Դաս 11

1 Նեփի 7

Նախաբան

1 Նեփի 7 ներառում է օրինակներ այն բանի վերաբերյալ, որ Նեփին նվիրված էր Աստծուն: Նեփին հնազանդվեց, երբ Տերը պատվիրեց նրան և նրա եղբայրներին վերադառնալ և խնդրել Իսմայելին և նրա ընտանիքին միանալ իրենց անապատում, որպեսզի նրանք կարողանային ամուսնանալ և երեխաներ մեծացնել: Նույնիսկ, երբ Լամանը և Լեմուելը ապստամբեցին Նեփիի դեմ և փորձեցին սպանել նրան, նա մնաց հավատարիմ և փորձեց օգնել նրանց նույնպես հավատարիմ լինել:

Ուսուցանման առաջարկներ

1 Նեփի 7.1–5

Տերը պատվիրում է Նեփիին վերադառնալ Երուսաղեմ՝ Իսմայելին և նրա ընտանիքին բերելու

Ցուցադրեք ամուսնացած զույգի և նրանց երեխաների մի նկար: (Դուք կարող եք օգտագործել ձեր իսկ ընտանիքի նկարը:)

Հրավիրեք մի ուսանողի բարձրաձայն կարդալ 1 Նեփի 7.1–2:

• Ի՞նչ պատվիրեց Տերը Լեքիի որդիներին անել: Ի՞նչ ճշմարտություն մենք կարող ենք սովորել այս պատվիրանից: (Համոզվեք, որ ուսանողները հասկանում են, որ Տերը պատվիրում է մեզ ամուսնանալ և զավակներ մեծացնել Նրա համար:)

Հիշեցրեք ուսանողներին, որ մի քանի օրերի դժվար ճամփորդություն էր պահանջվում անապատում, որպեսզի Նեփին ու իր եղբայրները վերադառնային Երուսաղեմ:

• Ինչու՞ էր ամուսնությունը և ընտանիքը բավականաչափ կարևոր Նեփիի և նրա եղբայրների համար, որպեսզի հետ վերադառնային Երուսաղեմ, որ հանդիպեին Իսմայելի և նրա ընտանիքի հետ:

Նախքան շարունակելը դուք կարող եք յուրաքանչյուր ուսանողի տալ «Ընտանիք՝ հայտարարություն աշխարհին» ուղերձի օրինակը կամ թող նրանք անդրադառնան հայտարարության օրինակին իրենց սուրբ գրությունների ուսումնասիրության օրագրերում:

Խնդրեք մի ուսանողի բարձրաձայն կարդալ «Ընտանիք. Հայտարարություն աշխարհին» ուղերձի հետևյալ մասը: Հրավիրեք ուսանողներին ուշադիր լսել և ներկայացնել, թե ինչ են վերջին օրերի մարգարեները հայտարարել ամուսնության կարևորության վերաբերյալ:

«Մենք՝ Հիսուս Քրիստոսի Վերջին Օրերի Սրբերի Եկեղեցու Առաջին Նախագահությունը և Տասներկու Առաքյալների Խորհուրդը, պաշտոնապես հայտարարում ենք, որ տղամարդու և կնոջ ամուսնությունը հաստատվել է Աստծո կողմից և, որ ընտանիքն ամենակարևոր դերն ունի Արարչի ծրագրում՝ Իր զավակների հավերժական ճակատագրի համար» («Ընտանիք՝ հայտարարություն աշխարհին», Լիահոնա, նոյեմբեր 2010, 129):

Հրավիրեք մի քանի ուսանողների կիսվել, թե ինչ են նրանք սովորում այս հայտարարությունից: Համոզվեք, որ նրանք հասկանում են, որ ընտանիքը ամենակարևոր դերն ունի Արարչի ծրագրում մեր հավերժական ճակատագրի համար: Շեշտեք, որ սա էր պատճառը, որ Տերը պատվիրեց Նեփիին և նրա եղբայրներին հրավիրել Իսմայելի ընտանիքին գնալ իրենց հետ: Նաև բացատրեք, որ ամուսնության ամենակարևոր պատճառներից մեկը երեխաներ լույս աշխարհ բերելն է:

• Ձեր կարծիքով, ի՞նչ է նշանակում սերունդ աճեցնել «Տիրոջ համար» (1 Նեփի 7.1):

Այն բանից հետո, երբ ուսանողները պատասխանեն այս հարցին, խրախուսեք նրանց լսել այլ մտքեր, մինչ դուք կկարդաք ընտանիքի վերաբերյալ հայտարարության հետևյալ մասը: Եթե նրանք ունեն հայտարարության իրենց օրինակները, դուք կարող եք խորհուրդ տալ, որ նրանք նշեն իրենց համար կարևոր բառերն ու արտահայտությունները:

«Մենք հայտարարում ենք, որ դեռևս ուժի մեջ է Իր զավակներին տված շատանալու և երկիրը լցնելու վերաբերյալ Աստծո պատվիրանը: …

…Ծնողների սուրբ պարտականությունն է՝ դաստիարակել երեխաներին սիրո և առաքինության մթնոլորտում, ապահովել նրանց նյութական և հոգևոր կարիքները, ուսուցանել նրանց սիրել և ծառայել մեկը մյուսին, պահել Աստծո պատվիրանները և օրինապաշտ քաղաքացիներ լինել, որտեղ էլ, որ ապրեն» («Ընտանիք՝ հայտարարություն աշխարհին», 129):

Հրավիրեք ուսանողներին բարձրաձայն կարդալ 1 Նեփի 7.3–5:

• Ինչպե՞ս են 1 Նեփի 7.3–5 հատվածները օրինակ հանդիսանում 1 Նեփի 3.7 հատվածի ճշմարտության վերաբերյալ: (Օգնեք ուսանողներին տեսնել, որ Տերը ուղի պատրաստեց Նեփիի և նրա եղբայրների համար, որ հնազանդվեն ամուսնանալու և երեխաներ ունենալու պատվիրանին:)

• Ինչպե՞ս կարող են երիտասարդները պատրաստվել այժմ, որ ամուսնանան և երեխաներ «մեծացնեն» ավետարանում:

1 Նեփի 7.6–15

Հանդիպելով Լամանի և Լեմուելի ապստամբությանը, Նեփին վկայում է դեպի խոստումի երկիր առաջնորդելու Տիրոջ զորության վերաբերյալ

Հրավիրեք մի ուսանողի բարձրաձայն կարդալ 1 Նեփի 7.6–7:

• Ինչու՞ Լամանը, Լեմուելը և Իսմայելի զավակներից մի քանիսը ապստամբեցին անապատում իրենց ճամփորդության ընթացքում:

Խրախուսեք ուսանողներին մտածել այն մասին, թե ի՞նչ կարող էին նրանք ասել Լամանին, Լեմուելին և Իսմայելի ապստամբ որդիներին ու դուստրերին, որ համոզեին նրանց շարունակել իրենց ճամփորդությունը դեպի խոստումի երկիր: Ապա խնդրեք նրանց լուռ կարդալ 1 Նեփի 7.8–12 և ներկայացնել հարցերը, որոնք Նեփին տվեց Լամանին և Լեմուելին:

• Ի՞նչ ճշմարտություններ կիսեց Նեփին, մինչ նա տալիս էր այս հարցերը: (Նա հիշեցրեց իր եղբայրներին օրհնությունների մասին, որոնք նրանք արդեն իսկ ստացել էին Տիրոջից և այն մասին, որ Տերը կարող էր շարունակել օրհնել նրանց համաձայն իրենց հավատքի:)

• Ինչու՞ է կարևոր մեզ համար հիշել այս ճշմարտությունները:

Հրավիրեք ուսանողներին կարդալ 1 Նեփի 7.13–15 և ներկայացնել հետևանքները, եթե Լամանը, Լեմուելը և Իսմայելի ապստամբ որդիներն ու դուստրերը վերադառնային Երուսաղեմ:

1 Նեփի 7.16–22

Նեփին ազատվում է Տիրոջ միջոցով

Բացատրեք, որ այն բանից հետո, երբ Նեփին հիշեցրեց Լամանին և Լեմուելին կործանման վերաբերյալ, որը կգար Երուսաղեմում ապրողների վրա, նրանք բարկացան նրա վրա:

Հրավիրեք ուսանողներից մեկին բարձրաձայն կարդալ 1 Նեփի 7.16: Դասարանին խնդրեք պատկերացնել, թե իրենք Նեփիի իրավիճակում են:

• Ինչպե՞ս ձեզ կզգայիք, եթե դուք լինեիք Նեփիի իրավիճակում: Ի՞նչ կանեիք դուք:

Նշեք, որ Նեփին արձագանքեց այս իրադրությանը օգնության համար աղոթելով: Խնդրեք մի ուսանողի բարձրաձայն կարդալ 1 Նեփի 7.17–18-ում Նեփիի աղոթքը:

• Ինչի՞ համար էր Նեփին աղոթում: Նրա աղոթքում, ձեր կարծիքով, ի՞նչ նշանակալի բան կա:

Մինչ ուսանողները կիսվեն իրենց պատասխաններով, համոզվեք, որ նրանք հասկանում են, որ Նեփին խնդրեց ազատվել «համաձայն [իր] հավատքի»: Նաև նշեք, որ մինչ նա խնդրում էր ազատվել իր եղբայրներից, նա խնդրեց Աստծուն այնքան ուժ տալ իրեն, որ նա կարողանար լուծել խնդիրը: Բացատրեք, որ հավատքով աղոթելը նշանակում է, որ մենք աղոթում ենք Տիրոջ հանդեպ վստահությամբ և գործելու ցանկությամբ: Հրավիրեք մի ուսանողի կարդալ Տասներկու Առաքյալների Քվորումից Երեց Դեյվիդ Ա. Բեդնարի հետևյալ խոսքերը.

«Նեփին օրինակ է մեկի, ով գիտեր և հասկանում էր և հույսը դնում էր Փրկչի հնարավորություն տվող զորության վրա:… Խնդրում եմ, ուշադրություն դարձրեք 17 հատվածում Նեփիի աղոթքի վրա. «Ո~վ Տեր, համաձայն իմ հավատքի, որը քո հանդեպ է, ազատիր ինձ իմ եղբայրների ձեռքից. այո, տուր ինձ այնքան ուժ, որ կարողանամ կտրել այս կապերը, որոնցով ես կապված եմ» (նշումներն ավելացված են):

… Ինձ համար հատկապես հետաքրքրական է այն, որ Նեփին չաղոթեց,… որ իր պայմանները փոխվեին: Դրա փոխարեն նա աղոթեց ուժ ստանալու համար, որ փոխեր իր պայմանները: Եվ թույլ տվեք ինձ հուշել, որ նա աղոթեց այս ձևով անշուշտ այն պատճառով, որ գիտեր և հասկանում էր և փորձառություն ուներ Փրկչի Քավության հնարավորություն տվող զորության հետ կապված» (“In the Strength of the Lord” [Brigham Young University devotional address, Oct. 23, 2001], 4, speeches.byu.edu):

Կիսվեք ձեր վկայությամբ, որ Աստված պատասխանում է մեր աղոթքներին մեր հավատքի համաձայն: Նշեք, որ այս իրավիճակում Աստված պատասխանեց Նեփիի աղոթքին գրեթե անմիջապես: Այնուամենայնիվ, աղոթքները միշտ չէ, որ պատասխանվում են այս կերպ: Երկնային Հայրը աղոթքներին պատասխանում է Իր իսկ ժամանակին, Իր իսկ ձևով և Իր կամքի համաձայն: Ուսանողներին հնարավորություն տվեք վկայել աղոթքի զորության վերաբերյալ՝ տալով նրանց հետևյալ հարցը.

• Ե՞րբ եք դուք հավատքով աղոթել և ստացել ուժ կամ օգնություն Տիրոջից՝ անմիջապես կամ որոշ ժամանակ անց: (Դուք կարող եք կիսվել փորձառությամբ, որն ունեցել այս սկզբունքի հետ կապված:)

Ասեք ուսանողներին, որ իր կապերից ազատվելուց հետո Նեփիի եղբայրները կրկին փորձեցին վնասել նրան: Հրավիրեք մի ուսանողի բարձրաձայն կարդալ 1 Նեփի 7.19–20:

• Ո՞վ համոզեց Լամանին և Լեմուելին դադարեցնել Նեփիին սպանելու փորձ կատարելը:

Նշեք, որ մեր աղոթքները հաճախ պատասխանվում են և մեր կարիքների համար հոգ է տարվում ուրիշների հավատարիմ գործերի միջոցով: Մինչ դասարանը ուսումնասիրի 1 Նեփի 7-ի մնացած հատվածները, հրավիրեք ուսանողներին ուշադրություն դարձնել, թե ինչպես Նեփին արձագանքեց իր եղբայրներին, նույնիսկ այն ամենից հետո, ինչ նրանք արել էին նրա հանդեպ: Խնդրեք նրանց մտածել հետևյալ հարցի շուրջ՝ առանց բարձրաձայն պատասխանելու.

• Ինչպե՞ս եք դուք պատասխանել, երբ ուրիշները փորձել են վնասել ձեզ:

Խնդրեք մի ուսանողի բարձրաձայն կարդալ 1 Նեփի 7.21: Դուք կարող եք խորհուրդ տալ, որ ուսանողները նշեն ներողամտության վերաբերյալ Նեփիի խոսքերը:

• Ի՞նչ է նշանակում անկեղծորեն ներել: (Եթե ուսանողները վստահ չեն, բացատրեք, որ անկեղծորեն նշանակում է իսկապես և ազնվորեն:)

• Ինչ՞ հորդորեց Նեփին, որ իր եղբայրները անեն: Ինչու՞ էր այս խորհուրդը կարևոր:

Վկայեք, որ ներողամտություն փնտրելը և ուրիշներին ներելը բերում է միություն և խաղաղություն: Հրավիրեք ուսանողներին մտածել իրենց ընտանիքներում եղած իրավիճակների մասին, որոնք ներողամտություն են պահանջել:

• Ինչու՞ է ներողամտությունը հատկապես կարևոր մեր ընտանիքներում:

• Մտածեք այն պահերի մասին, երբ դուք ներել եք ընտանիքի անդամի կամ երբ ընտանիքի անդամը ներել է ձեզ: Ինչպե՞ս է դա ազդել ձեր հարաբերությունների և ձեր տանը տիրող հոգու վրա:

Եզրափակեք դասը, հիշեցնելով ուսանողներին, որ Տերը պատվիրեց Նեփիին և նրա եղբայրներին ամուսնանալ և ունենալ ընտանիքներ, և որ Տերը նույնը պահանջում է այսօր: Նաև վկայեք, որ Տերը պատասխանում է մեր աղոթքներին և տալիս է մեզ ուժ հաղթահարելու մեր դժվարությունները համաձայն Նրա հանդեպ ունեցած մեր հավատքի: Հրավիրեք նրանց խորհել, թե ինչպես նրանք կարող են կիրառել այսօրվա դասի սկզբունքներից մեկը, որ օգնեն իրենց ընտանիքներին:

Սերտման սուրբ գրության կրկնություն

Նշում. Այս ձեռնարկում կան սերտման շատ սուրբ գրությունների կրկնություններ: Դրանք ներկայացնում են բազմաթիվ մեթոդներ, որոնք դուք կարող եք օգտագործել, որ օգնեք ուսանողներին հաճախակի կրկնել սերտելու համար նախատեսված սուրբ գրությունները:

Այս դասի ծավալը կարող է հնարավորություն տալ ժամանակ տրամադրել ստուգելու սերտելու համար նախատեսված սուրբ գրության կրկնության վարժությանը: Դուք կարող եք վարել վարժությունը դասի սկզբում, որպես ընդմիջում դասի մասերի միջև կամ դասի վերջում: Հակիրճ ձևով այն կատարեք, որ ժամանակ լինի դասի համար: Այլ կրկնության վարժությունների համար տեսեք ցուցիչը:

Երբ ուսանողները կարողանում են հեշտությամբ գտնել սերտելու համար նախատեսված սուրբ գրությունները և հասկանում են դրանց նշանակությունը, բովանդակությունը և կիրառումը, նրանք ավելի վստահ են լինում իրենց անձնական ուսումնասիրությունների ժամանակ, ավետարանի սկզբունքները կիրառելու իրենց ունակության վրա և սուրբ գրություններից ուսուցանելու իրենց հնարավորությունների վրա: Խորհեք Նախագահ Հովարդ Վ. Հանթերի հետևյալ հայտարարության շուրջ. «Մենք հուսով ենք, որ ձեր ուսանողներից ոչ մեկը չի հեռանա ձեր դասարանից վախեցած կամ շփոթված կամ ամոթի զգացումով, որ նրանք չեն կարող գտնել իրենց անհրաժեշտ օգնությունը, քանի որ նրանք բավականաչափ լավ չգիտեն սուրբ գրությունները, որպեսզի գտնեն համապատասխան հատվածները» (“Eternal Investments” [address to CES religious educators, Feb. 10, 1989], 2, si.lds.org):

Որպեսզի օգնեք ուսանողներին ծանոթանալ այն տեղերի հետ, որտեղ գտնվում են սերտման սուրբ գրությունները, հրավիրեք նրանց անդրադառնալ սերտման սուրբ գրությունների էջանշանին, գտնել սերտման առաջին հինգ հատվածները և կարդալ դրանք: Դուք կարող եք խրախուսել ուսանողներին ընդգծել սերտման սուրբ գրության հատվածները այնպես, որ նրանք կարողանան հեշտությամբ գտնել հատվածները:

Բացատրական և պատմական տեղեկություն

1 Նեփի 7․2 Իսմայելը Եփրեմից էր

Մորմոնի Գիրքը հաճախ անվանվում է «Հովսեփի փայտ» (Եզեկիել ԼԷ.19) կամ «Եփրեմի փայտ» (ՎևՈՒ 27.5): Լեքին Մանասեի հետնորդ էր (տես Ալմա 10.3) և Իսմայելը Եփրեմի հետնորդ էր Erastus Snow, Deseret News, Aug. 18, 1882): Հակոբի մարգարեությունները (տես Ծննդոց ԽԸ.16, ԽԹ.22) կատարվեցին, երբ Իսմայելը (Եփրեմից) եկավ Ամերիկյան մայրցամաք Լեքիի հետ (Մանասեից):

1 Նեփի 7. 3 -5: Ամուսնության կարևորությունը

Նախագահ Հովարդ Վ. Հանթերը ընդգծել է տաճարային ամուսնության կարևորությունը.

«Ճիշտ ինչպես մկրտությունն է Տիրոջ պատվիրան, այնպես էլ տաճարային ամուսնությունը: Ինչպես մկրտությունն է կարևոր Եկեղեցի մուտք գործելու համար, այնպես էլ տաճարային ամուսնությունն է կարևոր Աստծո ներկայությունում վեհացվելու համար: Դա մեր ճակատագրի մի մասն է: Մենք չենք կարող իրականացնել մեր գերագույն նպատակը առանց դրա:

Մի բավարարվեք սրանից քչով:

Դուք չեք ընդունի մկրտության աշխարհիկ ձևը, այնպես չէ՞:

Աստված ունի մկրտության իր ձևը՝ ընկղմամբ մեկի կողմից, ով կրում է իշխանություն:

Ապա դուք կընդունե՞ք ամուսնության աշխարհիկ ձևը:

Նա ունի նաև ամուսնության իր ձևը. Դա տաճարային ամուսնությունն է» (Teachings of Howard W. Hunter, ed. Clyde J. Williams [1997], 131–32; տես նաև ՎևՈՒ 131.1–4):

1 Նեփի 7.15 «Եթե դուք կամենաք վերադառնալ Երուսաղեմ, դուք նույնպես կկորչեք»

Նեփին զգուշացրեց իր եղբայրներին և Իսմայելի ընտանիքի անդամներին, որ նրանք կկորչեին, եթե վերադառնային Երուսաղեմ: Պատմությունը ցույց է տալիս, որ Նեփին ճիշտ էր: Լեքիի և Իսմայելի ընտանիքների Երուսաղեմից հեռանալուց հետո տարիներ անց բաբելոնացիները շրջապատեցին քաղաքը: Համաձայն Աստվածաշնչի մոտավորապես 18 ամսվա պաշարումը Երուսաղեմի մարդկանց թողեց առանց ուտելիք, քաղաքը «խրամատուեցաւ» և Սեդեկիա թագավորի բանակը ցրվեց (տես Դ Թագավորաց ԻԵ.1–7): Բաբելոնացիները այնուհետև քանդեցին տաճարը և շատ մարդկանց գերի տարան Բաբելոն: Եթե Լամանը, Լեմուելը և ուրիշները վերադառնային Երուսաղեմ, նրանք կընկնեին գերության մեջ կամ կմահանային (տես 2 Նեփի 1.4): Սակայն քանի որ նրանք ընտրեցին հետևել Լեքիին և Նեփիին, նրանք դրա փոխարեն վայելեցին Լիառատ երկրի միրգն ու մեղրը (տես 1 Նեփի 17.3–6) և ժառանգության երկիր ձեռք բերեցին (տես 2 Նեփի 1.5): Բացի այդ, Տերը ողորմած է եղել Լամանի և Լեմուելի վերջին օրերի սերնդի հանդեպ՝ օրհնելով նրանց ավետարանով (տես 2 Նեփի 4.7–9):