Wāhanga 51
He whakakitenga mā roto i a Hōhepa Mete te Poropiti, ki Tamihana, Ohaio, Mei 20, 1831. I tēnei wā kua tīmata te taetaetanga mai a ngā Hunga Tapu e hūnuku ana i ngā whenua whakaterāwhiti ki Ohaio, ā, ka tika haere kia whakaritea he whakaritenga mō tā rātou noho mai. I te mea nō ngā pīhopa tēnei haepapa, i kimihia atu e Pīhopa Eruera Pātiri he tohutohu mō tēnei take, kātahi ka inoi ake te Poropiti ki te Ariki.
1–8, Kua whakataua a Eruera Pātiri kia tirohia iho ngā tūranga kaitiaki me ngā whenua; 9–12, Me mahi pono ngā Hunga Tapu, ā, me kaua e whakapai kanohi; 13–15, Me whai pātaka pīhopa, ā, me whakarite ngā whenua kia rite ki te ture a te Ariki; 16–20, Ka meinga a Ohaio hei kāinga noho poto.
1 Whakarongo mai ki ahau, e ai tā te Ariki tō koutou Atua, kātahi ka kōrero atu au ki taku pononga a Eruera Pātiri, me te tuku atu ki a ia he tohutohu; nā te mea e tika pū ana kia whiwhi tohutohu ia kia pēhea e whakarite ai i tēnei iwi.
2 Nā te mea e tika pū ana kia whakaritea rātou kia rite ki aku ture; ki te kore, ka hātepea atu rātou.
3 Nā reira, tukua taku pononga a Eruera Pātiri, me te hunga nāna nei i kōwhiri, e āhuareka ana au ki a rātou, kia whakatau atu ki tēnei iwi ngā wāhanga, tēnā tangata me tēnā tangata kia rite ki tana whānau, e rite ana anō ki ōna ake āhuatanga me ana hiahia me ana mea e hapa ana.
4 Ā, tukua taku pononga a Eruera Pātiri, ina whakatau atu tētahi wāhanga ki tētahi tangata, kia hoatu ki a ia tētahi tuhinga e mana ai tana whiwhinga ki taua wāhanga, kia puritia e ia, arā, ki tēnei mana pū anō me tēnei tukunga ihotanga i roto i te hāhi, tae noa ki te wā e hara ai ia, ā, e whakaarohia ai rānei e te reo o te hāhi kāore ia e tika ana kia noho tonu ki roto i te hāhi, e rite ana ki tā ngā ture me ngā kawenata o te hāhi.
5 Ā, ki te hara ia, ā, ki te kore e whakaarohia ana e tika ana kia noho tonu i roto i te hāhi, kua kore ia e whai mana ki te kereme i taua wāhanga kua whakatapua ki te pīhopa me te hunga hapa o taku hāhi; nō reira, e kore ia e pupuri tonu i taua takohatanga, engari ka whai mana noa iho ki te kereme i taua wāhanga kua tukuna atu ki a ia.
6 Ā pēnei te whakaūnga o ngā mea katoa, e rite ana ki ngā ture o te whenua.
7 Ā, tukua ērā mea nō tēnei iwi kia whakataua atu ki tēnei iwi.
8 Ā, ko te moni e toe ana ki tēnei iwi—tukua kia whakataua tētahi āpiha ki tēnei iwi, kia tīkina te moni hei tiki kai, hei tiki kākahu, e rite ana ki ngā hiahia o tēnei iwi.
9 Ā, tukua ia tangata kia mahi pono, kia taurite i roto i tēnei iwi, ā, kia kaua he whakapai kanohi, kia kotahi ai koutou, pērā pū anō i tāku i whakahau ai i a koutou.
10 Ā, tukua ērā mea nō tēnei iwi kia kaua e tangohia atu, ā, e hoatu hoki ki ērā nō tētahi atu hāhi.
11 Nā reira, mehemea ka whiwhi tētahi atu hāhi i ngā moni o tēnei hāhi, tukua rātou kia utua tēnei hāhi anō kia rite ki tā rātou e whakaae mai ai;
12 Ā, ka pēneitia mā roto i te pīhopa, i te āpiha rānei, e whakataua ai e te reo o te hāhi.
13 Hei āpiti anō, tukua te pīhopa kia whakaritea tētahi pātaka mō tēnei hāhi; ā, tukua ngā mea katoa ahakoa he moni, he mīti rānei, arā, ngā mea e nui atu ana i ērā mea e tika ana mō tēnei iwi, kia purua atu ki roto ki ngā ringaringa o te pīhopa.
14 Ā, tukua ia hoki kia rāhuitia atu mōna anō, ā, mō ngā hiahia hoki o tōna whānau, i te mea ka utua ia mō tēnei mahi.
15 Ā pēnei tuku atu au ki tēnei iwi tētahi honore kia whakaritea rātou anō e rite ana ki aku ture.
16 Ā, kei te whakatapu au i tēnei whenua ki a rātou mō tētahi wā poto, kia whakaritea e au, e te Ariki, tētahi atu wāhi mō rātou, me te whakahau atu ki a rātou kia haere atu;
17 Ā, kāore anō kia hoatu te hāora me te rā ki a rātou, nā reira tukua rātou kia noho i runga i tēnei whenua me te mea nei mō ngā tau maha, ā, ka meinga tēnei hei painga mō rātou.
18 Nana, ka meinga tēnei hei tauira ki taku pononga a Eruera Pātiri, i ērā atu wāhi, i roto i ngā peka katoa.
19 Ā, ko te tangata e kitea ana he kaitiaki pono, he kaitiaki tika, ā, he kaitiaki whaiwhakaaro hoki, ko ia e kuhu ai ki roto i te haringa o tōna Ariki, ā, ka whiwhi i te oranga tonutanga.
20 He pono tāku e mea atu nei ki a koutou, ko Ihu Karaiti au, te mea e haere wawe mai ana, i tētahi hāora e kore nei e mōhiotia. Koia anō. Āmine.