1. Na, i te mea kua whakakitea mai e te Atua ki a au, kei te whai oku hoa riri katoa, i Mihuri i tenei Takiwa hoki, kia mau ahau i a ratou; a i te mea kahore he take e whaia ai ahau e ratou, kahore hoki he pono, he atarangi ranei o te tika i to ratou taha i roto i ta ratou whakapae ki a au; a i te mea ko a ratou take katoa e whakapae nei ki a au he mea tito katoa, ko te matapuna ko te teka pango hakerekereke; no reira, ka whakaari ahau he mea pai kia wehe atu ahau i konei mo tetahi wa poto, kia ora ai ahau, kia ora ai hoki te iwi. Na, e hiahia ana ahau kia mohio te hunga katoa e whai take ana ki a au, kua whakaritea e ahau etahi tangata hei kai whakahaere moku, ma ratou te taha ki a au e whakahaere, e whakaoti oku raruraru, ma ratou e whakaea aku nama katoa i te wa e tika ana, e whakaea ki te taonga ki tetahi mea ranei e tika ana. Ina tae ake te kupu ki a au kua mutu te tupuhi, kua tau te aio, ko reira ahau hoki mai ai ano ki a koutou.

2. Na, ko nga mamaetanga, ko nga pouritanga kua karangatia nei ahau kia hou ma reira, he mea paku noa iho ki a au, no te mea kua taungatia ki a au te hae, te riri a te tangata, kua kite hoki au i taua ahua i nga ra katoa o toku oranga; he aha ranei te take i peratia ai ahau kahore ahau i te mohio, ano te ahua he mea whakarite ahau mo te pai ranei, mo te kino ranei, aua, ma koutou e whakatau. Ko te Atua kei te mohio ki enei mea katoa, ahakoa pai, ahakoa kino. He ahakoa ra, ko te ahua, ka kau tonu ahau i roto i nga wai hohonu. Kua kore noa iho ahau e ohooho ano nei te ahua ko nga pouritanga he wahi no taku tinana, a e rite ana ahau ki a Paora, ara e whakakororia ana i roto i nga mamae, no te mea tae mai ki tenei ra kei te whakaputa tonu te Atua o oku inatua i a au ki waho i nga pouritanga katoa, a ka haere tonu tana mahi whakaora i a au; no te mea, nana, ka whai wikitoria ahau ki runga i oku hoa riri, na te Ariki, na te Atua te kupu.

3. No reira, kia hari te Hunga Tapu katoa, kia nui te koa, no te mea, ko te Atua o Iharaira to ratou Atua, ka hoatu hoki e ia te utu tika ki runga i nga matenga o o ratou kai whiu.

4. Nana, he pono ko te kupu tenei a te Ariki, me haere tonu te hanganga o toku temepara, me era atu o nga mahi kua whakaritea e ahau, kaua ano e whakamutua; na kia nuku ake to koutou kaha, to koutou u, to koutou manawanui, a koutou mahi, a e kore koutou e hapa i te utu mo koutou, e ai ta te Ariki o nga mano. Ki te tukinotia koutou e ratou, kia mohio i tukino ano ratou i nga poropiti, i te hunga tika hoki i mua i a koutou. Mo enei mea katoa he utu kei te rangi.

5. Na, ka whai kupu ahau ki a koutou mo runga i te rumakanga o o koutou tupapaku.

6. He pono, ko te kupu tenei a te Ariki ki a koutou mo o koutou tupapaku: ina rumakina tetahi o koutou mo o koutou tupapaku, kia noho rawa tetahi kai tuhituhi, hei kai whakaatu, ae i kite-a-kanohi ia i a koutou rumakanga; kia rongo rawa hoki ona taringa, kia riro ai ia hei kai whakaatu mo te mea pono, e ai ta te Ariki;

7. Ko te take i roto i a koutou tuhituhinga kia tuhituhia hoki ki te rangi; ko ta koutou hoki e hiiri ai i te whenua e hiiritia i te rangi; ko ta koutou e wewete ai i te whenua, e wetekia i te rangi;

8. Ka tata hoki ahau te whakahoki mai ki te whenua i nga mea maha e pa ana ki te Tohungatanga, e ai ta te Ariki o nga mano.

9. Kia pai ano te whakawhaiti i nga tuhituhinga, kia pai ai te hoatu ki roto i nga takotoranga pukapuka o toku Temepara tapu, kia puritia ai hei whakamaharatanga i tenei whakatupuranga, i tenei whakatupuranga, e ai ta te Ariki o nga mano.

10. E mea atu ana ahau ki te Hunga Tapu katoa, kei te hiahia ahau, ae e tino nui ana taku hiahia kia korero ki a ratou i runga i te paparewa, i te Ra Tapu e heke iho nei, mo te rumakanga o te hunga mate. Otira i te mea e kore e taea e au, me tuhituhi atu e ahau i tenei iwa, i tenei wa te kupu a te Ariki, mo taua take, ka tuku atu ai ki a koutou, me era atu take maha hoki.

11. Ka whakamutua e ahau taku reta mo tenei wa, i te kore taima ano; kei te mataara tonu hoki te hoa riri, a pera ano me ta te Kai-whakaora i mea ra, kei te haere mai te piriniha o tenei ao, otira kahore ana mea i roto i a au.

12. Nana, ko taku inoi ki te Atua, kia whakaorangia koutou katoa. A ka tuhi iho ahau i toku ingoa ko to koutou pononga i roto i te Ariki, ko te Poropiti, ko te Matakite o te Hahi o Ihu Karaiti o te Hunga Tapu o nga Ra o Muri nei.