1. Nana, taku ki tenei ki a koe, tenei te matauranga, ma reira nei koe e ahei ai te mahi mo te taha ki tenei mea, no te mea he mohiotanga tenei no roto ake i a au mo tenei Takiwa kua wehea e ahau mo te kaha o Hiona kia meinga kia kaha;

2. No reira me tuku ma taku pononga, ma Ahata (Nuera K. Witini) e tiaki i taua wahi kua whakaingoatia na i waenganui i a koutou kei runga na taku tutohutanga kia hanga toku whare tapu;

3. A tenei ano, me tuku kia wawahia ki nga roherohenga kia rite ki te matauranga, hei painga ki te hunga e rapu ana i te kainga tuturu, a me whakariterite i roto i to koutou runanga i waenganui i a koutou.

4. No reira, kia tupato, kia titiro koe ki tenei take, a ko taua wahanga hei painga mo taku ritenga, mo te tikanga o te whakaputanga mai i taku kupu ki nga tamariki a nga tangata;

5. No te mea nana, he pono taku e mea atu nei ki a koe, koia te mea nui i roto i a au, ko taku kupu me haere atu ki nga tamariki a nga tangata mo te mahi whakangohengohe i nga ngakau o nga tamariki a nga tangata mo to koutou painga. Koia ano. Amine.

6. Tenei ano, he pono taku e mea atu ki a koe, he matauranga, he whakaaro nui i roto i a au, mo taku pononga mo Homopere (Hoani Teonehana) tana hoatutanga kua manakohia e ahau me ana inoi kua rangona e ahau, ki a ia ano i hoatu e ahau he kupu whakaari mo te oranga-tonutanga ina u ia ki te pupuri i aku whakahaunga atu ano i tenei wa,

7. No te mea he uri ia no Heta, (Hohepa), he kai tango i nga manaakitanga o nga kupu whakaari ki ona matua.

8. He pono taku e mea atu nei ki a koe, he tino mahara i roto i a au kia uru ia he mema mo taua ritenga, kia ahei ai ia te whakapiki ki te whakaputanga mai i aku kupu ki nga tamariki a nga tangata;

9. No reira me whakarite koe i a ia ki tenei manaakitanga, kia ahei ai ia te rapu marie i nga taumahatanga e tau ana ki runga ki te whare kua whakaingoatia ra i waenganui i a koutou, kia ahei ai te noho i reira, Koia ano tenei. Amine.