Mga Pagpahinungod sa Templo ug mga Pag-ampo sa Pagpahinungod

Ang Biblia naglakip sa detalyado nga mga istorya kon sa unsa nga paagi ang karaan nga mga Israelite mipahinungod sa ilang mga tabernakulo ug mga templo aron sa paggahin niini isip sagrado nga mga dapit.¹ Ang mga Santos sa Ulahing mga Adlaw mipahinungod usab og mga templo ug ubang sagrado nga mga dapit aron magamit sa buhat sa Ginoo, sugod sa Templo sa Kirtland.

Agig dugang sa gihimo nga pormal nga mga tulumanon sa pagpahinungod sa nakompleto nga mga templo, ang unang mga Santos sa Ulahing mga Adlaw mihimo og sundanan sa seremonya alang sa pagpahinungod sa mga dapit sa templo. Labi na, ang unang mga Santos mihimo og espesyal nga mga seremonya sa pagpahimutang sa mga bato sa pamag-ang [cornerstones] alang sa mga templo sa Independence, Missouri, niadtong 1831; Kirtland, Ohio, niadtong 1833; Far West, Missouri, niadtong 1838; Nauvoo, Illinois, niadtong 1841; ug sa Siyudad sa Salt Lake, Utah, niadtong 1853.² Ang mga seremonya naglakip sa pagpanganta, mga wali, mga prosesyon, ug mga pag-ampo, ug, sa Nauvoo, usa ka military honor guard ug banda nga naggamit og instrumento nga brass. Sugod sa Nauvoo, usa sa mga bato sa pamag-ang gikalot aron kabutangan sa mga dokumento ug sa ubang mga artifact [butang nga handumanan] nga may kalabutan sa templo. Kini nga praktis nagpadayon karon, apan ang makuti nga mga seremonya sa bato sa pamag-ang wala na himoa. Alang sa pipila ka templo, lakip sa Nauvoo ug sa Siyudad sa Salt Lake, ang pagbutang sa ulohang bato sa templo gihimo usab pinaagi sa seremonya, nga naglakip sa musika, pag-ampo, ug mga singgit sa “Hosanna.”

Pagkahuman sa pagtukod, ang mga pagpahinungod nag-andam sa mga templo alang sa ilang sagrado nga mga katuyoan. Ang pagpahinungod sa Balay sa Ginoo didto sa Kirtland niadtong Marso 27, 1836, naghimo og usa ka sundanan alang sa umaabut nga mga pagpahinungod sa templo. Ang usa ka adlaw nga seremonya naglakip sa mga pakigpulong, musika, sa pagpangalagad sa sakrament, ug pag-ampo sa pagpahinungod, ug ang Singgit nga Hosanna. Daghang mga Santos sa Ulahing mga Adlaw kinsa mitambong niining unang pagpahinungod sa templo mirekord sa hilabihan nga mga espirituhanong timailhan, lakip na sa tingog sa nagdahunog nga kusog nga hangin, pagsulti og mga pinulongan, mga panan-awon, ug pagbisita sa mga anghel. Laing tulumanon sa pagpahinungod paglabay sa upat ka adlaw gihimo alang niadtong wala makasulod sa unang pagpahinungod tungod sa kadaghan sa mga tawo. Didto sa Kirtland, ang mga sesyon bukas ngadto sa publiko. Sa Nauvoo, ang mga tulumanon sa gipahinungod sa publiko ug pribado gihimo. Alang sa ulahing mga templo, ang mga miyembro ra sa Simbahan kinsa giisyuhan og mga tiket o mga rekomend gidawat ngadto sa mga sesyon sa pagpahinungod. Ang naandan nga balik-balik nga mga sesyon sa pagpahinungod sa templo nagpadayon, nagtugot nga daghang mga miyembro ang makaapil.

Si Joseph Smith mihatag sa pag-ampo sa pagpahinungod alang sa Templo sa Kirtland, nagbasa gikan sa giandam nga mensahe. Ang dinasig nga pag-ampo girekord ni Joseph Smith, Oliver Cowdery, ug sa uban sa wala pa ang adlaw sa pagpahinungod.³ Alang sa misunod nga mga templo, ang dinasig nga mga pag-ampo sa pagpahinungod gisulat sa usa ka tigdumalang lider sa Simbahan, giandam ang matag usa alang sa maong templo. Ang mga pag-ampo nanghangyo sa Ginoo sa pagdawat sa halad sa templo ug nangamuyo Kaniya sa pagbalaan ug pagpanalipod sa templo. Sa kasagaran, ilabi na sa unang mga templo, ang mga pag-ampo mipanalangin sa mga elemento nga gigamit sa pagtukod—bato, semento, balas, masilya, o mga bintana. Kadaghanan sa mga pag-ampo sa pagpahinungod naglakip sa pagtudlo og piho nga mga kwarto sa templo nga nagdetalye sa piho nga gamit niini. Kini nga mga pag-ampo nagtawag sa presensya sa Ginoo ug nag-ila sa templo nga Iyang balay, nagtimaan niini nga usa ka dapit sa pagkonektar uban sa balaan.

Kadtong kinsa motambong og pagpahinungod sa templo moapil sa Singgit nga Hosanna. Kini nga singgit susama sa pagdayeg nga gihalad sa mga sumusunod ni Jesukristo sa Iyang madaugon nga pagsulod ngadto sa Jerusalem.⁴ Ang kongregasyon mobarug, mowara-wara og puti nga panyo, ug magkahiusa sa pagsingit sa makatulo ka higayon sa mga pulong, “Hosanna, Hosanna, Hosanna ngadto sa Dios ug sa Kordero.”⁵ Ang singgit tapuson sa “Amen, Amen, ug Amen.”⁶ Didto sa Templo sa Kirtland, ang pag-ampo gisugdan sa pagkanta sa himno “Hosanna to God and the Lamb,” nga nailhan karon nga “Ang Espiritu sa Dios.” Kini nga himno gikanta sa tanang mga pagpahinungod sa templo sukad.

Tali niadtong 1999 ug 2002, ang mga tulumanon sa pagpahinungod sa pipila ka bag-ong gitukod nga mga templo sa importante nga makasaysayanong mga dapit, nga naglakip sa Palmyra, New York; Winter Quarters, Nebraska; ug Nauvoo, Illinois, gisibya gamit ang luwas nga sistema sa satellite, nagtugot sa mga miyembro sa Simbahan sa layong mga lugar nga makaapil. Kini nag-establisar og sundanan sa pagsibya sa mga pagpahinungod sa templo ngadto sa lokal nga mga sentro sa stake aron nga ang tanang takus nga mga miyembro sa distrito sa templo ug usahay sa gipalapdan nga dapit makaapil.

Sa samang paagi ang mga Santos sa Ulahing mga Adlaw mipahinungod sa daghang mga dapit alang sa buhat sa Dios. Kini naglakip sa mga tabernakulo, mga meetinghouse, mga Relief Society hall, ug mga panimalay. Ang mga nasud o mga dapit sa kalibutan gipahinungod usab alang sa pagsangyaw sa ebanghelyo.

Mga Kapanguhaan sa Simbahan

Gordon B. Hinckley, “Why These Temples?” Ensign, Ago. 1974, 37–47.

“Minutes and Prayer of Dedication, 27 March 1836 [D&C 109],” sa Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, ug Steven C. Harper, eds., Documents, Volume 5: Oktubre 1835–Enero 1838. Vol. 5 sa mga serye sa mga Dokumento sa The Joseph Smith Papers, gi-edit ni Ronald K. Esplin, Matthew J. Grow, ug Matthew C. Godfrey (Salt Lake City: Church Historian’s Press, 2017), 188–209.

Bibliograpiya

Ang mosunod nga pagmantala naghatag og dugang nga impormasyon kabahin niining hisgutanan. Pinaagi sa pag-refer o pag-link nimo ngadto niining mga kapanguhaan, wala kami mo-endorso o mogarantiya sa sulod o sa mga panglantaw sa tagsulat.

D. Arthur Haycock, “Temples: LDS Temple Dedications,” sa Daniel H. Ludlow, ed., Encyclopedia of Mormonism (New York: MacMillan, 1992), 4:1455–56.

May Kalabutan nga mga Hisgutanan: Kirtland Temple, Solemn Assemblies, Temple Endowment, Dedication of the Holy Land

Mubo nga mga Sulat

1. Tan-awa sa Numeros 7; 1 Mga Hari 8.

2. Bisan og ang unang mga templo wala makompleto didto sa Missouri, ang mga bato sa pamag-ang nagpabilin sa dapit isip handumanan.

3. Tan-awa sa Makasaysayanong Pasiuna sa “Minutes and Prayer of Dedication, 27 Marso 1836 [D&P 109],” sa Brent M. Rogers, Elizabeth A. Kuehn, Christian K. Heimburger, Max H Parkin, Alexander L. Baugh, ug Steven C. Harper, eds., Documents, Volume 5: Oktubre 1835–Enero 1838. Vol. 5 sa mga serye sa mga Dokumento sa The Joseph Smith Papers, gi-edit ni Ronald K. Esplin, Matthew J. Grow, ug Matthew C. Godfrey (Salt Lake City: Church Historian’s Press, 2017), 188–91.

4. Tan-awa sa Mateo 21:1, 8–9; Marcos 11:8–10; Juan 12:12–13.

5. Tan-awa sa 2 Mga Cronicas 5:11–14; Job 38:7; Mateo 21:1–11; 3 Nephi 11:17; Doktrina ug mga Pakigsaad 19:37; 36:3; 39:19; 124:101.

6. Gordon B. Hinckley, “This Great Millennial Year,” Ensign, Nob. 2000, 70. Sa makasaysayanong kalamboan sa singgit, tan-awa sa Jacob W. Olmstead, “From Pentecost to Administration: A Reappraisal of the History of the Hosanna Shout,” Mormon Historical Studies, vol. 2, nu. 2 (Tinglarag 2001), 7–37.