1. E whakapono ana matou ko nga kawanatanga he mea whakatu e te Atua hei painga mo te tangata, a e puritia ana e ia nga tangata hei whakautu mo a ratou mahi e pa ana ki a ratou ano, ahakoa i te mahinga ture, i te whakarerenga ranei i nga ture, hei painga, hei awhina i nga huihuinga tangata.

2. E whakapono ana matou, ara kahore he kawanatanga e kaha te tu i roto i te rangimarie, ki te kahore nga ture i hanga me te pupuri kia whiwhi ai ia tangata, ia tangata ki te tikanga here-kore o nga whakaaro, me te mana me te tikanga i runga i ena taunga, me te tiakanga i te ora.

3. E whakapono ana matou mo nga kawanatanga katoa e tika ana kia whai apiha me nga kai whakawa kia whakamahi i o ratou ture, a ko nga pera e whakahaere i te ture i runga i te tika me te pono, kia rapua, kia tautokotia e te reo o te iwi (me he mea he iwi kingi kore), ara ki ta te kingi e pai ai ranei.

4. E whakapono ana matou ko te karakia he mea whakarite na te Atua, a kei raro katoa nga tangata i a ia, ara i a ia anake mo te whakamahi i tera, ki te kahore o ratou whakaaro karakia e mea i a ratou kia takahia nga tikanga o etahi atu; engari kahore matou e whakapono ana ko nga ture tangata e ahei ana ki te hanga ture mo te karakia me te here i nga whakaaro o nga tangata; he whakarite ranei i nga tauira mo nga karakia; kia riria e te kai whakawa o te ture nga mahi he, engari kaua e here i te hinengaro; me riri i te he, engari kaua e pehi i te here-koretanga o te ngakau.

5. E whakapono ana matou kua takoto te tikanga kia tautoko nga tangata katoa i nga kawanatanga e noho nei ratou i reira, i te mea e tiakina ana ratou i roto i o ratou tikanga tuturu e nga ture o taua kawanatanga; a ko te tututanga he ahua kino mo nga tangata i raro nei i taua tiakanga, a e tika ana kia whakawhiu kia rite ki aua ahua; a ko nga kawanatanga katoa e ahei ana ki te hanga ture kia rite ki ta ratou e whakaaro ai hei painga mo te katoa, ahakoa ra me ata waiho te here-koretanga o te hinengaro.

6. E whakapono ana matou e tika ana kia whakahonoretia nga tangata i roto i o ratou turanga: ara nga kai whakahaere tikanga me nga kai whakawa kua whakatungia nei hei tiaki i te hunga hara-kore, me te whakawhiu i te hunga hara; me whakahonore, me tautoko nga tangata katoa i nga ture, ki te kahore hoki era kua kore he rangimarie me te noho pai i te kore ture, me te kino; ko nga ture tangata i whakaritea mo te whakatikatika i o tatou tikanga motuhake me nga tikanga o te iwi nui i waenganui i nga tangata tetahi ki tetahi, ko nga ture tapu he mea homai i te rangi, hei whakarite tauira mo te taha wairua, mo te whakapono me te karakia, he meatanga ma te tangata ki tona Kai-hanga.

7. E whakapono ana matou ko nga kai whakahaere tikanga, ko nga takiwa me nga kawanatanga e whai mana ana ki te hanga ture hei tiaki i nga tangata i roto i te whakamahinga o o ratou whakapono karakia; engari kahore matou e whakapono ana e whai mana ana ratou hei tango i tenei tikanga i nga tangata, hei whakahaere ranei i o ratou whakaaro, i te mea e tautokotia ana nga ture, a me he mea kahore aua whakaaro karakia e whakaputa ake ana i nga tikanga tutu.

8. E whakapono ana matou ko te mahinga i te hara me whiu kia rite ki tona ahua; a ko te kohuru, ko te tutu, te pahua, te tahae, me te takahi i te rangimarie, kia whiua katoatia kia rite ki a ratou ake ahua kino, me ta ratou mahi kino i waenganui i nga tangata, e aua ture o te kawanatanga i mahi ai taua he ki reira; mo te rangimarietanga o te katoa, e tika ana kia oho ake nga tangata katoa me te whakamahi i o ratou kaha ki te kawe mai i nga tangata hara ki nga ture pai kia whiua.

9. Kahore matou e whakapono ana e tika ana kia whakaurua nga tikanga karakia ki nga tikanga kawanatanga, a kia meinga tetahi o nga ropu karakia kia whakanuia, a ko tetahi e hereherea ana i roto i ona tikanga whaka-te-wairua, me nga tikanga o ona mema ano he tangata whenua kia whakakahoretia.

10. E whakapono ana matou e whai mana ana nga ropu karakia ki te mahi ki a ratou mema mo o ratou mahi he kia rite ki nga ture me nga whakariteritenga o aua ropu, me he mea taua whakariteritenga mo te tunga o taua mema; engari kahore matou e whakapono ana e whai mana ana nga ropu karakia ki te whakawa i nga tangata mo o ratou taonga, me te oranga, me te tango mai i a ratou nga taonga o tenei ao, me te whakapa i tetahi putake mate, ahakoa ki tona oranga, ki tona tinana ranei, kahore ano hoki e ahei ki te whakawhiu i a ratou ki tetahi mamae, heoi ano ko te tapahi atu i a ratou i to ratou ropu, me tango i to ratou tunga.

11. E whakapono ana matou e tika ana kia tono nga tangata ki te kawanatanga hei whakatika i nga mahi he ki a ratou, me nga mahi kino, i te mea e meatia ana te kino ki a ratou ake ano, ara ko te taha ki nga taonga me te ingoa pai e takahia ana, i nga wahi e tu ana nga ture hei tiaki i nga pera; otira e whakapono ana matou e tika ana nga tangata katoa kia tiaki i a ratou ano, me o ratou hoa, me nga taonga, me te kawanatanga, i nga tukinotanga, me nga takahanga i nga tangata katoa i nga wa e hiahiatia ana, a e kore e taea te tono ki nga ture, kia awhinatia.

12. E whakapono ana matou e tika ana kia kauwhautia te Rongo-pai ki nga iwi katoa o te whenua, he whakaoho i te hunga tika kia whakaora i a ratou ano i nga he o te ao. Engari kahore matou e whakapono ana e tika ana kia whakararuraru nga kai mahi te kauwhau ranei i te Rongo-pai, me te rumaki i a ratou i runga i te kore e whakaae o o ratou rangatira, te mea ranei i a ratou kia kaua ratou e pai ki o ratou tunga i tenei ora, a ma reira e pa mai ai te mate ki nga tangata; e whakapono ana matou ko nga whakararuraru pera kahore i te tika, a e kino ana ki te rangimarietanga o nga kawanatanga e tukua ana kia hereherea nga tangata i roto i te ponongatanga.