Lucy Mack Smith

Natawo niadtong 1775, si Lucy Mack nagdako sa relihiyoso kaayo nga panimalay. Sa iyang pagpangita alang sa kaluwasan, gitun-an ni Lucy ang Biblia, nag-ampo, mihisgut sa mga damgo ug mga panan-awon, ug mitambong og mga miting sa relihiyon, ug sa relihiyosong mga kalihokan nga gipaluyohan sa nagkadaiyang mga tinuohan. Naminyo siya ni Joseph Smith Sr. niadtong 1796 ug nahimong inahan ni Joseph Smith Jr. ug sa lain pang 10 ka mga anak. Gitudloan ni Lucy ang iyang mga anak sa pagbasa gamit ang Biblia ug mangluhod uban sa pamilya diha sa pag-ampo. Mipasakop siya sa makadiyot sa kongregasyon sa Presbyterian didto sa Palmyra apan andam nga midawat sa gipahiuli nga ebanghelyo ug nabunyagan sa wala madugay human naorganisar ang Simbahan niadtong Abril 6, 1830.

Si Lucy Mack Smith usa ka lig-on nga tigpanalipod sa bag-o pa ang Simbahan. Usa siya ka saksi sa mga panghitabo nga naglibot sa paghubad sa Basahon ni Mormon ug mipamatuod nga iyang naalsa ang mga palid ug nakagunit sa Urim ug Thummim.¹ Nangulo siya sa usa ka grupo sa mga Santos sa Ulahing mga Adlaw gikan sa Fayette, New York, hangtud sa Kirtland, Ohio, niadtong 1831.² Iyang gikuyogan ang iyang anak nga si Hyrum sa misyon ngadto sa Detroit sa ulahing bahin nianang tuiga ug gawasnong mipamatuod sa Basahon ni Mormon.³ Sa Kirtland, mitabang siya nga panguluhan ang paningkamot sa paglikom og kwarta aron sa pagtukod og usa ka eskwelahan.⁴ Miapil siya sa Relief Society sa Nauvoo sa edad nga 66 niadtong Marso 24, 1842, ug misulti sa nagkapundok nga kababayen-an nga siya “nanghinaut nga ang Ginoo mopanalangin ug moabag sa Society sa pagpakaon sa gutom, pagsinina sa hubo.”⁵ Ang mga Santos miatiman sa respetado nga inahan sa Propeta ug naminaw sa iyang tambag, nagpasabut sa iyang kamapinanggaon isip “Inahang Smith.”⁶

Niadtong 1844, pipila ka bulan human sa mga kamatayon nilang, Joseph, Hyrum, and Samuel Smith, si Lucy Mack Smith misugod sa pagpundok sa iyang kasaysayan, inabagan sa mga eskriba nga si Martha ug Howard Coray. Bisan sa katigulangon ug sa dili maayong panglawas, mibati siya nga “usa kini ka pribilehiyo ingon man akong katungdanan … sa paghatag og usa ka istorya (isip akong katapusan nga pagpamatuod ngadto sa kalibutan diin sa dili madugay akong biyaan).”⁷ Nakompleto ang manuskrito ni Lucy pagka-Oktubre 1845, ug mipahibalo siya sa publiko sa proyekto sa kinatibuk-ang komperensya.⁸ Sa dihang ang kadaghanan sa mga miyembro sa Simbahan milalin sa kasadpan paingon sa Great Basin pagkahuman sa 1846, ang kahimsug ni Lucy nagkakunhod, ug gipili niya nga magpabilin uban sa iyang pamilya didto sa Illinois. Gigahin niya ang nahibilin nga katuigan sa iyang kinabuhi uban sa iyang anak nga si Lucy Millikin, sa iyang umagad nga si Emma, ug sa iyang mga apo nga mga lalaki. Si Lucy Mack Smith namatay niadtong 1856.

Si Apostol Orson Pratt unang mimantala sa kasaysayan ni Lucy niadtong 1853. Sa mga 1860, si Presidente Brigham Young dayag nga misaway sa kasaysayan ni Lucy, gitudlo ang mga sayop sa petsa ug ang kronolohiya ug miinsister nga ang panumduman ni Lucy hinay na. Si Presidente Young mihangyo sa iyang magtatambag nga si George A. Smith (pag-umangkon ni Lucy) sa pagkorihir sa sayop ug “ipamantala kini ngadto sa kalibutan.”⁹ Ang mga rebisyon wala kaabut og 2 porsyento sa teksto.

Sama sa tanang mga tinubdan nga ang kasamtangang mga saysay naggikan sa panumduman, ang istorya ni Lucy Mack adunay mga depekto, mga pagsulabi, ug mga pagpihig. Ang mga historian kinsa mituon sa iyang saysay, hinoon, mitapos nga ang mga sayop sa iyang kasaysayan “ginagmay ra ug dili kasagaran.” Sa 200 ka mga pangalan sa iyang kasaysayan, kapin sa 190 ang napamatud-an sa laing mga tinubdan.¹⁰ Dugang pa, walay ebidensya nga hinay na ang panumduman ni Lucy. Usa ka bisita sa Nauvoo niadtong 1855 nakigsulti ngadto ni Lucy ug nakabantay nga siya “adunay pay talagsaon nga paminsar.”¹¹ Ang mga saysay ni Lucy nakahatag og paglantaw ngadto sa iyang personalidad, tinuohan, ug pagsabut sa calling ni Joseph Smith. Nagsangkap usa kini og mga dakong istorya sa pamilyang Smith ug sa mga panghitabo sa kasaysayan sa Simbahan diin walay laing tinubdan. Gigamit ang iyang kasaysayan sa mga Santos una sa paghulagway niining mga panghitabo ug alang sa dialogo nga iyang giasoy pag-usab gikan sa iyang panumduman.

May Kalabutan nga Hisgutanan: Female Relief Society of Nauvoo, Joseph Sr. and Lucy Mack Smith Family, Departure from Nauvoo