Wāhanga 46
He whakakitenga mā roto i a Hōhepa Mete te Poropiti ki te Hāhi, ki Katarana, Ohaio, Māehe 8, 1831. I tēnei wā tōmua o te Hāhi, kāore anō kia whakaritea tētahi mahere whakahaere whānui i ngā huinga o te Hāhi. Heoi anō, kua horapa haere te tikanga o te tūwhera i ngā tatau o ngā huinga hākarameta ki ngā mema anake me te hunga rānei e ako pono ana i te rongopai. Kei tēnei whakakitenga te hiahia o te Ariki e pā ana ki te whakahaere i ngā hui me Āna tohutohu mō te whainga atu me te mōhiotanga atu ki ngā takoha a te Wairua.
1–2, Me whakahaere e ngā erata ngā hui i runga i te ārahitanga a te Wairua Tapu; 3–6, Me kaua e pei atu i ngā kairapu i te pono mai i ngā hui hākarameta; 7–12, Uia te Atua, ā, rapua ngā takoha o te Wairua; 13–26, Kua whakarārangihia ētahi o ēnei takohatanga; 27–33, Kua hoatu ki ngā kaiārahi o te Hāhi he mana kia mōhio ai ki ngā takoha a te Wairua.
1 Whakarongo, E koutou ngā tāngata o taku hāhi; nā te mea he pono tāku e mea atu nei ki a koutou, nā, kua kōrerohia atu ēnei mea ki a koutou hei painga, hei akoranga mō koutou.
2 Engari ahakoa aua mea kua tuhia nei, kua hoatu i ngā wā katoa ki ngā erata o taku hāhi mai i te tīmatanga, ā, ka pērā tonu atu, kia whakahaerehia ngā hui katoa kia rite ki tā te Wairua Tapu ārahitanga i a rātou.
3 Hei aha koa e whakahaua ana koutou kia kaua rawa e pei atu i tētahi i ā koutou hui tūmatawhānui, e whakatūria ai i mua i te ao.
4 E whakahaua ana anō hoki koutou kia kaua e pei atu i tētahi nō te hāhi i ā koutou huinga hākarameta; heoi, mehemea kua hara tētahi, kaua e tukuna ia kia kai kia hohoungia te rongo o tana hara.
5 Hei āpiti anō tāku e mea atu nei ki a koutou, me kaua e pei atu i tētahi i ā koutou huinga hākarameta e rapu pono ana i te kīngitanga—e kōrero ana au e pā ana ki te hunga ehara nō te hāhi.
6 Hei āpiti anō tāku e mea atu nei ki a koutou, e pā ana ki ā koutou hui whakaū, mehemea i reira ētahi ehara nō te hāhi, e rapu pono nei i te kīngitanga, me kaua koutou e pei atu i a rātou.
7 Engari kua whakahaua koutou i roto i ngā mea katoa kia inoi atu ki te Atua, e hoatu noa ana; ā, ko tā te Wairua e whakaatu atu ai ki a koutou, he pai kē ki ahau kia meatia e koutou i runga i te tapu o te ngākau, e hīkoi tōtika ana i tōku aroaro, e whakaarohia ana te mutunga o tō koutou whakaoranga, e meatia ana ngā mea katoa i runga i te inoi me te whakawhetai, kia kaua koutou e whakapoapoangia e ngā wairua kino, e ngā akoranga rānei a ngā rēwera, e ngā whakahaunga rānei a te tangata; nā te mea nā te tangata ētahi, ā, nā ngā rēwera ētahi atu.
8 Nā reira, kia tūpato kei tinihangatia koutou; ā, whāia ponotia atu ngā takoha pai ake kia kore ai koutou e tinihangatia, e maumahara tonu ana ki te take i homai ai;
9 Nā, he pono tāku e mea atu nei ki a koutou, kua hoatu ērā hei painga mō te hunga e aroha ana ki ahau me te pupuri i aku whakahaunga katoa, me te tangata e whai ana kia pērā; kia riro ngā painga ki te hunga katoa e whai mai ai i ahau, e inoi mai ai rānei ki ahau, nā, e inoi mai ai ehara noa mō tētahi tohu kia whakangata i ō rātou hiahia o te kikokiko.
10 Hei āpiti anō, he pono tāku e mea atu nei ki a koutou, e hiahia ana ahau kia maumahara tonu koutou, me te pupuri katoa i roto i ō koutou hinengaro te tikanga o aua takoha, kua hoatu nei ki te hāhi.
11 Nā te mea ehara i te mea kua hoatu ngā takoha ki ngā tāngata katoa; nā te mea he maha ngā takoha, ā, kua hoatu ki ia tangata, ki ia tangata tētahi takoha e te Wairua o te Atua.
12 Kua hoatu tētahi ki ētahi, ā, kua hoatu tētahi atu ki ētahi, hei painga mō te katoa.
13 Kua hoatu ki ētahi e te Wairua Tapu kia mōhio ai ko Ihu Karaiti te Tama a te Atua, ā, i rīpekatia ia mō ngā hara o te ao.
14 Kua hoatu ki ētahi atu kia whakapono ki ā rātou kupu, kia whai oranga tonutanga anō hoki rātou ki te ū tonu i runga i te whakapono.
15 Hei āpiti anō, kua hoatu ki ētahi atu e te Wairua Tapu kia mōhio ai ngā rerekē o te whakahaeretanga, i te mea ka āhuareka anō ki taua Ariki anō, e ai ki tā te Ariki e pai ai, e hāngai atu ana ki ana whakaaroha e rite ana ki ngā āhuatanga o ngā tamariki a te tangata.
16 Hei āpiti anō, kua hoatu anō e te Wairua Tapu ki ētahi kia mōhio ai ngā rerekē o ngā whakamahinga, mehemea nā te Atua, kia hoatu ai ngā whakakitenga a te Wairua ki ia tangata, ki ia tangata hei painga mō konā.
17 Hei āpiti anō, he pono tāku e mea atu nei ki a koutou, kua hoatu ki ētahi, e te Wairua o te Atua, te kupu whai mātauranga.
18 Kua hoatu ki tētahi atu te kupu o te mōhiotanga, kia whakaakona ngā mea katoa kia mātau, ā, kia whai mōhiotanga.
19 Hei āpiti anō, kua hoatu ki ētahi te whakapono e whakaorangia ai;
20 Ā, kua hoatu ki ētahi atu he whakapono ki te whakaora.
21 Hei āpiti anō, kua hoatu ki ētahi kia whakamahia ngā merekara;
22 Ā, kua hoatu ki ētahi atu kia poropititia;
23 Ā, kua hoatu ki ētahi atu te mātauranga ki ngā wairua.
24 Hei āpiti anō, kua hoatu ki ētahi kia kōrero i ngā reo kē;
25 Ā, kua hoatu ki tētahi atu kia whakamāoritia ngā reo kē.
26 Ā, nā te Atua katoa ēnei takoha, hei painga mō ngā tamariki a te Atua.
27 Ā, e tika ana kia hoatu ki te pīhopa o te hāhi, me te hunga pērā e whakataua ai, e whakamanahia ai e te Atua kia mataara ai i runga i te hāhi, ā, kia tū hei erata ki te hāhi, kia mātau ai rātou ki aua takoha katoa kei puta tētahi ki waenganui i a koutou e whakapuaki ana engari ehara kau noa nā te Atua.
28 Ā, ka pahawa ake, nā, ko te tangata e inoi ake ai i runga i te Wairua, ka whiwhi i runga i te Wairua;
29 Kia hoatu ai ki ētahi kia whiwhi ki aua takohatanga katoa, kia ai he upoko, hei painga ia mō ngā mema katoa.
30 E hāngai ana tā te tangata e inoi ake ai i runga i te Wairua ki te hiahia a te Atua; nā reira kua meatia pū anō kia rite ki tāna e inoi ake ai.
31 Hei āpiti anō, ko taku kupu tēnei ki a koutou, me matua mahi ngā mea katoa i runga i te ingoa o te Karaiti, ahakoa he aha tāu e mea ai i runga i te Wairua;
32 Ā, me tuku whakawhetai ki te Atua i runga i te Wairua mō ngā manaakitanga katoa kua manaakitia koutou.
33 Ā, me mahi harakore tonu, me mahi tapu tonu e koutou i mua i tōku aroaro. Koia anō. Āmine.