Wāhanga 100
He whakakitenga e hoatu nei ki a Hōhepa Mete te Poropiti rāua ko Hirini Rikitana, ki Piripaka, Niu Ioka, Oketopa 12, 1833. I te āhua āwangawanga rāua mō ō rāua whānau i te mea kua ngaro atu rāua i ō rāua whānau mō ngā rā āhua maha.
1–4, Ka kauhau a Hōhepa rāua ko Hirini i te rongopai mō te whakaoranga wairua; 5–8, Ka hoatu ngā kupu hei kōrero ki a rāua i taua hāora pū anō; 9–12, Me tū a Hirini hei kaikōrero, ā, me tū a Hōhepa hei kaiwhakakite, ā, hei mea kaha ki te whakaatu; 13–17, Ka mairangatia ake e te Ariki tētahi iwi urutapu, ā, ka whakaorangia te hunga ngohengohe.
1 He pono, pēnei tā te Ariki ki a kōrua, e ōku hoa e Hirini kōrua ko Hōhepa, kei te pai ō kōrua whānau; kei roto rātou i ōku ringaringa, ā, māku rātou e mea kia rite ki tāku e pai ai; nā te mea he mana kei roto i ahau.
2 Nō reira, whai mai i ahau, ā, whakarongo ki ngā tohutohu e hoatu nei e au ki a kōrua.
3 Nana, titiro, he tokomaha ōku tangata i tēnei wāhi, i roto i ngā rohe huri noa; ā, ka huakina ake tētahi kuaha i roto i ngā rohe huri noa i tēnei whenua whakaterāwhiti.
4 Nō reira, kua tukua koutou e au, e te Ariki, kia haere mai ai ki tēnei wāhi; nā te mea pēnei e tika pū ana i roto i ahau mō te whakaoranga wairua.
5 Nō reira, he pono tāku e mea atu nei ki a kōrua, kia kaha ō kōrua reo ki tēnei iwi; kōrerohia atu ngā whakaaro e whakatō ai au i roto i ō kōrua ngākau, ā, ka kore kōrua e whakapōauautia i te aroaro o te tangata.
6 Nā te mea ka hoatu ki a kōrua i taua hāora pū anō, āe rā, i taua wā tonu, he aha hei kōrerotanga mā kōrua.
7 Engari he whakahaunga tāku e hoatu nei ki a kōrua, nā, ka whakapuaki kōrua i ngā mea katoa i runga i tōku ingoa, i runga i te ngākau pono, i runga i te wairua whai whakaaro, i roto i ngā mea katoa.
8 Ā, kei te hoatu tēnei whakaari e au ki a koutou, nā, ki te kaha koutou ki te mahi pēnei ka tau iho te Wairua Tapu ki te whakaatu atu i ngā mea katoa e kōrerotia nei e kōrua.
9 Ā, e tika pū ana i roto i ahau māu, e taku pono e Hirini, māu hei kaikōrero ki tēnei iwi; āe rā, he pono, māku koe e whakamana ki tēnei karangatanga, hei kaikōrero pū anō ki taku pononga a Hōhepa.
10 Ā, ka hoatu e au he mana ki a ia kia kaha ia i runga i te whakaaturanga.
11 Ā, ka hoatu e au he mana ki a koe kia kaha ki te whakamārama i ngā karaipiture katoa, kia taea ai e koe hei kaikōrero ki a ia, ā, māna hoki hei kaiwhakakite mōu, kia mōhio tūturu ai koe e pā ana ki ngā mea o taku kīngitanga i runga i te whenua.
12 Nō reira, me hono tonu tō haere, ā, tukua ō kōrua hoa kia hari; nana rā, titiro, kei tō kōrua taha au tae atu ki te mutunga.
13 Ināianei ā kei te hoatu e au tētahi kupu e pā ana ki a Hīona. Ka hokona a Hīona, ahakoa ka kohetea ia mō tētahi wā poto.
14 Kei roto i ōku ringaringa ō kōrua teina, aku pononga a Orihana Haiti rāua ko Hōani Koura; ki te pupuri rāua i aku whakahaunga ka whakaorangia rāua.
15 Nō reira, tukua ō kōrua ngākau kia mauritau; nā te mea ka mahitahi ngā mea katoa hei painga mō rātou kia hīkoi tōtika, ā, mō te whakatapunga o te hāhi.
16 Nā te mea ka mairanga ake ki ahau ake anō tētahi iwi urutapu, e mahi ai ki ahau i runga i te tika;
17 Ā, ka whakaorangia te hunga katoa e karanga ake ki te ingoa o te Ariki, me te pupuri i ana whakahaunga. Koia anō. Āmine.