Wāhanga 112
He whakakitenga mā roto i a Hōhepa Mete te Poropiti ki a Tamati P. Māhi, ki Katarana, Ohaio, Hūrae 23, 1837, e pā ana ki ngā Āpotoro Tekau Mā Rua a te Reme. I whakawhiwhia tēnei whakakitenga i te rā i kauhautia tuatahitia te rongopai e ngā Erata a Hipa T. Kimipara rāua ko Orihana Haiti ki Ingārangi. Ko Tamati P. Māti te Tumuaki o te Kōrama o ngā Āpotoro Tekau Mā Rua i tēnei wā.
1–10, Me tono e te Tekau Mā Rua te rongopai, ā, me whakaaraara ake te reo whakatūpato ki ngā whenua katoa me ngā tāngata katoa; 11–15, Me tango ake e rātou tō rātou rīpeka, me whai i a Ihu, me te whāngai i Ana hipi; 16–20, Ko te hunga e whiwhi i te Tumuakitanga Tuatahi te hunga e whiwhi i te Ariki; 21–29, Ka uhia te whenua ki te pōuritanga, ā, ka whakaorangia te hunga anake e whakapono ana, ā, e rumakina ana; 30–34, E pupuri ana te Tumuakitanga Tuatahi me te Tekau Mā Rua i ngā kī o te raneatanga o ngā wā.
1 He pono pēnei tā te Ariki ki a koe e taku pononga e Tamati: Kua rongo au i āu inoi; ā, kua ara ake āu mahi atawhai ki ahau hei whakamaharatanga i tōku aroaro mō āu teina i whiriwhiria ai ki te tuku whakaaturanga mō tōku ingoa me te tono atu i tēnā ki waenganui i ngā iwi, ngā hapū, ngā reo me ngā huihuinga tāngata, ā, kia whakamanangia mā roto i te whakahaeretanga o āu pononga.
2 He pono tāku e mea atu nei ki a koutou, kei roto ētahi mea i tō ngākau, ā, i a koe hoki kāore au, te Ariki, i āhuareka atu ki a koe.
3 Hei aha koa, ki te mea kua whakaiti koe i a koe anō ka whakateiteingia ake koe; nō reira, kua murua katoatia ō hara i a koe.
4 Tukua tō ngākau kia koa i mua i tōku mata; ā, māu e whakaatu mō tōku ingoa, ehara i te mea ki ngā Tauiwi anake, engari ki ngā Hūrae hoki; ā, māu taku kupu e tono atu ki ngā tōpito katoa o te ao.
5 Kia kaha koe, nō reira, i tēnā ata, i tēnā ata; ā, i tēnā rā, i tēnā rā, tukua atu te reo whakatūpato kia rere atu; ā, ina tau iho te pō kaua e tukua ngā tāngata o te whenua kia moe, he mea nā tō kōrero.
6 Tukua kia mōhiotia tō noho i Hīona, ā, kaua e nukuhia tō whare; nā te mea i a au, i te Ariki, tētahi mahi nui hei mahi māu, ki te whakaputa i tōku ingoa ki waenganui i ngā tamariki a te tangata.
7 Nō reira, kia whītikiria ake ō hope mō te mahi. Tukua ō waewae kia mau hū anō, nā te mea kua kōwhiria koe, ā, e takoto iho ana tō ara i roto i ngā maunga, ā, i roto i ngā iwi maha.
8 Ā, mā runga i tō reo ka whakaitia iho ngā mea teitei tokomaha ki raro, ā, mā runga i tō reo ka whakateiteingia ngā mea iti tokomaha.
9 Ko tō reo hei kohete ki te kaihara; ā, mā tō kohete e aukati te rere o te arero rukahu.
10 Kia whakaiti koe; ā, mā te Ariki tō Atua e ārahi i a koe ki te ringa, me te whakautu i ō inoi.
11 E mōhio ana au ki tō ngākau, ā, kua rangona ō inoi e pā ana ki ō teina. Kaua e rahi ake tō aroha ki ētahi i ētahi atu, engari tukua kia rite tō aroha ki a rātou ki tō aroha ki a koe anō; ā, tukua tō aroha ki ngā tāngata katoa, ā, ki te hunga katoa e aroha ana ki tōku ingoa.
12 Ā, kia inoi mō ō tuākana o te Tekau Mā Rua. Tohutohu kaha i a rātou mō tōku ingoa te take, ā, tukua kia kohetea rātou mō ō rātou hara katoa, ā, kia ū koe i mua i ahau i roto i tōku ingoa.
13 Ā whai muri iho i ō rātou whakawainga, me ngā whakapātaritari nui, nana, māku, mā te Ariki, e aroha atu ai ki a rātou, ā, ki te kore rātou e whakapakeke i ō rātou ngākau, ā, ki te kore hoki e whakamārō i ō rātou kakī ki ahau, ka whakatahuritia rātou, ā, māku rātou e mahu.
14 Ināianei, ko tāku e mea atu nei ki a koutou, ā, ko tāku e mea atu ai ki a koutou, e mea atu ai ki te Tekau Mā Rua katoa: e tū me te whītiki ake i ō hope, tangohia ake tō koutou rīpeka, whai mai i ahau, me te whāngai i aku hipi.
15 Kaua e whakateitei i a koutou anō; kaua e haututū ki taku pononga a Hōhepa; nā te mea he pono tāku e mea atu nei ki a koutou, kei tōna taha ahau, ā, kei runga tōku ringa i a ia; ā, ko ngā kī kua hoatu e au ki a ia, ki a koutou hoki, e kore e tangohia atu i a ia kia haere mai ai au.
16 He pono tāku e mea atu nei ki a koe, e taku pononga e Tamati, ko koe te tangata nāku i kōwhiri kia puritia ngā kī o tōku kīngitanga, e hāngai atu ana ki te Tekau Mā Rua, kei tāwāhi i waenganui i ngā iwi katoa—
17 Kia tū ai koe hei pononga māku e tūwhera ake ai te kuaha o te kīngitanga i ngā wāhi katoa kāore e taea e taku pononga e Hōhepa, me taku pononga a Hirini, me taku pononga a Hairama, tē haere mai;
18 Nā te mea kua utaina e au ki runga i a rātou te pīkaunga o ngā hāhi katoa mō tētahi wa poto.
19 Nā reira, ahakoa tonoa atu koe ki hea, me haere koe, ā, ka piri au ki a koe; ā, ki roto ki ngā wāhi katoa e whakapuakina ai e koe tōku ingoa ka whakatūwherahia ake tētahi kuaha ki a koe, e whiwhi ai rātou i taku kupu.
20 Ko te tangata e whiwhi i taku kupu te mea e whiwhi ai i ahau, ā, ko te tangata e whiwhi nei i ahau, e whiwhi i ērā, te Tumuakitanga Tuatahi, kua tonoa nei e Au, te hunga kua whakaritea nei e Au hei kairūnanga ki a koutou mō tōku ingoa te take.
21 Hei āpiti atu anō, ko tāku e mea atu nei ki a koutou, nā, ko te tangata e tonoa atu ai e koutou i runga i tōku ingoa, i runga i te reo o ō tuākana, te Tekau Mā Rua, e tino whakaaehia ana, e whakamanahia ana hoki e koutou, ka whai mana ki te whakatūwhera ake i te kuaha o tōku kīngitanga ki ngā iwi katoa ahakoa ki hea tonoa atu ai rātou—
22 Ki te mea ka whakaiti rātou i a ratou anō i mua i ahau, me te piri ki taku kupu, me te whakarongo ki te reo o taku Wairua.
23 He pono, he pono, tāku e mea atu nei ki a koutou, e uhia ana te whenua e te pōuritanga, ā, kua hipa te pōuritanga i ngā hinengaro o te iwi, ā, kua meinga ngā kikokiko katoa hei mea pokea i mua i tōku mata.
24 Nana, ka puta wawe mai te whiu ki runga i te hunga katoa e noho nei i runga i te whenua, tētahi rā riri, he rā tahunga, he rā whakamōtī, he rā tangi, he rā uhunga, ā, he rā auē; ā, anō nei he āwhiowhio ka tau iho ki runga i te mata katoa o te whenua, e ai tā te Ariki.
25 Ā, ka tīmata i runga i tōku whare, ā, atu i taku whare e puta atu ai ia, e ai tā te Ariki;
26 Ki mua tuatahi i te hunga kei waenganui i a koutou, e ai tā te Ariki, kua whakapuakina ake kia mōhio ki tōku ingoa engari kāore i mōhio ki ahau, ā, kua kohukohu ki ahau i te aroaro o tōku whare, e ai tā te Ariki.
27 Nō reira, tirohia kia kaua koutou e raru i a koutou anō e pā ana ki ngā take o tōku hāhi i tēnei wāhi, e ai tā te Ariki.
28 Engari whakamākia ō koutou ngākau i mua i ahau; kātahi ka haere koutou ki te ao whānui, me te kauhau i taku rongopai ki ngā mea katoa kāore anō kia whakawhiwhia;
29 Ā ka whakaorangia te tangata e whakapono ai, ā, e rumakina ai, engari ka pāpunihia te tangata e kore nei e whakapono ai, ā, e kore e rumakina ai.
30 Nā te mea ki a koutou, te Tekau Mā Rua, me taua hunga, te Tumuakitanga Tuatahi, kua whakaritea tahitia me koutou hei kairūnanga, hei kaiārahi mō koutou, ki reira tukuna atu ai te mana o te tohungatanga, mō ngā rā whakamutunga, ā, mō te wā whakamutunga, i konā te takiwā o te raneatanga o ngā wā,
31 Ko taua mana e puritia nei e koutou, e hono ana ki te hunga katoa kua whiwhi i tētahi takiwā i tētahi wā mai i te tīmatanga o te hanganga;
32 Nā te mea he pono tāku e mea atu nei ki a koutou, ko ngā kī o te takiwātanga, kua whiwhi nei koutou, he mea heke iho i ngā tūpuna, ā, ko te mea whakamutunga o te katoa, he mea tuku iho i te rangi ki a koutou.
33 He pono tāku e mea atu nei ki a koutou, nana anō te nui o tō koutou karangatanga. Whakamākia ō koutou ngākau me ō koutou kāmana, kei tika te rapu i ngā toto o tēnei whakatipuranga i ō ringaringa.
34 Kia ū tae noa ki taku haerenga mai, nā te mea ka haere wawe mai au; ā, kei ahau tōku utu hei hoatutanga ki ngā tāngata katoa e rite ana ki ā rātou mahi. Ko au te Arepa me te Omeka. Āmine.