Դաս 18

1 Նեփի 17

Նախաբան

Անապատում ութ տարի ճամփորդելուց հետո Լեքիի ընտանիքը ժամանեց ծովեզրյա մի տարածք, որը նրանք անվանեցին Լիառատ: Այն բանից հետո, երբ նրանք հաստատվեցին Լիառատում, Տերը պատվիրեց Նեփիին նավ կառուցել: Երբ նրա եղբայրները իմացան, թե նա ինչ էր փորձում անել, նրանք ծաղրեցին նրան, ապա դժգոհեցին և հրաժարվեցին օգնել: Նեփին սովորեցրեց իր եղբայրներին, որ չնայած Տերը փնտրել է խոսել նրանց հետ Հոգու մեղմ, հանդարտ ձայնով, նրանց անօրինությունը խանգարել է, որ նրանք զգան Նրա խոսքերը: Նա հանդիմանեց նրանց իրենց ամբարշտության համար և հորդորեց նրանց ապաշխարել:

Ուսուցանման առաջարկներ

1 Նեփի 17.1–51

Լեքիի ընտանիքի ճամփորդությունները դեպի Լիառատ երկիր, որտեղ Նեփիին պատվիրվում է նավ կառուցել

Գրատախտակին նկարեք հետևյալ գծապատկերը:

Խնդրեք ուսանողներին խորհել, թե արդյոք նրանք ներկայումս կնկարագրեն իրենց կյանքը որպես հեշտ, թե դժվար, և ինչու: (Դուք կարող եք խորհուրդ տալ ուսանողներին քննարկել իրենց պատասխանները զուգընկերոջ հետ: Կամ հրավիրեք մի քանի ուսանողների կիսվել իրենց մտքերով ամբողջ դասարանի հետ: Հիշեցրեք նրանց, որ կարիք չկա կիսվելու որևէ բանով, որը շատ անձնական է կամ գաղտնի:)

Հրավիրեք մի ուսանողի բարձրաձայն կարդալ 1 Նեփի 17.1, 4, 6: Մինչ նա կարդում է, թող դասարանը փնտրի բառեր և արտահայտություններ, որոնք նշում են, թե ժամանակը, որ Նեփին և նրա ընտանիքը անցկացրեցին անապատում, հեշտ էր, թե դժվար:

• Անապատում անցկացրած ժամանակը Նեփին բնորոշում էր որպես հեշտ, թե՞ դժվար: Ո՞ր բառերն են ակնարկում, որ այն դժվար էր:

Բացատրեք, որ Նեփին և նրա ընտանիքը նաև առատորեն օրհնվեցին այս ժամանակահատվածում: Հրավիրեք ուսանողներին ընթերցել 1 Նեփի 17.2, 5, 12−13 և գտնել, թե ինչով էին օրհնված Նեփին ու իր ընտանիքը իրենց ճամփորդության ընթացքում: Խնդրեք մի քանի ուսանողների բացատրել այն, ինչ իրենք գտել են:

Օգնեք ուսանողներին սովորել, թե ինչպես ներկայացնել վարդապետություններն ու սկզբունքները

Երբ դուք օգնեք ուսանողներին սովորել, թե ինչպես ներկայացնել սուրբ գրությունների վարդապետություններն ու սկզբունքները, նրանք կկարողանան ինքնուրույն ուսումնասիրել սուրբ գրությունները ավելի արդյունավետ կերպով: Սովորեցրեք ուսանողներին փնտրել այնպիսի արտահայտություներ, ինչպես օրինակ «այսպիսով մենք տեսնում ենք», «հետևաբար», «ուստի», «ահա» կամ «եթե …, ապա …», որոնք հաճախ ներկայացնում են սկզբունքներ կամ վարդապետություններ:

Ասեք ուսանողներին, որ Նեփին ուսուցանեց մի սկզբունք, որը բացատրեց, թե ինչու իր ընտանիքը կարող էր օրհնված լինել այս դժվար ժամանակահատվածում: Հրավիրեք ուսանողներին լուռ կարդալ 1 Նեփի 17.3 և ներկայացնել սկզբունքը, որ սկսվում է եթե բառով: Հակիրճ բացատրեք, որ սուրբ գրություններում սկզբունքները երբեմն ներկայացվում են «եթե-ապա» ձևով: Եթե բառը ներկայացնում է գործողություն, և ապա բառը ներկայացնում է հետևանքը (դրական կամ բացասական), որը մենք կունենանք որպես այդ գործողության արդյունք:

Չնայած 1 Նեփի 17.3-ը չի պարունակում ապա բառը, այն նկարագրում է գործողություն, ներառյալ մի քանի օրհնություններ, որոնք կլինեն արդյունքում: Խնդրեք ուսանողներին նշել իրենց ներկայացրած սկզբունքի «եթե-ապա» բաղադրիչները: Նրանք պետք է ասեն նմանատիպ մի բան. Եթե մենք պահենք պատվիրանները, ապա Տերը կուժեղացնի մեզ և միջոցներ կապահովի մեր համար, որ իրագործենք այն, ինչ նա պատվիրել է: (Դուք կարող եք գրատախտակին գրել այս սկզբունքը:) Հրավիրեք ուսանողներին փնտրել այս սկզբունքի վերաբերյալ վկայություն, մինչ նրանք ուսումնասիրում են Նեփիի փորձառությունը և մինչ նրանք անդրադառնում են իրենց իսկ կյանքին:

Բաժանեք թերթիկներ, որոնք պարունակում են հետևյալ հարցերը (կամ գրեք հարցերը գրատախտակին նախքան դասը).

1. Ի՞նչ պատվիրեց Տերը, որ Նեփին աներ: (1 Նեփի 17.7–8) Ինչպե՞ս արձագանքեց Նեփին: (1 Նեփի 17.9–11, 15–16) Ինչպե՞ս արձագանքեցին նրա եղբայրները: (1 Նեփի 17.17–21)

2. Ինչպե՞ս էր օգնել Տերը Մովսեսին իրագործել այն, ինչ պատվիրվել էր նրան անել: (1 Նեփի 17.23–29)

3. Ինչո՞վ էին Նեփիի եղբայրները նման Իսրայելի զավակներին: (1 Նեփի 17.30, 42)

4. Ի՞նչ է պատվիրել Տերը, որ կարող է դժվար լինել ինձ համար:

5. Ինչպե՞ս ես կարող եմ արձագանքել Նեփիի և Մովսեսի պես: Ինչպե՞ս ես կարող եմ խուսափել սխալներից, որ կատարեցին Նեփիի եղբայրները և Իսրայելի զավակները:

Ներկայացրեք վերևում տրված հարցերը, բացատրելով, որ դրանք կօգնեն ուսանողներին տեսնել, թե ինչպես Նեփին շարունակեց ապրել 1 Նեփի 17.3 սկզբունքի համաձայն Լիառատ ժամանելուց հետո: Հարցերը նաև կօգնեն ուսանողներին կիրառել սկզբունքը իրենց իսկ կյանքում: Հրավիրեք մի ուսանողի բարձրաձայն կարդալ 1 Նեփի 17.7–8: Խնդրեք դասարանի մյուս անդամներին ներկայացնել, թե ինչ էր պատվիրվել Նեփիին անել: Թող ուսանողները պատասխանը գրեն թերթիկի առաջին հարցի տակ կամ իրենց սուրբ գրությունների ուսումնասիրության օրագրերում:

• Ինչո՞վ կարող էր այս պատվիրանը դժվար լինել Նեփիի համար:

Հրավիրեք մի ուսանողի բարձրաձայն կարդալ 1 Նեփի 17.9–11 և մեկ այլ ուսանողի կարդալ 1 Նեփի 17.15–16: Նախքան նրանց կարդալը խնդրեք դասարանին ուշադիր լսել, թե ինչպես Նեփին արձագանքեց նավ կառուցելու պատվիրանին:

• Ի՞նչն է ձեզ վրա տպավորություն թողնում Նեփիի պատասխանի մեջ:

Թող ուսանողները թերթիկների վրա կամ իրենց սուրբ գրությունների ուսումնասիրության օրագրերում ամփոփ ձևով գրեն Նեփիի պատասխանը առաջին հարցի տակ:

Խնդրեք մի քանի ուսանողների հերթով բարձրաձայն կարդալ 1 Նեփի 17.17–21: Թող դասարանը փնտրի բառեր կամ արտահայտություններ, որոնք հայտնում են Լամանի և Լեմուելի վերաբերմունքը: Թող ուսանողները համառոտ ձևով գրի առնեն Լամանի և Լեմուելի արձագանքը ի պատասխան նավ կառուցելու պատվիրանին: Հրավիրեք մեկ կամ երկու ուսանողների դասարանի հետ կիսվել իրենց գրառումներով:

Բացատրեք, որ Նեփին արձագանքեց իր եղբայրների դժգոհություններին, հիշեցնելով նրանց, որ Տերը օգնել էր Մովսեսին իրագործել Իսրայելի զավակներին գերությունից ազատելու դժվարին հանձնարարությունը: Նեփին նաև համեմատեց իր եղբայրների կարծրասրտությունը Իսրայելի զավակների կարծրասրտության հետ: Հրավիրեք ուսանողներին ուսումնասիրել սուրբ գրությունների հատվածները և գրի առնել իրենց պատասխանները երկրորդ և երրորդ հարցերի վերաբերյալ: Ելնելով ձեր ուսանողների կարիքներից, դուք կրող եք հրավիրել նրանց անել դա անհատապես կամ զուգընկերոջ հետ:

Ուսուցանելիս հաշվի առեք ձեր ուսանողների կարիքները

Խելացի կլինի հարմարեցնել ուսուցման մեթոդները, օգնելով ուսանողներին հաջողությամբ իրականացնել որպես սովորողներ իրենց դերը: Օրինակ, եթե ուսանողները հոգնած տեսք ունեն, կարող եք խնդրել, որ նրանք աշխատեն զուգընկերների հետ, որպեսզի ներգրավված լինեն ուսուցման մեջ: Եթե ուսանողները եռանդով լի են, դուք կարող եք խնդրել նրանց անհատապես ուսումնասիրել, որ օգնեք նրանց կենտրոնացած մնալ:

Նրանից հետո, երբ ուսանողները կլրացնեն 2-րդ և 3-րդ հարցերը, հարցրեք.

• Ինչպե՞ս էր օգնում Տերը Մովսեսին իրագործել այն, ինչ պատվիրված էր նրան անել:

• Ձեր կարծիքով, Մովսեսի օրինակը ինչպե՞ս էր օգնում Նեփիին:

• Ինչո՞վ էին Նեփիի եղբայրները նման Իսրայելի զավակներին:

Նշեք, որ երբ Տերը մեզ տալիս է դժվարին առաջադրանքներ կամ պատվիրաններ, մենք կարող ենք ընտրել արձագանքել Նեփիի պես, կամ մենք կարող ենք արձագանքել ինչպես Լամանը և Լեմուելը: Բացատրեք, որ չնայած Աստված մեզ չի պատվիրել կատարել այնպիսի առաջադրանքներ, ինչպիսին է նավ կառուցելը կամ Կարմիր ծովը բաժանելը, Նա տվել է պատվիրաններ և պատվիրել է մեզ իրագործել բաներ, որոնք որոշ մարդիկ դժվար են կարծում: Օրինակ, նա պատվիրել է մեզ ունենալ առաքինի մտքեր և Հանգստյան օրը սուրբ պահել: Նա ակնկալում է, որ մենք կկատարենք Եկեղեցու կոչումները (օրինակ որպես քվորումի կամ դասարանի նախագահ) և ծառայել ուրիշներին: Նա նաև ակնկալում է, որ մենք պահենք մեր ուխտերը և ակտիվ մնանք Եկեղեցում, նույնիսկ դժվարությունների հանդիպելիս: Ուսանողներին ժամանակ տվեք 4-րդ և 5-րդ հարցերի պատասխանները գրի առնելու համար: Խրախուսեք նրանց 4-րդ հարցին պատասխանելիս գրել որևէ բանի մասին, որ Տերը պատվիրել է և որը դժվար է նրանց համար:

Այն բանից հետո, երբ ուսանողները բավականաչափ ժամանակ կունենան գրելու համար, բարձրաձայն կարդացեք Նեփիի հավատքի արտահայտությունը 1 Նեփի 17.50-ում: Ապա ուսանողներին խնդրեք լուռ կարդալ 1 Նեփի 17.51 և խորհել, թե ինչպես է դա վերաբերվում իրենց կյանքին: Խրախուսեք նրանց ավելացնել իրենց անունը ինձ բառից հետո և նավ կառուցել արտահայտությունը փոխարինել առաջադրանքով կամ պատվիրանով, որը նրանք դժվար են համարում: Խորհեք այն բանի վերաբերյալ, որ հրավիրեք այն ուսանողներին, ովքեր հարմար կգտնեն դա անել, բարձրաձայն կարդալ 1 Նեփի 17.51 իրենց կատարած փոփոխություններով: Կրկին անդրադարձեք գրատախտակին գրված սկզբունքին:

• Ի՞նչ փորձառություն էր Նեփին արդեն իսկ ունեցել այս սկզբունքի հետ կապված, որ տալիս էր նրան վստահություն, որ Տերը կօգներ իրեն կատարել ցանկացած պատվիրան:

• Ի՞նչ փորձառություն եք ունեցել դուք, որը ձեզ վստահություն է տալիս, որ Աստված կօգնի ձեզ իրագործել ցանկացած բան, ինչ Նա կպահանջի ձեզանից:

Կիսվեք ձեր վկայությամբ, որ երբ մենք պահում ենք պատվիրանները, Տերը ուժեղացնում է մեզ և ճանապարհներ է պատրաստում մեր համար իրագործելու այն ամենը, ինչն Ինքը պատվիրում է:

1 Նեփի 17.45–55

Նեփին հանդիմանում է Լամանին և Լեմուելին իրենց ամբարշտության համար

Ցուցադրեք Նեփին հնազանդեցնում է իր ըմբոստ եղբայրներին (62044; Gospel Art Book [2009], no. 70) նկարը: Հրավիրեք ուսանողներին ամփոփել այն, ինչը տեղի ունենում նկարում: Եթե ուսանողները պատասխան չունեն, հրավիրեք նրանց գտնել պատասխանը 1 Նեփի 17.48, 53–54-ում:

• Համաձայն 1 Նեփի 17.53-ի, ինչո՞ւ Տերը ցնցեց Նեփիի եղբայրներին: (Դուք կարող եք ուսանողների ուշադրությունը հրավիրել 53 ա տողատակի ծանոթագրության վրա, որ օգնեք նրանց հասկանալ, որ ցնցել բառը այս ենթատեքստում նշանակում է «այնպես անել, որ ցնցվեն կամ դողան»:)

Բացատրեք, որ ցնցումը, որ Տերը տվեց Լամանին և Լեմուելին, բազմաթիվ ճանապարհներից մեկն է, որոնցով Տերը հաղորդակցվել է նրանց հետ: Հրավիրեք ուսանողներին կարդալ 1 Նեփի 17.45 և ներկայացնել մի քանի ճանապարհներ, որոնցով Տերը հաղորդակցվել է Լամանի և Լեմուելի հետ անցյալում:

• Ի՞նչ ճանապարհներով է Տերը հաղորդակցվել Լամանի և Լեմուելի հետ: Դրանցից ո՞րն է այն ճանապարհը, որով Տերը ամենաշատն է փնտրում հաղորդակցվել մեզ հետ:

Դուք կարող եք առաջարկել ուսանողներին նշել 1 Նեփի 17.45-ի հետևյալ մասը. «Նա խոսել է ձեզ հետ՝ մեղմ, հանդարտ ձայնով»: Խնդրեք ուսանողներին կարդալ Տասներկու Առաքյալների Քվորումից Նախագահ Բոյդ Ք. Փաքերի հետևյալ խոսքերը.

«Սուրբ Հոգին խոսում է այնպիսի ձայնով, որ դուք ավելի շատ զգում եք, քան լսում: Այն նկարագրվում է որպես «մեղմ, հանդարտ ձայն» [ՎևՈՒ 85.6]: Եվ մինչ մենք խոսում ենք Հոգու հուշումներին «լսելու» մասին, ավելի հաճախ մարդիկ նկարագրում են հոգևոր հուշումը՝ ասելով. «Ես զգացողություն եմ ունեցել …»» (“Personal Revelation: The Gift, the Test, and the Promise,” Ensign, Nov. 1994, 60):

Դուք կարող եք հրավիրել ուսանողներին գրել հետևյալ ճշմարտությունը իրենց սուրբ գրություններում 1 Նեփի 17.45 հատվածի կողքին. Սուրբ Հոգին խոսում է մեղմ, հանդարտ ձայնով, որը մենք ավելի շատ զգում ենք, քան լսում: (Այս սկզբունքը շեշտելու համար դուք կարող եք խնդրել ուսանողներին կարդալ Վարդապետություն և Ուխտեր 8.2–3:)

• Ե՞րբ եք դուք զգացել, որ Սուրբ Հոգին խոսել է ձեզ հետ մեղմ, հանդարտ ձայնով:

• Ի՞նչ եք դուք անում, որն օգնում է ձեզ զգալ և ճանաչել Սուրբ Հոգու մեղմ, հանդարտ ձայնը:

Այն բանից հետո, երբ ուսանողները պատասխանեն, դուք կարող եք խրախուսել նրանց ընդգծել 1 Նեփի 17.45-ի հետևյալ արտահայտությունը. «Բայց դուք անզգայացած էիք, որպեսզսի կարողանայիք զգալ նրա խոսքերը»: Թող ուսանողները կարդան 1 Նեփի 17.45 հատվածի առաջին նախադասությունը և ներկայացնեն, թե ինչու էին Լամանը և Լեմուելը դարձել «անզգայացած»: Հրավիրեք նրանց ներկայացնել իրենց գտածը:

• Ինչո՞ւ «անօրինություն գործելիս սրընթաց լինելը» կարող էր պատճառ դառնալ, որ Լամանը և Լեմուելը դառնային «անզգայացած»:

• Ինչպե՞ս կարող են մեր մեղքերը ազդել Սուրբ Հոգու ազդեցությունը զգալու մեր կարողության վրա:

Ուսանողների պատասխաններից հետո կարդացեք Նախագահ Ջեյմս Ի. Ֆաուստի հետևյալ մտքերը, ով ծառայել է որպես Առաջին Նախագահության անդամ.

«Մեր օրերում հաղորդակցվելու համար հիմնականում օգտագործում են բջջային հեռախոսներ: Երբեմն, ինչևիցե, մենք գտնվում ենք այնպիսի վայրերում, որտեղ բջջային հեռախոսի ազդանշանը չի գործում: Սա կարող է պատահել, երբ բջջային հեռախոս օգտագործողը գտնվում է թունելում կամ կիրճում կամ երբ կան այլ խանգարող ռադիոազդանշաններ:

Այդպես է նաև աստվածային հաղորդակցության դեպքում: … Մենք հաճախ դնում ենք ինքներս մեզ հոգևոր առումով անհասանելի տեղերում՝ վայրեր և իրադրություններ, որոնք սահմանափակում են աստվածային ուղերձները: Այս անհասանելի տեղերից են բարկությունը, պոռնոգրաֆիան, հանցանքը, եսասիրությունը և այլ իրավիճակներ, որոնք վիրավորում են Հոգուն» (“Did You Get the Right Message?” Ensign կամ Liahona, May 2004, 67):

Որպես վերջաբան հրավիրեք ուսանողներին խորհել ուղերձների մասին, որոնք Տերը հաղորդել է նրանց վերջերս: Խրախուսեք նրանց խորհել, թե արդյոք նրանք գտնվում են որևէ «հոգևորապես անհասանելի վայրում», որ կարող է խանգարել նրանց նման հաղորդակցություն ստանալ: (Դուք կարող եք հրավիրել ուսանողներին գրել այդ մասին իրենց սուրբ գրությունների օրագրերում:) Վկայեք, որ Սուրբ Հոգին խոսում է մեղմ, հանդարտ ձայնով, որը մենք ավելի շատ զգում ենք, քան լսում: Նաև վկայեք, որ մենք կարող ենք ունենալ այս հաղորդակցության փորձառությունը, եթե ձգտենք լինել արժանի այս նուրբ հուշումներին:

Բացատրական և պատմական տեղեկություն

1 Նեփի 17․8-9 Դժվարությունը, որին հանդիպեց Նեփին նավ կառուցելիս

Տասներկու Առաքյալների Քվորումից Երեց Դեյվիդ Ա. Բեդնարը բացատրել է.

«Նեփին նավաստի չէր: Նա մեծացել էր Երուսաղեմում՝ ծովերից հեռու գտնվող քաղաքում, և ոչ թե Միջերկրական ծովի ափեզրին: Անհավանական է թվում, որ նա շատ բան իմանար կամ փորձառություն ունենար նավ կառուցելու համար անհրաժեշտ գործիքների և հմտությունների հետ կապված: Նա միգուցե երբեք նախկինում չէր տեսել օվկիանոսում լողացող նավ: Ըստ էության, Նեփին պատվիրան ստացավ և ուսուցանվեց կառուցելու մի բան, ինչը նախկինում երբեք չէր կառուցել, որպեսզի գնար մի վայր, որտեղ նախկինում երբեք չէր եղել» (“Learning to Love Learning” [Brigham Young University commencement address, Apr. 24, 2008], 4, speeches.byu.edu):

1 Նեփի 17․45 «Դուք անզգայացած էիք»

Առաջին Նախագահությունից Նախագահ Հենրի Բ. Այրինգը բացատրել է, որ Հոգու բացակայությունը մարդու կյանքում կարող է ապաշխարելու կարիք առաջ բերել.

«Սուրբ Հոգու մշտական ընկերակցությունը և առաջնորդությունը ունենալը պահանջում է մաքրություն: Հոգին պետք է հեռանա նրանցից, ովքեր մաքուր չեն:…

… Եթե դուք բարդություն ունեք Սուրբ Հոգին զգալու հետ կապված, դուք պետք է իմաստություն ունենաք խորհելու, թե արդյոք կա մի բան, ինչի համար դուք պետք է ապաշխարեք և ներում ստանաք:

Եթե դուք զգացել եք Սուրբ Հոգու ազդեցությունը այսօր, դուք կարող եք ընդունել դա որպես վկայություն, որ Քավությունը գործում է ձեր կյանքում: Այդ իսկ պատճառով և այլ ուրիշ պատճառներից ելնելով դուք լավ կանեք, եթե լինեք այնպիսի վայրերում և այնպիսի խնդիրների առջև կանգնեք, որոնք հրավիրում են Սուրբ Հոգու հուշումները: Սուրբ Հոգու ազդեցությունը զգալը գործում է երկու ուղղությամբ. Սուրբ Հոգին բնակվում է միայն մաքուր տաճարում, և Սուրբ Հոգին ստանալը մաքրում է մեզ Հիսուս Քրիստոսի Քավության միջոցով: Դուք կարող եք հավատքով աղոթել, որ իմանաք, թե ինչ անեք, որ մաքրվեք և, այդպիսով, արժանանաք Սուրբ Հոգու ընկերակցությանը և Տիրոջ ծառայությանը: Եվ այդ ընկերակցությամբ դուք ամուր կկանգնեք գայթակղությունների դեմ և զորություն կունենաք սուտը բացահայտելու համար» (“Gifts of the Spirit for Hard Times,” Ensign, June 2007, 23):