10-р бүлэг: 3 дахь өдөр
Сургаал ба Гэрээ 42:30–93
Оршил
2 дахь өдрийн хичээлийн оршлоос бошиглогч Иосеф Смит Сургаал ба Гэрээ 42-т өгөгдсөн илчлэлтийг “Огайод ‘хууль’ өгөгдөхөөр урьд нь Их Эзэний өгсөн амлалтын биелэлт болгон хүлээн авагдсан” гэдгийг уншиж мэддэг (С ба Г 42-р хэсгийн оршил). Сургаал ба Гэрээ 42-р хэсгийн энэ 2-р хичээлээр 30–93-р шүлгүүдийг авч үзэх ба Их Эзэн ядууст туслах, Сүмийн төрөл бүрийн ажлыг санхүүжүүлэх болон Огайод ирсэн бусад гэгээнтэнд туслахад Сүмийн гишүүдийг удирдан чиглүүлсэн материаллаг, санхүүгийн болон сүнслэг хуулиудыг танилцуулсан болохыг мэдэж авах болно.
Сургаал ба Гэрээ 42:30–42
Их Эзэн өргөлийн хуулийг өгөв
Сургаал ба Гэрээ 42:30–42 нь Их Эзэний өргөлийн хуулийг агуулдаг. Энэ хуулийн талаар мэдэж ойлгоход тань туслах даалгавар бол эдгээр шүлэгт өгөгдсөн өргөлийн хуулийн талаар хичээл бэлдэж, гэр бүлийн гишүүндээ эсвэл найздаа заах явдал юм. Тэгснээр өнөөдрийн хичээл дээр төрсөн сэтгэгдлээ судрын тэмдэглэл дээрээ бичих боломжтой байх болно.
Уг хичээлийг заахад бэлтгэхийн тулд Сургаал ба Гэрээ 42:30–42-ыг уншаад, дараах зүйлийг хий. Тухайлбал:
-
Зургаан шилэн аяганд скоч юм уу бал хэрэглэн зураас тэмдэглэнэ. (Боломжтой бол тунгалаг шилэн аяга хэрэглэ.) Аяга болгон дээр өөр өөр өндрийн хэмжээгээр зураас зур. Зааж байгаа хүндээ харуулахгүйн тулд аягануудыг нуух юм уу бүтээ.
-
Бүх аягыг зураас хүртэл нь усаар дүүргэхэд цаана нь илүү ус үлдэх усны сав бэлд. (Боломжтой бол, усанд өнгө оруулагч хийж болно.)
Зааж байгаа хүндээ устай сав харуулаад, саван дахь усаар орон нутаг дахь бүх эд хөрөнгө, баялгийг төлөөлүүлж байгаа гэж хэл. 1831 оны 2-р сард, Огайогийн Көртланд дахь Сүмийн гишүүд ядуусыг халамжилж, Огайод цугларахын тулд ихийг золиослон ирж байгаа хүмүүс болон Сүмийн үйл ажиллагааг санхүүжүүлэхэд туслах хэрэгтэй байсан.
Нэг суралцагчаас Сургаал ба Гэрээ 42:30-ийг чанга уншихыг хүсээд, ядуусын талаар Их Эзэн юу илчилснийг олж мэд. Ариулан адислах гэдэг үгийг тэмдэглэхийг түүнээс хүс.
ЗурагАхлагч Д.Тодд КристоффэрсонАрван хоёр Төлөөлөгчийн Чуулгын ахлагч Д.Тодд Кристоффэрсоны өгсөн ариулан адислах гэдэг үгийн тодорхойлолтыг унш. Тэрээр: “Өргөл болгох гэдэг нь аливаа зүйлийг нандин болгож мөн ариун зорилгод зориулахын тулд онцгойлон адислахыг хэлнэ” хэмээн хэлсэн (“Өргөл болгосон амьдралын тухай бодол эргэцүүлэл,” Ensign, 2010 оны 11-р сар, 16 эсвэл 2010 оны 10-р сарын Ерөнхий чуулган, 17).
Энэ үгийн тодорхойлолтыг судрын зах дээрээ 30-р шүлгийн хажууд бичихэд суралцагчаа урьж болно.
Сургаал ба Гэрээ 42 нь өргөлийн хууль хэмээх хуулийн зарчмуудыг агуулдаг болохыг тайлбарла. Эдгээр үндсэн зарчмыг ойлгоход суралцагчдадаа туслахын тулд Тэргүүн Зөвлөлийн ерөнхийлөгч Бага Ж.Рүбэн Кларкийн өгсөн дараах тайлбарыг чанга уншиж болно.
ЗурагЕрөнхийлөгч Бага Ж.Рүбэн Кларк“Бидэнд байгаа юм бүхэн Их Эзэнийх гэдэг нь [өргөлийн хуулийн] үндсэн зарчим юм; тиймээс, Их Эзэн биднээс аль нэг өмчөө эсвэл бүх өмч хөрөнгөө өгөхийг асууж болно, учир нь энэ бүхэн Түүнийх юм” (Conference Report, 1942 оны 10-р сар, 55).
Сургаал ба Гэрээ 42:30-д бид гачигдагсдын болон ядуусын өмнө ямар хариуцлага хүлээдэг гэж зааж байгааг суралцагчаасаа товч дүгнэн хэлэхийг хүс. (Дараах зарчимтай ойролцоо зүйлийг суралцагч тань хариулж болно. Бид гачигдагсдыг болон ядуусыг халамжлах ёстой. Та энэ шүлэг дээрээс уг зарчмыг зааж буй үг, хэллэгийг тэмдэглэхэд суралцагчаа урамшуулж болно.)
Дээр нь зураастай аягануудаа харуулаад, усны савнаас усаар дүүргэж эхэл. Нэг аягыг нь зураас хүртэл, гурван аягыг нь зураасаас дээгүүр, нөгөө хоёрыг нь зураасаас доогуур усаар дүүргэ. Аяга болгон дээрх зураас нь янз бүрийн гэр бүлийн хэрэгцээ болон шударга хүслийг төлөөлж байгааг тайлбарла. Жишээ нь, нэг хүүхэдтэй гэр бүлийн хэрэгцээ таван хүүхэдтэй гэр бүлийн хэрэгцээнээс өөр байж болно. Аяган дахь ус нь гэр бүл бүрийн эд баялаг, хөрөнгийг төлөөлж байгааг тайлбарла. Зураасаас доогуур устай аяганууд нь өөрсдийн хэрэгцээг хангах хангалттай мөнгө хөрөнгөгүй гэр бүлүүдийг төлөөлнө.
Сургаал ба Гэрээ 42:31-ийг чанга уншаад, судраа харан, дагаж уншихад суралцагчаа урь. Дараа нь дараах асуултуудыг тавь. Тухайлбал:
-
Эдгээр гэгээнтний хувьд өргөлийн хуулийн дагуу амьдрахын анхны алхам юу байсан бэ? (Өөрсдийн мөнгө төгрөг, эд хогшил болон эзэмшлийн газраа буюу өмч хөрөнгөө бишопдоо өгөх.)
-
Бид ядууст өгөх үедээ өөр бас хэнд өгдөг вэ? (Их Эзэн.)
Өөрсдийн өмч хөрөнгийг Сүмд өргөл болгон өгч байгаа Сүмийн гишүүдийг харуулахын тулд бүх аягатай усыг буцаан усны саванд хий.
Суралцагчаас Сургаал ба Гэрээ 42:32-ыг чанга уншихад уриад, өргөлийн хуулийн дагуу амьдрахын хоёр дахь алхмыг олж мэд. Дараа нь асуу.
-
Өргөлийн хуулийн дагуу амьдрах хоёр дахь алхам юу байсан бэ? (Гэр бүл болгон бишопоос хэрэгцээнийхээ дагуу баялгийн нэг хэсгийг хүлээн авч байсан.)
Өмч хөрөнгөө Сүмд өгснийхөө дараа, өөрөөр хэлбэл өргөл болгосныхоо дараа, гэр бүлүүдэд хэрэгцээнийх нь дагуу хөрөнгөнөөс нь буцааж өгч байсан. Тэр хэсэг нь уг гэр бүлийн хувийн өмч болж байв. Гэр бүлүүд нь өмчөө эзэмшиж мөн өөрсдийн хэрэгцээгээр ашиглаж болох байсан ч ашиглахдаа Бурханы өмнө хариуцлага хүлээж байлаа.
Аяга болгоныг зураас хүртэл нь усны савнаас усаар дүүргэ. Өргөлийн хуулийн дагуу, гэр бүл болгон өөрсдийнхөө хэрэгцээ болон шударга хүслийн дагуу хүлээж авч байсан гэдгийг тайлбарла. Бишоп болон уг өрхийн тэргүүн хоёр хоорондоо зөвлөлдөн, эдгээр шийдвэрийг гаргаж байв. Уг өмчийг эзэмших нь Их Эзэний бэлэг гэдгийг гэр бүлүүд ойлгож байсан ба эзэмшигчийнхээ хувьд тэд авсан зүйлээ Их Эзэний хаант улсыг барилцахад туслахад ашиглах үүрэг хариуцлага хүлээж байлаа.
Усны саванд үлдсэн усанд анхаарлыг нь хандуул. Сургаал ба Гэрээ 42:33–35-ыг чангаар уншихад нэг суралцагчийг уриад, өргөлөөр өгөгдсөн өмчийн үлдэгдэл буюу “үлдсэн” нь юунд зориулагдсан байсныг олж мэд. Дараа нь дараах асуултуудыг тавь.
-
Их Эзэн гэгээнтнүүдэд үлдсэн өмч хөрөнгөөр эсвэл “үлдсэн”-ээр нь юу хийхийг зааварласан бэ? (Тэд үүнийг ядууст туслах, Сүмийн байшин барилгыг санхүүжүүлж, гачигдагсдад туслахад ашиглах ёстой байсан.)
-
34-р шүлгээс олж мэдсэнээр, усны сав юу төлөөлж байгаа гэж та бодож байна вэ? (Агуулах.)
Сургаал ба Гэрээ 42:38-ыг чанга уншихад суралцагчаа уриад, өөрсдийн нөхцөл байдлаас үл харгалзан өргөлийн хуулийн дагуу амьдрахыг хүсэхэд хувь хүмүүст туслах үнэнийг олж мэд. Дараа нь асуу.
-
Их Эзэн бусдын төлөө сайныг үйлдэхтэй холбоотой ямар зарчим заасан бэ? (Хариулт нь дараах зарчимтай ойролцоо байх ёстой. Бид бусдын төлөө сайныг үйлдэхдээ Их Эзэнд үйлдэж байгаа хэрэг. Энэхүү үнэнийг судар дээрээ тэмдэглэхийг суралцагчаасаа хүсэх талаар бодож үз.)
-
Гэгээнтнүүдэд өөрсдийн өмч хөрөнгийг өргөл болгон өгөх хүсэлтэй болоход нь энэхүү үнэн хэрхэн тусалсан байж болох вэ? Энэхүү зарчмыг санаж байх нь амьдралд тань хэрхэн туслах вэ?
-
Та хэзээ бусдад туслахын тулд ямар нэгэн зүйл хийж байхдаа Их Эзэнд үйлчилж байгаагаа мэдэрч байсан бэ?
Бид эхэн үеийн гэгээнтнүүдийн адил өргөлийн хуулийн дагуу амьдрах зарлиг хүлээн аваагүй ч энэ хууль өнөөдөр ч хүчинтэй хэвээр гэдгийг тайлбарла. Ерөнхийлөгч Спэнсэр В.Кимбаллын хэлсэн дараах үгийг чанга уншаад, бидний хувьд өнөөдөр өргөлийн хуулийн дагуу амьдрах гэдэг нь юу гэсэн үг болох талаар сонсохыг суралцагчаасаа хүс. Тэрээр: “Өргөл гэдэг нь цаг зав, авьяас чадвар, эд хөрөнгөнөөсөө гачигдагсдыг сүнслэг мөн материаллаг байдлаар нь халамжлахын зэрэгцээ Их Эзэний хаант улсыг барьж байгуулахад зориулан өгөхийг хэлдэг” (“Welfare Services: The Gospel in Action,”Ensign, 1977 оны 11-р сар, 78).
Энэ тодорхойлолтыг судар дээрээ 30-р шүлгийн хажууд бичихэд суралцагчаа урамшуулж болно. Ерөнхийлөгч Кимбаллын хэлсэн үгийг уншсаныхаа дараа доорх асуултыг тавь.
-
Та цаг зав, авьяас чадвар, хөрөнгө мөнгө гээд юуг гачигдагсдад туслахад ашиглаж болох вэ?
Танд хэн нэгэн хүн цаг зав, авьяас чадвар, хөрөнгө мөнгөө өгч тусалж байсан талаарх туршлагаасаа хуваалц. Бусдын төлөө сайныг үйлдэхийн ач холбогдлын талаарх гэрчлэлээ хуваалц. Хичээлээ дуусгахдаа хичээлд оролцсон суралцагчдаа таларх.
-
Судрын тэмдэглэл дээрээ өөрийн заасан хүний нэрийг болон энэ даалгаврыг биелүүлсэн огноог бич. Заах үед тань юу нь хэцүү, юу нь сайн байсан талаар бодлоо тайлбарлан бич. Түүнчлэн бид бусдын төлөө сайныг үйлдэхдээ Их Эзэнд үйлдэж байдаг гэх зарчмын дагуу амьдарснаар та хэрхэн адислагдсанаа дүрслэн бич.
Сургаал ба Гэрээ 42:43–55
Их Эзэн үхэл, эдгэрлийн талаар зөвлөгөө өгөв
Сургаал ба Гэрээ 42:43–55-д Их Эзэн үхэл болон эдгэрлийн талаар заажээ. Тэрээр үхэл нь Өөрт нь нас нөгчсөн тэдэнд тааламжтай, харин Өөрт нь нас нөгчөөгүй тэдэнд гашуун байх болно хэмээн тайлбарласан. Түүнчлэн, Тэрээр өвчтэй хүмүүс “бүх өрөвч зөөлөн сэтгэлээр тэжээгдэ[ж]” (С ба Г 42:43), санваарын адислалыг хүлээн авах ёстой хэмээн хэлсэн. Зарим нь Есүс Христэд итгэх итгэлээрээ эдгээгдэх болно (С ба Г 42:48-ыг үзнэ үү).
Сургаал ба Гэрээ 42:56–69
Иосеф Смитэд нэмэлт судар мөн илчлэлтийг өгнө хэмээн Их Эзэн амлав
Сургаал ба Гэрээ 42:56–69-д бошиглогч Иосеф Смит илчлэлтийг үргэлжлүүлэн эрэлхийлбэл Их Эзэн үргэлжлүүлэн өгнө гэдгийг мэдэж авсан. Сургаал ба Гэрээ 42:61-ийг уншаад, илчлэлт хүлээн авах зарчмыг олж тогтоо. Өнөөдөр манай удирдагчид үргэлжлэн ирсээр буй илчлэлтийн зарчмаар Сүмийг удирдан, чиглүүлдэг.
-
61-р шүлгээс сурсан “хэрвээ–тэгвэл” гэсэн зарчмын мэдэгдлийг судрын тэмдэглэл дээрээ бич.
Сургаал ба Гэрээ 42:70–87
Санваарын удирдагчид ноцтой нүгэл үйлдсэн Сүмийн гишүүдтэй хэрхэн харьцах талаар заавар хүлээж авав
Сургаал ба Гэрээ 42:70–87 нь Сүмийн сахилга батын талаарх зарим үндсэн зарчим болон хуулиудыг агуулдаг. Сургаал ба Гэрээ 42:78-ыг уншаад, Их Эзэний Сүмийн гишүүн бүрд өгсөн зарлигийг тэмдэглэ.
Сургаал ба Гэрээ 42:88–93
Их Эзэн гэгээнтнүүдэд хувь хүн гомдлоо хэрхэн шийдэх талаар зааварлав
Хэн нэгэн хүн өөр хэн нэгний үг эсвэл үйлдэлд гомдож байхыг харж байснаа бод. Сургаал ба Гэрээ 42:88–89-ийг уншаад, хэрэв хэн нэгэн биднийг гомдоох аваас бид юу хийх ёстой талаар өгсөн Их Эзэний зааврыг олж мэд.
-
Судрын тэмдэглэл дээрээ дараах асуултуудад хариулж бич. Тухайлбал:
-
Хэн нэгэн биднийг гомдоосон үед бидний хамгийн түрүүнд хийх ёстой зүйл юу вэ?
-
Ийм хандлага нь яагаад танд тус болно гэж та бодож байна вэ?
-
Сургаал ба Гэрээ 42:90–91-ээс олон нийтийн өмнө гэм буруугаа хүлээх буюу зэмлэл хүртэх шаардлагатай зарим нүгэл, гэмт хэрэг байдаг болохыг бид мэдэж авдаг. Сургаал ба Гэрээ 42:92–93 дээрээс бид дараах зарчмыг мэдэж авдаг. Хувь хүмүүс хоорондын асуудлаа хоорондоо шийдэгдэх ёстой.
-
Яагаад хувь хүмүүс хоорондох асуудлаа хоорондоо шийдэх нь дээр гэж бодож байгаагаа судрын тэмдэглэл дээрээ бич.
Таныг гомдоосон хүн дээр очиж ярилцахад зориг шаардагддаг. Бусдын талаарх муу бодлоо зөвөөр шийдвэрлэхийг эрэлхийлэх үедээ Тэнгэрлэг Эцэгээс тусламж гуйн залбир.
-
Дараах өгүүлбэрийг судрын тэмдэглэл дээрээ өнөөдрийн даалгаврынхаа доор бич.
Би Сургаал ба Гэрээ 42:30–93-ыг судалж, энэ хичээлийг (огноо)-нд дуусгалаа.
Би дараах нэмэлт асуулт, бодол санаа ба ойлголтуудыг багштайгаа хуваалцахыг хүсэж байна. Тухайлбал: