Emer Harris

(1781–1869)

Si Emer Harris ay ipinanganak sa Cambridge, New York, noong 1781. Pinakasalan niya si Roxana Peas noong 1802, ngunit nagdiborsyo sila noong 1818, at pinakasalan ni Harris si Deborah Lott sa sumunod na taon. Pumanaw si Deborah noong 1825, at pinakasalan ni Harris si Parna Chapell noong 1826. Si Harris ay nabinyagan sa Ang Simbahan ni Jesucristo ng mga Banal sa mga Huling Araw noong Pebrero 1831. Kalaunan sa taong iyon ay inorden siya bilang high priest at hinirang na maglingkod bilang tagasulat ni Joseph Smith. Noong Enero 1832, siya at si Simeon Carter ay tinagubilinan sa pamamagitan ng paghahayag na “magsama sa ministeryo” (Doktrina at mga Tipan 75:30), at noong 1832 at 1833, nagmisyon siya sa Pennsylvania at New York. Si Harris ay nanirahan sa iba’t ibang bahagi ng Ohio mula 1831 hanggang 1838, at noong 1835 nakibahagi siya sa paggawa ng Kirtland Temple. Lumipat siya sa Missouri noong Oktubre 1838, ngunit kasama ng iba pang mga Banal sa mga Huling Araw, hindi nagtagal ay pinalayas sila sa estadong iyon at napilitang manirahan muli sa Commerce, Illinois, na kalaunan ay pinalitan ng pangalang Nauvoo. Nakibahagi siya sa paggawa ng Nauvoo Temple at naging bahagi ng Nauvoo Legion. Noong 1852, lumipat siya sa Utah Territory, kung saan naglingkod siya sa ilang tungkulin sa Simbahan, at sa huli ay nanirahan sa Logan, kung saan siya pumanaw noong 1869.

Mga Reperensya sa Doktrina at mga Tipan

Doktrina at mga Tipan 75

Karagdagang Impormasyon

Mga bayograpikal na katotohanan at sources, The Joseph Smith Papers

Mga Banal, tomo 1, Ang Pamantayan ng Katotohanan

Emer Harris sa Church History Biographical Database

Tingnan ang tungkol kay Emer Harris sa FamilySearch