1 Nana ināianei, ko taku kupu tēnei ki a koe, nā, i te mea i tukuna ake e koe aua tuhinga i hoatu ai ki a koe he mana hei whakapākehā mā roto i te Urama me te Tāmama, ki roto ki ngā ringaringa o tētahi tangata kino, kua ngaro atu i a koe.

2 Ā, i ngaro atu anō i a koe tō takohatanga i taua wā anō, ā, ka pōuri haere tōu hinengaro.

3 Hei aha koa, kua whakahokia atu ināianei ki a koe; nō reira tirohia iho kia pono koe me te ū tonu atu ki te whakaoti atu i te toenga o ngā mahi whakapākehā kia pērā me tāu i tīmata ai.

4 Kaua e tere atu tō oma, e nui atu rānei tō mahi, i te kaha o tōu tīnana me ngā mea e hoatu ai ki a koe hei whakapākehā; engari kia tākare tonu tae atu ki te mutunga.

5 Me inoi i ngā wā katoa, kia riro i a koe te wikitōria; āe rā, kia wikitōria koe i runga i a Hātana, ā, kia puta atu koe i ngā ringaringa o ngā pononga a Hātana e hāpai ake nei i tāna mahi.

6 Nana, kua whai atu rātou ki te whakangaro atu i a koe; āe rā, ko taua tangata pū anō i whakawhirinakihia nei e koe, nā, kua whai ia ki te whakangaro i a koe.

7 Ā, mō tēnei take au i kī ake he tangata kino, nā te mea kua whai atu ia ki te tango atu i aua mea kua tukuna iho ki a koe; ā, kua whai atu anō ia ki te whakangaro atu i tō takohatanga.

8 Ā, i te mea kua tukuna atu e koe ngā tuhinga ki roto ki ōna ringaringa, nana, kua murua atu ērā mea e ngā tāngata kino i a koe.

9 Nō reira, nāu ērā mea i tuku atu, āe rā, ērā mea e tapu ana, ki te kino.

10 Ā, nana, kua whakapurua iho e Hātana ki roto i ō rātou ngākau kia panoni i ngā kupu nāu i mea ai kia tuhia, kua whakapākehātia rānei e koe, ā, kua taka atu i ōu ringaringa.

11 Ā nana, ko taku kupu tēnei ki a koe, i te mea kua panoni rātou i ngā kupu, kua rerekē hoki te pānuitanga i tāu i whakapākehā ai me tāu i mea ai kia tuhia;

12 Ā, i runga i tēnei aronga, kua whai atu te rēwera kia whakatakotoria iho tētahi rautaki tinihanga, kia whakangaro atu i tēnei mahi;

13 Nā te mea kua whakapurua iho ki roto ki ō rātou ngākau kia pēnei ai, nā, mā te rukahu e kī ai rātou kua mau koe i roto i ngā kupu kua whakapākehātia e koe i runga i te whakataruna.

14 He pono, tāku e mea atu nei ki a koe, nā, e kore nei au e tuku kia tutuki i a Hātana tana rautaki kino i roto i tēnei mea.

15 Nana rā, nāna tēnā i whakapuru ki roto i ō rātou ngākau kia whakawai i te Ariki tō Atua, kia tono kia whakapākehātia anō.

16 Kātahi rā, nana, ka kī, ā, ka whakaaro ake i ō rātou ngākau—Ka kite tātou mehemea kua hoatu mana te Atua ki a ia kia whakapākehā ai; mehemea āe, ka hoatu mana anō ia ki a ia;

17 Ā, ki te hoatu mana anō te Atua ki a ia, ki te whakapākehā anō ia rānei, kia pēnei rānei te kōrero, ki te whakaputa ake anō ia i aua kupu anō, nana, kei a tātou aua mea anō, ā, kua panonitia ērā e tātou;

18 Nō reira e kore e ōrite ērā, ā, ka kī ake tātou kua rukahu ia i roto i āna kupu, ā, kāore ōna takohatanga, ā, kāore hoki ōna mana;

19 Nō reira ka whakangaro tātou i a ia, me tana mahi anō hoki; ā, ka pēnei tātou kia kore ai tātou e whakamā hei te mutunga, ā, kia whiwhi ai hoki tātou ki te korōria o te ao.

20 He pono, he pono, tāku e mea atu nei ki a koe, nā, he kaha tā Hātana pupuri i runga i ō rātou ngākau; e whakaohooho ake ana ia i a rātou kia haututū ki te pai;

21 Ā, kua pokea ō rātou ngākau, kua kikī anō hoki i te whakarihariha me ngā mōrikarika; ā, e nui ake ana tō rātou aroha ki te pōuritanga i tō rātou ki te māramatanga, nā te mea he kino ā rātou mahinga; nō reira e kore rātou e ui mai ki a au.

22 E whakaohooho ake ana a Hātana i a rātou kia ārahina ai e ia ō rātou wairua ki te whakangaromanga.

23 Ā pēnei, kua whakatakotoria iho e ia tētahi rautaki tinihanga, i runga i te whakaaro kia whakangaromia te mahi a te Atua; engari māku tēnei e tono i ō rātou ringaringa, ā, ka riro tēnei hei whakamākanga, hei whakahēnga mō rātou a te rā whakawā.

24 Āe rā, e whakaohoohoa ake ana e ia ō rātou ngākau kia riri ki tēnei mahi.

25 Āe rā, ka kī atu ia ki a rātou: e tinihanga, e whanga puku ki te hopu, kia whakangaro koe; nana, ehara tēnei i te kino. Ā, pēnei tana whakapatipati i a rātou, me te kī atu ki a rātou, nā, ehara te rukahu i te hara kia hopu ai i tētahi tangata i roto i tētahi rukahu, kia whakangaro rātou i a ia.

26 Ā, pēnei tana whakapatipati i a rātou, ā, ka ārahina haeretia rātou tae noa atu ki tana tōnga ihotanga i ō rātou wairua ki te ao rēwera; ā pēnei mea ai ia kia hopu rātou i a rātou anō i roto i tō rātou ake māhanga.

27 Ā pēnei tonu tana haere ki runga, ki raro, ki wiwī, ki wawā i te ao, e whai ana ki te whakangaro i ngā wairua o te tangata.

28 He pono, he pono, tāku e mea atu nei ki a koe, auē te mate mō te tangata e rukahu ana hei tinihanga nā te mea e whakaaro ana ia kei te rukahu tētahi atu hei tinihanga, nā te mea kāore ngā mea pērā e wātea ana i te tika a te Atua.

29 Nana, ināianei, nā rātou ēnei kupu i panoni, nā te mea e kī ana a Hātana ki a rātou: Nāna koutou i tinihanga—ā pēnei tana kukume atu i a rātou i runga i te whakapatipati ki te mahi kino, kia mea ai i a koe kia whakawai i te Ariki tōu Atua.

30 Nana, ko taku kupu tēnei ki a koe, nā, e kore koe e whakapākehā anō i aua kupu kua puta atu i ō ringaringa;

31 Nana, nā, e kore e tutuki i a rātou ā rātou rautaki tinihanga i runga i te rukahu mō aua kupu. Nā te mea, nana, ki te whakaputa mai koe i aua kupu anō ka kī ake rātou kua rukahu koe, ā, kua whakataruna koe i roto i tō mahi whakapākehā, engari kōtiti koe i tāu i tuhituhi ai.

32 Ā, nana, ka pānuitia atu tēnei e rātou, ā, ka whakapakeke a Hātana i ngā ngākau o te iwi kia riri ai ki a koe, kia kore rātou e whakapono ki aku kupu.

33 Pēnei whakaaro ai a Hātana kia taea e ia tō whakaaturanga i roto i tēnei whakatipuranga, kia kore ai te mahi e puta atu ki tēnei whakatipuranga.

34 Engari nana, he whai mātauranga tēnei, ā, nā te mea kei te whakaatu atu au he whai mātauranga ki a koe, ka hoatu e au he whakahaunga ki a koe e pā ana ki ēnei mea, hei meatanga māu, kaua e whakakitea atu tēnei ki te ao kia oti noa i a koe te mahi whakapākehātanga.

35 Kaua e mīharo i taku meatanga atu ki a koe: he whai mātauranga tēnei, kaua e whakakitea atu ki te ao—nā te mea i kī au, kaua e whakakitea atu ki te ao, kia tiakina ai koe.

36 Nana, kāore au e kī, kaua e whakakitea atu e koe ki te hunga tika;

37 Engari i te mea kāore koe e mātau i ngā wā katoa ki te hunga tika, kāore rānei e mātau i ngā wā katoa ko tēhea te hunga kino i te hunga tika, nō reira ko taku kupu tēnei ki a koe, kia nohopuku koe tae noa ki te wā e pai ana ki au kia whakaputaina atu ēnei mea ki te ao e pā ana ki tēnei mea.

38 Ināianei ā, he pono tāku e mea atu nei ki a koe, kua whaowhaoa tētahi tuhinga mō aua mea nāu nei i tuhi, aua mea kua taka atu i ōu ringaringa, ki runga i ngā papa a Nīwhai;

39 Āe rā, e mahara ana anō hoki koe i kīa nei i roto i aua tuhituhinga, nā, kua tukuna tētahi kōrero nui ake mō ēnei mea i runga i ngā papa a Nīwhai.

40 Ināianei ā, i te mea he nui ake te tuhinga i whaowhaoa nei i runga i ngā papa a Nīwhai e pā ana ki ngā mea, i runga i tōku whai mātauranga, e hiahia ana au ki te kawe mai i te mōhioranga ki te iwi i roto i tēnei tuhinga—

41 Nō reira, māu e whakapākehā ngā whaowhaonga kei runga i ngā papa a Nīwhai, heke iho ana tae noa ki te whakahaeretanga a kīngi Peniamine, kia tae rānei koe ki ērā mea nāu nei i whakapākehā, kua puritia nei e koe;

42 Ā nana, māu tēnā e whakaputa hei tuhituhinga a Nīwhai; ā pēnei, māku te hunga nā rātou nei aku kupu i panoni e whakapōauautia.

43 E kore au e tuku kia whakangaro rātou i taku mahi; āe rā, ka whakaatu atu au ki a rātou, nā, he nui ake tōku mātauranga i tō te tinihanga a te rēwera.

44 Nana, he wāhi noa iho tō rātou, he whakarāpopototanga noa rānei o te tuhinga a Nīwhai.

45 Nana, he maha ngā mea kua whaowhaoa nei i runga i ngā papa a Nīwhai e tino whakamārama ana i ngā tikanga o tāku rongopai; nō reira, he whai mātauranga i roto i ahau kia whakapākehā koe i tēnei wāhanga tuatahi o ngā whaowhaonga a Nīwhai, ka tuku atu ai i tēnei tuhituhinga.

46 Ā nana, kei roto i ngā wāhi toenga katoa o tēnei tuhituhinga aua wāhi katoa o taku rongopai i manakohia nei e aku poropiti tapu, āe rā, me aku apataki, i roto i ā rātou inoi kia puta mai ai ki tēnei iwi.

47 Ā, i kī atu au ki a rātou, nā, me tuku atu ki a rātou e rite ana ki tō rātou whakapono i roto i ā rātou inoi;

48 Āe rā, koinei tō rātou whakapono—ko taku rongopai, nāku anō i hoatu ki a rātou e kauwhau atu ai rātou i ō rātou rā, me kore pea e puta ake ki ō rātou tuākana ngā Rāmana, waihoki, te hunga katoa kua meinga hei Rāmana he mea nā ā rātou tītorehanga.

49 Nā, ehara tēnei i te katoa—ko tō rātou whakapono i roto i ā rātou inoinga ko tēnei, nā, kia whakamōhiotia anō hoki tēnei rongopai, mehemea e taea ai kia nōhia ai tēnei whenua e ētahi atu iwi;

50 Ā pēnei, i mahue iho i a rātou tētahi manaakitanga ki runga i tēnei whenua i roto i ā rātou inoi, kia whiwhi ai te hunga katoa e whakapono ana i tēnei rongopai i tēnei whenua ki te oranga tonutanga;

51 Āe rā, kia wātea ki ngā mea katoa ahakoa nō tēhea iwi, hapū, reo, huihuinga tāngata rānei.

52 Ināianei ā, nana, ka rite ki tō rātou whakapono i roto i ā rātou inoi taku kawe mai i tēnei wāhanga o taku rongopai ki te mātauranga o tōku iwi. Nana, kāore e kawea mai ia e au hei whakangaro i ērā mea kua whiwhi nei rātou, engari hei hanga ake.

53 Ā, mō tēnei take tāku i kī ai: Ki te kore tēnei whakatipuranga e whakapakeke i ō rātou ngākau, ka whakapūmau au i taku hāhi ki waenganui i a rātou.

54 Nā, kāore au e kī pēnei ana hei whakangaro i taku hāhi, engari e kī pēnei ana au hei hanga ake i taku hāhi;

55 Nō reira, me kaua e wehi ngā tāngata katoa o taku hāhi, nā te mea ka whiwhi te hunga pērā ki te kīngitanga o te rangi.

56 Engari ko te hunga e kore nei e wehi ana i ahau, e kore rānei e pupuri i aku whakahaunga engari e hangaia ake ana he hāhi ki a rātou anō hei rapu taonga, āe rā, me te hunga katoa e mahi whakarihariha ana me te hanga ake i te kīngitanga o te rēwera—āe rā, he pono, he pono tāku e mea atu nei ki a koe, nā, ko rātou te hunga māku e whakararu, ā, e mea kia ngāueue, kia tūoioi ki te pokapū.

57 Nana, ko Ihu Karaiti ahau, te Tama a te Atua. I haere mai au ki oku ake, ā, kīhai ōku ake i manako mai ki a au.

58 Ko au te māramatanga e tiaho mai ana i roto i te pōuritanga, ā, tē mātauria hoki e te pōuritanga.

59 Ko au te mea i kī ai—He hipi anō āku ehara nei i tēnei kāhui—ki aku apataki, ā, he tokomaha i reira kīhai i mārama mai ki aku kupu.

60 Ā, māku e whakakite atu ki tēnei iwi, nā, he hipi anō āku, ā, he peka anō rātou nō te whare o Hākopa;

61 Ā, māku ā rātou mahi whakamīharo e kukume mai ki roto i te māramatanga, i meatia ai e rātou i runga i tōku ingoa;

62 Āe rā, māku anō e kukume mai ki roto i te māramatanga taku rongopai i minitatia ai ki a rātou, ā, nana, e kore rātou e whakakore atu i tāu i whiwhi nei, engari ka hangaia atu e rātou, ā, ka kukume mai i ngā pitopito pono o taku akoranga, āe rā, ko te akoranga anake kei roto nei i ahau.

63 Ā, ka pēnei tāku kia whakapūmauhia taku rongopai, kia kore ai e nui rawa atu ngā tautohetohenga; āe rā, e whakaohooho ake ana a Hātana i ngā ngākau o te iwi kia tautohetohe ai e pā ana ki ngā pitopito o taku akoranga; ā, e hapa ana rātou i ēnei mea, nā te mea e whakapeau rātou i ngā karaipiture, ā, kāore rātou e mārama ana ki ēnā mea.

64 Nō reira, māku tēnei mea ngaro nui e hura atu ki a rātou;

65 Nana, māku rātou e whakakao anō nei he heihei e whakakao ana i āna pīpī ki raro i ōna parirau, ki te kore rātou e whakapakeke i ō rātou ngākau;

66 Āe rā, ki te haere mai rātou, e pai ana, me te inu noa i ngā wai o te ora.

67 Nana, koinei taku akoranga—ko te tangata e rīpenetā me te haere mai ki ahau, nō taku hāhi ia.

68 Ko te tangata e nui ake ai, e iti iho ai rānei tana whakapuaki i tēnei, ehara nōku tērā, engari he hoariri ki ahau; nō reira ehara nō taku hāhi ia.

69 Ināianei ā, nana, ko te tangata nō taku hāhi, e ū tonu ana ki taku hāhi ki te mutunga, māku ia e whakapūmau ki runga i taku kāmaka, ā, e kore ngā kūaha o te ao rēwera e wikitōria ki runga ki a rātou.

70 Ināianei ā, me mahara ki ngā kupu o te mea ko ia te oranga me te māramatanga o te ao, tō koutou Kaihoko, tō koutou Ariki me tō koutou Atua. Āmine.