Амьд бошиглогч

Оршил

Есүс Христийн Хожмын Үеийн Гэгээнтнүүдийн Сүмийн гишүүд амьд бошиглогч, үзмэрч болон илчлэгчээр удирдагдахаар адислагдсан. Эрт цагт бошиглогчид нь Их Эзэнээр сонгогдож, Түүний өмнөөс ярих эрх мэдэлтэй байсан. Үүнтэй адилаар бидний өдрүүдэд амьд бошиглогчдын үгс бидэнд болон дэлхийд Их Эзэний дуу хоолойг төлөөлдөг (C ба Г 1:37–38-ыг үзнэ үү). Энэ хичээл дээр суралцагчид Их Эзэний сонгосон бошиглогч болох Сүмийн ерөнхийлөгчөөс сүүлийн үед өгсөн зөвлөмжийг судална.

Заах зөвлөмж

Амьд бошиглогчоор дамжуулан ирсээр байгаа илчлэлт

Дараах асуултыг самбар дээр бич. Таны хувьд хамгийн чухал ерөнхийлөгч хэн бэ?

Ангийнхныг энэ асуултыг эргэцүүлэн бодоод, ерөнхийлөгч Эзра Тафт Бэнсоны хэлсэн дараах мэдэгдлийг унших явцдаа хариултыг олж сонсоход урь.

“Өнөөг хүртэл бидний санаа зовж байгаа зүйл болох хамгийн чухал бошиглогч бол бидний эрин үед амьдарч байгаа нэгэн юм” (“Jesus Christ—Gifts and Expectations,” New Era, 1975 оны 5-р сар, 17).

Амьд бошиглогч яагаад бидний хувьд хамгийн чухал бошиглогч гэж та нар бодож байна вэ?

Суралцагчдыг хариулсны дараа ерөнхийлөгч Бэнсоны хэлсэн үгийг үргэлжлүүлэн унш.

“Энэ нь Бурханаас бидэнд өгсөн өнөө үеийн заавруудыг авсан бошиглогч юм. Эрин үе бүрд эртний судар дээр нэмээд амьд бошиглогчдоос ирэх одоогийн судрууд хэрэгтэй. Тиймээс, та нарын хийж байх хамгийн чухал уншлага, эргэцүүлэн бодох зүйл Их Эзэний дуу хоолой болж байгаа хүнээс ирэх сүнслэгээр өдөөгдсөн үгс байх ёстой. Энэ нь Сүмд түүний хэлсэн үгсийг тогтмол анхааралтай уншиж, ашиглах нь яагаад чухал байдаг шалтгаан юм (“Jesus Christ—Gifts and Expectations,” 17).

Бид Тэргүүн Зөвлөл ба Арван хоёр Төлөөлөгчийн Чуулгын бүх гишүүнийг бошиглогч, үзмэрч, илчлэгчид хэмээн дэмжин баталдаг гэдгийг тайлбарла. Гэхдээ Сүмийн ерөнхийлөгч нь дэлхий дээрх санваарын бүх түлхүүрийг ашиглах эрх мэдэлтэй цорын ганц хүн бөгөөд бүх Сүмийн төлөө илчлэлт хүлээн авч мөн зарлах эрхтэй цорын ганц хүн юм.

Эдгээр хичээлээс таны сурсан зүйлс дээр үндэслэн Сүмийн ерөнхийлөгч хэзээ бүх Сүмийн төлөө илчлэлтүүдийг зарлаж эсвэл Сүмийн үйл ажиллагаагаа явуулдаг арга замд чухал өөрчлөлтүүдийг зарлаж байсан бэ? (Хариултуудад ерөнхийлөгч Вилфорд Вүдраффын олон эхнэр авах ёсны талаарх тунхаг бичиг [Албан тунхаг 1-ийг үзнэ үү], ерөнхийлөгч Жозеф Ф.Смитийн мөнх бус байдлын дараах сүнсний дэлхийн тухай өмнө мэдэгдээгүй үнэнүүдийг тунхагласан үе [C ба Г 138-ыг үзнэ үү] болон ерөнхийлөгч Спэнсэр В.Кимбаллын санваарын адислалууд Сүмийн зохистой бүх гишүүнд боломжтой болсныг тунхагласан [Албан тунхаг 2-ыг үзнэ үү] үе зэрэг багтаж болно.)

Нэг суралцагчийг ерөнхийлөгч Дийтр Ф.Угдорфын хэлсэн дараах мэдэгдлийг чанга уншихад урь. Ангийнхныг бидний өдрүүд дэх илчлэлтийн тухай үнэнийг сонсоход урь.

“Бурхан Өөрийн хүүхдүүдтэй ярилцсаар байгаа гэдэг нь Есүс Христийн Сүмийн Сэргээлтийн алдар суут захиасуудын нэг билээ. Тэрбээр тэнгэрийн хаа нэгтээ далдлагдаагүй бөгөөд эрт үеийн адилаар өнөөдөр ч ярьдаг юм.

Бурханы хүн төрөлхтөнд өгсөн үнэлж баршгүй заавруудыг бид Библи, Мормоны Ном, Сургаал ба Гэрээ болон Агуу Үнэт Сувдаас олох боломжтой. Нэмж хэлэхэд, Их Эзэн Өөрийн үйлчлэгчдээр дамжуулан бидэнтэй ярьдаг мөн ирэх Ерөнхий чуулганд ч ярих болно” (“Why Do We Need Prophets?” Ensign, 2012 оны 3-р сар, 4).

Илчлэлтийн тухай ямар сургаалыг ерөнхийлөгч Угдорф заасан бэ? (Суралцагчид өөр үгс хэрэглэж болох ч дараах сургаалын мэдэгдэлтэй адилыг олж тогтоох ёстой. Их Эзэн өнөөдөр ч амьд бошиглогчдоороо дамжуулан бидэнтэй ярьдаг. Та энэ сургаалыг самбар дээр бичиж болно.)
Бид амьд бошиглогчийн үгсийг хаанаас олж авч болох вэ? (Ерөнхий чуулган, Сүмийн сэтгүүлүүд, LDS.org ба mormonchannel.org гэх мэт хариултууд байж болно.)

Их Эзэний амьд бошиглогчоороо дамжуулан ярьсаар байгаагийн ач холбогдлыг ойлгоход нь суралцагчдад туслахын тулд нэг суралцагчийг ерөнхийлөгч Жон Тэйлорын хэлсэн дараах үгийг чанга уншихад урь. Ангийнхнаас бошиглогчдоор дамжуулан илчлэлт үргэлжлүүлэн ирэх нь яагаад чухал болохыг олж сонсохыг хүс.

“Бидэнд тэнгэр дэх амьд санваараас гарч, дэлхий дэх амьд санваараар дамжин ирдэг амьд мод—амьд усан оргилуур—амьд оюун ухаан шаардлагатай. … Адам хамгийн анх Бурхантай харилцаж эхэлсэн цагаас хойш … сүм хийгээд хувь хүмүүст тохиолдож байсан онцгой нөхцөл байдлуудад тохирсон шинэ илчлэлтүүд шаардлагатай байсан. Адамын илчлэлтүүд Ноаг хөвөгч авдраа хийхэд зааварчлаагүй, Ноагийн илчлэлтүүд Лотыг Содомыг орхи гэж хэлээгүй мөн эдгээрийн аль нь ч Израилын хүүхдүүдийг Египетээс гаргах талаар яриагүй (The Gospel Kingdom, Г.Хомэр Дурхам [1987], 34-т).

Ерөнхийлөгч Тэйлорын хэлснээр бидэнд яагаад амьд бошиглогч хэрэгтэй байдаг вэ? (Амьд бошиглогчоор дамжуулан Бурхан хэрэгцээ болон цаг үеийн нөхцөл байдлуудад тохируулан тусгай удирдамж өгдөг.)
Илчлэлт үргэлжлэн ирэх шаардлагатайг ойлгох нь амьд бошиглогчийн үгсийг сонсох эсвэл унших арга замд тань хэрхэн нөлөөлж чадах вэ?

Амьд бошиглогчийн зөвлөгөөг дагах нь

Суралцагчдад амьд бошиглогчийн зөвлөгөөг ярилцахад туслахын тулд өнгөрсөн жил Сүмийн ерөнхийлөгчийн Ерөнхий чуулган дээр хэлсэн нэг эсвэл түүнээс дээш хэлсэн үгийг сонго. Ангид байгаа бүх суралцагчид хэлсэн үгийн нэг хувийг өг. Суралцагчдад амьд бошиглогчийн одоо зааж буй сургаал эсвэл зарчмуудыг олж мэдэх хугацаа өг.

Суралцагчдад унших хангалттай цаг гаргаж өгсний дараа тэднийг Сүмийн ерөнхийлөгчийн зааж буй сургаал эсвэл зарчмуудыг жагсаан бичихэд урь. Нэг суралцагчийг тэдний хариултыг самбар дээр бичихэд урь.

Тэдний олж тогтоосон сургаалууд эсвэл зарчмуудын ач холбогдлыг ойлгож, мэдрэхэд нь суралцагчдад туслахын тулд дараах асуултуудаас заримыг эсвэл бүгдийг асуу.

Эдгээр зарчим эсвэл сургаалын аль нь танд илүү их хамаатай гэж та бодож байна вэ? Яагаад?
Та болон танай гэр бүлийнхэн ямар арга замаар бошиглогчийн зөвлөгөөг дагахаар хичээж байна вэ?
Сүмийн ерөнхийлөгчийн одоо зааж буй зүйлсийг судалж мөн амьдралдаа хэрэгжүүлэх нь яагаад чухал гэж та бодож байна вэ?

Дараах асуултуудыг самбар дээр бичээд, суралцагчдаас тэдгээрийг хичээлийн дэвтэр юм уу судрын тэмдэглэл дээрээ хариулж бичихийг хүс.

Таны дөнгөж сая судалсан амьд бошиглогчийн үгсээс Их Эзэн таныг ямар захиасыг хүлээн аваасай гэж хүсэж байгаа гэж та мэдэрсэн бэ?

Та бошиглогчийн уг зөвлөгөөний дагуу юу хийх вэ?

Бичсэн зүйлийнхээ дагуу амьдрахыг суралцагчдаас хүс. Тэднийг ийнхүү үйлдэх үед Тэнгэрлэг Эцэг тэднийг адислах болно хэмээх итгэлтэй байж болно гэж гэрчил. Амьд бошиглогчдын сургаалуудыг тогтмол судалж, хэрэгжүүлдэг байхад суралцагчдыг урамшуулан дэмж.

Амьд бошиглогчдын талаар гэрчлэлээ хуваалцахад суралцагчдыг урь.

Энэ семинарын жилийн төгсгөлд дүгнэлт болгож судруудыг өдөр бүр үргэлжлүүлэн судлахад суралцагчдыг урамшуулан дэмж. Хэрэв тэд ирэх жил семинарт дахин хамрагдах бол та тэдэнд Хуучин Гэрээг судалж эхлэхийг санал болгож болно. Та нэг суралцагчийг хэдийгээр семинар хичээллээгүй байсан ч судраас өдөр бүр уншихаа үргэлжлүүлснээр хүлээн авсан адислалуудаа гэрчлэхийг урьж болно.

Тайлбар ба нөхцөл байдлын тухай мэдээлэл

Амьд бошиглогчдыг дагахын ач холбогдол

Ерөнхийлөгч Эзра Тафт Бэнсон ингэж заажээ.

“Бид мөнх бус бүх хүнээс илүүтэй Есүс Христийн Хожмын Үеийн Гэгээнтнүүдийн Сүмийн ерөнхийлөгч, бошиглогч, үзмэрч, илчлэгч, удирдагч дээр хараагаа бат чиглүүлж байх ёстой. Тэр бол амьд усны оргилуурт хамгийн ойр зогсдог хүн юм. Зөвхөн бошиглогчоор дамжуулан авч чадах зарим тэнгэрлэг зааварчилга байдаг. Их Эзэнд хэр ойр байгаагаа хэмжих хамгийн сайн арга бол Түүний дэлхий дээрх төлөөлөгч болох бошиглогч-ерөнхийлөгчийн сүнслэгээр өдөөгдсөн үгсийн талаар ямар сэтгэгдэлтэй байгаа болон үүн дээр хэрхэн үйлдэхээс харагдана. Бошиглогчдын сүнслэгээр өдөөгдсөн үгс шалихгүй дэмий зүйл биш. Бүх хүн илэрхийлэлт авах эрхтэй бөгөөд зарим хүн өөрсдийн тодорхой даалгаврын хүрээнд илчлэлт авах эрхтэй байдаг. Гэвч цорын ганц хүн Сүмд болон дэлхийд Их Эзэний төлөөний хүн болон ярих эрхтэй бөгөөд тэр бол Сүмийн ерөнхийлөгч мөн. Бусад бүх хүний үгс түүний сүнслэгээр өдөөгдсөн үгсээр дэнслэгдэх ёстой.

Бошиглогч хэдийгээр эгэл хүн ч, Бурхан түүнийг Сүмийг нь төөрөлдүүлэхийг зөвшөөрөхгүй. (Discourses of Wilford Woodruff, pp. 212–213-ыг үзнэ үү.) Бурхан бүх зүйлийг эхлэлээс төгсгөл хүртэл мэддэг бөгөөд хэн ч тохиолдлоор Есүс Христийн сүмийн ерөнхийлөгч болж эсвэл азаар тэндээ үлдэж эсвэл санаандгүй байдлаар гэртээ дуудагддаггүй.

Та бидний хувьд хамгийн чухал бошиглогч бол манай эрин үед амьдарч байгаа тэр хүн юм. Энэ бол Бурханаас бидэнд ирдэг өнөөдрийн зааварчилгаануудыг авдаг бошиглогч юм. Бурханы Адамд өгсөн илчлэлт Ноад хөвөгч авдар хэрхэн барихыг зааварчлаагүй юм. Эрин үе бүрд эртний судар дээр нэмээд амьд бошиглогчдоос ирэх одоогийн судрууд хэрэгтэй. Тиймээс, та нарын хийж байх хамгийн чухал уншлага, эргэцүүлэн бодох зүйл Их Эзэний дуу хоолой болж байгаа хүнээс ирэх сүнслэгээр өдөөгдсөн үгс байх ёстой. Ийм учраас Сүмийн хэвлэлд хандаж мөн түүний үгсийг анхааралтай унших нь та нарт нэн чухал” (“Jesus Christ—Gifts and Expectations,” New Era, 1975 оны 5-р сар, 16–17).

Ерөнхийлөгч бага Ж.Рүбэн Кларк түүнчлэн амьд бошиглогчдыг сонсох хэрэгцээг онцолжээ.

“Хэдэн жилийн өмнө нэгэн товхимол миний ширээн дээр байсан юм. … Гаднах хуудсан дээр нь ‘бидэнд бошиглогч хэрэгтэй’ гэсэн байсныг уншаад би өнгөрсөн ба одоог бодоход миний бодлоор дэлхий ямар сохор байна вэ гэж бодсон. …

… Бид бошиглогчоор дутаагүй. Бидэнд дутагдаж байгаа зүйл бол сонсох чих мөн Бурханы зарлигласнаар амьдрах шийдвэр юм” (Conference Report, 1948 оны 10-р сар, 79–80-д).

Ерөнхийлөгч Вилфорд Вүдрафф

“Та нарыг замыг алдагдуулахыг надад буюу энэ Сүмийн ерөнхийлөгчид ч мөн өөр хэнд ч, хэзээ ч Их Эзэн үл зөвшөөрөх болно. Энэ нь хөтөлбөрт байхгүй. Энэ нь Бурханы оюунд байхгүй. Хэрэв би үүнийг хийхээр хичээх аваас, Их Эзэн намайг албан тушаалаас минь зайлуулах буйзаа, мөн хүмүүний үрсийг Бурханы илчлэлтүүд хийгээд өөрсдийнх нь үүргээс гажуудуулахаар оролдсон бусад хэнийг ч Тэрбээр мөн үүнчлэн зайлуулах болно” (Албан тунхаг 1).