Ho valin’ny fanontanian’ireo loholona momba ny fomba tokony hatao hananganana ny tanànan’i Ziona dia nanome ny fanambarana voarakitra ao amin’ny Fotopampianarana sy Fanekempihavanana 58 ny Tompo tamin’ny 1 Aogositra 1831. Ny andininy 34–65 dia ahitana ny torolalana momba ny fiainana ny lalàn’ny fanokanana ho an’ireo izay nifindra monina tany Ziona. Ao amin’ireo andinin-tsoratra masina ireo ny Tompo dia nampianatra ihany koa ny fitsipiky ny fibebahana sy nandidy ny loholona hitory ny filazantsara ary nanoro hevitra azy ireo mikasika ny fomba fananganana an’i Ziona.
Sosokevitra enti-mampianatra
Tamin’ny lesona teo aloha dia nasaina hampiasa ny ny fahafahany misafidy ny mpianatra mba hanao zavatra tsara talohan’ny fianarana androany. Mandraisa andraikitra hijerena raha nanaiky ilay fanasana ny mpianatra amin’ny alalan’ny fangatahana ny mpianatra hizara ny zavatra niainany tamin’ny fisafidianana ny “hazoto hirotsaka” (F&F 58:27) amin’ny fanaovana zavatra tsara.
Angataho ny mpianatra vitsivitsy mba hamaly io fanontaniana io. Avy eo dia soraty eny amin’ny solaitrabe ireto fanontaniana manaraka ireto: Ahoana no ahafahako mahafantatra raha tena nibebaka marina aho? Ahoana no ahafahako mahafantatra raha tena namela ahy tamin’ny heloko ny Tompo?
Asao ny mpianatra mba hanoratra ireo fanontaniana ireo ao amin’ny kahie ao an-dakilasy na ao amin’ny diary fandalinany soratra masina. Angataho izy ireo haka minitra vitsivitsy hanoratany ny valiny tsirairay avy. Rehefa avy nomena fotoana ampy ny mpianatra dia ampahafantaro fa hanana fahafahana ny hamerina handinika ny valinteniny izy ireo rehefa afaka kelikely eo mandritra ny lesona.
Fintino ny Fotopampianarana sy Fanekempihavanana 58:34–37 amin’ny alalan’ny fanazavana fa maro tamin’ireo loholona izay nandeha tany Missouri sy hanorim-ponenana tany no te-hahafantatra ny zavatra tokony hataony mba handrindrana sy handaminana ary hananganana ny tanànan’i Ziona. Nanome torolalana ireo izay nifindra monina tao Missouri ny Tompo mba hanome ny volany sy ny fananany ho amin’ny foto-kevitra fananganana an’i Ziona. Nomena toromarika i Martin Harris mba ho fakan-tahaka amin’ny fanomezana vola ny eveka. Nanome vola betsaka izy mba hanampiana ny Eveka Edward Partridge amin’ny fividianana tany ho an’ny Fiangonana.
Soraty eny amin’ny solaitrabe ireto anarana manaraka ireto: Martin Harris, William W. Phelps, ary Ziba Peterson. Asao ny mpianatra iray hamaky mafy ny Fotopampianarana sy Fanekempihavanana 58:38–41, 60. Asao ny iray kilasy hanaraka ny vakiteny sy hitady ny torohevitra nomen’ny Tompo an’i Martin Harris sy William W. Phelps ary Ziba Peterson teo am-piomanany hanangana an’i Ziona.
Rehefa mamaly ireto fanontaniana manaraka ireto ny mpianatra dia soraty eo amin’ny solaitrabe eo ambanin’ny anarana mifanaraka amin’izany ny valinteniny.
Inona no fahotana nanamelohan’ny Tompo an’i Martin Harris? Inona no nasain’ny Tompo hataony?
Inona no fahotana izay nolazain’ny Tompo fa nahameloka an’i William W. Phelps? Inona no nasain’ny Tompo hataony? (Azonao atao ny manazava fa ilay andian-teny hoe “mitady ny ho ambony” [andininy 41 ] dia tsy midika hoe manao izay tsara indrindra na miezaka ny manatsara. Tsy izany, fa io andian-teny io dia midika faniriana tsy ara-drariny sy feno fieboeboana ny hiseho ho tsaratsara kokoa na manan-danja kokoa noho ny hafa.)
Inona no nandraman’i Ziba Peterson hatao amin’ny fahotany?
Hamafiso fa ny fahotan’ireo lehilahy ireo dia saika nanakana azy ireo amin’ny fanampiana amin’ny fananganana an’i Ziona.
Inona ireo zavatra sasany izay mety hanakana ny fahafahantsika manompo ny Tompo?
Asao ny mpianatra iray hamaky mafy ny Fotopampianarana sy Fanekempihavanana 58:42. Asaivo manaraka ny vakinteny ny rehetra ka hitady ny zavatra nampianarin’ny Tompo mikasika ny fibebahana.
Inona araka ireo andininy ireo no fampanantenan’ny Tompo ho antsika raha mibebaka isika? (Tokony hamantatra ity fitsipika manaraka ity ny mpianatra: Raha mibebaka amin’ny fahotantsika isika dia hamela antsika ny Tompo ka tsy hahatsiaro izany intsony. Soraty eo amin’ny solaitrabe izany fitsipika izany. Azonao atao ny manasa ny mpianatra mba hanisy marika ny teny izay mampianatra io fitsipika ao amin’ny andininy 42 io.)
Inona amin’ireo fahotana ataontsika no voakasik’io fampanantenana io? (Izy rehetra.)
Asao ny mpianatra iray hamaky mafy ity fanambarana manaraka ity izay nataon’ny Filoha Boyd K. Packer ao amin’ny Kôlejin’ny Apôstôly Roambinifolo. Angataho ny mpianatra mba hihaino ireo teny na andian-teny izay mifandray amin’ilay fitsipika voasoratra eny amin’ny solaitrabe.
Sary
Filoha Boyd K. Packer
“Na inona na inona fandikan-dalàna nataontsika, na firy na firy ny fandratrantsika ny hafa tamin’ny zavatra nataontsika dia afaka ho voafafa avokoa izany heloka izany. Ho ahy, ny andian-teny tsara indrindra ao amin’ny soratra masina angamba dia ny filazan’ny Tompo hoe: “Indro, izay efa nibebaka tamin” ny fahotany, dia izy no voavela, ary Izaho Tompo dia tsy mahatsiaro izany intsony’ [F&F 58:42].
“Izany no fampanantenan’ny filazantsaran’i Jesoa Kristy sy ny Sorompanavotana” (“The Atonement,” Ensign na Liahona, nôv. 2012, 77).
Asaivo jeren’ireo mpianatra ny fanontaniana voasoratra eo amin’ny solaitrabe.
Ahoana no hanampian’ny fampanantenan’ny Tompo ao amin’ny andininy 42 amin’ny famaliana ilay fanontaniana fahatelo hoe: Ahoana no ahafahako mahafantatra raha tena namela ahy tamin’ny heloko tokoa ny Tompo? (Ny fampanantenan’ny Tompo dia manampy antsika hahafantatra fa manome famelan-keloka mandrakariva Izy rehefa mibebaka tanteraka amin’ny fahotantsika isika.)
Ankoatra ny fahafantarana fa ny Tompo dia nampanantena ny hamela antsika rehefa mibebaka tanteraka amin’ny fahotantsika isika, ahoana koa no ahafahantsika mahafantatra fa voavela ny helotsika?
Asaivo mamaky mafy ity teny nambaran’ny Filoha Dieter F. Uchtdorf ao amin’ny Fiadidiana Voalohany manaraka ity ny mpianatra iray. Angataho ny mpianatra hihaino ny fomba ahafahany mahafantatra rehefa namela ny helony ny Tompo.
Sary
Filoha Dieter F. Uchtdorf
“Raha vao mibebaka marina tokoa isika dia hanala ny vesatry ny fanamelohana noho ny fahotantsika i Kristy. Ny tenantsika ihany dia afaka mahalala fa voavela heloka sy voadio isika. Hanamarina izany amintsika ny Fanahy Masina; Izy no Mpanamasina. Tsy misy fijoroana ho vavolombelona momba ny famelan-keloka lehibe mihoatra noho izany” (“Fotoam-piverenana hieren-doza,” Ensign na Liahona, mey 2007, 101).
Ahoana no efa nitahiana ny fiainanao noho ny fahafantarana fa afaka ny ho voavela amin’ny fahotanao rehetra ianao?
Hazavao amin’ireo mpianatra fa diso ny olona sasany mihevitra fa raha mbola afaka mahatsiaro ny fahotany izy ireo dia mbola tsy nibebaka tanteraka. Asao ny mpianatra iray hamaky mafy ity fanambarana manaraka nataon’ny Filoha Dieter F. Uchtdorf ity: Angataho ny mpianatra mba hihaino ny antony mety mahatonga antsika hahatsiaro ny fahotantsika na dia efa avy nibebaka aza isika.
Sary
Filoha Dieter F. Uchtdorf
“Hiezaka hampino antsika i Satana fa tsy voavela ny helotsika satria afaka mahatsiaro azy ireny isika. Mpandainga i Satana; miezaka ny mampanjavozavo ny fahitantsika sy mitondra antsika lavitra ny lalan’ny fibebahana sy ny famelan-keloka izy. Tsy nampanantena Andriamanitra fa tsy hahatsiaro ny fahotantsika intsony isika Hanampy antsika hiala amin’ny famerenana indray ilay fahadisoana ny fahatsiarovana. Kanefa halefahana eny an-dalana eny ny fahatsiarovana ny fahotantsika raha toa ka mijanona ho marina sy mahatoky isika. Ho ampahan’ny fanasitranana ilaina sy ny dingan’ny fanadiovana izany” (“Fotoam-piverenana hieren-doza,” 101).
Hamafiso fa misy fepetra ny fampanantenana voasoratra eny amin’ny solaitrabe. Afaka mahazo famelan-keloka avy any amin’ny Tompo isika raha manao izay azontsika atao amin’ny fibebahana amin’ny fahotantsika.
Inona no atao hoe mibebaka? (Azonao atao ny manasa ireo mpianatra hijery indray ny zavatra nosoratany ho valin’ireo fanontaniana eny amin’ny solaitrabe.)
Rehefa avy mamaly ireo mpianatra dia asao ny mpianatra iray hamaky mafy ity fanambarana manaraka ity izay avy ao amin’ny bokikely Jeunes soyez forts. Asaivo henoin’ny mpianatra ireo zavatra fanampiny azony hianarana mikasika ny dikan’ny hoe mibebaka.
“Mihoatra noho ny fanekena ireo fahadisoana fotsiny ny fibebahana. Fanovana ny fomba fisainana sy fiovam-po izany. Tafiditra amin’izany ny fialana amin’ny fahotana sy ny fitodihana any amin’ Andriamanitra mba hahazoana famelan-keloka. Ny fitiavana an’ Andriamanitra sy ny faniriana tena marina ny hankatò ny didiny no mamporisika hanao izany” (Jeunes, soyez forts [kiboky, 2011], 28).
Hazavao fa ny fibebahana marina dia ahitana fepetra takiana maromaro. Voalaza ao amin’ny Fotopampianarana sy Fanekempihavanana 58:43ny roa amin’ireo fepetra takiana ireo. Asao ny mpianatra iray hamaky mafy io andininy io. Asaivo manaraka ny vakinteny ny mpianatra rehetra ka hitady ny zavatra roa tsy maintsy hataontsika mba hahafahantsika mibebaka tanteraka amin’ny fahotantsika.
Araka ny andininy 43 dia inona avy ireo zavatra roa izay tsy maintsy ataontsika mba hibebahana marina amin’ny fahotantsika? (Tokony hamantatra ity fitsipika manaraka ity ny mpianatra: Raha te-hibebaka dia tsy maintsy mibaboka sy mahafoy ny fahotantsika isika. Soraty eny amin’ny solaitrabe io fitsipika io.)
Ahoana no hanampian’io fahamarinana io antsika amin’ny famaliana ilay fanontaniana hoe: Ahoana no ahafahako mahafantatra raha tena nibebaka marina tamin’ny fahotako aho? (Ampio ny mpianatra hahatakatra fa ny fibabohana sy ny fahafoizana ireo fahotana dia zava-dehibe amin’ny fibebahana tanteraka.)
Inona no dikan’ny hoe mibaboka ny fahotantsika?
Mba hanampiana ny mpianatra hahatakatra tsara kokoa ny dikan’ny hoe mibaboka amin’ny fahotantsika dia asao ny mpianatra iray hamaky mafy ity fanambarana manaraka nataon’ny Loholon’ny Loholona D. Todd Christofferson ao amin’ny Kôlejin’ny Apôstôly Roambinifolo ity:
Sary
Loholona D. Todd Christofferson
“Endri-javatra mahery vaika ny fibabohana sy ny fahafoizana. Mifono zavatra betsaka noho ny fitenenana mahazatra hoe ‘Miaiky aho fa diso’ izy ireo. Ny fibabohana dia fiaikena lalina, ary indraindray fiaikena tena mampijaly ny fahadisoana sy ny faniratsirana an’ Andriamanitra sy ny olona” (“Ilay fanomezana masin’ny fibebahana,” Ensign na Liahona, nôv. 2011, 40).
Ahoana no hanampian’ny fibabohantsika ny fahotantsika amin’ny fitodihana avy amin’izany sy amin’ny fanatonana an’ Andriamanitra mba ho voavela?
Tafiditra ao amin’ity fifanakalozan-kevitra ity ny mety handinihan’ny mpianatra ny fahotana izay mety ilainy hibabohana sy ny olona tokony hibabohany izany. Hazavao fa mila mibaboka ny fahotana rehetra vitantsika amin’ny Ray any An-danitra isika. Ny fandikan-dalàna goavana toy ny fandikana ny lalàn’ny fahadiovam-pitondrantena na ny fampiasana ny pôrnôgrafia dia tokony hibabohana amin’ny eveka na ny filohan’ny sampana ihany koa.
Asaivo jeren’ny mpianatra ny fahamarinana farany izay nosoratanao teny amin ny solaitrabe.
Inona no dikan’ny hoe “mahafoy ny fahotanao”? (Mitodika tanteraka avy amin’ny fahotantsika sy tsy manao izany intsony.)
Mijoroa ho vavolombelona momba ny Sorompanavotan’ny Mpamonjy sy ireo fitsipiky ny fibebahana ary famelan-keloka nifanakalozana hevitra teo. Asao ireo mpianatra mba hisaintsaina raha toa misy fahotana mila hibebahany ary amporisiho izy ireo mba hibebaka amin’ny alalan’ny fampiharana ireo fahamarinana nianarany.
Nandidy ireo loholona ny Tompo mba hitory ny filazantsara sy nanoro hevitra azy ireo mikasika ny fomba fananganana an’i Ziona.
Fintino ny Fotopampianarana sy Fanekempihavanana 58:49–62 amin’ny alalan’ny fanazavana fa ny Tompo dia nilaza tamin’ireo loholona izay nasaina nijanona tao Missouri fa tokony hividy tany sy hiomana amin’ny fanangonana ny Olomasina tao Missouri izy ireo.
Araka ny ao amin’ny andininy 46–47, dia inona no zavatra tokony nataon’ireo loholona teny am-piverenany ho any Ohio?
Araka ny ao amin’ny andininy 64, dia iza no tsy maintsy itoriana ny filazantsara? (Mety amin’ny fomba hafa no hilazan’ny mpianatra ny valinteniny kanefa tokony hita taratra ao kosa ity fitsipika manaraka ity: Tsy maintsy toriana amin’ny olona tsirairay avy ny filazantsara. Azonao atao ny manasa ny mpianatra mba hanisy marika ny teny izay mampianatra io fahamarinana ao amin’ny andininy 64 io.)
Amporisiho ireo mpianatra hanaraka ny fitaoman’ny Fanahy mba hizara ny fahamarinan’ny filazantsara amin’ireo manodidina azy ireo.
Fanazavana sy fampahalalana avy amin’ny zava-miseho
Nampianatra ny Loholona D. Todd Christofferson ao amin’ny Kôlejin’ny Apôstôly Roambinifolo fa ny fibebahana dia mihoatra noho ny fanaovana lisitra fanaraha-maso ny zavatra tokony hatao fotsiny:
Sary
Filoha Dieter F. Uchtdorf
“Mety hanampy ny olona sasany ny miezaka mamorona lisitra amin’ireo dingana manokan’ny fibebahana kanefa mety hitarika ihany koa amin’ny fomba fibebahana mandeha ho azy sy tsy noeritreretina izany, izay tsy tena avy amin’ny fo na mitondra fiovana. Tsy marivo tototra ny fibebahana marina. Manao fitakiana fototra roa ny Tompo: ‘Izao no ahafantaranareo raha mibebaka amin’ny fahotany ny olona—indro hibaboka izany izy ary hahafoy izany’ (F&F 58:43)” (“Ilay fanomezana masin’ny fibebahana,” Ensign na Liahona, nôv. 2011, 40).
Ny Loholona Russell M. Nelson ao amin’ny Kôlejin’ny Apôstôly Roambinifolo dia nanazava ny dikan’ny hoe mibebaka:
Sary
Loholona Russell M. Nelson
“Ny fotopampianaran’ny fibebahana dia misy dikany malalaka kokoa mihoatra noho ny famaritana ao amin’ny rakibolana. Rehefa nilaza i Jesoa hoe “mibebaha” dia noraketin’ireo mpianany tamin’ny fampiasana ny matoateny tamin’ny fiteny Grika hoe metanoeo izany didy izany. Misy dikany lehibe tokoa izany teny manan-danja izany. Ao amin’io teny io, ny tovonameta dia midika hoe ‘fiovana.’ Mifandray amin’ny teny Grika efatra manan-danja ilay tovona: nous, izay midika hoe ‘ny saina’; gnosis, izay midika hoe ‘fahalalana’; pneuma, izay midika hoe ‘fanahy’; ary pnoe, izay midika hoe ‘fofonaina.’
“Ka rehefa nandidy antsika ‘hibebaka’ i Jesoa dia nangataka antsika Izy mba hiova—hanova ny saintsika sy ny fahalalantsika ary ny fanahy—eny fa na dia hatramin’ny fofonaina aza. Nanazava ny mpaminany iray fa izany fiovana amin’ny fofonaina izany dia midika hoe miaina sy miaiky am-pankasitrahana Azy izay nanome ny fofonaina ho an’ny tsirairay. Hoy ny Mpanjaka Benjamina hoe: “Fa raha manompo Azy izay efa nahary anareo … sy mitahiry anareo isan andro isan’ andro amin’ ny fampindramana anareo fofon’ aina …ombieny ombieny—Lazaiko fa raha manompo Azy amin’ ny fanahinareo rehetra sy manontolo ianareo, dia mbola ho mpanompo tsy mahasoa ihany ianareo.’ [Môsià 2:21.]
“Eny, nandidy antsika hibebaka ny Tompo, hanova ny fombantsika sy hanatona Azy ary ho tonga tahaka Azy bebe kokoa. [Jereo ny 3 Nefia 27:21, 27.] Mitaky fiovana tanteraka izany” (Repentance and Conversion,”Ensign na Liahona, May 2007, 103).
Ny Loholona F. Burton Howard ao amin’ny Fitopololahy dia nizara ny traikefa niainany iray izay nianarany fa aorian’ny fibebahana dia tena tsy mahatsiaro ny fahotantsika intsony tokoa ny Tompo:
Sary
Loholona F. Michael Watson
“Tantara iray farany— fony aho mbola eveka indray. Indray alina raha tena resi-torimaso aho dia naneno ny lakolosim-baravarana. Fanimpanina aho raha namoha ny varavarana sy nahita mpikambana tanora tao amin’ny kôlejin’ny mpisoroko teo am-baravarana. Fantatro tsara izy, tena fantatro tsara mihitsy izy hany ka tsy nampaninona ahy ny niara-nitsangatsangana taminy, niara-nivavaka taminy sy nivavaka ho azy, ary nampianatra azy. Fantatro tsara izy tahaka ny ahafantaran’ny eveka tsara iray ny mpisorona valo ambinifolo taona mavitrika rehetra. Ary izany dia ampy ho ahy nahafahako nametraka fanontaniana ny zavatra ataony eo am-baravarako amin’ny misasakalina.
“Hoy izy: ‘Mila miresaka aminao aho ry eveka. Nahavita zavatra goavana aho, ka tsy afaka mandeha mody.’
“Marina mihitsy ny voalazany. Tena goavana tokoa izany. Nanasa azy hiditra aho, ka niresaka izahay. Niresaka izy dia nihaino aho, avy eo aho niresaka dia nihaino izy, mandra-piposaky ny masoandro. Nanana fanontaniana maro izy. Nahavita fahotana tena ratsy tokoa izy. Naniry izy ny hahafantatra raha toa ka mbola nisy ny fanantenana Naniry izy ny hahafantatra ny fomba hibebahana. Naniry izy ny hahafantatra raha toa ka tafiditra ao anatin’ny fibebahana ny filazana amin’ny ray aman-dreniny. Naniry izy ny hahafantatra raha toa ka mbola afaka handeha hanao asa fitoriana izy. Naniry izy ny hahafantatra zavatra hafa maro.
“Tsy nanana ny valinteny rehetra aho, saingy nilaza taminy kosa fa nisy ny fanantenana. Nolazaiko taminy fa ho sarotra ny làlana miverina, nefa azo tanterahina izany. Nazavaiko ny zavatra fantatro momba ny dingan’ny fibebahana ary nanampy azy aho hahatakatra ny zavatra tsy maintsy hataony. Nolazaiko taminy fa raha te-handeha hanao asa fitoriana marina izy dia any aorian’ny fibebahany vao afaka raisina izany fanapahan-kevitra izany. Avy eo dia nolazaiko izy handeha hody, ary lasa izy.
“Nanazava ny toe-java-misy tamin’ny ray aman-dreniny izy. Nangataka famelan-keloka tamin’ireo izay nanaovany fahadisoana izy. Navelany ny fahotana sy ny naman-dratsy ka nanao izay azony natao rehetra izy mba hibebahana.
“Afaka herintaona teo ho eo dia nandeha tany amin’ny sahan’ny misiôna ny zatovolahy dimy tamin’izany kôlejy izany. Iray tamin’ireo izy. Tena akaiky azy rehetra ireo aho. Nanatrika ny fanaovam-beloman’izy ireo tsirairay avy aho. Samy nanompo tamim-boninahitra avokoa izy rehetra. Fotoana fohy taorian’ny nodiany dia samy nanambady tany amin’ny tempoly avokoa izy rehetra. Nanatrika ny lanonana tsirairay avy izaho sy ny vadiko. Afaka maka taratasy kely iray aho, na dia androany aza, ka manoratra ny anaran’izy ireo sy ny anaran’ny vadiny mbamin’ny sasantsasany amin’ny zanany. Toy izany no entina hilazana ny fahafantarako tsara azy ireo.
“Saingy mamelà ahy ianareo hilaza zavatra iray—zavatra iray izay sady tsiambaratelo no tena manan-danja. Tsy mety tsaroako ny anaran’ilay zatovolahy iray izay tonga tany an-tranoko tamin’ny misasakalina. Fantatro fa iray tamin’ireo dimy ireo izy, nefa tsy tsaroako hoe iza amin’ireo.
“Taty aoriana dia nisaorana aho ka nesoriko niala tao an-tsaiko ilay zava-niseho iray manontolo. Taona maro taty aoriana, raha nandeha an-tongotra aho indray hariva izay, dia tonga tao amin’ilay paroasy izay naha-eveka ahy taloha. Namerina fahatsiarovana maro tato an-tsaiko ilay haizina mangina. Teo am-pisainana lalina aho no nahatsapa fa nandalo teo anoloan’ny trano izay niainan’iray tamin’ireo mpisoroko taona maro lasa izay. Tampoka teo dia nitamberina tao an-tsaiko indray ny tantaran’ilay zatovolahy iray izay nolazaiko teo, ary niezaka indray aho nahatsiaro hoe iza tamin’izy dimy lahy ilay izy. Nipetraka tato amin’ity trano ity ve izy? Hoy aho nanontany tena. Nahoana aho no tsy afaka mahatsiaro?
“Rehefa notohizako ny diako dia nisy zava-nitranga—zavatra izay sarotra hazavaina, nefa tena nisy izany ho ahy. Toa nandre feo aho nilaza hoe: ‘Tsy takatrao ve ry zanako lahy? Efa nohadinoiko izany. Nahoana ianao no tokony hahatsiaro?’
“Sorena aho. Tsy nisy valiny nahafa-po tamin’ilay fanontaniana. Tsy nanontany tena intsony momba izany aho. Ary tamin’izay dia fantatro tsy an-kisalasalana bebe kokoa noho ny nahafantarako azy teo aloha fa faly ny Tompo rehefa miverina any aminy ny zanany.
“Tokony tsaroan’ny mpiandry ondry sy ny ondry very rehetra io zavatra farany io. Tena izay mihitsy no tian’ny Tompo ambara rehefa nilaza hoe: ‘Indro, izay efa nibebaka tamin’ny fahotany, dia izy no voavela, ary Izaho Tompo dia tsy mahatsiaro izany intsony (F&F 58:42)’” (“Come Back to the Lord,” Ensign, nôv. 1986, 77—78).
Nanazava mikasika ny zavatra takiana amin’ny fibabohana ny Loholona Richard G. Scott ao amin’ny Kôlejin’ny Apôstôly Roambinifolo:
Sary
Loholona Richard G. Scott
“Mila miaiky hatrany ny fahotanao amin’ny Tompo ianao. Raha toa ka fandikan-dalàna mihoa-pampana izany, toy ny [fahalotoana ara-pitondrantena], dia ilaina hibabohana amin’ny eveka na ny filohan’ny tsatòka. Aoka isika hahatakatra fa tsy fibebahana ny fibabohana. Dingana ilaina izany, fa tsy ampy raha izay fotsiny no atao. Ny fibabohana tsy feno, amin’ny alalan’ny filazana ireo fahadisoana kelikely kokoa dia tsy hanampy anao hibebaka amin’ny fandikan-dalàna lehibe kokoa izay nafenina. Ilaina amin’ny famelan-keloka ny fahavononana hilaza manontolo amin’ny Tompo, ary raha ilaina; dia amin’ny mpitsara mpihazona ny fisoranana miasa ho an’ny Tompo ny zavatra rehetra nataonao.”(“Finding Forgiveness,” Ensign, mey 1995, 76).
Nampianatra ny maha-zava-dehibe ny fahatsoram-po sy ny fahamarinan-toetra tanteraka ny Filoha Spencer W. Kimball :
Sary
Filoha Spencer W. Kimball
“Tsy misy olona afaka ny ho voavela heloka amin’ny fandikan-dalàna raha tsy misy ny fibebahana, ary tsy nibebaka ny olona iray raha tsy namboraka ny fanahiny sy niaiky ny fikasany sy ny fahalemeny, tamim-pahatsorana sy tsisy fanamarinan-tena” (Love versus Lust, Brigham Young University Speeches of the Year [Jan. 5, 1965], 10).
Amin’ny maha-filohan’ny Fisoronana Aharôna azy ao amin’ny paroasy dia mihazona ireo fanalahidin’ny fibebahan’ny olona ao amin’ny paroasiny ny eveka na ny filohan’ny sampana. Mampiasa ny fanalahidy toy izany ny eveka sy ny filohan’ ny sampana mba hamantarana ny toeran’ny olona iray ao am-piangonana sy hanampiana ilay olona amin’ny dingan’ny fibebahana. Nanome hevi-baovao fanampiny momba ny tanjon’ny fibabohana ny fahotana goavana amin’ireo mpitarika ao amin’ny fisoronana nahazo lalana ny Loholona Richard G. Scott ao amin’ny Kôlejin’ny Apôstôly Roambinifolo:
Sary
Loholona Richard G. Scott
“Ny fandikan-dalàna goavana tahaka ny tsy fahadiovam-pitondrantena dia mitaky ny fanampian’ny olona izay mihazona ny fanalahidin’ny fahefana, toy ny eveka na ny filohan’ny tsatòka, mba hilofosana mangina amin’ny dingan’ny fibebahana mba hahazoana antoka fa vita tanteraka sy araka ny tokony ho izy izany” (The Power of Righteousness,”Ensign, nôv. 1998, 69–70).
Nampianatra ny dikan’ny hoe mibebaka amin ny fahotantsika ny Loholona Neil L. Andersen ao amin’ny Kôlejin’ny Apôstôly Roambinifolo:
Sary
Loholona Neil L. Andersen
“Ny fahafoizana ny fahotana dia midika hoe tsy miverina intsony. Mitaky fotoana ny fahafoizana. Mba hanampiana antsika dia indraindray mamela ny ambin’ny fahadisoantsika hijanona ao an-tsaintsika ny Tompo. Lafiny manan-danja amin’ny fianarantsika eto an-tany izany.
Rehefa mibaboka marina tokoa amin’ny fahotantsika isika, ka manonitra izay vitantsika amin’ireo izay nanaovantsika ratsy, ary mahafoy ny fahotantsika amin’ny alalan’ny fitandremana ny didy, dia eo andalam-pahazoana ny famelan-keloka izay isika. Rehefa mandeha ny fotoana dia ho tsapantsika fa mihena ny fijaliantsika noho ny alahelo, ka ‘[m]anaisotra ny heloka hiala ny fontsika’ [Almà 24:10] ary mitondra ‘fiadanan-tsaina.’ [Môsià 4:3.]
“Ho an’ireo izay tena mibebaka tokoa kanefa toa tsy mahatsapa ho maivamaivana: tohizo ny fitandremana ny didy. Mampanantena anareo aho fa ho maivamaivana ianareo amin’ny fotoan’ny Tompo. Mitaky fotoana ihany koa ny fahasitranana” (“Mibebaha … mba hahazoako manasitrana anareo,” Ensign na Liahona, nôv. 2009, 42).