Գրադարան
Դաս 6. 1 Նեփի 1

Դաս 6

1 Նեփի 1

Նախաբան

Մորմոնի Գիրքը սկսվում է Լեքիի կողմից մարգարեի իր դերը հավատարմորեն կատարելով: Ինչպես Լեքին, այնպես էլ «շատ մարգարեներ եկան՝ մարգարեանալով ժողովրդին, որ նրանք պետք է ապաշխարեն» (1 Նեփի 1.4): Երբ նա մարգարեացավ Երուսաղեմի կործանման մասին և վկայեց Մեսիայի միջոցով փրկության մասին, շատ մարդիկ ծաղրեցին նրան և ցանկացան սպանել նրան: Այնուամենայնիվ, Լեքին ուրախանում էր Տիրոջ գթությամբ և ազատելու զորությամբ: Մինչ ուսանողները սովորեն Լեքիի ծառայության մասին, նրանց հասկացողությունը այսօրվա մարգարեների վերաբերյալ կարող է աճել: Մինչ նրանք փնտրեն Աստծո գթության ապացույց իրենց կյանքում, նրանց հարաբերությունը Նրա հետ կխորանա:

Ուսուցանման առաջարկներ

1 Նեփի 1.1–3

Նեփին սկսում է իր հիշատակարանը

Հրավիրեք ուսանողներին լուռ կարդալ 1 Նեփի 1.1–3: Խնդրեք նրանց ներկայացնել, թե ինչու Նեփին գրեց իր հիշատակարանը:

  • Ի՞նչ պատճառներ բերեց Նեփին իր հիշատակարանը կազմելու վերաբերյալ:

  • Ձեր կարծիքով, ինչու՞ էր Նեփին զգում, որ նա «մեծապես հովանավորված [էր] Տիրոջ կողմից», չնայած որ նա ունենում էր «շատ չարչարանքներ»:

1 Նեփի 1.4–20

Լեքին տեսիլք է տեսնում և նախազգուշացնում է ժողովրդին, որ Երուսաղեմը կործանվելու է

Հրավիրեք ուսանողներին մտածել մի այնպիսի ժամանակի մասին, երբ նրանց ծնողները նախազգուշացրել են իրենց վտանգի մասին:

  • Ինչու՞ են ձեր ծնողները նախազգուշացնում ձեզ վտանգի մասին:

  • Ի՞նչ եղանակներով է Երկնային Հայրը նախազգուշացնում Իր զավակներին:

Բացատրեք, որ Մորմոնի Գրքի առաջին պատմությունը սկսվում է այն ժամանակ, երբ շատ մարդիկ Երուսաղեմում չար էին: Հրավիրեք մի ուսանողի կարդալ 1 Նեփի 1.4: Խնդրեք դասարանին փնտրել, թե ինչ եղանակով Տերը նախազգուշացրեց Երուսաղեմի մարդկանց:

Բացատրեք, որ Նեփիի հայրը՝ Լեքին, միացավ «շատ մարգարեներին», որոնք նշված են այս հատվածում: Նա նախազգուշացրեց մարդկանց, որ նրանք պետք է ապաշխարեն: Որպեսզի օգնեք ուսանողներին բացահայտել Լեքիի նախազգուշացումները և ուսուցանումները, ուսանողներին բաժանեք զույգերի և թող յուրաքանչյուր զույգը կարդա 1 Նեփի 1.5–13: Խնդրեք նրանց ներկայացնել, թե ինչ տեսավ Լեքին տեսիլքում՝ իրենց սուրբ գրություններում նշումներ կատարելով կամ թղթի վրա ցուցակ կազմելով: Զույգերին տվեք մի քանի րոպե, որպեսզի քննարկեն հետևյալ հարցը: (Դուք կարող եք հարցը գրել գրատախտակին:)

  • Ինչպե՞ս դուք ձեզ կզգաք, եթե տեսիլքում տեսնեք, որ ձեր քաղաքը կործանվելու է:

Վարժությունից հետո հրավիրեք ուսանողներին լուռ ընթերցել 1 Նեփի 1.15՝ ուշադրություն դարձնելով Լեքիի զգացմունքներին այս տեսիլքից հետո:

  • Ինչպե՞ արձագանքեց Լեքին այն բաներին, որոնք տեսավ:

Հրավիրեք ուսանողներին բարձրաձայն կարդալ 1 Նեփի 1.14–15: Օգնեք դասարանին գտնել պատճառները, թե ինչու էր Լեքին ուրախանում: (Անհրաժեշտության դեպքում դուք պետք է բացատրեք, որ չնայած Լեքին իմացավ, որ Երուսաղեմը կործանվելու էր, նա նաև տեսավ, որ նրանք, ովքեր վստահում էին Աստծուն, չեն կործանվի:)

  • Ե՞րբ եք դուք կարողացել փառաբանել Աստծուն նույնիսկ ձեր կյանքի դժվարագույն պահերին:

  • Որո՞նք են դժվար պահին Տիրոջ «բարությունը և ողորմությունը» հասկանալու որոշ օրհնությունները:

Թող ուսանողներից մեկը բարձրաձայն կարդա հետևյալ հայտարարությունը.

«Ինչպես հին ժամանակների մարգարեները, այնպես էլ այսօրվա մարգարեները վկայում են Հիսուս Քրիստոսի մասին և ուսուցանում են Նրա ավետարանը: Նրանք հայտնի են դարձնում Աստծո կամքը և իրական էությունը: Նրանք խոսում են համարձակորեն և պարզ՝ դատապարտելով մեղքը և նախազգուշացնելով դրանց հետևանքների մասին: Երբեմն նրանք կարող են ոգեշնչվել, որ մարգարեանան ապագա իրադարձությունների մասին մեր օգտի համար» (True to the Faith: A Gospel Reference [2004], 129):

Շեշտեք, որ Լեքին օրինակ է այն ճշմարտության, որ մարգարեները նախազգուշացնում են մեղքի մասին և ուսուցանում են փրկություն Հիսուս Քրիստոսի միջոցով: (Դուք կարող եք այս ճշմարտությունը գրել գրտախտակին:)

Հրավիրեք ուսանողներին կարդալ 1 Նեփի 1.19–20:

  • Ի՞նչ էր ուսուցանում Լեքին:

  • Ինչպե՞ս էին մարդիկ արձագանքում Լեքիի ուսմունքներին:

  • Ինչու՞ են որոշ մարդիկ մեր օրերում մերժում Տիրոջ մարգարեների ուղերձները:

  • Ե՞րբ եք դուք օրհնվել կամ ձեզ պաշտպանված զգացել այն պատճառով, որ հետևել եք մարգարեին:

1 Նեփի 1.20

Նեփին վկայում է Տիրոջ գորովագութ ողորմությունների մասին

Նշեք, որ 1 Նեփի 1.20-ի երկրորդ նախադասության մեջ Նեփին ընդհատում է իր պատմությունը, որպեսզի իր ուղերձով կիսվեր նրանց հետ, ովքեր կարդում են իր խոսքերը: Թող ուսանողները անձամբ կարդան 1 Նեփի 1.20, փնտրելով ուղերձը, որը Նեփին ուզում է, որ մենք տեսնեինք: Անհրաժեշտության դեպքում ուղղեք նրանց ուշադրությունը այն արտահայտության վրա, որը Նեփին օգտագործում է ուղերձը ներկայացնելու համար («Ես՝ Նեփիս, ցույց կտամ ձեզ …»):

  • Ինչպե՞ս կարող է այսպիսի արտահայտություններին ավելի շատ ուշադրություն դարձնելը օգնել ձեզ Մորմոնի Գրքի ձեր անձնական ուսումնասիրության ժամանակ:

  • Ի՞նչ էր Նեփին ուզում մեզ ցույց տալ:

Խնդրեք ուսանողներից մեկին բարձրաձայն կարդալ 1 Նեփի 1.20: Հրավիրեք մեկ այլ ուսանողի կարդալ Մորոնի 10.3: Խնդրեք ուսանողներին փնտրել նմանատիպ իմաստներ այս երկու հատվածներում:

  • Ի՞նչ նմանատիպ գաղափարներ են Նեփին ու Մորոնին ցանկացել, որ նկատեն Մորմոնի Գրքի ընթերցողները:

Օգնեք ուսանողներին ներկայացնել այս սկզբունքը. Տիրոջ գորովագութ ողորմությունները տարածվում են նրանց վրա, ովքեր հավատում են Նրան: (Դուք կարող եք սկզբունքը գրել գրատախտակին:)

Որպեսզի օգնեք ուսանողներին հասկանալ, թե որոնք են Տիրոջ գորովագութ ողորմությունները և ինչպես կարելի է ճանաչել դրանք կյանքում, կիսվեք Տասներկու Առաքյալների Քվորումից Երեց Դեյվիդ Ա. Բեդնարի հետևյալ մտքով.

Երեց Դեյվիդ Ա. Բեդնար

«Տիրոջ գորովագութ ողորմությունները շատ անձնական և առանձնահատուկ օրհնություններ, ուժ, պաշտպանություն, հավաստիացումներ, առաջնորդություն, սիրալիրություն, մխիթարություն, աջակցություն և հոգևոր պարգևներ են, որոնք մենք ստանում ենք Տեր Հիսուս Քրիստոսից, Նրա շնորհիվ և Նրա միջոցով: …

… Տիրոջ գորովագութ ողորմությունները չեն հայտնվում պատահականորեն կամ պարզապես զուգադիպության արդյունքում: Հավատարմությունը և հնազանդությունը մեզ հնարավորություն են տալիս ստանալ այս կարևոր պարգևները, և հաճախ Տերը ճիշտ ժամանակին օգնում է մեզ տեսնել դրանք:

Մենք չպետք է թերագնահատենք կամ անտեսենք Տիրոջ գորովագութ ողորմությունների զորությունը» («Տիրոջ գորովագութ ողորմությունները», Ensign կամ Լիահոնա,մայիս 2005, 99–100):

  • Ինչպե՞ս էր Երեց Բեդնարը բացատրում «Տիրոջ գորովագութ ողորմություններ» արտահայտությունը:

  • Տիրոջ գորովագութ ողորմությունների ի՞նչ օրինակներ եք դուք տեսել, որ ուղղված լինեն ձեզ կամ մեկին, ում դուք գիտեք:

Այս հարցին պատասխանելու համար ուսանողներին բավականաչափ ժամանակ տալուց հետո հրավիրեք նրանց մտածել, թե ինչպես կարող են նրանք իրենց կյանքում ավելի լավ գնահատել Տիրոջ գորովագութ ողորմությունները: Խրախուսեք նրանց ավելի մեծ ուշադրություն դարձնել գորովագութ ողորմություններին, որոնք Տերը տալիս է իրենց: Դուք կարող եք խորհուրդ տալ, որ նրանք գրի առնեն գորովագութ ողորմությունների փորձառությունները իրենց անձնական օրագրերում: Նրանց ժամանակ տվեք, որ իրենց սուրբ գրությունների ուսումնասիրության օրագրում կամ դասարանային նոթատետրերում գրեն մեկ կամ երկու եղանակներ, որոնցով Տերը վերջերս ուղղել է իրենց Իր գորովագութ ողորմությունները:

Վերջում կրկնեք Տիրոջ գորովագութ ողորմությունների վերաբերյալ 1 Նեփի 1.20-ում Նեփիի վկայությունը: Կիսվեք ձեր վկայությամբ Տիրոջ առանձնահատուկ օրհնությունների ու հոգատարության վերաբերյալ: Խրախուսեք ուսանողներին փնտրել Տիրոջ գորովագութ ողորմությունների օրինակներ իրենց կյանքում և Մորմոնի Գրքում:

Բացատրական և պատմական տեղեկություն

1 Նեփի 1․2 «Եգիպտացիների լեզու»

Նեփին ասաց, որ նա իր հիշատակարանը գրել էր «Եգիպտաղիների լեզվով» (1 Նեփի 1.2): Մոտավորապես 470 տարի անց Բենիամին Թագավորը սովորեցնում է իր զավակներին «Եգիպտացիների լեզուն» (Մոսիա 1.1–4): «Փոխված եգիպտերեն» տերմինը հայտնվում է Մորմոն 9.32: Մորոնին նշել է, որ մինչ իր օրերը՝ Լեքիի և Նեփիի ժամանակներից մոտավորապես 1000 տարի անց, մարդիկ վերափոխել էին այն եգիպտերենը և եբրայերենը, որը օգտագործել էին Լեքին և Նեփին:

1 Նեփի 1․4 «Շատ մարգարեներ»

Նեփին ասել է, որ «շատ մարգարեներ» եկան Երուսաղեմի մարդկանց մեջ: Մենք գիտենք, որ Երեմիան, Աբդիան, Նաումը, Ամբակումը և Սոփանիան բոլորն էլ եղել են նույն ժամանակաշրջանում ապրող մարգարեներ, ովքեր վկայում էին Հուդայի Թագավորությունում: Երեմիա ԼԵ.15 պարունակում է նմանատիպ մեկնաբանություն այն բանի վերաբերյալ, որ Տերը բազմաթիվ մարգարեներ առաջ ուղարկեց, որ նախազգուշացնեին ժողովրդին (տես նաև Բ Մնացորդաց ԼԶ.15–16):

Երեմիան զորեղ մարգարե էր Լեքիի ու Նեփիի օրերում և նշվում է 1 Նեփի 5.13 և 7.14-ում: Նա ծառայել է հրեաներին սկսած մ.թ.ա. 626 -ից մինչև 586 -ը: Ի տարբերություն Լեքիի, Երեմիան մնաց Երուսաղեմում և շարունակեց ժողովրդին ապաշխարության կանչել (տես Սուրբ Գրքերի Ուղեցույց, «Երեմիա»): Լեքիի Երուսաղեմը թողնելուց հետո Երեմիան բանտ էր գցվել: Բանտում եղած ժամանակ նա գրել է «Ողբերը» գիրքը, որտեղ նա ողբացել է Երուսաղեմի կործանումը և այն փաստը, որ մարդիկ չէին ապաշխարում: