1. Whakarongo mai e koutou e te iwi o taku Hahi, e ai ta te Ariki, ta to koutou Atua, a e rongo ki te kupu a te Ariki mo te taha ki a koutou:

2. Ka puta wawe mai te Ariki ki tona temepara, te Ariki tera ia e haere mai ki runga ki te whenua me te kanga hei whakaritenga whakawa; ae ra ki runga ki nga iwi katoa kua wareware ki te Atua, a ki runga i nga iwi Atua-kore ki waenganui i a koutou.

3. No te mea ka meinga e ia tona ringa tapu kia huhu i nga kanohi o nga tauiwi katoa, a ko nga pito katoa o te whenua tera e kite i te whakaoranga a to ratou Atua.

4. No reira, whakatakatu i a koutou, whakatakatu e toku iwi, whakatapua koutou; huihuia koutou kia kotahi, e te iwi o toku Hahi ki runga ki te whenua o Hiona, koutou katoa, te hunga kihai i whakahaua kia ata noho.

5. Puta atu koutou i Papurona. Kia ma koutou e nga kai mau i nga oko o te Ariki.

6. Karangatia o koutou huihuinga karakia. Kia honohono te korero tetahi ki tetahi, a meinga nga tangata katoa kia karanga ake ki te ingoa o te Ariki;

7. A he pono taku e mea atu ano ki a koutou, kua tae mai te wa e puaki ai te reo o te Ariki ki a koutou. puta atu koutou i Papurona; huihuia mai koutou i waenganui i nga tauiwi, i nga hau e wha i tetahi pito o te rangi, puta noa i tetahi.

8. Tonoa atu nga kaumatua o toku Hahi ki nga iwi katoa o tawhiti mamao; ki runga i nga motu o te moana; tonoa atu ki nga whenua ke; karanga atu ki nga iwi katoa; tuatahi ki nga Tauiwi, a ki nga Hurai.

9. A nana, kia penei ta ratou karanga, a ko te reo o te Ariki ki nga iwi katoa: haere atu koutou ki te whenua o Hiona, kia meinga ai nga rohe o toku iwi kia nui, a ko ona Takiwa (Stakes) kia whakakahangia, a kia neke haere a Hiona ki nga wahi e taiawhio ana;

10. Ae ra, meinga te karanga kia puta atu ki nga iwi katoa: ara ake whakatika, haere atu ki te whakatau i te Tane marena hou; nana, kei te haere mai te Tane marena hou, haere atu koutou ki te whakatau i a ia. Whakariteritea koutou mo te ra nui o te Ariki.

11. Kia mataara rapea, no te mea kahore hoki koutou e mohio ki te ra, ki te haora.

12. No reira, meinga te Hunga Tapu kei roto nei ratou i nga Tauiwi kia rere ki Hiona.

13. A meinga te Hunga i mahue ki Huria, kia rere ki Hiruharama, ki nga maunga o te whare o te Ariki.

14. Puta atu koutou i roto i nga iwi, ae ra, i Papurona, i waenganui i nga kino, koia ra a Papurona wairua.

15. Otira, he pono, e ai ta te Ariki, kaua e hohoro ta koutou omanga, engari matua whakariteritea nga mea katoa; a ko ia e haere ana kaua e titiro whakamuri, kei puta ohorere mai he whakangaromanga ki runga i a ia.

16. Whakarongo, kia rongo koutou e nga hunga e noho ana i te whenua. Whakarongo ngatahi koutou e nga kaumatua o toku Hahi, a kia rongo i te reo o te Ariki, no te mea e karanga ana ia i nga tangata katoa, me tana whakahau i nga tangata katoa kia ripeneta;

17. No te mea, nana, kua tonoa e te Ariki, e te Atua, te anahera e karanga i waenganui o te rangi, e mea ana: Whakaritea e koutou te huarahi o te Ariki, whakatikaia ona ara, no te mea kua tata te haora o tona putanga mai,

18. Ina tu te Reme i runga i Maunga Hiona, me te kotahi rau e wha tekau ma wha mano kua tuhituhia nei te ingoa o tona Matua ki o ratou rae:

19. No reira, whakaritea koutou mo te haerenga mai o te Tane marena hou; puta atu koutou ki te whakatau i a ia,

20. No te mea tera ia e tu ki runga i Maunga Oriwa, ki runga i te moana marohirohi, ae ra ki runga i te hohonu, ki runga i nga motu o te moana, ki runga i te whenua o Hiona;

21. A ka puaki atu tona reo i Hiona, a ka korero mai ia i Hiruharama, a ka rangona tona reo i roto i nga iwi katoa,

22. A ko taua reo ano ko te reo o nga iwi maha, a ko te reo ranei o nga whatitiri e pakaru iho ai i nga maunga, a e kore nga raorao e kitea;

23. Ka whakahaua e ia te tino hohonutanga, a ka aia atu ki muri ki nga whenua o te nota, a ko nga moutere ka meinga hei whenua kotahi,

24. A ko te whenua o Hiruharama me te whenua o Hiona ka whakahokia ki o raua wahi ake, a ka rite ano te whenua ki tona ahua i nga ra i mua atu o tona wehenga.

25. A ko te Ariki, ae ra te Kai-whakaora ka tu i waenganui i tona iwi, a ka kingi i runga i nga kikokiko katoa.

26. A ko ratou ko te hunga i nga whenua o te nota, ka whakamohiotia i te aroaro o te Ariki, a ko o ratou poropiti ka rongo i tona reo, a ka kore e pupuri i a ratou ake, a ka patua e ratou nga kamaka, me nga haupapa ka tere atu i o ratou aroaro.

27. A ka whakaputaina ake he huarahi i waenganui o te hohonu.

28. Ko a ratou hoa riri ka hinga i a ratou,

29. A i nga wahi titohea ka pupu ake he puna wai i reira; a ko nga whenua maroke ka kore ake to ratou maroketanga.

30. A ka maua mai e ratou a ratou taonga nunui ki nga tamariki a Eperaima, a aku pononga.

31. A ko nga rohe o oku maunga tu tonu, ka tu wiriwiri i o ratou aroaro.

32. A ko reira ratou hinga ai ki raro, a ka karaunatia ki te kororia, ae ra, i roto i Hiona, e nga ringaringa o nga pononga o te Ariki, ae ra o nga tamariki a Eperaima;

33. A ka whakakiia ratou ki nga waiata o te hari mutunga-kore.

34. Nana, koia nei te manaakitanga o te Atua mau tonu ki runga i nga hapu o Iharaira, a ko nga manaakitanga papai rawa ki runga i te matenga o Eperaima me ona hoa.

35. A me ratou ano hoki o te hapu o Hura i muri i to ratou mamaetanga, ka whakatapua ki nga tapu i mua i te Ariki kia noho i tona aroaro, i te ra i te po mo ake, ake.

36. A nana, he pono, he pono e ai ta te Ariki, Tera enei mea e whakamohiotia i waenganui i a koutou e te hunga e noho ana i te whenua, kua tonoa e ahau taku anahera, kia rere i waenganui o te rangi, kei a ia te Rongo-pai mau tonu, kua puta nei ia ki etahi, a kua hoatu ki te tangata, tera nei e puta atu ki te tokomaha e noho ana i te whenua;

37. A e kauwhautia tenei Rongo-pai ki nga iwi katoa, ki nga hapu, ki nga reo, ki nga tangata.

38. A tera e haere atu nga pononga a te Atua e mea me te reo nui, Kia wehi ki te Atua, hoatu te kororia ki a ia, no te mea kua tae mai te haora o tana whakaritenga whakawa:

39. A koropiko atu ki a ia ki te kai hanga o te rangi me te whenua, te moana me nga puna wai,

40. E karanga ake ana ki te ingoa o te Ariki i te ao, i te po, e mea ana, Aue, haehaea e koe nga rangi kia heke iho ai koe ki raro nei, kia hinga iho ai i nga maunga i to aroaro.

41. A kia whakautua ki runga i o ratou maienga, no te mea ka rite te aroaro o te Ariki ki te ahi whakarewa e ka ana, ki te ahi e meinga ai nga wai kia koropupu.

42. Aue e te Ariki, me heke iho koe kia meinga ai tou ingoa kia mohiotia e ou hoa riri, a kia tu wiriwiri ai nga iwi i tou aroaro.

43. Ina meatia e koe nga mea whakarihariha—nga mea kahore nei e rapu ana ratou;

44. Ae, ina haere iho koe ki raro nei, a ka hinga iho nga maunga i tou aroaro, a ko reira koe tutaki ai i a ia e hari ana, e mahi tika ana, ki a ia e mahara ana ki a koe i roto i ou huarahi.

45. Mai o te timatanga o te ao kahore ano nga tangata i rongo, i rangona ranei e te taringa, kahore ano hoki te kanohi i kite noa, e te Atua, haunga koe, ano te nui o nga mea kua whakaritea e koe mona e tatari ana ki a koe.

46. A e ai te ki, Ko wai tenei e haere mai nei ki raro i te Atua i te rangi me nga kakahu kara; ae i nga wahi kahore ano i mohiotia, ka kakahuria ki tona kakahu kororia, e haere mai ana i roto i te nui o tona kaha?

47. A tera ia e mea, ko ahau tera i korero i roto i te tika; e kaha ana ki te whakaora.

48. A he whero te kakahu o te Ariki i tona putanga mai, a ko ona kakahu ka rite ki a ia e totoa nei i roto i te turanga waina,

49. A he tino nui te kororia o tona aroaro, a ka huna te ra i tona mata i a ia, a ka puritia atu e te marama tona marama; a ko nga whetu ka toremi i o ratou wahi;

50. A e rangona tona reo, a kua takahia e ahau anake taku takahanga waina, a kua maua mai te whakaritenga whakawa ki runga i nga iwi katoa; a kahore he mea i mahue ki a au;

51. A kua takahia ratou e ahau i taku riri, a kua takahia ratou e ahau ki raro i taku whakatakariri; a ko o ratou toto kua ruiruia e ahau ki runga i oku kakahu, a whakaparua iho oku kakahu katoa, no te mea ko te ra tenei o te rapunga utu i mau nei i roto i toku ngakau.

52. Nana, ko te tau a toku hokonga kua tae mai, a ka korerotia e ratou te aroha me te atawhai a to ratou Ariki, me nga mea katoa i whiwhi ai ratou e rite ana ki ona painga, e rite ana ki tona aroha me tona atawhai mo ake ake,

53. I roto i o ratou mamaetanga katoa, i mamae hoki ia. A na te anahera i noho nei i tona aroaro i whakaora i a ratou; a i roto i tona aroha me tona moteatea, hokona ana ratou e ia, a hapainga ana ratou, pikaua ana ratou katoa i nga ra onamata;

54. Ae, me Enoka ano hoki, me te hunga i a ia; me nga poropiti i mua atu i a ia; me Noa ano hoki, me ratou katoa i mua atu i a ia, me Mohi ano hoki, me te hunga o mua atu i a ia;

55. Mai i a Mohi ki a Iraia, mai i a Iraia ki a Hoani, i a te Karaiti nei ratou i tona aranga, me nga apotoro tapu, i a Aperahama, i Ihaka me Hakopa, tera e huihui ki te aroaro o te Reme.

56. A ko nga urupa o te Hunga Tapu tera e whakatuwheratia, a ka puta mai ratou, ka tu i te ringa matau o te Reme, ina tu ia i runga i Maunga Hiona, i runga i te pa tapu, te Hiruharama Hou, a ka waiata ratou i te waiata a te Reme, i te ao, i te po, mo ake, ake.

57. A ma tenei e meinga ai nga tangata hei tango i nga kororia meake whakakitea, a kua tukua mai e te Ariki te raneatanga o te Rongo-pai, me tona kawenata mau tonu, e maharatia ai i roto i te marama, i te nanukore,

58. Hei whakatu i te hunga ngoikore mo nga mea e puta mai ana i runga i te whenua, mo te tononga o te Ariki i te ra e whakapoauautia ai te hunga matau e te hunga ngoikore, a ka meinga te mea iti hei iwi kaha, a ma nga mea e rua e mea nga tekau mano kia oma atu;

59. A ma nga mea ngoikore o te whenua ta te Ariki e patu i nga iwi ki te kaha o tona Wairua.

60. A mo tenei take i hoatu ai enei whakahaunga; a kua whakahaua kia puritia enei i te ao i te ra e hoatu ai, heoi inaianei ka puta atu ki nga kikokiko katoa.

61. A e rite ana tenei ki nga mahara me nga whakaaro o te Ariki, te kai whakahaere i runga i nga kikokiko.

62. A ko ia e ripeneta ana, e whakatapu ana i a ia ano, ka hoatu ki a ia he oranga-tonutanga;

63. A ki runga i te hunga e kore e whakarongo ki te reo o te Ariki, ka tutuki te mea i tuhituhia e te Poropiti, e Mohi, ara me tapahi atu ratou ki waho o te iwi.

64. A ko te mea ano i tuhituhia e te Poropiti, e Maraki; Nana, kei te haere mai te ra ka rite tona ngiha ki te oumu, a ko te hunga whakakake katoa me te hunga katoa e mahi ana i te kino, ka rite ratou ki te kakau witi; a ka tahuna ratou e te ra meake nei puta e ai ta te Ariki o nga mano, a kore ake he manga, he pakiaka e mahue ki a ratou.

65. No reira, ko te whakautu tenei a te Ariki ki runga i a ratou:—

66. I te ra e haere atu ai ahau ki oku, a kahore he tangata i waenganui i a koutou i manako ki a au, a i aia atu koutou.

67. A i a au i karanga ano, kahore tetahi o koutou i whakahoki mai, a kore rawa toku ringa i whakapotoa mai, kia kore ai ahau e hoko, me toku kaha ranei hei whakaputa.

68. Nana, i taku riringa ka maroke te moana i a au, meinga ana e ahau nga awa hei koraha; haunga ana o ratou ika, a mate ana i te maroke.

69. Whakakakahuria ana e ahau nga rangi ki te pouri kerekere, a hanga ana e ahau he kahuata hei uhi mo ratou.

70. A ka whiwhi koutou i tenei i toku ringa,—ae, ka takoto koutou i roto i te pouri.

71. Nana, kahore tetahi hei whakaputa i a koutou, no te mea kahore koutou i whakarongo ki toku reo i a au i karanga mai ai ki a koutou i nga rangi; kahore koutou i whakapono ki aku pononga, i a ratou i tonoa atu ai ki a koutou, kihai koutou i manako ki a ratou.

72. No reira, i hiiritia ai e ratou te whakaaturanga me te herenga i te ture, a i tukua atu koutou ki tua o te pouritanga;

73. A ka haere enei ki roto ki waho o te pouritanga, ki te wahi o te tangihanga, me te aue, me te teteatanga o nga niho.

74. Nana, na te Ariki na to koutou Atua i korero. Amine.