Wāhanga 66
He whakakitenga mā roto i a Hōhepa Mete te Poropiti, ki Hairama, Ohaio, Oketopa 29, 1831. I inoi muna a Wiremu E. Makiririni ki te Ariki kia whakamōhiotia atu mā roto i te Poropiti te whakautu ki ngā pātai e rima, he mea kāore i whakamōhiotia ki a Hōhepa Mete. I runga i tā te tono a Makiririni, i inoi ake te Poropiti ki te Ariki kātahi ka whiwhi i tēnei whakakitenga.
1–4, Ko te raneatanga o te rongopai te kawenata mau tonu; 5–8, Ko tā ngā erata he kauhau, he whakaatu, ā, he kōrero tahi ki te iwi; 9–13, Mā te mahi minita pono e riro ai te taonga tuku iho o te oranga tonutanga.
1 Nana, pēnei tā te Ariki ki taku pononga a Wiremu E. Makiririni—Kua manaakitia koe i te mea kua tahuri atu koe i ō hē, ā, kua whiwhi ki aku mea pono, e ai tā te Ariki tō Kaihoko, te Kaiwhakaora o te ao, o te hunga pū anō e whakapono ana ki tōku ingoa.
2 He pono tāku e mea atu nei ki a koe, kua manaakitia koe mōu i whiwhi ki taku kawenata mau tonu, ko te raneatanga pū anō o tōku rongopai, kua tonoa atu ki ngā tamariki a te tangata, kia whai oranga rātou, ā, kia mea ai hei kairapu i ngā kororia e whakakitea atu ai i ngā rā o muri, pērā i te mea i tuhia ai e ngā poropiti me ngā āpōtoro i ngā rā onamata.
3 He pono tāku e mea atu nei ki a koe, e taku pononga e Wiremu, kua mā koe, engari ehara katoa; nō reira me rīpenetā, i aua mea ehara i te pai i taku tirohanga, e ai tā te Ariki, nā te mea ka whakakitea atu e te Ariki aua mea ki a koe.
4 Ināianei ā, he pono, māku, mā te Ariki, e whakakite atu ki a koe tāku e pai ai e pā ana ki a koe, he aha rānei tāku e pai ai e pā ana ki a koe.
5 Nana, he pono tāku e mea atu nei ki a koe, nā, ko taku hiahia kia whakapuaki atu koe i taku rongopai mai i tētahi whenua ki tētahi whenua, ā, mai i tētahi pā ki tētahi pā, āe rā, i ēnā rohe huri noa kāore anō kia whakapuakina.
6 Kaua e noho roa i tēnei wāhi; kaua e haere ake ki te whenua o Hīona ināianei; engari mehemea e taea ana te tuku atu, tukuna; ki te kore, kaua e māharahara ki ō rawa.
7 Haere ki ngā whenua whakaterāwhiti, me whakaatu ki ia wāhi, ki ia iwi, i roto hoki i ō rātou whare karakia, e kōrero tahi ana ki te iwi.
8 Tukua taku pononga a Hamuera H. Mete kia haere tahi me koe, ā, kaua e whakarērea ia, ā, tukuna āu tohutohu ki a ia; ā, ka meatia te tangata whakapono hei mea kaha i ngā wāhi katoa; ā, ka haere au, te Ariki me koe.
9 Whakapāngia atu ō ringaringa ki runga i te hunga māuiui, kia ora ai rātou. Kaua e hoki mai kia tonoa koe e au, e te Ariki. Kia manawanui i ngā whakamamaetanga. Uia, kātahi ka whiwhi; pātōtōngia, kātahi ka huakina ake ki a koe.
10 Kaua e whai kia pēhia. Whakarērea atu ngā mea kāore i te tika. Kaua e mahi puremu—he whakawainga kua whakararuraru nei i a koe.
11 Puritia ēnei kīanga, i te mea he pono hoki ēnei mea; ā, māu e whakanui tō tūranga, ā, ka panapana atu i ngā tāngata tokomaha ki Hīona me ngā waiata o te hari mau tonu ki runga ki ō rātou māhunga.
12 Kia ū tonu i ēnei mea tae atu ki te mutunga, ā, ka whiwhi koe ki te karauna o te oranga tonutanga ki te ringa katau o tōku matua, e kī tonu ana i te aroha noa me te pono.
13 He pono tā te Ariki tō Atua, tō Kaihoko, ko Ihu Karaiti pū anō. Āmine.