Wāhanga 9
He whakakitenga mā roto i a Hōhepa Mete te Poropiti ki a Oriwa Kautere, ki Hamoni, Penihiwheinia, Aperira 1829. Ka whakatūpatoria a Oriwa kia manawanui ai, ā, ka ākina ia kia tau te ngākau ki te tuhituhi, hei kaituhi mō te kaiwhakapākehā, kaua hei ngana ki te whakapākehā.
1–6, He tuhinga onamata anō kāore anō kia whakapākehātia; 7–14, Ka whakapākehātia te Pukapuka a Moromona i runga i te rangahau me te whakamanatanga ā-wairua.
1 Nana, ko taku kupu tēnei ki a koe, e taku tama, nā, i te mea kāore koe i whakapākehā e rite nei ki tāu i hiahia mai nā i ahau, ā, i tīmata atu anō ki te tuhituhi mō taku pononga, a Hōhepa Mete, Tama.
2 Kātahi, nana, he tuhinga anō āku, nā, māku e tuku mana atu ki a koe e taea ai e koe te āwhina ki te whakapākehā.
3 Kia manawanui, e taku tama, he whaiwhakaaro hoki nōku, ā, kāore e tika pū ana kia whakapākehā koe i tēnei wā.
4 Nana, ko te mahi i karangatia nei koe hei mahi, arā, ko te tuhituhi mō taku pononga a Hōhepa.
5 Ā, nana, he kore nōu i mahi tonu i a koe e tīmata ana, i te wā i tīmata ai koe ki te whakapākehā, koinā au i tango atu i tēnei tikanga i a koe.
6 Kaua e amuamu, e taku tama, he whaiwhakaaro nōku i pēnei taku meatanga atu ki a koe i runga i tēnei āhuatanga.
7 Nana, kāore koe i mārama; kua whakaaro ake koe ka hoatu au i tērā ki a koe, ahakoa kāore i whakaarohia e koe hāunga tāu ui kau noa mai ki ahau.
8 Engari, nana, ko taku kupu tēnei ki a koe, nā, me āta whakaaro i roto i tōu hinengaro; kātahi ka ui mai ki ahau mehemea rānei he tika, ā, mehemea e tika ana ka mea au kia wera tō uma i roto i a koe; nō reira, ka rongo koe kei te tika tēnā.
9 Engari mehemea kāore i te tika e kore koe e rongo i ērā momo kare ā-roto, engari ka tau te pāhoahoa ki ōu whakaaro e meinga ai kia wareware koe ki te mea e hē ana; nō reira, tē taea e koe te tuhituhi i ērā mea e tapu ana hāunga noa kua hoatu ki a koe e ahau.
10 Nā, mehemea i mōhio koe ki tēnei kua āhei i a koe te whakapākehā; hei aha koa, kāore e tika pū ana i tēnei wā kia whakapākehā koe.
11 Nana, i tika pū ia i te wā i tīmata ai koe; engari i wehi koe, ā, kua pahemo atu te wā, ā, kāore e tika pū ana ināianei;
12 Nā, kāore koe e kite ana kua hoatu e au ki taku pononga, ki a Hōhepa he kaha e ranea ana, nā konā whakakapia ai? Ā, kāore au i whakahē i tētahi o kōrua.
13 Meatia tēnei mea kua whakahaua nei koe e au, ā, ka whaipai koe. Kia ū, ā, kaua e tuku ki te whakawaitanga.
14 Kia tū kaha koe i roto i te mahi i karangatia nei koe e ahau, ā, kāore te makawe kotahi i te māhunga e ngaro, ā, ka mairangatia ake koe hei te rā whakamutunga. Āmine.