Wāhanga 73
He whakakitenga i hoatu ai ki a Hōhepa Mete te Poropiti rāua ko Hirini Rikitana, ki Hairama, Ohaio, Hanuere 10, 1832. Mai i te wāhi tōmua o tērā Tīhema, i te aro katoa atu te Poropiti rāua ko Hirini ki te mahi kauhau, ā, mā konei he nui ngā mea i whakatutukihia kia memeha atu ngā whakaaro kino i tupu ake ai ki te Hāhi (tirohia te kowae upoko ki wāhanga 71).
1–2, Me hono tonu atu te kauhautanga a ngā erata; 3–6, Me hono tonu atu tā Hōhepa Mete rāua ko Hirini Rikitana whakapākehātanga i te Paipera kia oti rā anō.
1 Nā, he pono, pēnei tā te Ariki, he tika pū anō i roto i ahau kia hono tonu tā rāua kauhautanga i te rongopai, i runga hoki i te akiaki ki ngā hāhi i roto i ngā rohe huri noa, tae noa atu ki te huihuinga whānui o te hāhi;
2 Kātahi, nana, ka whakamōhiotia atu ki a rātou, e te reo o te huihuinga whānui o te hāhi, ā rātou momo mīhana.
3 Nā, he pono tāku e mea atu nei ki a kōrua e aku pononga, e Hōhepa Mete, Tama., kōrua ko Hirini Rikitana, e ai tā te Ariki, he tika pū anō kia whakapākehā anō;
4 Ā, ki te mea e āhei ana te parakatihi, kia kauhau atu i roto i ngā rohe huri noa tae noa atu ki te huihuinga whānui o te hāhi; ā, hei muri iho i tērā kia hono tonu atu te mahi whakapākehātanga tae noa ki tana otinga.
5 Ā, tukua tēnei hei tauira ki ngā erata kia puta mai he māramatanga atu anō, pērā pū i te tuhituhinga.
6 Nā, kāore au e hoatu mea anō ki a kōrua i tēnei wā. Kia whītikina ake ō kōrua hope, ā, kia whaiwhakaaro. Koia anō. Āmine.