Գրադարան
Դաս 8. 1 Նեփի 3–4

Դաս 8

1 Նեփի 3–4

Նախաբան

Տերը պատվիրեց Լեքիին հետ ուղարկել իր որդիներին Երուսաղեմ, որպեսզի Լաբանից ձեռք բերեին արույրե թիթեղները: Լամանը և Լեմուելը չէին պատկերացնում, թե ինչպես կարող էին նրանք կատարել այդ պատվիրանը, սակայն Նեփին հավատում էր, որ Տերը ճանապարհ կպատրաստեր նրանց համար, որպեսզի նրանք իրականացնեն այն, ինչ Նա պահանջում էր: Չնայած, որ անընդհատ բախվում էր դժվարությունների, Նեփին հավատարմորեն շարունակում էր անել այն, ինչ Տերը ուզում էր, որ նա աներ: Դրա արդյունքում նա առաջնորդվեց Սուրբ Հոգով և հաջողությամբ ձեռք բերեց թիթեղները:

Ուսուցանման առաջարկներ

1 Նեփի 3.1–9, 19–20

Լեքիի որդիները վերադառնում են Երուսաղեմ արույրե թիթեղները ձեռք բերելու համար

Հետևյալ նախադասությունները գրեք գրատախտակին նախքան դասի սկսվելը: Խնդրեք ուսանողներին ընտրել այն նախադասությունը, որը լավագույնս նկարագրում է, թե ըստ իրենց, ինչպես է Տերը օգնում մեզ, երբ Նա պատվիրում է մեզ անել դժվար բաներ:

Երբ դուք աշխատում եք կատարել մի պատվիրան կամ դժվար առաջադրանք, որը տրված է Տիրոջ կողմից, Նա.

  1. Կփոխի պատվիրանը, որպեսզի այն հեշտ ու հասարակ լինի ձեզ համար, որ կատարեք:

  2. Կօրհնի ձեր ջանքերը՝ պատրաստելով ճանապարհ, որ դուք կատարեք պատվիրանը, չնայած որ այն կարող է շարունակել դժվար լինել:

  3. Կմիջամտի և կանի ողջ աշխատանքը ձեր փոխարեն:

  4. Կպահանջի, որ դուք ամբողջությամբ այն անեք ինքնուրույն՝ առանց որևէ օգնության:

Հրավիրեք մի քանի ուսանողների կիսվել իրենց ընտրած պատասխանով և պատճառաբանել, թե ինչու են դա ընտրել:

Բացատրեք, որ կան շատ ճանապարհներ, որոնցով Տերը կարող է օրհնել նրանց, ովքեր ձգտում են կատարել Իր պատվիրանները: Երբ ուսանողները ուսումնասիրեն 1 Նեփի 3–4 Նեփիի արձանագրությունները, հրավիրեք նրանց փնտրել այս սկզբունքի օրինակներ: Նաև քաջալերեք ուսանողներին նշել, թե ինչպես Նեփին ու նրա եղբայրները տարբեր ձևով արձագանքեցին դժվարություններին:

Խնդրեք մի քանի ուսանողների հերթով բարձրաձայն կարդալ 1 Նեփի 3.1–9: Դասարանին հրավիրեք լսել և գտնել պատճառները, թե ինչու էր Նեփին կամենում անել այն, ինչ խնդրում էր նրա հայրը:

Լամանը և Լեմուելը զգացին, որ արույրե թիթեղների համար Երուսաղեմ վերադառնալը, «ինչ պահանջում է նրանցից [Լեքին], դժվար բան է» (1 Նեփի 3.5): Որպեսզի օգնեք ուսանողներին հասկանալ որոշ պատճառները, թե ինչու էին Լամանը և Լեմուելը այդպես զգում, դուք կարող եք նրանց հիշեցնել, որ նրանք արդեն իսկ երկար ճանապարհ էին անցել Երուսաղեմից:

  • Ձեր կարծիքով, ինչու՞ էր Նեփին պատրաստ առանց տրտնջալու անել այն, ինչ իր հայրը պատվիրում էր:

Հրավիրեք ուսանողներին ներկայացնել 1 Նեփի 3.7 հատվածի սկզբունքը «եթե-ապա» նախադասության տեսքով: Օրինակ, ուսանողները կարող են ասել, որ, եթե մենք փնտրենք անել այն, ինչ Տերն է պատվիրում, ապա Նա ճանապարհ կպատրաստի մեզ համար, որ մենք կատարենք դա: Նշեք, որ 1 Նեփի 3.7-ը սերտելու համար նախատեսված սուրբ գրություն է: Բացատրեք, որ ուսանողները տարվա ընթացքում պետք է կենտրոնանան սերտելու համար նախատեսված 25 սուրբ գրությունների հատվածների վրա (լրացուցիչ տեղեկությունների համար տես այս ձեռնարկի ցուցիչը): Սերտելու համար նախատեսված 25 սուրբ գրությունների հատվածները նշված են սեմինարիայի էջանշանի հակառակ կողմում: Դուք կարող եք խրախուսել ուսանողներին այնպես նշել սերտելու համար նախատեսված սուրբ գրությունների հատվածները, որ նրանք կարողանան հեշտությամբ գտնել հատվածների տեղը:

  • Ե՞րբ եք դուք զգացել, որ Տերը «ուղի է պատրաստել» ձեր համար Իր պատվիրաններից մեկը պահելու համար:

Հրավիրեք մի ուսանողի բարձրաձայն կարդալ 1 Նեփի 3.3, 19–20: Խնդրեք դասարանին ուշադրություն դարձնել այն արտահայտությունների վրա, որոնք ասում են, թե ինչու էին արույրե թիթեղները այդքան արժեքավոր Լեքիի ընտանիքի և նրանց սերունդների համար: (Դուք կարող եք ուսանողներին խորհուրդ տալ, որ իրենց սուրբ գրություններում նշեն այս արտահայտությունները:) Այն բանից հետո, երբ ուսանողները կկիսվեն նրանով, ինչ իրենք գտել են, բացատրեք, որ արույրե թիթեղները արժեքավոր հնադարյան սուրբ գրություններ էին, որոնք պարունակում էին Հին Կտակարանի նույն գրություններից ու տեղեկություններից շատերը:

  • Ձեր կարծիքով, ինչու՞ էր արույրե թիթեղների բովանդակությունն այնքան կարևոր, որ այն ձեռք բերելու համար Նեփին ու նրա եղբայրները պետք է վերադառնային Երուսաղեմ:

  • Ի՞նչ են պարունակում սուրբ գրություններն այսօր, որ արժեքավոր է ձեր համար: Ինչու՞ է այն արժեքավոր ձեր համար:

1 Նեփի 3.10–31

Լաբանը գողանում է Լեքիի ունեցվածքը և փորձում է սպանել Նեփիին ու նրա եղբայրներին

Հրավիրեք դասարանի կեսին ուսումնասիրել արույրե թիթեղները ձեռք բերելու Նեփիի և նրա եղբայրների առաջին փորձը (տես 1 Նեփի 3.10–18): Հրավիրեք մյուս կեսին ուսումնասիրել երկրորդ փորձը (տես 1 Նեփի 3.21–31): Թող յուրաքանչյուր ուսանող ինքնուրույն աշխատի և պատասխանի հետևյալ հարցերին: Դուք կարող եք նրանց հանձնարարել, որ ավարտեն այս հանձնարարությունը իրենց սուրբ գրությունների ուսումնասիրության օրագրերում կամ դասարանային նոթատետրերում: Հարցերը գրեք գրատախտակին կամ յուրաքանչյուր ուսանողի համար պատրաստեք առանձին թերթիկներ այդ հարցերով:

  1. Ովքե՞ր գնացին:

  2. Ի՞նչ արեցին նրանք:

  3. Ի՞նչ նրանք արեցին, երբ փորձը ձախողվեց:

  4. Առաջին փորձը ուսումնասիրողների համար. Նեփին ու իր եղբայրները սկսեցին «չափազանց վշտանալ» այն բանից հետո, երբ նրանց չհաջողվեց ձեռք բերել արույրե թիթեղները (տես 1 Նեփի 3.14): Ինչպե՞ս էր Նեփիի արձագանքը այս ձախողմանը տարբեր իր եղբայրների արձագանքից: (Տես 1 Նեփի 3.15–16:)

    Երկրորդ փորձը ուսումնասիրողների համար. Լամանը և Լեմուելը բարկացած էին Նեփիի վրա այն բանից հետո, երբ նրանց երկրորդ փորձը ձախողվեց: Նրանք ծեծեցին նրան և կոպիտ խոսքեր ասացին նրան: Նույնիսկ այն բանից հետո, երբ հրեշտակը խոստացավ նրանց, որ Տերը Լաբանին կհանձներ նրանց ձեռքը, նրանք շարունակեցին տրտնջալ և կասկածել, որ կկարողանային հաջողության հասնել: Ինչպե՞ս կարող էր Լամանի և Լեմուելի բարկությունը ազդել հրեշտակի խոստումին հավատալու նրանց կարողության վրա: Ինչպե՞ս են բարկությունը, վիճաբանությունը, տրտնջալը և անհավատությունը խոչընդոտ հանդիսանում մեզ համար՝ Աստծո ուղերձները հասկանալու հարցում: (Տես 1 Նեփի 3.28–31, 3 Նեփի 11.29:)

  5. Ի՞նչ տպավորություններ դուք ստացաք ձեր ուսումնասիրած հատվածներից:

Պատասխանելու համար ուսանողներին բավականաչափ ժամանակ տրամադրելուց հետո հրավիրեք մի քանիսին կիսվել իրենց պատասխաններով:

1 Նեփի 4.1–38

Նեփին ձեռք է բերում արույրե թիթեղները

Խնդրեք ուսանողներին ներկայացնել հարցերը, որոնք Լամանը և Լեմուելը տվեցին 1 Նեփի 3.31 հատվածում:

Հրավիրեք մի ուսանողի բարձրաձայն կարդալ 1 Նեփի 4.1–3: Խնդրեք դասարանին ուշադրություն դարձնել, թե Նեփին ինչպես է պատասխանում իր եղբայրների հարցերին:

  • Ի՞նչ առնչություն ուներ Մովսեսի պատմությունը Լամանի և Լեմուելի հարցերի հետ:

Եթե ուսանողներին օգնություն է անհրաժեշտ այս հարցին պատասխանելու համար, բացատրեք, որ Մովսեսը հանդիպեց նմանատիպ դժվարությունների, երբ նրան պատվիրվեց Եգիպտոսից դուրս բերել Իսրայելի զավակներին: Չնայած Մովսեսը շարունակ փորձում էր, նա չէր կարողանում համոզել Փարավոնին ազատել ժողովրդին ստրկությունից: Այնուամենայնիվ, Մովսեսը շարունակում էր անել այն, ինչ Տերը պատվիրել էր նրան, և Տերը ճանապարհ պատրաստեց նրա համար, որ ազատեր Իսրայելի զավակներին: Նեփին կիրառեց Մովսեսի օրինակը իր ընտանիքի պայմաններում: Նա վստահ էր, որ Աստված նաև ճանապարհ կպատրաստեր նրանց համար:

  • Ի՞նչ սկզբունք եք դուք սովորել իր եղբայրներին տված Նեփիի պատասխանից:

Չնայած ուսանողները կարող են մի փոքր այլ կերպ ձևակերպել իրենց պատասխանները, նրանք պետք է արտահայտեն, որ եթե մենք հավատարմորեն շարունակենք անել այն, ինչ Տերն է պահանջում, չնայած դժվարություններին, Նա ճանապարհ կպատրաստի մեր համար, որ կատարենք այն, ինչ Նա պատվիրում է: (Դուք կարող եք գրել այս սկզբունքը գրատախտակի վրա:)

Անդրադարձեք այն նախադասություններին, որոնք դուք գրել էիք գրատախտակին դասի սկզբում:

  • Այժմ, երբ դուք ուսումնասիրել եք Նեփիի օրինակը, ո՞ր նախադասությունն է ձեր կարծիքով ամենալավը ամփոփում այն սկզբունքը, որը դուք նոր ներկայացրեցիք:

Մինչ ուսանողները ուսումնասիրեն Նեփիի հիշատակարանի մնացած մասը, խրախուսեք նրանց փնտրել այս սկզբունքի հաստատումը Նեփիի հաստատակամության արդյունքներում:

Թող մի ուսանող բարձրաձայն կարդա 1 Նեփի 4.4–6: Դուք կարող եք խորհուրդ տալ, որ ուսանողները նշեն 1 Նեփի 4.6 իրենց սուրբ գրություններում:

Օգնեք ուսանողներին հասկանալ, որ Տերը կարող է ոգեշնչել մեզ անել մի բան առանց անմիջապես հայտնելու, թե ինչպես, երբ կամ ինչու մենք պետք է դա անենք: Նեփին իմացավ ինչպես, երբ և ինչու Տերը կօգներ իրեն միայն այն բանից հետո, երբ նա թույլ տվեց Սուրբ Հոգուն առաջնորդել իրեն, և այն բանից հետո, երբ նա որոշեց առաջ գնալ հավատքով:

Ասեք ուսանողներին, որ Նախագահ Հարոլդ Բ. Լին նկատել է, որ մենք հաճախ ցանկանում ենք տեսնել «վերջը սկզբից», կամ արդյունքը, նախքան մենք կհետևենք Տիրոջ նշած ուղուն: Նա խորհուրդ է տվել.

«Դուք պետք է սովորեք քայլել մի փոքր լույսի ներքո, և գուցե մի քանի քայլ անեք խավարի մեջ [անիմանալին], և դուք կտեսնեք, որ լույսը կհայտնվի և կառաջնորդի ձեզ վերևից» (in Lucile C. Tate, Boyd K. Packer: A Watchman on the Tower [1995], 137–38):

Հրավիրեք մի ուսանողի բարձրաձայն կարդալ 1 Նեփի 4.7:

  • 1 Նեփի 4.7 հատվածում ի՞նչն է կարևոր «այնուամենայնիվ, ես առաջ գնացի» արտահայտությունում:

  • Ի՞նչ է ուսուցանում Նեփիի օրինակը «գնալ և անել» մեր պատրաստակամ լինելու և Տիրոջ կողմից առաջնորդվելու մեր կարողության կապի վերաբերյալ:

Հրավիրեք մի քանի ուսանողների հերթով բարձրաձայն կարդալ 1 Նեփի 4.8–18:

  • Ի՞նչ պատճառներ բերեց Հոգին Նեփիին Լաբանին սպանելու Տիրոջ պատվիրանի հետ կապված:

Ամփոփեք թիթեղները հաջողությամբ ձեռք բերելու Նեփիի պատմության մնացած մասը (տես 1 Նեփի 4.19–38), կամ հրավիրեք մի ուսանողի, ով ծանոթ է պատմության մնացած մասին, անել դա: Խնդրեք ուսանողներին ներկայացնել սկզբունքները, որոնք նրանք տեսնում են թիթեղները ձեռք բերելու այս վերջին ջանքերում: Այն բանից հետո, երբ նրանք կկիսվեն իրենց մտքերով, ավելացրեք ձեր վկայությունը, որ, երբ մենք հավատք ենք ցուցաբերում առ Աստված և փնտրում ենք անել այն, ինչ Նա պատվիրում է, նույնիսկ երբ մենք չենք կարողնում ելք տեսնել, Նա կառաջնորդի մեզ Սուրբ Հոգու ազդեցությամբ:

Որպեսզի օգնենք խորացնել ուսանողների վկայությունը այս սկզբունքի վերաբերյալ, հրավիրեք նրանց կիսվել փորձառություններով, երբ նրանք գործել են հավատքով, առանց նախապես իմանալու, թե ինչպես և երբ է Աստված օգնելու իրենց:

Հրավիրեք ուսանողներին խորհել մի իրավիճակի մասին, որում նրանք գտնվում են այժմ, որտեղ Տիրոջ պահանջները դժվար են իրենց համար: Խնդրեք նրանց իրենց սուրբ գրությունների ուսումնասիրության օրագրերում գրել, թե ինչ կանեն նրանք, որ ցույց տան Տիրոջը իրենց պատրաստակամությունը «գնալ և անել» այն, ինչ Նա պատվիրել է: Երբ նրանք ավարտեն գրելը, արտահայտեք ձեր վստահությունը, որ երբ մենք ցուցադրենք մեր հավատքը, Տերը կօրհնի մեզ կատարել այն, ինչ Նա պատվիրել է մեզ:

սերտելու համար նախատեսված սուրբ գրության նյութՍուրբ գրություններից սերտեք 1 Նեփի 3.7

Գրատախտակին գրեք հնազանդություն, հավատք, և վստահություն: Հարցրեք.

  • Նեփիի հնազանդության, հավատքի և վստահության ի՞նչ ապացույցներ եք տեսնում 1 Նեփի 3:

  • Ինչպե՞ս կարող են այս արժեքները օգնել մեկին, ով կանչված է միսիա ծառայելու:

Հրավիրեք յուրաքանչյուր ուսանողի նամակ գրել մի միսիոների, հարցնելով, թե ինչպե՞ս է նա տեսնում 1 Նեփի 3.7 գործի մեջ: Խրախուսեք ուսանողներին կիսվել իրենց նամակների ցանկացած պատասխանով:

Նշում. Յուրաքանչյուր դասի վերջում, որը պարունակում է սերտելու համար նախատեսված սուրբ գրություն, դուք կգտնեք լրացուցիչ վարժություն, որը նախատեսված է ուսանողներին օգնելու սերտելու հատվածը: Դուք կարող եք օգտագործել այս վարժությունները ցանկացած ժամանակ (լրացուցիչ տեղեկությունների համար տեսեք ցուցիչը և Ավետարանի ուսուցում և ուսումնասիրություն ձեռնարկը):

Բացատրական և պատմական տեղեկություն

1 Նեփի 4.10-12: Լաբանին սպանելու հրամանը

Ի՞նչ արդարացում կա Նեփիի պես արդար մարդու համար մեկ այլ անձնավորության կյանքից զրկելու հետ կապված: Մարգարե Ջոզեֆ Սմիթը ուսուցանել է, որ Տերն է որոշում ճշտի ու սխալի չափանիշները.

«Մի սպանիր»: Մեկ այլ անգամ Նա ասել է «Անպատճառ բնաջինջ արա»: Սա է սկզբունքը, որով ղեկավարվում է երկնքի իշխանությունը. հայտնությամբ, որը հարմարեցվում է պայմաններին, որոնցում դրված են արքայության զավակները: Ինչ էլ որ Աստված պահանջի՝ ճիշտ է, անկախ այն բանից, թե ինչ է դա, չնայած, որ մենք միգուցե չտեսնենք դրա պատճառը նախքան երկար ժամանակ կանցնի իրադարձությունների տեղի ունենալուց» (History of the Church, 5:135):

Լաբանին սպանելու Տիրոջ հրամանը ավելի լավ հասկանալու համար կարող է օգնել հետևյալը հիշելը.

  1. Տերը Լաբանին տվեց ամենաքիչը երկու հնարավորություն՝ տալու արույրե թիթեղները նախքան պահանջեց նրա կյանքը: Լաբանը ստախոս էր և գող, և նա ամենաքիչը երկու անգամ փորձեց սպանել: Մովսեսի օրենքի համաձայն գողությունը և սպանության փորձը երկուսն էլ կարող էին պատժվել մահով (տես Ելից ԻԱ.14, ԻԲ.2, Երկրորդ Օրինաց ԻԴ.7):

  2. Տերը ցանկանում էր, որ Լեքին ու նրա սերունդները ունենային արույրե թիթեղներում պարունակվող սուրբ գրությունների հիշատակարանները, նույնիսկ եթե անհրաժեշտ էր, որ «մեկ մարդ կորչի» (1 Նեփի 4.13) դա իրականացնելու համար: Արույրե թիթեղները օրհնեցին ոչ միայն Նեփիի և Մուղեկի ժողովուրդներին, այլ դրանք նաև ապահովեցին ոսկե թիթեղների որոշ բովանդակությունը (ինչպես օրինակ Եսայիայից որոշ մեջբերումները և Զենոսի այլաբանությունը ընտանի և վայրի ձիթենիների մասին): Մորմոնի Գիրքը օրհնել է միլիոնավոր մարդկանց և կօրհնի ավելի շատ միլիոնավորների: Վերջիվերջո, այս ամենը պատահեց, քանի որ Նեփին գնաց Լաբանի մոտ և հետևեց Հոգու առաջնորդությանը:

Որոշ մարդիկ սխալմամբ զգացել են, թե Տիրոջ Հոգին հուշել է նրանց անել մի բան, որը հակասել է նախկինում տրված Տիրոջ պատվիրանին: Նախագահ Էզրա Թավտ Բենսոնի հետևյալ խոսքերը ապահովում են երեք կարճ ստուգում, որոնք մենք կարող ենք օգտագործել, որպեսզի խուսափենք մոլորության մեջ ընկնելուց և հաստատ իմանանք, թե երբ են հոգևոր տպավորությունները գալիս Տիրոջից.

«1. Ի՞նչ են կանոնիկ գրքերն ասում դրա վերաբերյալ: «Օրէնքին ու վկայութեանը դիմեցէք, եթե նորանք չխօսեն այս խոսքի համեմատ, նորանք արշալոյս չունին», - ասել է Եսայիան:(Եսայիա Ը.20):…

Մենք պետք է ջանասիրաբար ուսումնասիրենք սուրբ գրությունները: Մորմոնի Գիրքը և Վարդապետություն և Ուխտերը առանձնահատուկ կարևորություն ունեն մեզ համար:…

2. Ի՞նչ են ասում այս մասին Վերջին Օրերի Սրբերի Եկեղեցու Նախագահները, մասնավորապես՝ ապրող Նախագահը:…

Այսօր աշխարհում կա միայն մեկ մարդ, ով խոսում է Եկեղեցու անունից: (Sես ՎևՈւ 132․7; 21․4։) Այդ տղամարդը [Եկեղեցու] Նախագահն է։ Քանի որ նա տալիս է մեզ Տիրոջ խոսքը այսօրվա համար, նրա խոսքերը ունեն նույնիսկ ավելի անհետաձգելի կարևորություն, քան մահացած մարգարեներինը: Երբ նա խոսում է Սուրբ Հոգու ներգործությամբ, նրա խոսքերը սուրբ գրություն են: (Տես ՎևՈՒ 68.4:)…

3. Երրորդ և վերջին թեսթը դա Սուրբ Հոգին է՝ Սուրբ Հոգու թեսթը: Այդ Հոգով մենք … «կարող ենք իմանալ ճշմարտությունը բոլոր բաների վերաբերյալ» (Մորոնի 10.5։) Այս ստուգումը կարող է միանգամայն արդյունավետ լինել միայն այն դեպքում, երբ մարդու Աստծո հետ շփման ուղիները մաքուր են և առաքինի և պարուրված չեն մեղքով» (in Conference Report, Oct. 1963, 16–17):