“Female Relief Society of Nauvoo,” Mga Hisgutanan sa Kasaysayan sa Simbahan
“Female Relief Society of Nauvoo”
Female Relief Society of Nauvoo
Sa sayong bahin sa Marso 1842, sa dihang ang mananahi nga si Margaret Cook nakabantay nga ang mga trabahante sa gitukod nga Templo sa Nauvoo nanginahanglan og mga kamisin, siya misugyot sa ideya nga magtukod og usa ka grupo sa tigtahi ngadto sa iyang agalon, nga si Sarah Kimball. Ang tinguha alang sa mga kababayen-an nga mag-organisar og mabination nga mga kapunongan aron sa pagpasiugda sa sosyal ug relihiyoso nga mga kawsa ug aron sa pagsulbad sa kakabus ug ubang panginahanglan sa komunidad komon sa Amerika niadtong ika-19 nga siglo.1 Giimbitar ni Sarah ang iyang mga higala ug kasilinganan sa pag-apil sa ilang “Kapunongan sa Kababayen-an” ug mihangyo ni Eliza R. Snow sa pagsulat og konstitusyon, usa ka sundanan sa organisasyon nga komon sa ubang mga kapunongan nianang higayuna. Si Eliza mipresentar sa iyang dokumento ngadto ni Joseph Smith, kinsa miingon nga mao kadto ang labing maayo nga iyang nakita apan ang Ginoo sa iyang hunahuna adunay “mas maayo pa” alang sa kababayen-an. Gusto niyang organisahon sila “subay sa sundanan, o han-ay, sa pagkapari” ug maghatag sa kapunongan og usa ka importanting luna diha sa Simbahan sa Dios.2 Si Sarah Kimbal mihinumdom nga si Joseph miingon, “Ang organisasyon sa Simbahan ni Kristo wala gayud mahingpit hangtud ang kababayen-an na-organisar.”3
Ang tindahan ni Joseph Smith sa Nauvoo kon diin ang Relief Society na-organisar niadtong Marso 17, 1842.
Niadtong Marso 17, 1842, baynte ka kababayen-an ang nagpundok diha sa dakong lawak nga pundukanan ibabaw sa Red Brick nga Tindahan ni Joseph Smith. Niining unang panagtigum sa pagtukod, si Joseph Smith misugyot sa kababayen-an nga magpili og presidente, kinsa maoy mopili og duha ka magtatambag.4 Si Emma Smith napili nga presidente pinaagi sa nagkahiusang boto sa tanan, ug siya mipili ni Sarah M. Cleveland ug Elizabeth Ann Whitney isip mga magtatambag. Human sa pagpili, si Joseph Smith mibasa sa pagpadayag nga iyang nadawat alang kang Emma Smith niadtong 1830 nga mipahayag kaniya nga usa ka “Pinili nga Babaye.” Si Emma adunay responsibilidad, si Joseph mitudlo, “sa pagpatin-aw sa mga kasulatan ngadto sa tanan; ug sa pagtudlo sa babaye nga kabahin sa komunidad; ug nga dili siya lamang, apan ang uban, makaangkon sa samang mga panalangin.”5
“Mohimo kita og butang nga dili ordinaryo,” si Emma Smith mipahayag atol niining unang panagtigum. “Paabuton nato ang talagsaong mga okasyon ug dinaliang mga tawag sa panabang.”6 Ang nagkapundok nga kababayen-an nagpili usab og usa ka sekretarya ug usa ka tesorero [treasurer]. Kining kababayen-an “gi-orden,” o gi-set apart, sumala sa mga instruksyon ni Joseph Smith, pinaagi sa pagpandong sa mga kamot. Ang kapunongan paspas nga midako ug, sa pag-abut sa Marso 1844, kapin 1,300 ka kababayen-an ang nadawat isip mga miyembro.
Pinaagi sa Relief Society [Kapunongan sa Kahupayan], ang Ginoo mihatag sa kababayen-an og usa ka organisadong luna ug katungod diha sa Simbahan. “Karon akong ihatag ang yawe kanimo sa ngalan sa Dios,” si Joseph Smith mipahayag niadtong Abril 28, 1842, “ ug kini nga kapunongan magmaya ug ang kahibalo ug kaalam modagayday gikan niining higayuna.” Ang Relief Society importante kaayo sa pagpangandam sa kababayen-an sa Simbahan sa pagdawat og mga ordinansa sa templo.7 Sa usa ka bahin nagpasabut sa ilang umaabut nga partisipasyon niining mga ordinansa, si Joseph mitudlo nga ang kababayen-an sa dili madugay “sila makabaton sa mga pribilehiyo ug mga panalangin, ug mga gasa sa pagkapari.”8
Ang mga sakop sa Relief Society sa Nauvoo mipunting sa duha ka dagkong katuyoan sama sa gitudlo ni Joseph Smith: “ang Kapunongan dili lamang aron sa paghupay sa kabus, apan sa pagluwas sa mga kalag.”9 Ang talaan sa ilang panagtigum mirekord, sama pananglit , giunsa niining kababayen-an ang pag-atiman sa midagsa nga kabus nga mga langyaw gikan sa Missouri ug sa British Isles. Ang mga miyembro nagpadayon sa pagtagbaw sa panginahanglan sa ilang isig ka mga Santos pinaagi sa pagbinayloay og mga serbisyo sa isig ka sakop sa Relief Society, nangayo og mga donasyon alang sa mga nanginahanglan, ug pagtino sa panginahanglan sa mga pamilya diha sa komunidad. Ang Relief Society nalambigit usab sa politika, naghatud og mga petisyon ngadto sa gobernador sa Illinois nga si Thomas Carlin.10
Agig dugang sa manggiloy-on ug buhat isip maayong lungsuranon, ang Relief Society nagsilbi og importante nga espiritwal nga mga katuyoan. Si Joseph Smith mihatag kanila og dugang nga mga instruksyon mahitungod sa ilang relihiyusong mga responsibilidad ug katungod, nakigsulti ngadto kanila sa unom sa siyam ka mga okasyon nga siya mitambong sa mga panagtigum sa Relief Society niadtong 1842.11 Ang kababayen-an mihatag usab og tambag sa usag usa atol sa mga panagtigum ug nagpahigayon og teyolohikanhon nga mga panaghisgut, sama sa gibuhat sa mga kalalakin-an sa Tunghaan sa mga Elder diha sa Kirtland. Ang kababayen-an migamit sa espiritwal nga mga gasa ug nagpamatuod ngadto sa usag usa. Si Lucy Mack Smith, sama pananglit, misulti sa nagkapundok nga kababayen-an nga “hinumduman ang mga pulong ni Alma” ug “mag-ampo pag-ayo sa buntag, udto ug gabii.” Siya nahadlok nga siya “sa pipila ka higayon nalang makahimamat sa Kapunongan,” siya misulti kanila, tungod sa iyang dako na nga pangidaron. Apan siya “buot mobilin sa iyang pagpamatuod nga ang Basahon ni Mormon mao ang basahon sa Dios.”12
Ang Relief Society sa sinugdanan nagpundok atol sa tingpamulak ug ting-init nga mga bulan sa 1842 ug 1843. Pagka-Marso 1844, sa dihang ang kapunongan unang nagtigum alang sa tuig, si Emma Smith namulong sa upat ka panagtigum mahitungod sa panginahanglan alang sa moral nga kalunsay, malagmit isip pamaagi sa dili kaayo tataw nga pagbabag sa gitugutan nga dinaghang kaminyoon.13 Human niini nga mga panagtigum, ang Relief Society wala na magpundok pag-usab sa Nauvoo.14 Si Brigham Young pormal nga mipahunong sa mga panagtigum sa kapunongan niadtong Marso 1845.
Si Eliza R. Snow midala sa talaan nga libro sa Relief Society sa Nauvoo ngadto sa Utah ug, sa dihang gihangyo ni Presidente Brigham Young sa pagtabang nga ma-establisar pag-usab ang Relief Society, migamit niini isip sundanan sa pagtabang sa mga bishop ug kababayen-an sa tibuok ginsakupan nga yuta sa awahing bahin sa 1860. Kining mga kapunongan sa Utah nagtamud ngadto sa Female Relief Society sa Nauvoo alang sa inspirasyon, mitipig sa ilang kaugalingon nga talaan nga mga libro ug kanunayng maghisgut sa istorya sa ilang sinugdanan ug ang paglakip ni Joseph Smith sa kababayen-an sa pagpahiuli sa Simbahan.15
Ulohang pahina sa talaan nga libro sa Relief Society sa Nauvoo.