blong Jekob wetem Rejel) (Jen 29:32–30:24; 35:16–18).

Jekob i givim wan blesing long wanwan lida blong traeb bifo hem i ded (Jen 49:1–28). Blong gat moa infomesen, long luk nem blong wanwan boe blong Jekob.

Ruben, i fasbon boe blong fas waef blong Jekob, Lea; hem i lusum blesing blong hem olsem fasbon, mo i lusum dabol pat blong wanem hem i gat raet long hem from rabis tingting mo fasin blong hem (Jen 49:3–4). Raet blong fasbon i bin go long Josef, we i fasbon boe blong seken waef blong Jekob, Rejel (1 Kron 5:1–2). Livae, we Lod i bin jusum traeb blong hem blong stap olsem ol givhan prishud blong hem, i no bin kasem wan raet from spesel koling ia blong olgeta blong go givhan long medel blong ol traeb. Hemia i mekem se dabol pat blong Josef, oli serem long ol boe blong Josef, Efrem mo Manase (1 Kron 5:1; Jerem 31:9), we oli bin kaontem tufala olsem ol seperet traeb blong Isrel (JST, Jen 48:5–6 [Apendiks]).

Ol memba blong traeb blong Juda oli sapos blong kam ol man blong rul kasem taem we Mesaea bae i kam (Jen 49:10; JST, Jen 50:24 [Apendiks]). Long las dei, traeb blong Efrem bae i gat spesel janis ia blong tekem mesej blong Restoresen blong gospel i go long wol mo mekem Isrel i kam tugeta bakegen (Dut 33:13–17). Taem bae i kam we, tru long gospel blong Jisas Kraes, Efrem bae i gat lidasip wok ia blong mekem evri traeb blong Isrel oli kam wan bakegen (Aes 11:12–13; D&K 133:26–34).

Taem Isrel i Seraot

Lod i bin seraotem mo i givim hadtaem long olgeta twelef traeb blong Isrel from fasin blong olgeta we i no stret mo i no gud, mo oli stap agens. Be Lod i yusum tu, wei ia blong seraotem ol pipol blong Hem we Hem i bin jusum long medel blong ol nesen blong wol blong blesem olgeta nesen ia.

Kam Tugeta blong Isrel

Haos blong Isrel bae i kambak tugeta long ol las dei bifo we Kraes i kam (TbB 1:10). Lod i mekem ol pipol blong Hem, Isrel, i kambak tugeta taem oli akseptem Hem mo oli obei long ol komanmen blong Hem.

Afta we Isrel i seraot olbaot, bae oli kambak tugeta wanples, 1 Nif 15:12–17.
Lod bae i pulum tugeta evri pipol blong haos blong Isrel, 1 Nif 19:16 (3 Nif 16:5).
Bae oli karemaot olgeta aot long tudak mo bae oli save se Lod i Sevya blong olgeta, 1 Nif 22:12.
God i karem ol pikinini blong hem oli kam tugeta wanples mo i kaontem olgeta, 1 Nif 22:25.
Ol kantri blong Ol Jentael bae i karem Isrel i go long evri graon blong olgeta we i kam long ol papa blong olgeta, 2 Nif 10:8 (3 Nif 16:4).
Pipol blong mi mo toktok blong mi bae oli kam wan tugeta long wanples, 2 Nif 29:13–14.

God i singaotem ol elda blong oli karem i kam wanples olgeta we God i bin jusum, D&K 29:7 (D&K 39:11).
Mi karem i kam wanples olgeta we mi jusum, D&K 33:6.
Yufala i kam tugeta wanples blong mi save givim loa blong mi long yufala mo blong yufala i save kasem paoa we i kam long heven, D&K 38:31–33.
Bambae mi karembak ol pipol blong mi, we oli blong haos blong Isrel, D&K 39:11.
Olgeta sent bae oli kamkamaot, D&K 45:46.
Moses i bin givim long mitufala ol ki blong wok blong karem Isrel i kam wanples, D&K 110:11.

Ol tenfala traeb blong Isrel we oli lus

Ol tenfala traeb blong Isrel, oli stap long Not pat blong kingdom blong Isrel, mo oli tekem olgeta oli go prisena long Asiria long 721 B.K.B. Long tetaem ia, oli bin go long ol kantri long Not blong ol narafala oli nomo save se wanem i hapen long olgeta. Long ol las dei, bambae oli kambak.